Chejbꞌanile yinh tzet chiꞌelqꞌalaxtoj
22
Yalnipaxo Komam tet yaꞌ Moisés hakaꞌ tiꞌ: «Ta ay mak chiꞌelqꞌanto hunu noꞌ wakax maka hunu noꞌ meꞌ, kat ispotxꞌni noꞌ maka chistxonhto naj noꞌ, hokꞌonh noꞌ wakax chaqꞌ naj selelo noꞌ yelqꞌa naj tuꞌ; taka meꞌ noꞌ xin, kanhkꞌonh noꞌ meꞌ chaqꞌ naj selelo noꞌ yelqꞌa tuꞌ. 2 Ta ay hunu naj chiꞌilcha yet lanhan yelqꞌawi, kat ismaqꞌlax naj, kat iskam naj; iskamikal naj tuꞌ, mach chiꞌok ismulo naj chimaqꞌnikamo naj. 3 Yaj ta tzꞌayikal chiꞌilcha naj yinh yeleqꞌ, kat ismaqꞌlaxkamo naj, iskamikal naj tuꞌ, chiꞌok ismulo naj chimaqꞌnikamo naj.»Haꞌ mak chiꞌelqꞌan hunu tzet ye tuꞌ, yilal istohlan tzet chiyelqꞌa tuꞌ; yajaꞌ ta machi ismelyu naj chitohlani, yilal istxonhlaxto naj kat istohlan naj tzet chelqꞌa tuꞌ.
4 »Yajaꞌ ta xin chiꞌilcha no noqꞌ yelqꞌa naj yebꞌ xin ta itzitzto noꞌ, kayel chistohla naj noꞌ, machi yok yinh ta waxanhka wakax noꞌ, maka burro noꞌ, maka meꞌ noꞌ.
5 »Ta ay hunu naj chistanhe maka chisbꞌejtzokto isnoqꞌ lowo yul ispeyabꞌ hunuxa maka, yilal yanayo naj selel sat istzꞌunubꞌ naj tuꞌ, yaj hunteqꞌan kaw kꞌul, yinh ismul noꞌ chakoj.
6 »Ta ay hunu naj chiꞌaniko qꞌaꞌ, kat isto qꞌaꞌ yinh teꞌ txꞌix kat isnhusnito qꞌaꞌ ixim trigo tenan, maka ixim qꞌanxa aytoko xol istel, haꞌ mak chiꞌanito qꞌaꞌ tuꞌ, yilal istohlan ixim trigo chitzꞌato tuꞌ.
7 »Ta ay hunu mak chiyaqꞌ ismelyu maka hunuxa tzet ye tuꞌ kaw ay istohol iskꞌubꞌaꞌ hunu naj, kꞌuxan xin chiꞌelqꞌalaxilti yul yatut naj; ta xin chiꞌilcha naj chiꞌelqꞌawi tuꞌ, yilal kayel chistohla naj. 8 Yajaꞌ ta mach chiꞌilcha mak elqꞌantoj yilal yilaxto naj yahaw nha tuꞌ sata ebꞌnaj juez, kat yil-laxi ta maxhtaj naj elqꞌanto tzet aqꞌlax iskꞌubꞌaꞌ tuꞌ.
9 »Ta ay hunu mak chihalni hunu noꞌ wakax yetoj, maka hunu noꞌ burro, maka hunu noꞌ meꞌ, maka hunu xilqꞌape, maka hunu tzet ye tuꞌ kꞌaynatoj chaliko yetoj; taka xin ay mak chihalni ta yet ye hunteqꞌan tuꞌ, yilal yilaxto kawanh mak tuꞌ sata ebꞌnaj juez. Haꞌ mak ay ismul tuꞌ yilal istohlan kayel tzet chal yeto tuꞌ tet naj yahaw.
10 »Ta ay hunu naj chiꞌel yinh iskꞌul ischahni tet hunuxa maka hunu noꞌ burro, maka hunu noꞌ wakax, maka hunu noꞌ meꞌ, maka hunuxa tzet noqꞌal istanheꞌ; yajaꞌ ta chikam noꞌ, maka ta chiꞌok hunu islahwilal noꞌ, maka ta chiꞌelqꞌalaxto noꞌ, machi xin mak chiꞌilni; 11 haꞌ naj chahnhe noꞌ istanheꞌ tuꞌ, chaqꞌ bꞌinaho naj isbꞌi Komam Dios yinh yunhe yaqꞌni isbꞌa yinh ta mach ismul naj yinh noꞌ, kat yabꞌenti naj yahaw noꞌ tuꞌ tzet chal naj, machi xin chistohla naj noꞌ tet naj. 12 Yajaꞌ ta yinh sat naj elqꞌalaxto noꞌ, wal tuꞌ yilal istohlan naj noꞌ tet yahaw tuꞌ; 13 taka hunu noꞌ xoltelajil noqꞌ chipotxꞌnikamo noꞌ xin, yilal yinito naj hanikꞌo isnimanil noꞌ tuꞌ isyebꞌ tet naj yahaw noꞌ, hak tuꞌ xin mach chistohla naj noꞌ. 14 Ta ay hunu naj chikꞌamnhen hunu no noqꞌ, kꞌuxan xin iskam noꞌ maka chilahwi noꞌ mach xin yinho sat naj yahaw chu noꞌ, yilal istohlan naj noꞌ tet naj yahaw tuꞌ. 15 Yajaꞌ ta yinh sat naj yahaw tuꞌ chu noꞌ, wal xin mach chistohla naj noꞌ tet naj yahaw, hanhkꞌanhe iskꞌambꞌanil noꞌ chiyaqꞌ naj ta kꞌamil ye noꞌ yu naj.
Chejbꞌanile yinh iskꞌulal chiwatxꞌelaxi
16 »Ta ay hunu naj winaj tonhe chiꞌetli yinh hunu ix ix, kat isway naj yebꞌ ix, yajaꞌ ta xin maxhto mak chiqꞌanni ix, yilal yaqꞌni naj istohol ischꞌibꞌbꞌal ix tet ismam, istoholo ismul yako yinh ix, kat yiqꞌnikanokanh naj ix. 17 Yajaꞌ ta mach chisje ismam ix chiyiqꞌ naj ix, masan yilal yaqꞌni naj istohol ischꞌibꞌbꞌal ix tet ismam.
18 »Sunil ebꞌix ahbꞌe, yilal yaqꞌlax kamo ebꞌix. 19 Haꞌ mak chiwatxꞌen mule yebꞌ hunu no noqꞌ, yilal iskami.
20 »Haꞌ mak chihalten xahanbꞌal tet ej tioxh, yilal iskami, yuto wetnhehan bꞌay wal yaltelax xahanbꞌal tuꞌ.
21 »Mach cheyaqꞌ tako iskꞌul, yebꞌ mach cheyeta anma nan konhobꞌal ay tekꞌatanh, yuto kexehayo sat txꞌotxꞌ Egipto hakaꞌ nan konhobꞌal.
22 »Mach cheyeta ebꞌix hunix yebꞌ nixhte mebꞌaꞌ unin, mach ismam yebꞌ mach ismiꞌ. 23 Yuto ta cheyeta, kat yapni yel yaw wetan, chinkolwahan yinh; 24 kat istit inhowalan teyinh, kat kexintanhtzenilojan yu chꞌen espada, kat winilojan hekawil; hak tuꞌ xin chikankano heyixal hunixal, yebꞌ xin heyuninal, yinh mebꞌaꞌ uninal.
25 »Ta ay chꞌen melyu cheyaqꞌ kꞌamil tet anma mebꞌaꞌ ay tekꞌatanh ay yul inkonhobꞌtiꞌan, mach cheqꞌan yal chꞌen tet, hakaꞌ chute ebꞌnaj chꞌaqꞌni chꞌen melyu kꞌamil. 26 Ta chiyakano xil isqꞌap yunhe heyaqꞌni chꞌen melyu kꞌamil tet, aqꞌwe meltzoho xil isqꞌap tuꞌ yet chꞌay numnahi; 27 yuto hanhechꞌan huneꞌ xil isqꞌap tuꞌ, haꞌ xin chiꞌokniko yu yet ay chew yet chiꞌok wayoj. Ta xin chiꞌah yaw naj wetan, chinkolwahan yinh naj, yuto hanintiꞌan chitzꞌay inkꞌulan yinh anma.
28 »Machojabꞌ chexbꞌawa yinh ebꞌnaj juez, mach chetzꞌaktiꞌnhepaxo ebꞌnaj yahawil konhobꞌ.
29 »Machojabꞌ chiꞌekꞌ tzꞌayik yinh heyiniti bꞌabꞌel sat hetzꞌunubꞌ wetan yebꞌ teꞌ bꞌabꞌel yal uva, yebꞌ hebꞌabꞌel winaj unin chipitzkꞌahi cheyaqꞌ wetan; 30 kat heyaqꞌnipaxo noꞌ bꞌabꞌel yunin hewakax yebꞌ hemeꞌ wetan. Wajebꞌnhe tzꞌayik chikankano iskꞌatanh ismiꞌ, haxa yinh iswaxajebꞌ tzꞌayik kat heyiniti noꞌ wetan. 31 Hex tiꞌ, yilal hepohnilo hebꞌa xol istxꞌojal, yuto wetan heyehi.
»Mach chekꞌux ischibꞌehal no noqꞌ chipotxꞌlaxkamo yu noꞌ xoltelajil noqꞌ, wal xin haꞌ tet metx txꞌiꞌ cheyaqꞌ noꞌ.