Huneꞌ mexha bronce yet xahanbꞌal
27
Yalnipaxo Komam Dios tet yaꞌ Moisés: «Chewatxꞌepaxo huneꞌ ismexhahil yet xahanbꞌal yajaꞌ teꞌ acacia cheyakoj, lahannhe chu ismalil iskanhebꞌal ispakꞌul teꞌ, kabꞌ metro yok 25 (howebꞌ iskawinaj) centímetro chu ismalil hunun ispakꞌul teꞌ, yebꞌ huneꞌ metro yok 35 (holanhebꞌ iskawinaj) centímetroa chukanh istel. 2 Kat heyaniko kanhebꞌ yukꞌaꞌ huneꞌ mexha yet xahanbꞌal tuꞌ, hunun yukꞌaꞌ yinh hunun istxikin, yukꞌaꞌ tuꞌ huneꞌnhe chu yebꞌ mexha yet xahanbꞌal; kat heyaniko chꞌen bronce yinh sunil. 3 Kat hewatxꞌenpaxo munlabꞌal chiꞌokniko yinh xahanbꞌal, chewatxꞌen huneꞌ net bꞌay chikutxbꞌalaxkanh tanh yebꞌ chꞌen pala, yebꞌ chꞌen nime sekꞌ bꞌay chiꞌalaxayto ischikꞌil no noqꞌ, yebꞌ chꞌen tenaza chimeltzon noꞌ chibꞌe, yebꞌ chꞌen net bꞌay chiꞌay tzaqꞌaqꞌ, sunil hunteqꞌan munlabꞌal tiꞌ, broncenhe chꞌen chiꞌok yinh. 4 Kat hewatxꞌenpaxo istxayibꞌal, bronce chꞌen cheyakoj, kat heyanipaxiko kanhebꞌ chꞌen argolla bronce petpet yehi yinhla iskanhebꞌal istxikin txayebꞌal tuꞌ. 5 Kat heyaniko txayibꞌ tuꞌ yalanh istiꞌ ismexhahil yet xahanbꞌal yunhe iskankano yiktabꞌanil yoj ismexhahil tuꞌ. 6 Kat hewatxꞌenpaxo te teꞌ, teꞌ acacia, chibꞌatxnikanh ismexhahil tuꞌ, kat heyanipaxiko chꞌen bronce yinh teꞌ. 7 Haꞌ te teꞌ tuꞌ chiꞌekꞌto teꞌ yul isholanil chꞌen argolla yinh qꞌaxqꞌep iskꞌul ismexhahil xahanbꞌal, yunhe chiyu isbꞌatxlaxikꞌoj. 8 Chewatxꞌe isholanil teꞌ aqꞌinteꞌ, kaw hakaꞌtikꞌa yechel hawil yinh iswiꞌ witz, hak tuꞌ chawute,» xhi Komam tet yaꞌ Moisés.Yamaqꞌil Yatut Komam Dios
9 Yalnipaxo Komam: «Chewatxꞌepaxo amaqꞌ yinhla ishoyanil watuttuꞌan, kat hemajchenayoj. Yinh yetkꞌulal sur, cheyako qꞌap cortina watxꞌebꞌil yinh qꞌap lino chembꞌil yinh, kat hakꞌalniko qꞌap, 45 (howebꞌ yoxkꞌal) metro chuko isqꞌatanil qꞌap. 10 Kat heyaniko 20 (hunkꞌal) yoyal qꞌap yibꞌanh 20 (hunkꞌal) chꞌen bronce, kat hewatxꞌenpaxo isganchohal, plata chꞌen cheyakoj, petkixhtanhe cheyute. 11 Hakpax tuꞌ xin yinh yetkꞌulal yinh norte, chemajchepaxayo yu qꞌap cortina, 45 (howebꞌ yoxkꞌal) metro chuko istel, kat heyaniko 20 (hunkꞌal) yoyal qꞌap yibꞌanh 20 (hunkꞌal) chꞌen bronce chitzꞌonhi, kat hewatxꞌen isganchohal yebꞌ yalawil iswiꞌ tuꞌ, chꞌen plata cheyako yinh.
12 »Haxa yamaqꞌil xin yinh yetkꞌulal bꞌay chito tzꞌayik, cheyapaxiko qꞌap cortina, 22 (kabꞌ iskawinaj) metro yok yiktaxa chuko istel, kat heyanayo 10 (lahonhebꞌ) yoyal yebꞌ 10 (lahonhebꞌ) bꞌay chꞌay yoj teꞌ oy tuꞌ. 13 Haxapaxo yinh yetkꞌulal bꞌay chiꞌahilo tzꞌayik 22 (kabꞌ iskawinaj) metro chupaxiko ishojanil qꞌap cortina tuꞌ. 14 Haꞌ yinh isqꞌaxepal ispultahil yamaqꞌil tuꞌ, chawapaxiko qꞌap cortina, hujebꞌ metro chuko qꞌap, kat hatzꞌunnayo oxebꞌ yoyal qꞌap yebꞌ oxebꞌ bꞌay chitzonnhi yoj teꞌ oy. 15 Haxa qꞌaxepxapaxo yinh ispultahil, hujebꞌ metro chawutepaxiko ishojanil qꞌap cortina tuꞌ, kat hatzꞌunnipaxayo oxebꞌ yoyal qꞌap yebꞌ oxebꞌ bꞌay chitzꞌonhi teꞌ oy.
16 »Haxa ispultahil yamaqꞌil watuttuꞌan, bꞌalonhebꞌ metro chuto qꞌap cortina tuꞌ; kanhebꞌ yelawil qꞌap chꞌoki; qꞌap yax, qꞌap kajmutzꞌmunhe, qꞌap kaj yebꞌ qꞌap lino chembꞌil. Haꞌ qꞌap cheyako yinh, kat yok yelawil qꞌap yu mak kaw helan ischemli, kat hatzꞌunnayo kanhebꞌ yoyal qꞌap yebꞌ kanhebꞌ bꞌay chꞌay yoj teꞌ oy tuꞌ. 17 Sunil teꞌ oy chꞌok yinh ishoyanil watuttuꞌan chiꞌok chꞌen plata ismajilo iswiꞌ, yebꞌ isganchohal teꞌ plata chꞌen chꞌoki. Wal yoj sunil teꞌ oy tuꞌ, bronce chꞌen chiꞌokto yalanh. 18 Haꞌ yamaqꞌil ispakꞌul watuttuꞌan, 45 (howebꞌ yoxkꞌal) metro chuko ishojani, haxa sat yinh yamaqꞌil xin 22 (kabꞌ iskawinaj) metro yok yiktaxa chuko sat; haxa istelbꞌal qꞌap xin kabꞌ metro yok 25 (howebꞌ iskawinaj) centímetro chukanh. Haꞌ qꞌap lino chembꞌil, haꞌ qꞌap chiꞌok yinh qꞌap cortina chiꞌok yinh watuttuꞌan, haꞌ xin chꞌen bronce chikan yalanh teꞌ oy tuꞌ. 19 Sunil munlabꞌal chiꞌokniko yinh culto yul watuttuꞌan chꞌen bronce chꞌok yinh. Hakpax tuꞌ estaca chiꞌokniko yinh watuttuꞌan yebꞌ estaca chiꞌokniko yinh yamaqꞌil, bronce chꞌen chiꞌoknikoj,» xhi Komam tet yaꞌ Moisés.
Teꞌ aceite chiꞌokniko yu ismujli chꞌen lámpara
20 Yalnipaxo Komam tet yaꞌ Moisés: «Lahwi tuꞌ kat hawalni tet konhobꞌ Israel ta chiyiti teꞌ aceite chꞌel yinh teꞌ olivo yunhe ismujli chꞌen lámpara, haxinwal aynhetikꞌako qꞌaꞌ yinh chꞌen. 21 Yaꞌ Aarón yebꞌ iskꞌahol chimunla yinh yilni chꞌen lámpara, haxinwal aynhetikꞌako qꞌaꞌ yinh chꞌen chꞌekꞌ aqꞌbꞌal insatajan, yul inTabernáculohanb watxꞌebꞌil yinh qꞌap mantiado, bꞌay chinchah hinbꞌahan yebꞌ hex; chꞌen lámpara tuꞌ ayko satakꞌti qꞌap velo aykanh, qꞌap ayko yenhelo teꞌ Kaxha yet inTratohan. Huneꞌ tiꞌ chejbꞌanile chiyukano texol, hex Israel hex tiꞌ yinh sunilbꞌal tiempo yebꞌ tet heyuninal,» xhi Komam tet yaꞌ Moisés.