Istzejtahil isTabernáculo Yatut Komam Dios
24
Istzotelpaxo Komam Dios tet yaꞌ Moisés, yalni Komam: 2 «Hal tet ebꞌnaj Israel tato chiyiti ebꞌnaj teꞌ aceite kaw kꞌul tawet, teꞌ chiꞌel yinh teꞌ olivo, chiꞌokniko yinh chꞌen lámpara yunhe aynhetikꞌako qꞌaꞌ yinh chꞌen. 3 Haxa xin yaꞌ Aarón chiwatxꞌeniko qꞌaꞌ yinh chꞌen lámpara insatajan, sata qꞌap velo bꞌay ayayo Kaxha yet intratohan yul Tabernáculo bꞌay chinchah hinbꞌahan yebꞌ hex. Hak tuꞌ xin aynhetikꞌako qꞌaꞌ yinh chꞌen sunilbꞌal aqꞌbꞌal. Huneꞌ tiꞌ, chejbꞌanile chukano teyet hex mame hex tiꞌ yebꞌ tet yuninal heyuninal yinh sunilbꞌal ej tiempo. 4 Kaw kꞌul chu iswatxꞌelaxahto chꞌen lámpara oro yibꞌanh isbꞌatxobꞌal, aynhetikꞌako xin qꞌaꞌ yinh chꞌen insatajan, hanin Yahawilintiꞌan.Pan chꞌaqꞌlax tet Komam
5 »Cheyiti ixim harina kaw kꞌul, kat iswatxꞌelax kabꞌlahonhebꞌ ixim pan yinh ixim, kabꞌ libra ixim harina chꞌok yinh hunun ixim pan tuꞌ; 6 kat hawanayo ixim yibꞌanh mexha oro ayayo insatajan. Kabꞌ latzꞌan chuyo ixim yibꞌanh mexha tuꞌ, wajebꞌ ixim yinh hunun latzꞌan. 7 Kat hawanayo teꞌ pom kaw xuqꞌ sam yibꞌanh hunun latzꞌan ixim; huneꞌ tuꞌ yebꞌalqꞌabꞌe chinhuslax insatajan, hanin Yahawilintiꞌan. 8 Hunun tzꞌayik xewilal, chiꞌalaxayo ixim pan tuꞌ yinh istxolal insatajan, huneꞌ tiꞌ istꞌinhanil tzet taqꞌwebꞌilkano heyu wetan, yinh sunilbꞌal ej tiempo, hex Israel hex tiꞌ. 9 Haꞌ ixim pan tuꞌ yet yaꞌ Aarón ye ixim, yebꞌ yuninal; haꞌ ehobꞌal bꞌay chiswah ebꞌnaj ixim tuꞌ wetan yehi, yuto kaw niman yelapno ixim yul insatan xol hunteqꞌan tzet chislo ebꞌnaj sacerdote, chiꞌilaxti yebꞌalqꞌabꞌehal chinhuslax insatajan,» xhi Komam.
Kamikal chiꞌay yibꞌanh mak chibꞌawa yinh Komam Dios
10 Yinh huneꞌ tiempohal tuꞌ, ay huneꞌ naj, ah Israel ismiꞌ, wal ismam naj ah Egipto. Haꞌ naj tuꞌ, elti xol ebꞌnaj Israel, iskajle isbꞌa naj yebꞌ huneꞌxa naj, kaw Israel, yul campamento. 11 Haꞌ yunin ix ah Israel tuꞌ bꞌahwahi. Istzꞌaktiꞌnhenpaxo naj isbꞌi Komam Dios, yuxin ilaxto naj yu ebꞌnaj Israel sata yaꞌ Moisés. Haꞌ isbꞌi ismiꞌ naj tuꞌ xin, Selomit. Iskutzꞌin naj Dibri ye ix, yinh naj Dan titna ix. 12 Ismajchelax naj, masanto yal Komam Dios yinh tzet eliko naj. 13 Istzotel Komam Dios tet yaꞌ Moisés, yalni Komam hakaꞌ tiꞌ: 14 «Ilto naj halni tzotiꞌ txꞌoj winhan yintalto campamento. Wal ebꞌnaj abꞌen tzet yal naj chayo isqꞌabꞌ ebꞌnaj yibꞌanh iswiꞌ naj, kat isqꞌojlaxkamo naj yu sunil ebꞌnaj Israel. 15 Chawal tet ebꞌnaj Israel hakaꞌ tiꞌ: Makxanhetikꞌa chitzꞌaktiꞌnhen isDiosal, haꞌ huneꞌ mak tuꞌ, chitokano ismul yibꞌanh. 16 Haꞌ mak chihalni tzotiꞌ txꞌoj yinh isbꞌi Komam Jahawil, yilal iskami. Wal xin sunil anma chiqꞌojni kamoj. Machi yok yinh ta jet konhobꞌ maka anma nan konhobꞌal ayko koxol, ta chibꞌahwa yinh isbꞌi Komam wiyom iskami.
17 »Haꞌ mak chimaqꞌnikamo yet anmahil, haꞌ huneꞌ mak tuꞌ yilal yaqꞌlen isyaꞌtajil kamikal.
18 »Haꞌ mak chimaqꞌnikamo hunu isnoqꞌ yet anmahil, yilal yaqꞌni selel noꞌ, huneꞌ noꞌ hakaꞌ noꞌ tuꞌ, chaqꞌ seleloj.
19 »Ta ay hunu mak chiwatxꞌen istxꞌojal yinh yet anmahil, haꞌtikꞌa istxꞌojal iswatxꞌe tuꞌ, haꞌtikꞌa chꞌaqꞌlax tet. 20 Tato ay hunu mak chiqꞌahnito hunu yet anmahil, haꞌ huneꞌ mak tuꞌ yilal isqꞌahlapaxtoj. Tato ay hunu mak chimaqꞌnipoho isbꞌaqꞌ sat yet anmahil, haꞌ huneꞌ mak tuꞌ yilal ismaqꞌlaxpaxo poho isbꞌaqꞌ sat. Tato ay hunu mak chimaqꞌnilti yeh hunu yet anmahil, haꞌ huneꞌ mak tuꞌ, yilal ismaqꞌlaxpaxilti yeh. Haꞌ tzet chiswatxꞌe tuꞌ, haꞌtikꞌa chipajtzelax tet.
21 »Haꞌ mak chiꞌaqꞌnikamo hunu isnoqꞌ yet anmahil, yilal yaqꞌni selel noꞌ chismaqꞌkamo tuꞌ. Haꞌ mak chimaqꞌnikamo hunu yet anmahil, haꞌ huneꞌ mak tuꞌ, yilal ismaqꞌlaxpaxokamoj.
22 »Lahannhe chejbꞌanile chiwakanojan tet anma mach Israeloj ay texol, yebꞌ teyet hex Israel hex tiꞌ. Hanin Yahawilintiꞌan, heDiosal, chiwalan huneꞌ tiꞌ,» xhi Komam.
23 Yalni yaꞌ Moisés hunteqꞌan tuꞌ tet ebꞌnaj Israel, yinilto ebꞌnaj naj halni tzotiꞌ txꞌoj yinh Komam Dios yintalto campamento, isqꞌojnikamo ebꞌnaj naj. Hakaꞌtikꞌa yu yalni Komam Dios tet yaꞌ Moisés, hak tuꞌ yu isyijen ebꞌnaj Israel tuꞌ.