2 «Hal tet konhobꞌ Israel ta chiskutxbꞌako isyebꞌalqꞌabꞌ wetan. Huneꞌ yebꞌalqꞌabꞌ chiꞌah tuꞌ, chekutxbꞌakanh xol anma, chꞌel yinh iskꞌul yaqꞌni. 3 Haꞌ tzet chikutxbꞌalaxkanh tuꞌ, haꞌ ton hunteqꞌan tiꞌ: chꞌen oro, chꞌen plata yebꞌ chꞌen cobre, 4 qꞌap qꞌap yaxtzꞌantzꞌonhe, qꞌap kajmutzꞌmunhe, qꞌap qꞌap kaj jilni, qꞌap kaw kꞌul, xil noꞌ chiw. 5 Yebꞌpaxo istzꞌumal noꞌ winaj chiw, kaj jilni anhtebꞌil, yebꞌ hunteqꞌan istzꞌumal no noqꞌ kaw ay istohol, yebꞌ teꞌ acacia. 6 Yebꞌ teꞌ aceite chiꞌokniko yinh lámpara, yebꞌ anh kaw xuqꞌ sam chisomlaxiko xol teꞌ aceite chijobꞌlaxato yinh iswiꞌ mak chiꞌok yinh inmunilan, yebꞌ anh kaw xuqꞌ sam chꞌalaxiko xol teꞌ pom. 7 Yebꞌ chꞌen cornalina yebꞌ hunteqꞌan chꞌen nixhte chꞌen kaw saqꞌal jilni chꞌok yinh ischaleko yebꞌ yinh istxam iskꞌul xil isqꞌap yaꞌ yahawil sacerdote.

8 »Kat hewatxꞌenkanh hunu nha wetan yunhe wehayojan xol anma Israel. 9 Huneꞌ nha bꞌay chineh tuꞌan yebꞌ sunil tzet chiꞌokniko yul nha tuꞌ; kaw lahan chawute ismalil hakaꞌ ismalil chiwaqꞌan tawet,» xhi Komam tet yaꞌ Moisés.

10 Yalnipaxo Komam Dios tet yaꞌ Moisés: «Watxꞌewe hunu Kaxha,^a yaj teꞌ acacia cheyakoj; huneꞌ metro yok 12 (kabꞌlanhebꞌ) centímetro ispakꞌul teꞌ, 67 (hujebꞌ iskanhwinaj) centímetro istelbꞌal teꞌ yebꞌpaxo satbꞌal teꞌ. 11 Kat hawaniko chꞌen oro yinhla iskꞌul teꞌ yebꞌ yul teꞌ, kat heyanipaxiko chꞌen oro yelawilo yinhla istiꞌ teꞌ. 12 Kat hewatxꞌen kanhebꞌ argolla, oro petan yehi, kat heyaniko hunun chꞌen yinh hunun istxikin teꞌ, yuxin kabꞌebꞌ chꞌen cheyako yinh huneꞌ iskꞌul teꞌ, kabꞌebꞌxa chꞌen xin yinh qꞌaxepxa iskꞌul teꞌ. 13 Kat hewatxꞌenpaxo kabꞌebꞌ te teꞌ yinh teꞌ acacia, kat heyaniko chꞌen oro yinh teꞌ; 14 kat heyanilto teꞌ yul chꞌen oro petan yehi ayko yinhla kabꞌebꞌ iskꞌul teꞌ Kaxha tuꞌ, huneꞌ teꞌ yinh qꞌaxep, hunxa teꞌ xin yinh qꞌaxepxa; chiꞌoknikoj yet chibꞌatxlaxikꞌo teꞌ Kaxha tuꞌ. 15 Matxa xin cheyilti teꞌ yul chꞌen oro petan yehi ayko yinh teꞌ Kaxha, wal ye hakaꞌ tuꞌ. 16 Yul teꞌ Kaxha tuꞌ xin, chekꞌubꞌato chejbꞌanile tzꞌibꞌnhebꞌiliko yinh chꞌen chꞌen chiwaqꞌan teyet.

17 »Chewatxꞌenpaxo ismajil teꞌ bꞌay chiꞌaqꞌlax tanho mule, chꞌen oro kaw kꞌul cheyako yinh teꞌ; huneꞌ metro yok 12 (kabꞌlahonhebꞌ) centímetro, 67 (hujebꞌ iskanhwinaj) centímetro issatbꞌal teꞌ. 18 Haxa yibꞌanh ismajil teꞌ Kaxha tuꞌ, cheyayo kabꞌebꞌ yechel ebꞌnaj querubín watxꞌebꞌil yinh chꞌen oro, chakꞌbꞌil yu martillo; hunun ebꞌnaj querubín tuꞌ chilinhbꞌalaxayoj yiktabꞌal istxikin ismajil teꞌ Kaxha tuꞌ. 19 Haꞌ ismajil teꞌ Kaxha tuꞌ yebꞌ yechel ebꞌnaj querubín huneꞌnhe yiqꞌni isbꞌa; hunun ebꞌnaj querubín tuꞌ chilinhbꞌalaxayoj yiktabꞌal istxikin ismajil teꞌ Kaxha tuꞌ. 20 Ebꞌnaj querubín tuꞌ, ishakxiti ebꞌnaj yinh hunun, yajaꞌ yilnayo ebꞌnaj yibꞌanh ismajil teꞌ Kaxha tuꞌ; lehannilto xikꞌ ebꞌnaj yibꞌanh ismajil teꞌ Kaxha tuꞌ, kꞌuxannhe ismajnayo ebꞌnaj ismajil teꞌ yu xikꞌ. 21 Lahwi tuꞌ, kat heyaniko ismajil teꞌ Kaxha tuꞌ, kat hekꞌubꞌankanto chejbꞌanile tzꞌibꞌnhebꞌiliko yinh chꞌen chꞌen chiwaqꞌan tawet. 22 Haꞌ yibꞌanh ismajil teꞌ Kaxha bꞌay ayayto chꞌen chꞌen bꞌay tzꞌibꞌnhebꞌilayo chejbꞌanile wuhan, xolbꞌal ebꞌnaj kawanh querubín, haꞌ tuꞌ chinye hinbꞌahan, kat intzotelan tawet, kat walnihan tzet wal isyijen anma Israel,» xhi Komam tet yaꞌ Moisés.

23 Yalnipaxo Komam Dios tet yaꞌ Moisés: «Chewatxꞌepaxo huneꞌ teꞌ mexha, yaj teꞌ acacia cheyako yinh; 90 (lahonhebꞌ ishokꞌal) centímetro ispakꞌul teꞌ, 45 (howebꞌ yoxkꞌal) centímetro satbꞌal teꞌ, yebꞌ xin 67 (hujebꞌ iskanhwinaj) centímetro istelbꞌal teꞌ. 24 Kat heyaniko chꞌen oro, chꞌen kaw kꞌul yinh teꞌ mexha tuꞌ, kat heyaniko chꞌen oro yelawil iskꞌul iskanhebꞌal istxikin teꞌ. 25 Kat hewatxꞌenpaxo yelawil yibꞌanh istiꞌla teꞌ yinh ishoyanil yinh chꞌen oro, oxebꞌ pulgada chukanh bꞌay chiꞌok chꞌen oro tuꞌ. 26 Chewatxꞌepaxo kanhebꞌ chꞌen argolla oro petan yehi, kat heyaniko chꞌen yinh hunun istxikin teꞌ bꞌay ayko yoj teꞌ mexha tuꞌ. 27 Haꞌ iskawilal yelawil teꞌ mexha cheyako chꞌen argolla, haxinwal chu yekꞌto te teꞌ yul chꞌen, yunhe isbꞌatxlaxkanh mexha tuꞌ. 28 Kat hewatxꞌen kabꞌebꞌo te teꞌ yinh teꞌ acacia, kat heyaniko chꞌen oro yinh teꞌ, kat heyanilto teꞌ yul chꞌen oro petan yehi yunhe chiyu isbꞌatxlaxikꞌo teꞌ. 29 Kat hewatxꞌenpaxo chꞌen plato, chꞌen cuchara yebꞌ chꞌen xhalu oro, kat hewatxꞌenpaxo chꞌen sekꞌ oro, bꞌay chiꞌetxi tzet chꞌaqꞌlax yebꞌalqꞌabꞌehal. 30 Kat heyanayo ixim pan yibꞌanh mexha yinh sunilbꞌal tzꞌayik insatajan; ixim pan chiꞌay sat mexha tuꞌ, wetan ye ixim,» xhi Komam tet yaꞌ Moisés.

31 Yalnipaxo Komam Dios tet yaꞌ Moisés: «Chewatxꞌenpaxo huneꞌ candelero, nabꞌa oro cheyako yinh, haꞌ chꞌen martillo chichakꞌni yet chiwatxꞌelaxi; wal yoj yebꞌ bꞌay chiꞌay bꞌatxnoj yebꞌ netbꞌal yebꞌ isxumakil hunxanhe chꞌenal chutekano isbꞌa. 32 Wajebꞌ xin isqꞌabꞌ chiꞌoki, oxox isqꞌabꞌ yinh qꞌaxqꞌep iskꞌul. 33 Oxebꞌ chꞌen net hakaꞌ teꞌ isxumakil teꞌ almendro ayko yinh huneꞌ isqꞌabꞌ, aypaxiko yechel teꞌ manzan yebꞌ teꞌ kaj. Yinh hunxa isqꞌabꞌ, aypaxo oxebꞌ chꞌen net hakaꞌ teꞌ isxumakil teꞌ almendro, aypaxiko yechel teꞌ manzan yebꞌ teꞌ kaj yinh. Hak tuꞌ yeko yechel iswajebꞌal isqꞌabꞌ chꞌen candelero tuꞌ. 34 Haꞌ chꞌen aykanh yiktabꞌal bꞌay chichꞌibꞌilo isqꞌabꞌ tuꞌ, ay kanhebꞌ isnet hakaꞌtikꞌa jilnipaxo isxumakil teꞌ almendro yebꞌ sat teꞌ yebꞌ iskajil teꞌ. 35 Yalanh kabꞌkabꞌ isqꞌabꞌ chꞌen tuꞌ xin ayiko yechel sat teꞌ manzan, hak tuꞌ xin yalanh hunun kabꞌkabꞌ isqꞌabꞌ ayiko yechel sat teꞌ manzan. Hak tuꞌ ye chꞌen wajebꞌal isqꞌabꞌ. 36 Haꞌ yechel sat teꞌ manzan yebꞌ isqꞌabꞌ chꞌen tuꞌ hunnhe yiqꞌni isbꞌa. Chichakꞌlax yu martillo yet chiwatxꞌi, nabꞌa oro chꞌen chiꞌok yinh.

37 »Kat hewatxꞌenpaxo hujebꞌ islamparahil, kat heyanahto yibꞌanh yunhe ismujli sataj. 38 Haxa chꞌen tenaza chiꞌinati istanhil, yebꞌ isplatohal, oro chꞌen iskabꞌebꞌal. 39 33 (Oxlanhebꞌ iskawinaj) kilo oro chiꞌokniko iswatxꞌebꞌanil chꞌen candelero tuꞌ yebꞌ hunteqꞌanxa tzet chiꞌokniko yintaj. 40 Kaw cheyil hewatxꞌen hunteqꞌan tiꞌ, kaw hakaꞌtikꞌa yechel inyehan tawet yinh iswiꞌ witz, hak tuꞌ cheyute,» xhi Komam tet yaꞌ Moisés.