23
»Mach chu hehobꞌnikanh leqꞌtiꞌal yinh hunu heyet anmahil; mach lahano cheyute habꞌa yebꞌ anma txꞌoj isnabꞌal cheyaqꞌni hebꞌa yinh tzet ye tuꞌ mach yeloj.2 »Mach chexoktzujno yinta ebꞌnaj txꞌoj, waxanhka kaw niman yiqꞌni isbꞌa ebꞌnaj. Hayet chexqꞌanlax heyaqꞌni hebꞌa yinh hunu tzet ye tuꞌ mach toholoj, mach cheyako habꞌa xol, waxanhka hunbꞌulan yiqꞌni isbꞌa ebꞌnaj. 3 Waxanhka kaw mebꞌaꞌ hunu mak, yajaꞌ ta ay ismul mach cheyato habꞌa yibꞌanh ismul tuꞌ.
4 »Ta chiꞌilcha isburro maka iswakax hunu mak ayko ishowal teyinh heyu, aqꞌwe meltzoho noꞌ tet. 5 Ta cheyil yaykꞌay isburro huneꞌ mak ayko ishowal teyinh yalanh yijatz, ¿chimkexhkolwa yinh? Yilal hekolwa yinh heyinikanh noꞌ yebꞌ yijatz.a
6 »Machojabꞌ cheyilo ispixan naj mebꞌaꞌ yet chiskolni isbꞌa naj yet chiwatxꞌelaxayo hunu howal, yuto ay yelapno ye naj.
7 »Mach cheyako hebꞌa xol ebꞌnaj chinanikanh tzotiꞌ yinh hunuxa maka, chiqꞌannayo kamikal yibꞌanh mak tohol isbꞌeybꞌal, yuto haꞌ mak chiwatxꞌen hakaꞌ tuꞌ chiwalan ta chako ismul wetan.
8 »Mach chechah melyu yinh ewantajil yet chewatxꞌen hunu tzet ye tuꞌ; yuto haꞌ mak chichahni chꞌen melyu tuꞌ, lahan hakaꞌ mak mach chu yilni; machi xin chiswatxꞌe tzet ye tuꞌ yinh istoholal, hak tuꞌ xin chu iskꞌaywa ebꞌnaj mach ismul.
9 »Mach cheyeta anma nan konhobꞌal ay texol, yuto heyohta tzet heyaqꞌle xol anma nan konhobꞌal yet heyekꞌ sat txꞌotxꞌ Egipto.
10 »Wal xin wajebꞌ habꞌil chimunla hetxꞌotxꞌ, kat hekutxbꞌankanh sat hetzꞌunubꞌ tuꞌ. 11 Wal yinh ishuj habꞌil xin, cheyakano txꞌotxꞌ xewoj; haꞌ xin tzet chichꞌibꞌkanh sat txꞌotxꞌ yinh ishuj habꞌil tuꞌ, matxa cheyikanh, to yet anma mebꞌaꞌ ay yul hekonhobꞌ yehi, kat xin islohnito noꞌ xoltelajil noqꞌ tzet matxa chilahwikanh. Hak tuꞌ cheyutepaxo yinh teꞌ uva yebꞌ teꞌ olivo.
12 »Wajebꞌ tzꞌayik chexmunla yul semana, haxa yinh ishuj tzꞌayik xin chexxewi, kat isxewpaxo hewakax yebꞌ heburro; kat xin isxewpaxo ebꞌnaj hechejabꞌ yebꞌ ebꞌnaj nan konhobꞌal ay texol, yunhe yiqꞌni yip ebꞌnaj.
13 »Sunil tzet chiwalan tawet tiꞌ, chekꞌubꞌa, kat heyijeni. Machojabꞌ bꞌaqꞌinh chꞌaqꞌlax bꞌinaho isbꞌi hunuxa tzet chihal-lax diosal texol, nitam heyaqꞌni bꞌinahoj,» xhi Komam tet yaꞌ Moisés.
Oxebꞌ nime qꞌinh chiꞌekꞌtzelax yinh habꞌil
14 Yalnipaxo Komam tet yaꞌ Moisés: «Yulbꞌal habꞌil, oxel cheyekꞌtze qꞌinh wetan. 15 Cheyekꞌtze qꞌinh yet chewani ixim pan machi yanhal aykoj. Hakaꞌtikꞌa yu walnihan tawet, yulbꞌal hujebꞌ tzꞌayik chewah ixim pan machi yanhal aykoj. Huneꞌ qꞌinh tuꞌ yulbꞌal ixahaw Abib cheyekꞌtze, yuto yinh huneꞌ ixahaw tuꞌ kexwilojan sat txꞌotxꞌ Egipto. Machi mak chul insatajan ta machi isyebꞌalqꞌabꞌ iqꞌbꞌil yu.
16 »Cheyekꞌtzepaxo qꞌinh yet cheyinikanh bꞌabꞌel sat tzet tzꞌunbꞌil heyu, kat heyekꞌtzen qꞌinh yet cheyinikanh sat hetzꞌunubꞌ yinh islahobꞌal habꞌil.
17 »Sunil ebꞌnaj winaj yilal iskutxbꞌan isbꞌa ebꞌnaj oxel insatajan hanin Yahawilintiꞌan yulbꞌal hunun habꞌil, yet chꞌekꞌtzelax hunun qꞌinh tiꞌ wetan.
18 »Hayet cheyaqꞌni no noqꞌ yinh xahanbꞌalil wetan, mach hunnheho chu heyalten ischikꞌil noꞌ yebꞌ ixim pan ayko yanhal; machi xin chu hekꞌubꞌanto ismantecahil noꞌ yinh hunxa tzꞌayik.b
19 »Haꞌ bꞌabꞌel sat hetzꞌunubꞌ kaw kꞌul, yilal heyinito yul watutan, hanin heDiosal intiꞌan.
»Mach chu hetahtzen ischibꞌehal noꞌ nixhte chiw xol yal yim ismiꞌ,» xhi Komam tet yaꞌ Moisés.
Huneꞌ yángel Komam Jahawil ijbꞌanikꞌo anma Israel
20 Yalnipaxo Komam Jahawil tet yaꞌ Moisés: «Chinchejtojan wángelan tesataj yunhe kexistanhen yinh hebꞌel, kat kexyinito sat txꞌo txꞌotxꞌ watxꞌebꞌilxa teyet wuhan. 21 Mach chexhitzilo yinh naj, yijem cheyute hebꞌa tet naj. Mach chaqꞌ nimankꞌulal naj teyinh tato manhkꞌom cheyute hebꞌa tet naj, yuto haninan anheko naj texol.c 22 Ta kaw yeli cheyabꞌe tzet chal naj kat heyijen tzet chiwalan, wal tuꞌ chiwakojan inhowalan yinh mak chiꞌaniko ishowal teyinh; kat waqꞌni ekꞌojan yaꞌ yanma mak chexetani. 23 Haꞌ naj wángeltiꞌan chiꞌok tesataj, kat kexyinito naj sat istxꞌotxꞌ ebꞌnaj amorreo, ebꞌnaj hitita, ebꞌnaj ferezeo, ebꞌnaj cananeo, ebꞌnaj heveo yebꞌ ebꞌnaj jebuseo, yuto chintanhtzelojan hunteqꞌan anma tuꞌ yinh hunelnhe. 24 Mach cheyilto istxꞌojal chiswatxꞌe hunteqꞌan anma tuꞌ, mach chexay jahnoj, kat heyinayo hebꞌa sata istioxh, wal xin chemaqꞌ poho sunil hunteqꞌan istioxh tuꞌ yebꞌ hunteqꞌan chꞌen chꞌen bꞌay chiꞌay jahnoj. 25 Hanhechꞌan wetan, hanin Heyahaw intiꞌan, heDiosal bꞌay cheyiyo hebꞌa, kat wanayojan isyaxil yibꞌanh tzet cheloh yebꞌ yibꞌanh ha haꞌ cheyukꞌu, kat winilojan sunilal yabꞌil texol. 26 Wal xin txꞌiꞌal habꞌilal chiwaqꞌan teyet. Machi hunu ebꞌix ix texol tonhe chꞌel nixhte yunin yinh yebꞌ machi hunu ebꞌix machi yunin.
27 »Chiwaqꞌ xiwojan iskꞌul anma chexkajni, kat waqꞌni somchahokanhan isnabꞌal anma ay yul hunun konhobꞌ bꞌay chexekꞌi. Haxa anma chiꞌaniko ishowal teyinh, chꞌelkanh teyet wuhan. 28 Chiwakojan xiwkilal yinh yanma ej konhobꞌ bꞌay chilakexekꞌi. Maxhtotikꞌa chexapni yul iskonhobꞌ tuꞌ, kat yelkanh yu xiwkilal teyet. Chixiwkanh anma heveo, anma cananeo yebꞌ anma heteo teyet, kat yelkanh tesataj. 29 Mach chiwilojan anma tuꞌ yinhnhe huneꞌ habꞌil yunhe machi etaxto txꞌo txꞌotxꞌ, yebꞌ yunhe machi poh no noqꞌ xoltelajil, kat kexyetan noꞌ. 30 Wal xin nixhtejal intzumbꞌenilojan anma tuꞌ tesataj, yet kaw xapohchakanokanh heyuninal, kat yokkano txꞌotxꞌ heyu. 31 Xawayojan ismohonal hetxꞌotxꞌ tuꞌ; chiꞌichiti txꞌotxꞌ yinh haꞌ Kajinh Mar masanta chiꞌapni txꞌotxꞌ yinh haꞌ mar bꞌay ay ebꞌnaj filisteo, kat yichipaxti txꞌotxꞌ yinh txꞌotxꞌ desierto, kat yekꞌapno txꞌotxꞌ yinh haꞌ niman Éufrates. Chiwakojan sunil hunteqꞌan anma tuꞌ yul heqꞌabꞌ, kat winilojan ebꞌnaj yinh hesat.