3 »Ta chebꞌeybꞌalnhe chejbꞌanile yebꞌ kuybꞌanile walan teyet, kat hewatxꞌen tzet chiwalan, 4 chiwatijan haꞌ nhabꞌ yinh istzꞌayikal yibꞌanh hetxꞌotxꞌ kat yaqꞌni sat hetzꞌunubꞌ. 5 Ayextoko yinh istzꞌayikal yet chekꞌupnikanh hetrigo, kat yaynapaxilo istzꞌayikal heyuxni teꞌ uva, kat yaynapaxilo istzꞌayikal hetxini hetrigo hunelxa; yuxin kaw aynhetikꞌa tzet cheloh masanto kaw chinohkano hekꞌul. Kaw xin yinh sunil hekꞌul chexeh sat hetxꞌotxꞌ.

6 »Chiwaqꞌnihan aqꞌankꞌulal teyet sat hetxꞌotxꞌ; hayet chexwayi, machi mak chexxibꞌteni, kat kexinkolnilojan tet noꞌ howla noqꞌ yebꞌ machi chꞌen espada sat hetxꞌotxꞌ. 7 Haꞌ ebꞌnaj chiꞌaniko howal teyinh, chiꞌelkanh ebꞌnaj teyet, kat heyok tzujno yinta ebꞌnaj, kat yaykꞌay ebꞌnaj yul heqꞌabꞌ yu heyespada. 8 Howanhchꞌan hex chexoktzujno yinta 100 (hokꞌal) ebꞌnaj winaj, Haxapaxo 100 (hokꞌal) hex xin chexoktzujno yinta 10 (lahonhebꞌ) mil ebꞌnaj. Haꞌ ebꞌnaj chiꞌaniko howal teyinh, chiꞌaykꞌay ebꞌnaj tuꞌ yul heqꞌabꞌ yu heyespada.

9 »Kaw kꞌul chexwilan, kat waqꞌni chꞌibꞌojan hebꞌisil, kat inyijenan tzet tꞌinhbꞌabꞌil teyet wuhan. 10 Yexnheto hewahni ixim trigo hunbꞌihalxa, kat yayilo istzꞌayikal ixim akꞌ trigo, haxa ixim hunbꞌihal tuꞌ chiꞌelti ixim yul yehobꞌal kat istenbꞌalaxpaxto ixim akꞌto bꞌay chiꞌelti ixim hunbꞌihal tuꞌ.

11 »Chinwatxꞌehan bꞌay chinehayojan texol, machi xin chexinyahan. 12 Chinekꞌan texol, kat wokan heDiosal, kat heyok inkonhobꞌojan. 13 Hanin Yahawilintiꞌan heDiosal kexwilojan sat txꞌotxꞌ Egipto, yunhe matxa chexok ischejabꞌo ebꞌnaj Egipto tuꞌ. Kexinkolilojan yul isqꞌabꞌ isyaꞌtajil bꞌay ayexikoj, yuxin tinanh matxa nhohanexayoj yu txꞌixwilal yet chexekꞌi.

14 »Yajaꞌ tato mach cheyabꞌe tzet chiwalan, yebꞌ ta mach cheyije inchejbꞌanilan, 15 yebꞌ ta cheyintanhenkanilto kuybꞌanile chiwalan, yebꞌ ta mach chebꞌeybꞌalnhe sunil chejbꞌanile, kat heyetanto tzet tꞌinhbꞌabꞌilkano wuhan yebꞌ hex. 16 Haꞌ hunteqꞌan isyaꞌtajil tiꞌ chiwayojan teyibꞌanh: Chiwatijan xiwkilal texol, chiwatijan howla yabꞌil chexaqꞌni kamoj, chiwatijan qꞌaꞌ yinh henimanil yebꞌ yabꞌil yul isbꞌaqꞌ hesat, kat yekꞌyaꞌ heyanma. Nabꞌnhe chetzꞌun hetzꞌunubꞌ, yuto haꞌ anma ayko ishowal teyinh chiꞌinito sat hetzꞌunubꞌ tuꞌ. 17 Haninan chinokan howal teyinh, kat xin heyaykꞌay yul isqꞌabꞌ ebꞌnaj ayko ishowal teyinh, kat heyokto yalanh yip ebꞌnaj, kat xin heyelkanh waxanhka machi mak chextzunbꞌenikꞌoj.

18 »Yajaꞌ ta maxhtikꞌa cheyije kuybꞌanil chiwalan teyet yet cheyilni hunteqꞌan isyaꞌtajil tuꞌ, hujelto chiwayojan isyaꞌtajil teyibꞌanh yu hetxꞌojal tuꞌ. 19 Chintanhtzelojan heloloꞌal tuꞌ; matxa haꞌ nhabꞌ chitit yul satkanh, matxa chaqꞌpaxo txꞌo txꞌotxꞌ sat hetzꞌunubꞌ. 20 Nabꞌnhe chexekꞌyaꞌ hemunlahi, yuto matxa chiyaqꞌ txꞌo txꞌotxꞌ sat hetzꞌunubꞌ, matxa chiyaqꞌpaxo sat teꞌ lobꞌehal cheloh.

21 »Tato chelahiko hemanhkꞌon tzet chiwalan machi xin cheyije, hujelto chiwayojan isyaꞌtajil teyibꞌanh, hakaꞌtikꞌa hemul. 22 Chiwatijan noꞌ howla noqꞌ texol, kat istzilnikamo noꞌ heyuninal yebꞌ henoqꞌ; nixhtejal kexistanhtzenilo noꞌ masanto chitanhilo anma, matxa xin hunu mak chiꞌekꞌ yulajla bꞌeh.

23 »Yajaꞌ tato maxhtikꞌa cheyije tzet chiwalan yet chihul hunteqꞌan isyaꞌtajil tuꞌ teyibꞌanh, ta chelahiko hemanhkꞌon wetan, 24 yinh hakaꞌ tuꞌ, chiwayojan inhowalan teyibꞌanh, hujel el ekꞌbꞌalto isyaꞌtajil chiwayojan teyibꞌanh yu hemul. 25 Chiwatijan howal teyinh yu espada yu chinpajtzehan teyet yu mach cheyije istꞌinhanil intratohan taqꞌwebꞌil heyu. Hayet chexto heyebꞌaꞌ hebꞌa yul hekonhobꞌ heyalni, kat wanitijan yabꞌil teyinh, kat heyaykꞌay yul isqꞌabꞌ ebꞌnaj chiꞌaniko howal tuꞌ teyinh.

26 »Hayet chiwetantojan tzet cheloh, 10 (lahonhwanh) ebꞌix ix hun chu iswatxꞌen tzet cheloh yul huneꞌ horno; kaw xin nixhchꞌan tzet cheloh tuꞌ chiꞌaqꞌlaxi, maxhtikꞌa xin chinoh hekꞌul yet cheloni.

27 »Yajaꞌ tato maxhtikꞌa cheyije inchejbꞌanilan, yexnhetotikꞌa xin hemanhkꞌomal wetan, 28 hakinpax tuꞌan chiwakojan inhowalan teyinh, chiwinitijan ishowal inwiꞌan, hujel el ekꞌbꞌalto chiwayojan isyaꞌtajil teyibꞌanh yu hemul. 29 Chexok hekꞌuxnoto ischibꞌehal hekꞌahol yebꞌ hekutzꞌin. 30 Chiwuchkꞌayojan bꞌay cheyiyo hebꞌa sata hetioxh nahat yekanh, chinmaqꞌni pohojan hexahanbꞌal yet hepom yet hetioxhal tuꞌ. Haꞌ bꞌay tenanto hunteqꞌan hetioxh mach itzitzo tuꞌ, haꞌ yibꞌanh tuꞌ chexintenbꞌakanhan yet kamomexxa, kat kexinyahnihan. 31 Chiwuchkꞌatojan hekonhobꞌ, kat wuchkꞌanayojan yatut hetioxh. Matxa xin chintzalahan yinh isxuqꞌal sam heyebꞌalqꞌabꞌ kaw xuqꞌ sam.

32 »Chiwuchkꞌakantojan hekonhobꞌ, haxa xin ebꞌnaj ayko ishowal teyinh, ebꞌnaj aytikꞌa texol, kaw xin chikꞌayilo iskꞌul ebꞌnaj yilni hekonhobꞌ etaxnatoj. 33 Chexwaqꞌ pujnahotojan xolaj nime konhobꞌ. Aynhetikꞌati wespadahan teyinh yet chexekꞌi. Haꞌ hetxꞌotxꞌ tuꞌ tzꞌinan chukanoj, wal hekonhobꞌ chiꞌuchkꞌalaxtoj chikankano yinh haknhetiꞌ. 34 Hayet ay hex sat istxꞌotxꞌ ebꞌnaj ayko ishowal teyinh tuꞌ, haꞌ yulbꞌal tiempo chikankano hetxꞌotxꞌ ischukil chixew txꞌotxꞌ yinh tzalahilal. 35 Hak tuꞌ xin chu isxew txꞌotxꞌ, hakaꞌtikꞌa istzꞌayikal yet machi heyaqꞌ xewo txꞌotxꞌ yet ay hex sat txꞌotxꞌ.

36 »Hex itzitz hexto ay hex sat istxꞌotxꞌ ebꞌnaj chiꞌaniko howal teyinh; hayet ay hex bꞌey tuꞌ, chiwanikojan xiwkilal teyinh, yuxin hayet chibꞌili isqꞌabꞌ hunu te teꞌ, chexxiwkanh, kat heyelkanh hakaꞌta ay mak lanhan kexistzumbꞌen yu chꞌen espada, kat heyaykꞌayi, yajaꞌ xin machi mak chextzumbꞌeni. 37 Toxanhe chetenlekanh hebꞌa hunun hex kat heyelkanh, hakaꞌto lanhan heyelkanh tet hunu howal, yajaꞌ xin machi mak chextzumbꞌeni. Machi hunujex tiꞌ chu heqꞌoji yinh ebꞌnaj chiꞌaniko howal teyinh. 38 Chextanhtzelaxilo xolaj nan konhobꞌal; haxa xin istxꞌotxꞌ ebꞌnaj ayko ishowal teyinh haꞌ chexlahkꞌoni. 39 Haxa xin hex chito kexkankano sat istxꞌotxꞌ ebꞌnaj ayko ishowal teyinh, haꞌ tuꞌ chexkamkanayo yu hemul, yebꞌ yu ismul heyichmam.

40 »Yajaꞌ ta cheyalahti hemul wetan, yebꞌ ismul hemam icham, yebꞌ cheyalnati hemanhkꞌomal yebꞌ hemachiswalilal winhan, 41 yu sunil hemul tuꞌ yuxin tit inhowalan teyinh, yuxin chexwatojan sat istxꞌotxꞌ ebꞌnaj ayko ishowal teyinh. Yajaꞌ ta cheyiyo hebꞌa wetan, kat heyohtanheniloj ta heyako hemul, ta hak tuꞌ 42 chinnanitijan istꞌinhanil intratohan waqꞌan tet yaꞌ Jacob yebꞌ tet yaꞌ Isaac yebꞌ tet yaꞌ Abraham. Chinnanipaxtijan istxꞌotxꞌ. 43 Yajaꞌ chibꞌejlaxkano hetxꞌotxꞌ tiꞌ, tzꞌinan chukano txꞌotxꞌ, chixew txꞌotxꞌ yet matxa hex sat txꞌotxꞌ. Wal hex xin, chetohla hemul tuꞌ, yuto kexyahwa yinh chejbꞌanile walan teyet, yebꞌ heyintanhenkanilto kuybꞌanile.

44 »Yajaꞌ waxanhka nan konhobꞌal heye sat istxꞌotxꞌ ebꞌnaj ayko ishowal teyinh, yajaꞌ mach chexinyahan yebꞌ chexinbꞌejnikanojan yinh hunelnhe. Machi xin chexintanhtzelojan yinh hunelnhe yu inyijenan intratohan intꞌinhbꞌakanojan tet heyichmam, yuto hanintiꞌan Yahawil hinan heDiosal. 45 Wal xin chinnatijan intratohan tꞌinhbꞌabꞌilkano wuhan yebꞌ hex yet kexwinilojan sat txꞌotxꞌ Egipto sata nime konhobꞌ, yu wokan heDiosaloj. Hanin Yahawilintiꞌan chiwalan huneꞌ tiꞌ,» xhi Komam.

46 Haꞌ hunteqꞌan chejbꞌanile, yebꞌ kuybꞌanile, yebꞌ tzotiꞌ yaqꞌkano Komam tet ebꞌnaj Israel, yinh iswiꞌ witz Sinaí tet yaꞌ Moisés, yunhe yalni yaꞌ tet anma Israel.