38
Iswatxꞌen naj Bezaleel mexha yet xahanbꞌal bꞌay chinhuslax no noqꞌ yinh xahanbꞌalil tet Komam Dios. Haꞌ teꞌ acacia yako naj yinh. Lahan ismalil istelbꞌal yebꞌ satbꞌal tuꞌ, kabꞌ metro yok 35 (holanhebꞌ iskawinaj) centímetro ismalil; yebꞌ xin huneꞌ metro yok 35 (holanhebꞌ iskawinaj) centímetro yukanh istel. 2 Iswatxꞌelax kanhebꞌ yukꞌaꞌ mexha tuꞌ, hunun yukꞌaꞌ yinh hunun istxikin, hun xin yu iswatxꞌelax yebꞌ teꞌ mexha, yuxin machi isxijil oki; teꞌ mexha tuꞌ yebꞌ yukꞌaꞌ, bronce chꞌen ok yinh. 3 Iswatxꞌenpaxo naj chꞌen munlabꞌal chiꞌokniko yinh ismexhahil yet xahanbꞌal tuꞌ; chꞌen net bꞌay chiꞌayto tanh, chꞌen tenaza, chꞌen nime sekꞌ, yebꞌ chꞌen isnet tzaqꞌaqꞌ, chꞌen pala; sunil hunteqꞌan munlabꞌal tuꞌ, bronce chꞌen oknikoj. 4 Iswatxꞌelaxpaxiko huneꞌ istxayibꞌal istiꞌlaa mexha tuꞌ, bronce chꞌen oknikoj, yalanh istiꞌ ismexhahil yet xahanbꞌal tuꞌ alaxikoj yinh yiktabꞌal istel. 5 Iswatxꞌenpaxo naj kanhebꞌ chꞌen argolla bronce, petpet yehi, yok chꞌen yinh hunun istxikin bꞌay ay istxayibꞌal ismexhahil xahanbꞌal tuꞌ, haꞌ yul chꞌen tuꞌ chiꞌelto te teꞌ chibꞌatxnikanh ismexhahil yet xahanbꞌal. 6 Lahwi tuꞌ xin, iswatxꞌenpaxo naj te teꞌ yinh isteꞌal teꞌ acacia, teꞌ chibꞌatxnikanh ismexhahil yet xahanbꞌal tuꞌ, yaniko naj chꞌen bronce yinh teꞌ. 7 Yanikto naj teꞌ yul chꞌen bronce petan yehi ayko yinhla istxikin ismexhahil yet xahanbꞌal tuꞌ, yunhe isbꞌatxlaxikꞌoj. Huneꞌ mexha yet xahanbꞌal tuꞌ holan yukano yul, watxꞌebꞌil yinh teꞌ aqꞌinteꞌ.8 Iswatxꞌe naj huneꞌ pechꞌan yebꞌ yoj pechꞌan yinh chꞌen bronce. Chꞌen bꞌay chil sat ebꞌix ix chimunla yul ispultahil Yatut Komam,b bꞌay chiskutxbꞌa isbꞌa anma, haꞌ ebꞌix xin sahni chꞌen tet Komam.c
Yamaqꞌil Yatut Komam Dios
9 Iswatxꞌenpaxo naj yamaqꞌil Yatut Komam Dios, haꞌ yinh yetkꞌulal sur yinh chuman, haꞌ bꞌey tuꞌ xin 45 (howebꞌ yoxkꞌal) metro istelbꞌal qꞌap cortina oki, haꞌ qꞌap tuꞌ, yinh qꞌap lino bꞌatxꞌobꞌil watxꞌi qꞌap. 10 Istzꞌunlaxayo 20 (hunkꞌal) yoyal qꞌap, yebꞌ 20 (hunkꞌal) isxeꞌal bronce; iswatxꞌelaxpaxo isganchohal teꞌ yebꞌ isjolqꞌabꞌil, yajaꞌ plata. 11 Haxa yinh yetkꞌulal norte yinh yamaqꞌil Yatut Komam tuꞌ 45 (howebꞌ yoxkꞌal) metro yepaxiko istelbꞌal qꞌap cortina oki, iswatxꞌelaxayo 20 (hunkꞌal) yoyal nabꞌa bronce; iswatxꞌelaxpaxo isganchohal yebꞌ isjolqꞌabꞌil, yajaꞌ plata oknikoj. 12 Haxa yinh yetkꞌulal bꞌay chito tzꞌayik, 22 (kabꞌ iskawinaj) metro qꞌap cortina oki; 10 (lahonhebꞌ) xin yoyal yebꞌ 10 (lahonhebꞌ) base bꞌay chitzꞌonhi teꞌ oy tuꞌ. Iswatxꞌelaxpaxo isganchohal yebꞌ isjolqꞌabꞌil, yajaꞌ plata chꞌen oki. 13 Haxa yinh yetkꞌulal bꞌay chiꞌahilo tzꞌayik 22 (kabꞌ iskawinaj) metro yok yiktaxa istelbꞌal qꞌap cortina oki. 14 Haꞌ isqꞌaxepal istiꞌ bꞌay chonhoknapnoj, 7 (hujebꞌ) metro istelbꞌal qꞌap oki, oxebꞌ xin yoyal, yebꞌ oxebꞌ isxeꞌal oy tuꞌ. 15 Haxa hunxa isqꞌaxepal istiꞌ xin, 7 (hujebꞌ) metro istelbꞌal qꞌap ok yinh, oxebꞌ xin yoyal yebꞌ oxebꞌ isxeꞌ bꞌay chitzꞌonhi teꞌ oy tuꞌ. 16 Sunil qꞌap cortina, hoyaniko yinh yamaqꞌil Yatut Komam Dios tuꞌ, yinh qꞌap lino bꞌatxꞌobꞌil watxꞌelax qꞌap. 17 Wal sunil isxeꞌ teꞌ oy tuꞌ, bronce chꞌen, haxa isganchohal yebꞌ isjolqꞌabꞌil istiꞌla teꞌ plata chꞌen; aypaxiko chꞌen plata yinh iswiꞌ teꞌ oy tuꞌ. Sunil teꞌ oy hoyaniko yinh yamaqꞌil Yatut Komam, ayko isjolqꞌabꞌil yelawil iswiꞌ teꞌ, plata chꞌen ayko yinh.
18 Haxa qꞌap qꞌap ayko yinh ispultahil yamaqꞌil Yatut Komam tuꞌ, watxꞌebꞌiliko qꞌap qꞌap yax, qꞌap kajmutzꞌmunhe, qꞌap kaj jilni, yebꞌ qꞌap lino bꞌatxꞌobꞌil. Qꞌap tuꞌ xin, 9 (bꞌahonhebꞌ) metro yeko istel sat qꞌap, kabꞌ metro yok 25 (howebꞌ iskawinaj) centímetro yekanh istel yoj qꞌap; lahan ismalil qꞌap hakaꞌ sunil qꞌap ayko yinh yamaqꞌil Yatut Komam. 19 Ayko kanhebꞌ yoyal qꞌap yebꞌ kanhebꞌ xeꞌ bronce; hakpax tuꞌ isganchohal yebꞌ isjolqꞌabꞌil aykoj, plata chꞌen. Aypaxiko chꞌen plata yinh iswiꞌ teꞌ oy tuꞌ. 20 Sunil yestakahil Yatut Komam hoyanikoj, yebꞌ yestakahil yamaqꞌil, broncenhe chꞌen.
Ebꞌnaj ijbꞌalom yinh munil
21 Ischejni yaꞌ Moisés ta chiwatxꞌelax islistahil hanta tzet chꞌokniko yinh iswatxꞌebꞌanil Yatut Komam bꞌay chikꞌuhi isKaxhahil Istrato Komam. Haꞌ ebꞌnaj levita watxꞌen istxolal yinh tzetaj yet tuꞌ chꞌoknikoj haꞌ xin naj Itamar, iskꞌahol yaꞌ Aarón, haꞌ ijbꞌan ebꞌnaj levita tuꞌ.
22 Haꞌ xin naj Bezaleel, iskꞌahol naj Uri, watxꞌen sunil tzet ischej Komam Dios tet yaꞌ Moisés. Haxa ismam icham naj Bezaleel haꞌ ton naj Hur, yikꞌal yaꞌ Judá. 23 Kolwapaxo naj Aholiab yinh munil tuꞌ, naj iskꞌahol naj Ahisamac yikꞌal naj Dan. Naj Aholiab tuꞌ, chakꞌom chꞌen naj, chemlompaxo naj, chapaxiko naj yelawil qꞌap yax qꞌap, qꞌap kajmutzꞌmunhe, yebꞌ qꞌap kaj, yebꞌ qꞌap lino kaw kꞌul.
Chꞌen chꞌen okniko yinh Yatut Komam Dios
24 Sunil chꞌen oro ok yinh Yatut Komam Dios, haꞌ ton chꞌen yaqꞌ anma Israel issabꞌehal tet Komam, 21 (hun iskawinaj) quintal yok 95 (holanhebꞌ ishokꞌal) libra yalil chꞌen oro tuꞌ, hakaꞌtikꞌa yalil chꞌen peso aqꞌlax yul Yatut Komam.
25 Haxa chꞌen plata kutxbꞌalaxayo yet yilaxkanh isbꞌisil anma Israel tuꞌ; 75 (holanhebꞌ iskanhwinaj) quintal yebꞌ kabꞌ arroba yalil chꞌen plata tuꞌ, hakaꞌ yalil chꞌen peso aqꞌlax yul Yatut Komam Dios. 26 Sunil ebꞌnaj winaj tzꞌajanxa yinh ishabꞌilal, ebꞌnaj ekꞌbꞌalxa yinh 20 (hunkꞌal) habꞌil, 603,550 isbꞌisil ebꞌnaj yinh sunil. Yikta iswaj gramo chꞌen plata yaqꞌ hunun ebꞌnaj, hakaꞌ yalil chꞌen peso aqꞌlax yul Yatut Komam. 27 Haꞌ ismalil chꞌen plata ok isxeꞌal bꞌay tzꞌonhi teꞌ aqꞌinteꞌ ok yicho Yatut Komam, yebꞌ xeꞌal yoyalo qꞌap qꞌap, 75 (howebꞌ iskanhwinaj) quintal yalil chꞌen. Sunil chꞌen plata tuꞌ okniko yinh 100 (hokꞌal) isxeꞌal teꞌ oy yinh sunil, yuxin 75 (howebꞌ iskawinaj) libra chꞌen plata ok xeꞌo hunun teꞌ oy. 28 Haxa yinh kabꞌ arrobaxa chꞌen plata tuꞌ, iswatxꞌe naj Bezaleel chꞌen gancho ok yinh teꞌ oy yebꞌ chꞌen ok yibꞌanh iswiꞌ teꞌ, yebꞌ chꞌen ok yinh chꞌen petpet yehi.
29 Haxa chꞌen bronce kutxbꞌalaxi, chꞌen aqꞌlax sabꞌehal tet Komam Dios, apni yalil chꞌen yinh 53 (oxlanhebꞌ yoxkꞌal) quintal yok 10 (lahonhebꞌxa) libra. 30 Haꞌ yinh chꞌen bronce kutxbꞌalaxkanh tuꞌ, watxꞌelax xeꞌalo ispultahil Yatut Komam, huneꞌ yatut bꞌay chiskutxbꞌa isbꞌa anma Israel. Yinh chꞌen xin, watxꞌelaxpaxo ismexhahil yet xahanbꞌal yebꞌ istxayibꞌal yelawil ismexhahil tuꞌ, yebꞌ sunil chꞌen munlabꞌal chiꞌokniko yinh ismexhahil yet xahanbꞌal. 31 Haꞌ chꞌen bronce tuꞌ okpaxo yinh xeꞌaloj yoyal Yatut Komam yinh ishoyanil, yebꞌpaxo xeꞌalo ispultahil yamaqꞌil Yatut Komam; sunil yestakahil Yatut Komam yebꞌ yestakahil ishoyanil yamaqꞌil Yatut Komam, bronce chꞌen oknikoj.