—Ahanhti yebꞌ yaꞌ Aarón, naj Nadab yebꞌ naj Abiú, yebꞌpaxo 70 (lahonhebꞌ iskanhwinaj) ebꞌnaj ichamta winaj chiꞌijbꞌali xol ebꞌnaj Israel bꞌay ay intiꞌan, yajaꞌ xin nahat chꞌel ebꞌnaj winhan, kat yay jahnoj. 2 Wal hach xin chachhitziko inkꞌatanhan, wal ebꞌnaj xin mach chu ishitziko ebꞌnaj, nitam konhobꞌ chu yahti inkꞌatanhan, xhi Komam tet yaꞌ Moisés.

3 Isto yaꞌ Moisés, yalno sunil tzet ischej Komam Jahawil isyijeꞌ konhobꞌ Israel. Hayet yabꞌen anma Israel tuꞌ, istaqꞌwi hakaꞌ tiꞌ:

—Chikoyijehanh sunil tzet chischej Komam kowatxꞌehanh, xhi anma Israel. 4 Istzꞌibꞌnhenkano yaꞌ Moisés sunil tzet yalkano Komam tet yaꞌ. Haxa yinh hunxa tzꞌayik kaw sahabꞌ ah yaꞌ Moisés, iswatxꞌenkanh yaꞌ huneꞌ bꞌay chꞌaqꞌlax xahanbꞌal yich witz tuꞌ; islatzꞌbꞌankanh yaꞌ 12 (kabꞌlanhebꞌ) chꞌen chꞌen hakaꞌtikꞌa isbꞌisil hunun majan ebꞌnaj Israel. 5 Lahwi tuꞌ, ischejni yaꞌ hunteqꞌan ebꞌnaj tzeh Israel ispotxꞌno noꞌ wakax yunhe isnhuslax noꞌ yinh xahanbꞌalil tet Komam Dios; yaqꞌnipaxo ebꞌnaj isxahanbꞌal yet aqꞌankꞌulal tet Komam. 6 Ispohni yaꞌ Moisés yikta ischikꞌil noꞌ wakax tuꞌ, yanayto yaꞌ yul hunteqꞌan pechꞌan; haxa yiktaxa ischikꞌil noꞌ xin istixhayo yaꞌ yibꞌanh bꞌay chꞌok xahanbꞌal. 7 Lahwi tuꞌ, yiniti yaꞌ teꞌ hum bꞌay tꞌinhbꞌabꞌil istrato Komam, yawten yaꞌ teꞌ yabꞌeꞌ konhobꞌ Israel. Istaqꞌwi anma Israel, yalni hakaꞌ tiꞌ:

—Kaw chijakojanh yinh kokꞌulanh kowatxꞌenanh, kat koyijenanh sunil tzet chiyal Komam tiꞌ, xhi anma Israel.

8 Yiniti yaꞌ Moisés ischikꞌil noꞌ wakax ayayto yul pechꞌan tuꞌ, istxihnayo yaꞌ noꞌ yibꞌanh anma Israel, yalni yaꞌ tet anma hakaꞌ tiꞌ:

—Haꞌ chikꞌ tiꞌ chꞌaqꞌnikano yijaꞌ isbꞌa istrato Komam Dios chiyaqꞌkano jet; haꞌ xin chitꞌinhbꞌankano hunteqꞌan tzotiꞌ yaqꞌ Komam jet, xhi yaꞌ Moisés.

9 Lahwi tuꞌ, yahto yaꞌ Moisés yebꞌ yaꞌ Aarón yebꞌ naj Nadab yebꞌ naj Abiú iswiꞌ witz, yebꞌ 70 (lahonhebꞌ iskanhwinaj) ebꞌnaj ichamta winaj Israel. 10 Yilni ebꞌnaj Israel Komam Dios, isDiosal bꞌey tuꞌ, haꞌ bꞌay ayayo yoj Komam toxanhe chitzejtzon hakaꞌ chꞌen zafiro, kaw yaxnarnonhe jilni hakaꞌ satkanh. 11 Matzet utelax ebꞌnaj yu isqꞌaqꞌal yip Komam, wal xin kaw yil ebꞌnaj Komam, iswaꞌ ebꞌnaj sataj Komam.

12 Yalnipaxo Komam Jahawil tet yaꞌ Moisés:

—Moisés, ahanhti iswiꞌ witz bꞌay ay intiꞌan, kat kinhawechmanan; yuto chiwaqꞌan kabꞌebꞌ chꞌen chꞌen paqꞌan yehi bꞌay intzꞌibꞌnhekojan chejbꞌanile yebꞌ kuybꞌanile yu kexinkuynihan, xhi Komam.

13 Yahwano yaꞌ Moisés yebꞌ yaꞌ Josué, yaꞌ ischejabꞌ yaꞌ Moisés tuꞌ, yahto ebꞌyaꞌ iswiꞌ witz bꞌay ay Komam. 14 Yalni yaꞌ Moisés tet ebꞌnaj ichamta winaj Israel:

—Kananhwekano bꞌey tiꞌ, haꞌ tiꞌ chonhheyechmahanh, chikankano yaꞌ Aarón yebꞌ yaꞌ Hur tekꞌatanh; ta ay tzet cheyoche hewatxꞌeꞌ, haꞌ tet yaꞌ cheqꞌambꞌe, xhi yaꞌ Moisés.

15 Lahwi yalni yaꞌ Moisés, yahto yaꞌ iswiꞌ witz; yok hoyno huneꞌ moyan yinh iswiꞌ witz tuꞌ. 16 Yayilo isqꞌaqꞌal ismay Komam Dios yibꞌanh iswiꞌ witz Sinaí. Wajebꞌ tzꞌayik ok hoyno huneꞌ moyan yinh iswiꞌ witz tuꞌ; haxa yinh ishuj tzꞌayik xin yawten Komam yaꞌ Moisés xol moyan. 17 Isye isbꞌa isqꞌaqꞌal yip Komam yinh iswiꞌ witz nahat yekanh sata konhobꞌ Israel, hakaꞌ hunu qꞌa qꞌaꞌ kaw kaj txaltxonhe chonhtzꞌato yu, hak tuꞌ yu isyeni isbꞌa Komam. 18 Lahwi tuꞌ, ishitzato yaꞌ Moisés yinh iswiꞌ witz, yokto yaꞌ xol huneꞌ moyan hoyanikoj; iskankano yaꞌ yinh 40 (kawinaj) tzꞌayik yebꞌ 40 (kawinaj) aqꞌbꞌal bꞌey tuꞌ.