Yatut Komam Dios
26
Yalnipaxo Komam: «Haꞌ watutan chewatxꞌe, 10 (lahonhebꞌ) majan qꞌap cortina cheyakoj yinh, qꞌap lino kaw kꞌul, qꞌap chembꞌil, yebꞌ qꞌap yaxtzꞌantzꞌonhe, yebꞌ qꞌap kajmutzꞌmunhe yebꞌ qꞌap kaj jilni, haꞌ qꞌap chiꞌoki, kat ischemlaxiko yechel kawanh ebꞌnaj querubín yinh qꞌap; haꞌ mak kaw helan ischemli, haꞌ chiꞌaniko yechel ebꞌnaj yinh qꞌap. 2 Sunil qꞌap cortina tuꞌ, lahannhe chu ismalil qꞌap, 12 (kabꞌlanhebꞌ) metro yok yiktaxa chu istel hunun qꞌap, haxa issat huneꞌ metro yok 80 (iskanhwinaj) centímetro. 3 Kat hetzꞌisnayo howebꞌ qꞌap cortina tuꞌ, haxinwal hunxanhe chiꞌeliko qꞌap ishowebꞌal; haktikꞌapax tuꞌ howebꞌxa qꞌap hunxanhe chiꞌeliko qꞌap. 4 Kat heyaniko isholanil yinh istiꞌla qꞌap bꞌabꞌel majan, kat istzꞌislaxayo yu txꞌal yax; haktikꞌapax tuꞌ cheyute hunxa qꞌap iskabꞌ majan. 5 50 (Lahonh yoxkꞌal) isholanil qꞌap chiꞌok yinh huneꞌ bꞌabꞌel majan cortina, lahannhe xin chuko isbꞌisil isholanil hunxa majan qꞌap cortina. 6 Kat iswatxꞌelaxpaxo 50 (lahonh yoxkꞌal) chꞌen gancho oro yunhe ischahni isbꞌa huneꞌ majan qꞌap yebꞌ hunxa majan qꞌap, hak tuꞌ chu ishunayo qꞌap yinh watutojan.7 »Watxꞌepaxo 11 (hunlanhebꞌ) cortina yinh istzꞌumal noꞌ chiw, hunnhe mantiadohal chuko yibꞌanh watuttuꞌan. 8 Sunil hunta litxꞌan istzꞌumal noꞌ chiw tuꞌ lahan chiyu ismalil, yikta iskanh metro chawute ismalil istelbꞌal, wal issat xin kabꞌ metro chawute.
9 »Kat hetzꞌisnayo howebꞌ litxꞌan istzꞌumal noꞌ tuꞌ, haxinwal hunxanhe chiꞌelikoj, nan xin chetzꞌispaxayo wajebꞌxa litxꞌan istzꞌumal noꞌ, kat hepajtzonayo noꞌ iswaj litxꞌanil sata bꞌay chonhokapno yul watuttuꞌan. 10 Kat hewatxꞌen 50 (lahonh yoxkꞌal) isholanil yinhla istiꞌla noꞌ yinh bꞌabꞌel howebꞌ litxꞌan; hak tuꞌ xin chupaxo isholanil istiꞌla hunxa noꞌ wajebꞌ litxꞌan. 11 Kat hewatxꞌenpaxo 50 (lahonh yoxkꞌal) chꞌen gancho bronce, kat heyanikto chꞌen yul isholanil noꞌ tuꞌ; hak tuꞌ xin chu ismajchenayo noꞌ iswiꞌ yibꞌanh watuttuꞌan. 12 Haxa noꞌ hun litxꞌan yiktato noꞌ ekꞌbꞌal chikanlokno yinta watuttuꞌan. 13 Hak tuꞌ chu ismajchayo yich watuttuꞌan yu noꞌ chiꞌekꞌbꞌanli tuꞌ yinh qꞌaxqꞌep ispakꞌul watuttuꞌan; 45 (howebꞌ yoxkꞌal)a centímetro chipalkꞌon yinh qꞌaxqꞌep ispakꞌul.
14 »Chewatxꞌenpaxo istzꞌumal noꞌ winaj chiw mantiadohal, noꞌ kaj yanhal aykoj, chiꞌahto yibꞌanh watuttuꞌan; kat hewatxꞌenpaxo mantiado yinh hunteqꞌanxa istzꞌumal no noqꞌ kaw labꞌan, kaw ay istohol chiꞌahpaxto yibꞌanh watuttuꞌan.
15 »Chewatxꞌenpaxo teꞌ aqꞌinteꞌ teꞌ acacia; kaw tohol chawutelo teꞌ kat yok teꞌ yinh watuttuꞌan. 16 Yikta ishoꞌ metrob chawute istel teꞌ, yebꞌ xin 67 (hujebꞌ iskanhwinaj) centímetroc chu satbꞌal teꞌ. 17 Kat heyaniko ischolanil istiꞌ teꞌ aqꞌinteꞌ tuꞌ yunhe chu ischahni isbꞌa istiꞌ teꞌ yet chihunbꞌalax teꞌ yinh watuttuꞌan. 18 Hayet chewatxꞌenilo teꞌ aqꞌinteꞌ tuꞌ, chewatxꞌe 20 (hunkꞌal) teꞌ chiꞌok yinh sur. 19 Kat hewatxꞌen 40 (kawinaj) chꞌen plata bꞌay chiꞌay tzꞌonhno teꞌ, kabꞌkabꞌ chꞌen chiꞌay yalanh hunun teꞌ. 20 Hakpax tuꞌ yinh qꞌaxepxa ispakꞌul watuttuꞌan yinh norte cheyapaxiko 20 (hunkꞌal) teꞌ aqꞌinteꞌ tuꞌ. 21 Kat heyanayo 40 (kawinaj) chꞌen plata bꞌay chꞌay tzꞌonhno teꞌ, kabꞌkabꞌ chꞌen chiꞌay yalanh hunun teꞌ. 22 Yinta watuttuꞌan yetkꞌulal bꞌay chito tzꞌayik, wajebꞌ teꞌ aqꞌinteꞌ tuꞌ chewatxꞌe. 23 Kat hewatxꞌenpaxo kabꞌebꞌ teꞌ yinh istxikin bꞌay chito tzꞌayik. 24 Teꞌ aqꞌinteꞌ tuꞌ kabꞌkabꞌ chiyuko teꞌ, kat ishunbꞌalax istxikin teꞌ yu chꞌen argolla petan yehi. 25 Haꞌ teꞌ waxajebꞌ aqꞌinteꞌ, 16 (wajlanhebꞌ) chꞌen plata, hakaꞌ yoj pilal chiꞌay yalanh teꞌ, yuxin kabꞌkabꞌ chꞌen chiꞌay yalanh hunun teꞌ.
26 »Kat hewatxꞌenpaxo howebꞌ teꞌ regla teꞌ acacia, bꞌay chiꞌok teꞌ aqꞌinteꞌ yinh huneꞌ ispakꞌul watuttuꞌan, 27 kat hewatxꞌenpaxo howebꞌxa teꞌ regla bꞌay chiꞌok teꞌ aqꞌinteꞌ yinh qꞌaxepxa ispakꞌul watuttuꞌan; yebꞌ howebꞌxa teꞌ chiꞌokniko yinh yetkꞌulal bꞌay chito tzꞌayik. 28 Teꞌ regla chiꞌok yiktabꞌal chiꞌichito teꞌ yinh huneꞌ istxikin masanta chiꞌapni teꞌ yinh hunxa istxikin. 29 Tzujan tuꞌ kat heyaniko chꞌen oro yinh teꞌ aqꞌinteꞌ yebꞌ yinh teꞌ regla, kat heyaniko chꞌen argolla oronhe yinh teꞌ aqꞌinteꞌ tuꞌ, yunhe yekꞌto teꞌ regla yul chꞌen. 30 Kaw hakaꞌtikꞌa yechel inyehan tawet iswiꞌ witz, hak tuꞌ cheyute watuttuꞌan.
31 »Chewatxꞌenpaxo huneꞌ qꞌap cortina yinh qꞌap yax qꞌap yebꞌ yinh qꞌap kajmutzꞌmunhe, yebꞌ qꞌap kaj jilni, yebꞌ qꞌap lino chembꞌil; kat ischemlaxiko yechel ebꞌnaj querubín yinh qꞌap. 32 Kat heyaniko kanhebꞌ chꞌen gancho oro yinh istiꞌ qꞌap, kat helokbꞌankanh qꞌap yinh kanhebꞌ teꞌ oy acacia, kat heyanipaxiko chꞌen oro yinh teꞌ, kat helinhbꞌanayo teꞌ yibꞌanh kanhebꞌ yoj pilal plata. 33 Lahwi tuꞌ kat islokbꞌalax istiꞌ qꞌap cortina yinh chꞌen gancho tuꞌ; tzujan tuꞌ xin kat heyanikto isKaxhahil isTrato Komam tꞌinhbꞌabꞌilkanoj yintalto qꞌap cortina. Haꞌ xin qꞌap chipohni xolbꞌal huneꞌ Ehobꞌal Txahul yebꞌ huneꞌ Ehobꞌal ekꞌna kaw Txahul. 34 Kat heyaniko ismajil teꞌ Kaxha tuꞌ bꞌay ayko ebꞌnaj querubín ay ismay, yul huneꞌ Ehobꞌal ekꞌna kaw Txahul. 35 Kat heyanayo teꞌ mexha satakꞌti qꞌap cortina tuꞌ yinh yetkꞌulal norte; haxa candelabro yinh yetkꞌulal sur cheyayo chꞌen, satakꞌto teꞌ mexha.
36 »Kat hewatxꞌen hunu qꞌap cortina oxebꞌ yelawil aykoj; qꞌap yax yebꞌ qꞌap kajmutzꞌmunhe, yebꞌ qꞌap kaj jilni, chiꞌok ispultahilo watutan hakaꞌ mantiado tuꞌ, kat ischemlaxiko yechel yinh qꞌap yu mak kaw helan ischemli. 37 Kat hewatxꞌenpaxo howebꞌ yoyal qꞌap, yaj teꞌ acacia cheyakoj, kat heyanipaxiko chꞌen oro yinh teꞌ, kat heyaniko isganchohal oro, kat heyanayo howebꞌ chꞌen bronce yalanh yoyal qꞌap cortina bꞌay chonhokapnoj,» xhi Komam tet yaꞌ Moisés.