8 »Chebꞌis hujel el yinh hujuta habꞌil, haꞌ hujebꞌ habꞌil chibꞌislax yinh hujel tuꞌ, chiꞌeliko yinh 49 (bꞌalonhebꞌ yoxkꞌal) habꞌil. 9 Haxa yinh 10 (islahonhebꞌ) tzꞌayik yinh ishuj ixahaw, istzꞌayikal bꞌay chiwaqꞌ nimankꞌulalan yinh mule, huneꞌ tzꞌayik tuꞌ, chiꞌoqꞌtzelax chꞌen trompeta yul sunil hekonhobꞌ. 10 Haxa yet chitzꞌajna 50 (lahonhebꞌ yoxkꞌal) habꞌil, kaw ayojabꞌ yelapno huneꞌ habꞌil tuꞌ yul hesat, yuto ishabꞌilal yet chexkol-laxiloj. Cheyalnikꞌo yul sunil hekonhobꞌ ta ishabꞌilal bꞌay chexkol-laxiloj. Haꞌ mak chejabꞌ yehi chimeltzo yatut; haꞌ mak elna sat istxꞌotxꞌ, chimeltzo sat istxꞌotxꞌ hunelxa. 11 Haꞌ habꞌil 50 (lahonhebꞌ yoxkꞌal) tuꞌ, ishabꞌilal yet chexok yinh tzalahilal. Huneꞌ habꞌil tuꞌ, machi hunu tzꞌunubꞌ chetzꞌun sat hetxꞌotxꞌ, mach chekꞌuppaxokanh ixim trigo tonhe chiyalnhe isbꞌa, mach chetzokꞌpaxilo isqꞌabꞌ teꞌ uva, mach cheyuxpaxilo sat teꞌ yinh huneꞌ habꞌil tuꞌ, 12 yuto huneꞌ habꞌil tuꞌ kaw ay yelapno, ishabꞌilal bꞌay kexkol-laxiloj. Haꞌ tzet tonhe chiyalnhe isbꞌa sat hetxꞌotxꞌ yinh huneꞌ habꞌil tuꞌ, haꞌ cheloh.

13 »Haꞌ yinh huneꞌ habꞌil chexkol-laxilo tuꞌ, sunil hex chiꞌaqꞌlaxpaxo hetxꞌotxꞌ yul heqꞌabꞌ. 14 Tato ay hunu mak chisloqꞌ maka chistxonh hunu istxꞌotxꞌ, machojabꞌ chistxum yiqꞌni niman melyu yinh txꞌotxꞌ. 15 Haꞌ mak chiloqꞌni txꞌotxꞌ tuꞌ, yilal istohlan txꞌotxꞌ hatatikꞌa hanta habꞌil xaꞌekꞌto yettax habꞌil bꞌay chexkolchaloj. Haꞌ mak chitxonhni txꞌotxꞌ xin, yilal isqꞌanni istohol txꞌotxꞌ hatatikꞌa hantato habꞌil chiꞌok tzꞌunubꞌ sat txꞌotxꞌ, yalanhto yet chikol-laxiloj. 16 Tato txꞌiꞌalto habꞌil bꞌay chiꞌok tzꞌunubꞌ sat txꞌotxꞌ, aykanh istohol txꞌotxꞌ, taka hayebꞌxanhe habꞌil bꞌay chiꞌok tzꞌunubꞌ sat txꞌotxꞌ, wal tuꞌ ayayti istohol txꞌotxꞌ. Yuto hatatikꞌa hanta sat tzꞌunubꞌ chiyaqꞌ txꞌotxꞌ haꞌ chichahlax istohol, hatatikꞌa hayebꞌto habꞌil chiꞌok tzꞌunubꞌ sat txꞌotxꞌ.

17 »Machojabꞌ hunujex cheyaqꞌ subꞌchaho heyet anmahil, wal xin xiwanhwe tet heDios, yuto hanintiꞌan heYahawil yebꞌ xin heDiosal. 18 Bꞌeybꞌalnhewe kuybꞌanile yebꞌ chejbꞌanile chiwalan, haxinwal chexehikꞌo sat txꞌotxꞌ yinh sunil hekꞌul. 19 Haꞌ txꞌotxꞌ chiꞌaqꞌni sat hetzꞌunubꞌ, chexwaꞌi masanto chipalkꞌon isnoh hekꞌul. Chexeh sat txꞌotxꞌ yinh kaw aqꞌankꞌulal.

20 »Kꞌuxanta cheqꞌambꞌe teyet hakaꞌ tiꞌ: “¿Tzet xin chikolo yinh ishuj habꞌil tuꞌ tato machi chikowatxꞌe komunil, yebꞌ ta mach chijikanh sat kotzꞌunubꞌ?” ta kexchi. 21 Mach cheyako yinh hekꞌul, yuto yinh iswaj habꞌil kaw chiwayojan isyaxil yibꞌanh hetzꞌunubꞌ, haꞌ xin sat hetzꞌunubꞌ yinh huneꞌ habꞌil tuꞌ, chiyabꞌekanh yulbꞌal oxebꞌ habꞌil. 22 Haꞌ xin sat hetzꞌunubꞌ chekꞌubꞌakanh tuꞌ, haꞌ cheloh yinh ishuj yebꞌ iswaxajebꞌ habꞌil, chito yabꞌepaxokanh yinh isbꞌalonhebꞌ habꞌil, yet cheyechman yelilo sat hetzꞌunubꞌ hunelxa.

23 »Haꞌ txꞌo txꞌotxꞌ mach chu istxonhlaxto txꞌotxꞌ yinh hunelnhe, yuto wetan ye txꞌotxꞌ. Hex tiꞌ tonhe chexekꞌ sat txꞌotxꞌ wuhan hakaꞌ ebꞌnaj tonhe chul ekꞌi. 24 Tato ay hunu mak chitxonhni hunu istxꞌotxꞌ, chisje isloqꞌnipaxilo istxꞌotxꞌ tuꞌ hunelxa.^a

25 »Tato ay hunu naj heyet konhobꞌ chikankano yinh manhtzetal, kat istxonhnito hunu istxꞌotxꞌ tet hunujex, haꞌ hunu mak ayto yuh isbꞌa yebꞌi, haꞌ chisje isloqꞌnipaxilo huneꞌ txꞌo txꞌotxꞌ istxonhto naj tuꞌ.

26 »Yajaꞌ tato ay hunu naj matxa mak ay yu chiloqꞌnilo txꞌotxꞌ tuꞌ, yajaꞌ ta chiyu isqꞌujnayo naj istohol txꞌotxꞌ xin, chisje isloqꞌnipaxilo naj istxꞌotxꞌ tuꞌ hunelxa, 27 kachannhe chisbꞌis naj hantaxa habꞌil istxonhnito naj txꞌotxꞌ, kat yaqꞌni meltzoho naj tet naj loqꞌnhe txꞌotxꞌ hayebꞌto habꞌil yet chikol-laxilo txꞌotxꞌ. 28 Yajaꞌ ta mach chikꞌuychayo istohol txꞌotxꞌ yu naj, wal tuꞌ, chikankano txꞌotxꞌ tet naj loqꞌnhe txꞌotxꞌ tuꞌ masanto yet ishabꞌilal yet chikol-laxilo txꞌotxꞌ. Hato yinh huneꞌ habꞌil tuꞌ, chikol-laxilo txꞌotxꞌ, kat ismeltzopaxiko txꞌotxꞌ yul isqꞌabꞌ naj hunelxa.

29 »Tato ay hunu mak chistxonhto hunu yatut ay yul nime konhobꞌ hoyaniko iskꞌubꞌal yinh; naj txonhnito yatut tuꞌ, chisje isloqꞌnipaxilo naj yatut hunelxa yulbꞌal huneꞌ habꞌil; huneꞌ habꞌil tuꞌ chiꞌichiko isbꞌisniti yinh istzꞌayikal yet istxonhnito naj yatut. 30 Yajaꞌ tato mach chisloqꞌilo naj teꞌ yulbꞌal huneꞌ habꞌil tuꞌ, chikankano teꞌ tuꞌ yinh hunelnhe tet naj loqꞌnhe teꞌ yebꞌ tet yuninal naj. Mach chu iskol-laxilo teꞌ nha tuꞌ yet ishabꞌilal yet chikol-laxilo txꞌo txꞌotxꞌ. 31 Walpaxo teꞌ nha chitxonhlax yul aldea machi iskꞌubꞌal aykoj, lahan teꞌ yebꞌ txꞌo txꞌotxꞌ, chisje isloqꞌlaxpaxilo teꞌ yu naj yahaw, yebꞌ xin chimeltzo teꞌ tet yahaw yinh ishabꞌilal yet chikol-laxilo txꞌo txꞌotxꞌ.

32 »Walpaxo ebꞌnaj levita chisje isloqꞌnipaxilo ebꞌnaj yatut ay yul iskonhobꞌ hunelxa, tzijxanhe ishabꞌilal. 33 Haꞌ mak chiloqꞌni yatut hunu naj levita, chiꞌel naj yul teꞌ yinh ishabꞌilal yet chikol-laxilo txꞌo txꞌotxꞌ, yuto ebꞌnaj levita tuꞌ, haꞌ yatut ebꞌnaj ay yul iskonhobꞌ, haꞌ ismajul ebꞌnaj texol, hex Israel hex tiꞌ.^b 34 Yajaꞌ wal istxꞌotxꞌ ebꞌnaj levita ay yul iskonhobꞌ bꞌay chilow isnoqꞌ, mach chitxonhlaxto txꞌotxꞌ, yuto yet ebꞌnaj ye txꞌotxꞌ yinh sunilbꞌal tiempo.

35 »Tato ay hunu heyet konhobꞌ chikankano yinh manhtzetal, kat yapni tekꞌatanh, kolwahanhwe yinh, kat heyaqꞌni bꞌay chiꞌeh tekꞌatanh, hakaꞌ chu hekolwa yinh anma nan konhobꞌal chiꞌekꞌ tekꞌatanh. 36 Machi hunu tzet ye tuꞌ tiꞌ cheyilo tet ta ay hunu tzet cheyaqꞌ isqꞌanaꞌ, mach cheqꞌan iskꞌambꞌanil tet; wal xin xiwanhwe wetan hanin heDiosal intiꞌan; kꞌul cheyute hebꞌa yinh mak chiꞌeyayo tekꞌatanh. 37 Mach cheqꞌan yal chꞌen melyu cheyaqꞌ iskꞌamnheꞌ. Mach cheyapaxkanh istohol tzet chislo. 38 Hanintiꞌan Yahawil hinan, heDiosal wehan, kexwilojan sat txꞌotxꞌ Egipto yunhe waqꞌnihan txꞌotxꞌ Canaán teyet kat wokan heDiosaloj.

39 »Tato ay hunu heyet konhobꞌ ay tekꞌatanh yul heyatut chikan yinh manhtzetal kat istxonhnito isbꞌa teyet; mach cheyaqꞌ ekꞌoyaꞌ yanma yinh munil, hakaꞌ ebꞌnaj chejabꞌ txonhbꞌil tet hunu maka. 40 Wal xin hakaꞌ hunu hekꞌamteꞌ maka hakaꞌ hunu mak tonhe chiꞌekꞌ tekꞌatanh, hak tuꞌ cheyute. Huneꞌ mak tuꞌ, chimunla teyintaj masanta yet chiꞌayilo ishabꞌilal yet chikol-laxilo ebꞌnaj chejabꞌ txonhbꞌil, 41 kat yel naj yebꞌ yuninal yul heyatut, kat ismeltzo naj iskꞌatanh mak ayto yu isbꞌa yebꞌi yebꞌ sat istxꞌotxꞌ. 42 Yuto inchejabꞌan heyehi, hanan kexwilojan sat txꞌotxꞌ Egipto. Mach chu hetxonhlaxtoj yu heyok chejabꞌoj. 43 Mach cheyako hebꞌa yahawilo yibꞌanh ebꞌnaj chistxonhto isbꞌa teyet; wal xin xiwanhwe wetan hanin heDiosal intiꞌan.

44 »Tato cheyoche cheloqꞌ hunu naj hechejabꞌoj maka hunu ix hechejabꞌoj, chu heloqꞌni xol ej konhobꞌ ayko yinhla ishoyanil hekonhobꞌ tuꞌ. 45 Chisje heloqꞌnipaxo hechejabꞌ xol anma mach Israelo ay texol, yebꞌpaxo anma mach Israelo chipitzkꞌa texol. Haꞌ hunteqꞌan anma tuꞌ, chisje heloqꞌni yu yok hechejabꞌoj. 46 Kat iskanpaxkano ebꞌnaj ismajulo heyuninal yet chexkamtoj, haꞌ ebꞌnaj xin chiꞌokpaxo ischejabꞌo heyuninal tuꞌ. Yajaꞌ wal texol hex Israel hex tiꞌ machi hunu mak Israel chu yok yahawo yet Israelal, kat yaqꞌni ekꞌoyaꞌ yinh ismunil.

47 »Ta ay hunu naj mach Israelo ay texol, chiꞌok qꞌalomal, taka xin ay hunu heyet konhobꞌ Israel ayayo iskawilal yatut naj chikan yinh manhtzetal, kat istxonhnito isbꞌa tet naj maka tet hunuxa naj nan konhobꞌal, 48 haꞌ naj chistxonhto isbꞌa tuꞌ, chisje isloqꞌlaxilo naj yet tzujanilxa. Chisje isloqꞌlaxpaxilo naj yu hunu mak yuxhtato isbꞌa yebꞌi. 49 Chisje isloqꞌlaxilo naj yu hunu yuxhta ismam, maka yu iskꞌahol yuxhta ismam, maka yu hunu mak ayto yu isbꞌa yebꞌi. Yebꞌ xin haꞌtikꞌa naj chiyu isloqꞌnipaxilo isbꞌa yul isqꞌabꞌ naj loqꞌnhe tuꞌ ta chiyu yu naj. 50 Chisbꞌisni naj yebꞌ naj bꞌay istxonhto isbꞌa tuꞌ yinh habꞌil bꞌay istxonhto isbꞌa naj masanta yinh habꞌil yet chikolchalo ebꞌnaj chejabꞌ. Hatatikꞌa hayebꞌ habꞌil xaꞌekꞌto tuꞌ, hak tuꞌ istohol naj chiyaqꞌa; kat yaqꞌnipaxo meltzoho naj istohol tzꞌayik munlahi hakaꞌtikꞌa istohol istzꞌayik ebꞌnaj kꞌamteꞌ. 51 Yajaꞌ ta kaw txꞌiꞌalto habꞌil yet chul habꞌil bꞌay chikol-laxilo ebꞌnaj chejabꞌ chistxonhto isbꞌa, hatatikꞌa hantato habꞌil tuꞌ, hak tuꞌ istohol chiyaqꞌa tet mak bꞌay txonhbꞌil isbꞌa naj tuꞌ; yinh hakaꞌ tuꞌ, chisje yaqꞌni meltzoho naj yaqꞌbꞌilxa chꞌen melyu ischah istoholo tuꞌ. 52 Yajaꞌ tato hayebꞌxanhe habꞌil yinh habꞌil bꞌay chikol-laxilo ebꞌnaj chejabꞌ, haxanhe hayebꞌ habꞌil tuꞌ chistohla naj. 53 Tato ay hunu heyet konhobꞌ Israel chistxonhto isbꞌa, hakaꞌojabꞌ hunu kꞌamteꞌ chimunla yinh ishabꞌilal, hakojabꞌ tuꞌ chiꞌutelaxi. Mach chechah etalaxo heyet konhobꞌ tuꞌ yinh hesat.

54 »Yajaꞌ tato mach chu iskol-laxilo yulbꞌal hunteqꞌan habꞌil tuꞌ, hato yinh habꞌil bꞌay chikol-laxilo ebꞌnaj chistxonh isbꞌa chejabꞌoj, hato tuꞌ chikolchalo naj yebꞌ yuninal. 55 Yuto hex Israelex tiꞌ, kaw inchejabꞌan heyehi, haninan kexwilojan sat txꞌotxꞌ Egipto yu heyok inchejabꞌojan. Haninan Yahawintiꞌan heDiosaloj,» xhi Komam.