Xil isqꞌap ebꞌnaj sacerdote
28
Yalnipaxo Komam tet yaꞌ Moisés hakaꞌ tiꞌ: «Xol ebꞌnaj Israel, haꞌ yaꞌ hawuxhta Aarón yebꞌ iskꞌahol, haꞌ ton naj Nadab, naj Abiú, yaꞌ Eleazar yebꞌ naj Itamar, haꞌ ebꞌnaj chꞌok hawetbꞌihoj yinh inmunilan; yaꞌ Aarón yebꞌ ebꞌnaj iskꞌahol tuꞌ haꞌ chiꞌok insacerdotehan. 2 Yuxin kaw nantikꞌa chawatxꞌe xil isqꞌap yaꞌ Aarón, hawuxhtaj. Xil isqꞌap yaꞌ tuꞌ kaw ay yelapnoj, kaw ay ismay, yebꞌ xin kꞌulchꞌan jilni. 3 Yuxin tzotelanh tet makta kaw ay ishelanil, tet makta chiwaqꞌan ishelanil ischemli, kat iswatxꞌen xil isqꞌap yaꞌ Aarón; yuto haꞌ yaꞌ insikꞌilojan yok sacerdotehal yinh inmunilan. 4 Haꞌ xil isqꞌap yaꞌ chawaqꞌ watxꞌe tuꞌ, haꞌ ton hunteqꞌan tiꞌ: qꞌap chiꞌok yinh istxam iskꞌul yaꞌ, qꞌap efod, qꞌap chaleko qꞌap túnika chembꞌil, qꞌap mitra chiꞌahto yinh iswiꞌ yaꞌ. Yuxin kaw nantikꞌa yok iswatxꞌebꞌanil xil isqꞌap hawuxhta tuꞌ yebꞌ iskꞌahol yaꞌ, yu ismunla ebꞌnaj sacerdotehal yinh inmunilan. 5 Haꞌ mak chiwatxꞌen xil isqꞌap ebꞌnaj tuꞌ yilal yaniko chꞌen oro yinh, yebꞌ xin qꞌap yax qꞌap, yebꞌ qꞌap kajmutzꞌmunhe qꞌap, qꞌap kaj jilni, yebꞌ qꞌap lino chembꞌil kotxkilta chuko yelawil.6 »Haxa qꞌap chaleko, oro chꞌok yinh qꞌap, kat iswatxꞌelaxpaxo qꞌap qꞌap yax, qꞌap kajmutzꞌmunhe, qꞌap kaj jilni, yebꞌ qꞌap lino chembꞌil yu mak kaw helan. 7 Kat iswatxꞌenpaxo qꞌap txꞌambꞌale chꞌok yinh iswixikꞌ ebꞌnaj, kat ischalen isbꞌa istxam yebꞌ qꞌap yintaj yebꞌ qꞌap sataj. 8 Haxa qꞌap txꞌambꞌal chiꞌok yinh yikta yaꞌ yibꞌanh qꞌap chaleko yu issutꞌniko yiktaj, tzꞌisbꞌilayo qꞌap yibꞌanh qꞌap chaleko yunhe hunxanhe chꞌeliko qꞌap sunil, kat yok oro yinh qꞌap, yebꞌ qꞌap yax, qꞌap kajmutzꞌmunhe, qꞌap kaj jilni, yebꞌ qꞌap lino chembꞌil.
9 »Kat hewatxꞌenilo kabꞌebꞌ chꞌen ónice, kat istzꞌibꞌnhelaxiko isbꞌi ebꞌnaj iskꞌahol yaꞌ Israel yinh chꞌen. 10 Wajebꞌ isbꞌi ebꞌnaj chitzꞌibꞌnhelaxiko yinh huneꞌ chꞌen, wajebꞌxa isbꞌi ebꞌnaj xin yinh hunxa chꞌen chitzꞌibꞌnhelaxikoj. Hakaꞌtikꞌa istxolal yu ispitzkꞌa ebꞌnaj, hak tuꞌ chu istzꞌibꞌnhelaxiko isbꞌi ebꞌnaj yinh chꞌen. 11 Haꞌ mak chiꞌaniko isbꞌi ebꞌnaj yinh chꞌen tuꞌ, haꞌ ton mak chimunla yinh iswatxꞌen chꞌen kaw kꞌul jilni; hakaꞌ chu yok istzꞌibꞌal hunu sello, hak tuꞌ chu yok hunteqꞌan bꞌihe tuꞌ yinh chꞌen. 12 Kaw cheyako chꞌen kabꞌebꞌ chꞌen tiꞌ yibꞌanh istxꞌanhal iswixikꞌ qꞌap chaleko. Haꞌ ismunil chꞌen, haꞌ ton isnahniti yinh ebꞌnaj iskꞌahol yaꞌ Israel. Hak tuꞌ chu yinikꞌo yaꞌ Aarón isbꞌi ebꞌnaj yibꞌanh iswixikꞌ insatajan, yunhe innanitijan ebꞌnaj. 13 Kat hewatxꞌenpaxo chꞌen oro bꞌay chitzꞌonhi chꞌen. 14 Kat ishal-lax kabꞌebꞌ chꞌen cadena oro kaw kꞌul, kat yokpaxo yinh chꞌen oro bꞌay chitzꞌonhi chꞌen ónice.
15 »Haxa yinh qꞌap yet istxam iskꞌul xin, qꞌap chiꞌok yechelo yinh isyaꞌtajil chiwayojan; hakaꞌtikꞌa chu iswatxꞌi qꞌap chaleko, hak tuꞌ yalaxpaxiko chꞌen oro yinh, yebꞌ qꞌap yax, qꞌap kajmutzꞌmunhe, qꞌap kaj, qꞌap lino kotxkixhtanhe chu yu yelawil. 16 Qꞌap istxam iskꞌul tuꞌ kaw pim chiyuhi, yebꞌ xin lahannhe ismalil iskanhebꞌal istxikin, 22 (kabꞌ iskawinaj) centímetro chu hunun istxikin qꞌap. 17 Lahwi tuꞌ, kat heyaniko chꞌen chꞌen kaw kꞌulchꞌan jilni yibꞌanh, kanh txol chuyo chꞌen yibꞌanh qꞌap. Haꞌ yinh bꞌabꞌel txol, cheyako huneꞌ chꞌen sárdica, yebꞌ huneꞌ chꞌen topacio, yebꞌ huneꞌ chꞌen carbunclo. 18 Haxa yinh iskabꞌ txol xin cheyako huneꞌ chꞌen esmeralda, yebꞌ huneꞌ chꞌen zafiro, yebꞌ huneꞌ chꞌen diamante. 19 Haxa yinh yox txol xin, cheyako huneꞌ chꞌen jacinto, yebꞌ huneꞌ chꞌen ágata, yebꞌ huneꞌ chꞌen amatista. 20 Haxa yinh iskanh txol, cheyako huneꞌ chꞌen berilo, yebꞌ huneꞌ chꞌen ónice, yebꞌ huneꞌ chꞌen jaspe. Sunil hunteqꞌan chꞌen tiꞌ, yibꞌanh chꞌen oro chitokano chꞌen. 21 Yilal 12 (kabꞌlanhebꞌ) chꞌen chiꞌoki, yuto 12 (kabꞌlanhwanh) ebꞌnaj iskꞌahol yaꞌ Israel. Hakaꞌ chu yok istzꞌibꞌal sello, hak tuꞌ chuko isbꞌi hunun ebꞌnaj 12 (kabꞌlahonhwanh) tuꞌ yinh chꞌen.
22 »Kat iswatxꞌelaxpaxo iscadenahil yet istxam iskꞌul tuꞌ, oro kaw kꞌul chꞌok yinh huneꞌ cadena tuꞌ, chihal-lax chꞌen kat yalaxayo yibꞌanh qꞌap. 23 Kat iswatxꞌelax kabꞌebꞌ chꞌen oro, petan yehi, kat yalaxiko chꞌen yinh istxikin qꞌap yet istxam iskꞌul tuꞌ. 24 Lahwi tuꞌ kat iskꞌal-laxiko chꞌen cadena tuꞌ yinh chꞌen oro petan yehi, ayko yinh kabꞌebꞌ istxikin qꞌap yet istxam iskꞌul. 25 Kat yok hunun istxam chꞌen cadena yibꞌanh chꞌen bꞌay tzꞌonhbꞌabꞌilayo chꞌen, kat iskꞌal-laxiko yibꞌanh istxꞌanhal iswiꞌ iswixikꞌ qꞌap chaleko iskawilal istxam iskꞌul. 26 Kat iswatxꞌipaxo kabꞌebꞌ chꞌen oro petkixhtanhe yehi, kat yalaxiko chꞌen yinh kabꞌebꞌ istxikin qꞌap yalanh istxam iskꞌul, yuto hun chuko yebꞌ qꞌap chaleko tuꞌ. 27 Kat iswatxꞌipaxo kabꞌebꞌ chꞌen oro petkixhtanhe yehi, kat yok chꞌen yinh istxꞌanhal chaleko yinh iswiꞌ iswixikꞌ, iskawilal istxam iskꞌul bꞌay ay istzꞌisbꞌanil yibꞌanh qꞌap istxꞌanhal qꞌap chaleko tuꞌ. 28 Hak tuꞌ xin chu ishuni qꞌap yet istxam iskꞌul yebꞌ qꞌap chaleko yu kanhebꞌ chꞌen oro petan yehi, haꞌ txꞌal yax txꞌal, haꞌ chiximlenkanoj; yebꞌ xin yunhe mach chispoh isbꞌa qꞌap chaleko yebꞌ qꞌap istxam iskꞌul tuꞌ. 29 Yuxin hayet chiꞌokto yaꞌ Aarón yul watutan insatajan, yebꞌ isbꞌi 12 (kabꞌlanhwanh) iskꞌahol yaꞌ Israel yinh istxam iskꞌul, chinnatijan ebꞌnaj, yichmam ebꞌnaj Israel yinh sunilbꞌal tiempo. 30 Kat hawanipaxiko chꞌen Urim yebꞌ chꞌen Tumim yibꞌanh qꞌap yet istxam iskꞌul, haxinwal iqꞌbꞌil chꞌen yu yaꞌ Aarón yibꞌanh istxam iskꞌul yet chiꞌok yaꞌ insatajan, hanin Yahawilintiꞌan. Hak tuꞌ chu yinikꞌo yaꞌ Aarón tuꞌ chꞌen yibꞌanh istxam iskꞌul yunhe istxumni yaꞌ tzet chiyoche inkꞌulan tet inkonhobꞌ Israelan.
31 »Kat xin hawatxꞌen qꞌap capa nabꞌa yaxnhe, yalanh qꞌap chaleko. 32 Kat yalaxiko isholanil isnuqꞌ qꞌap; kat yok istiꞌ isnuqꞌ qꞌap tuꞌ yunhe ispimbꞌiloj hakaꞌ hunteqꞌan chaleko tzꞌum, yunhe machi tzilmohi.a 33 Kat yalaxiko yelawil istxam istiꞌ qꞌap, chiꞌalaxiko yechel teꞌ granada yinh, chiwatxꞌelaxiko yelawil qꞌap yu qꞌap yax qꞌap, qꞌap kajmutzꞌmunhe, qꞌap kaj; kat hawatxꞌen nixhte iskꞌolkꞌolal istiꞌ qꞌap, kat yok chꞌen campana oro yinh istxam qꞌap. 34 Yuxin istxolal chiꞌok yechel qꞌap, huneꞌ chꞌen campana, huneꞌ teꞌ granada, hunxa chꞌen campana, hunxa teꞌ granada; hak tuꞌ chuko istxolal yelawil istiꞌ qꞌap. 35 Hayet chimunla yaꞌ Aarón yinh inmunil tuꞌan chiyako yaꞌ qꞌap capa tuꞌ, hak tuꞌ xin chiꞌabꞌelax isqꞌanhi chꞌen nixhte campana yet chiꞌokto yaꞌ yul watutan insatajan; haꞌ xin chalniloj ta mach kam yaꞌ.
36 »Kat hawatxꞌen hunu chꞌen placa nabꞌa oro bꞌay chitzꞌibꞌnhelaxiko hakaꞌ tiꞌ: “Aqꞌbꞌilxa tet Komam Jahawil,” chukoj. Hakaꞌ chu istzꞌibꞌnhelax tzꞌibꞌ yinh hunu sello, hak tuꞌ chu istzꞌibꞌnhelax hunteqꞌan tzꞌibꞌ tuꞌ. 37 Kat iskꞌal-laxiko chꞌen placa tuꞌ yu huneꞌ txꞌal yax, yiktabꞌal ispalanh yinh qꞌap ayahto yinh iswiꞌ yaꞌ. 38 Kat yok yinh ispalanh yaꞌ Aarón yinh sunilbꞌal tiempo. Haꞌ xin yaꞌ Aarón chiꞌinito sunil ismul anma Israel, yet chiyaqꞌni isyebꞌalqꞌabꞌ wetan, yu huneꞌ placa tuꞌ chinchahan isyebꞌalqꞌabꞌ anma.
39 »Kat ischemlaxpaxo qꞌap túnika yinh txꞌal lino, kat iswatxꞌelaxpaxo qꞌap chꞌahto yinh iswiꞌ yaꞌ yinh txꞌal lino; kat ischemlaxpaxo qꞌap txꞌambꞌal yu huneꞌ mak kaw helan ischemli. 40 Kat hawaqꞌni watxꞌeꞌ xil isqꞌap ebꞌnaj iskꞌahol yaꞌ Aarón; chiwatxꞌi qꞌap túnika, yebꞌ qꞌap txꞌambꞌal, yebꞌ qꞌap chꞌahto yinh iswiꞌ ebꞌnaj yunhe kaw ay yelapnoj yehi yebꞌ xin kaw saqꞌal jilni.
41 »Hak tuꞌ chu xil isqꞌap yaꞌ Aarón yebꞌ ebꞌnaj iskꞌahol, kat hajobꞌnayo aceite yibꞌanh iswiꞌ ebꞌnaj yu yaqꞌlaxkano ismunil ebꞌnaj, kat yokkano ebꞌnaj insacerdotehojan. 42 Kat iswatxꞌelaxpaxo yul iswex ebꞌnaj, haꞌ qꞌap lino chꞌoknikoj, chꞌichayti qꞌap yinh yikta ebꞌnaj masanta chꞌayilo yinh iswitxꞌiꞌ ebꞌnaj. 43 Hayet chiꞌokto yaꞌ Aarón yebꞌ ebꞌnaj iskꞌahol yul watutan bꞌay chinchah hinbꞌahan yebꞌ ebꞌnaj, yilal yaniko ebꞌnaj yul iswex tuꞌ, yebꞌpaxo yet chihitziko ebꞌnaj iskꞌatanh ismexhahil yet xahanbꞌal yet chimunla ebꞌnaj yinh ismunil yinh sacerdotehal yul watutan, yunhe machi yako ebꞌnaj hunu ismul, kat iskam ebꞌnaj. Huneꞌ tiꞌ, chejbꞌanile chukano tet yaꞌ Aarón yebꞌ tet yuninal yaꞌ bꞌaqꞌinh,» xhi Komam tet yaꞌ Moisés.