6. KUYBꞌANILE YINH HUNTEQꞌAN TZET CHIꞌAQꞌLAX TET KOMAM DIOS
(27:1-34)
Hunteqꞌan tzet chꞌaqꞌlax tet Komam Dios
27
Tzotel Komam Dios tet yaꞌ Moisés, yalni Komam: 2 «Hal hunteqꞌan kuybꞌanile tiꞌ tet ebꞌnaj Israel: Tato ay hunu mak chiyoche isloqꞌolo hunu mak kat yalni ta chaqꞌ wetan, hak tiꞌ chu isloqꞌlaxilo hakaꞌ tiꞌ:a 3 Ebꞌnaj winaj ayko yinh 20 (hunkꞌal) habꞌil masanta yinh ebꞌnaj 60 (oxkꞌal) habꞌil, chiꞌaqꞌlax 50 (lahonh yoxkꞌal) chꞌen plata istoholoj, hakaꞌ yalil chꞌen plata chiꞌokniko yul watutan. 4 Haxa yinh ebꞌix ix xin 30 (lahonhebꞌ iskawinaj) chꞌen plata chiꞌaqꞌlaxi. 5 Haxapaxo yinh ebꞌnaj winaj unin howebꞌ habꞌil masanto yinh ebꞌnaj 20 (hunkꞌal) habꞌil, 20 (hunkꞌal) chꞌen plata chiꞌaqꞌlaxi; taka ix ix xin 10 (lahonhebꞌ) chꞌen plata chiꞌaqꞌlaxi. 6 Haxa yinh nixhte unin huneꞌixto ixahaw ispitzkꞌahi masanto yinh howebꞌ habꞌil, howebꞌ chꞌen plata chiꞌaqꞌlaxi, taka ix ix xin oxebꞌ chꞌen plata chiꞌaqꞌlaxi. 7 Haxapaxo yinh ebꞌnaj ichamta winaj ekꞌbꞌalxa yinh 60 (oxkꞌal) habꞌil, 15 (holanhebꞌ) chꞌen plata chꞌaqꞌlax yinh, ta ixnam anmaxa xin, 10 (lahonhebꞌ) chꞌen plata chꞌaqꞌlax yinh. 8 Yajaꞌ ta ay hunu mak mebꞌaꞌ machi qꞌuycha chꞌen yu, haꞌ huneꞌ mak tuꞌ chiꞌilaxti sata naj sacerdote kat yilni naj hanta chiyu yaqꞌni, hantatikꞌa chiqꞌoji yaqꞌni.9 »Walpaxo tato haꞌ no noqꞌ, noꞌ chiyu yaqꞌlax xahanbꞌalil wetan, hanin Yahawilintiꞌan, haꞌ noꞌ tuꞌ chepohilo noꞌ, wetan yeh noꞌ. 10 Mach chu ishel-laxto noꞌ yebꞌ hunuxa noꞌ. Mach chu ishel-lax noꞌ kꞌul yebꞌ hunuxa noꞌ mach kꞌuloj, maka hunu noꞌ mach kꞌuloj yebꞌ hunu noꞌ kꞌul; yajaꞌ ta chihel-laxto noꞌ, haꞌ noꞌ kakꞌonh tuꞌ, wetan ye noꞌ.
11 »Taka hunu no noqꞌ mach sajoj hakaꞌ yalni chejbꞌanile chꞌaqꞌlax wetan, noꞌ mach chu yaltelax xahanbꞌalil, haꞌ noꞌ tuꞌ, chiꞌilaxto noꞌ sata naj sacerdote, 12 kat yalni naj hanta istohol noꞌ, hak tuꞌ xin chiꞌaqꞌlaxi, hatatikꞌa tzet jilni noꞌ. 13 Yajaꞌ ta naj aqꞌni noꞌ wetan, choche naj isloqꞌopaxilo noꞌ, chꞌaqꞌ naj huneꞌ ishoꞌ majan yibꞌanhilo istohol noꞌ chiyal naj sacerdote tuꞌ.
14 »Ta ay hunu mak chiyaqꞌ yatut wetan, chiyil naj sacerdote huneꞌ teꞌ nha tuꞌ, kat yalni naj hanta istohol teꞌ hatatikꞌa tzet jilni teꞌ. Haꞌ istohol teꞌ chiyal naj, hak tuꞌ chiꞌaqꞌlaxi. 15 Yajaꞌ ta naj aqꞌni teꞌ wetan chiyoche naj isloqꞌopaxilo teꞌ, yilal yaqꞌni naj huneꞌ ishoꞌ majan yibꞌanhilo istohol teꞌ chiyal naj sacerdote, kat yokpaxo teꞌ nha tuꞌ yu naj.
16 »Ta ay hunu mak chiyaqꞌ hanikꞌo istxꞌotxꞌ wetan, hatatikꞌa sat tzꞌunubꞌ chiyaqꞌ txꞌotxꞌ, hak tuꞌ istohol txꞌotxꞌ chiꞌalaxikoj. Tato bꞌalonhebꞌ arroba ixim cebada chiyaqꞌ txꞌotxꞌ, 50 (lahonh yoxkꞌal) plata istohol txꞌotxꞌ. 17 Tato yinh habꞌil yet chikol-laxilo txꞌotxꞌ chꞌaqꞌlax txꞌotxꞌ wetan, haꞌ istohol txꞌotxꞌ tuꞌ tzꞌajan chiꞌalaxikoj. 18 Yajaꞌ ta yet xaꞌekꞌto ishabꞌilal bꞌay kol-laxilo txꞌotxꞌ kat yaqꞌlax txꞌotxꞌ wetan, haꞌ naj sacerdote chistxumni hanta chꞌen plata chꞌaqꞌlax yinh txꞌotxꞌ, chiꞌilaxayti hanikꞌ istohol txꞌotxꞌ hatatikꞌa hayebꞌto habꞌil yayilo ishabꞌilal bꞌay chikol-laxilo txꞌotxꞌ hunelxa.
19 »Yajaꞌ ta chiyoche naj aqꞌnhe txꞌotxꞌ wetan isloqꞌopaxilo txꞌotxꞌ yilal yaqꞌni naj huneꞌ ishoꞌ majan yibꞌanhilo istohol txꞌotxꞌ chiyal naj sacerdote, hak tuꞌ chu yokpaxo txꞌotxꞌ yu naj. 20 Yajaꞌ ta mach chisloqꞌilo naj txꞌotxꞌ, kat istxonhlaxto txꞌotxꞌ tet hunuxa maka, matxa chu isloqꞌnilo naj txꞌotxꞌ yinh hakaꞌ tuꞌ. 21 Haxa yet chitzꞌajna istiempohal bꞌay chikol-laxilo txꞌo txꞌotxꞌ, huneꞌ txꞌotxꞌ tuꞌ chikol-laxilo wetan, haꞌ txꞌotxꞌ tuꞌ xin chiꞌokkano yul isqꞌabꞌ ebꞌnaj sacerdote.
22 »Tato ay hunu naj chiyaqꞌ hunu istxꞌotxꞌ wetan loqꞌbꞌil yu, mach ismajulo naj ye txꞌotxꞌ yu ismam, 23 chiyil naj sacerdote txꞌotxꞌ yebꞌ naj, kat yalni naj hanta istohol txꞌotxꞌ, hatatikꞌa hantato istiempohal istzꞌajna bꞌay chikol-laxilo txꞌotxꞌ. Haꞌ yinh huneꞌ tzꞌayik tuꞌ, chiyaqꞌ naj istohol txꞌotxꞌ, haꞌ chꞌen tuꞌ, kꞌul yokkano wetojan, hanin Yahawilintiꞌan. 24 Haxa yinh ishabꞌilal yet chikol-laxilo txꞌotxꞌ, chimeltzo txꞌotxꞌ tuꞌ yul isqꞌabꞌ naj txonhnheto txꞌotxꞌ, yuto yet yalanhtokanoj yettikꞌa naj txꞌotxꞌ.
25 »Haꞌ istohol hunu tzet ye tuꞌ, haꞌ ebꞌnaj sacerdote chihalni hanta istohol, hakaꞌ ismalil chꞌen melyu chiꞌokniko yul watutan, 20 (hunkꞌal) geras yalil hunun chꞌen plata.b
26 »Haꞌ noꞌ bꞌabꞌel yunin wakax, noꞌ bꞌabꞌel yunin meꞌ, wetan ye noꞌ, yuxin machi hunu mak chu yalni ta chꞌaqꞌlax noꞌ wetan, yuto wetan ye noꞌ. 27 Taka noꞌ bꞌabꞌel yunin hunu noꞌ mach sajoj hakaꞌ yalni chejbꞌanile chꞌaqꞌlax wetan, yajaꞌ ta naj aqꞌnhe noꞌ chiloqꞌnipaxilo noꞌ wetan hunelxa, hakaꞌtikꞌa istohol noꞌ haꞌ chiꞌaqꞌlaxi, kat xin yaqꞌlaxpaxo huneꞌ ishoꞌ majan yibꞌanh istohol noꞌ. Yajaꞌ ta mach chiloqꞌlaxilo noꞌ yu naj aqꞌni noꞌ wetan, chisje istxonhlaxto noꞌ yu ebꞌnaj sacerdote.
28 »Tzijxanhe tzet ay hex chetaqꞌwe heyaqꞌni wetan, yinh hunelnhe chiꞌaqꞌlaxi; ta anma, maka hunu no noqꞌ, maka hunu txꞌotxꞌ aykano hemajuloj. Machi hunu tzet chꞌaqꞌlax wetan chiyu istxonhlaxtoj, maka ismeltzo tet yahaw, yuto wetan ye yinh hunelnhe. 29 Haꞌ mak tꞌinhanxatikꞌa istanhtzelaxiloj mach chu isloqꞌlaxiloj yunhe matxa chꞌaqꞌlaxkamoj, wal xin yilal iskam huneꞌ mak tuꞌ.c
30 »Haꞌ yinh sunil sat tzꞌunubꞌ chiyaqꞌ txꞌo txꞌotxꞌ, haꞌ huneꞌ 10 (islahonhebꞌ) majan, wetan yehi.d 31 Tato ay hunu mak chiyoche isloqꞌolo huneꞌ 10 (islahonhebꞌ) majan tuꞌ, yilal yaqꞌni huneꞌ ishoꞌ majan yibꞌanhilo istohol.
32 »Hunun noꞌ yet islahonhkꞌonh wetan yehi; ta noꞌ wakax, maka noꞌ meꞌ, cheyaqꞌ noꞌ heyebꞌalqꞌabꞌo wetan. 33 Mach chisje hesikꞌlen noꞌ, bꞌaytet noꞌ saqꞌal jilni maka bꞌaytet noꞌ mach kꞌulo jilni, mach chu hehelnipaxo noꞌ yebꞌ hunuxa noꞌ nan jilni. Tato ay hunu mak chihelni noꞌ xin, haꞌ noꞌ bꞌabꞌel tuꞌ, yebꞌ noꞌ chꞌaqꞌlax selelo noꞌ, chiꞌok noꞌ iskakꞌonhal wuhan; matxa xin chu isloqꞌlaxpaxilo noꞌ yu yahaw,» xhi Komam.
34 Haꞌ hunteqꞌan chejbꞌanile tiꞌ, yaqꞌ Komam Dios tet yaꞌ Moisés iswiꞌ witz Sinaí, yu isyijen anma Israel.