2 »Ta cheloqꞌ hunu heyet konhobꞌ Israel hechejabꞌoj, wajebꞌnhe habꞌil chimunla naj teyintaj, haxa yinh ishuj habꞌil xin kat iskolchalo naj; machi xin melyu chaqꞌ naj yinh iskolbꞌanil tuꞌ. 3 Ta ischukilnhe naj apni yet isloqꞌlax naj tuꞌ, ischukilnhe naj chipaxtoj yet chikolchaloj. Taka tzujan yixal naj yintaj yet isloqꞌlax naj, hayet chipaxto naj tuꞌ chimeltzopaxo yixal naj yintaj. 4 Yaj xin ta haꞌ naj yahaw naj tuꞌ chiꞌaniko yixal naj, ay xin yuninal yebꞌ yixal, hayet chipaxto naj xin, chikankano yixal naj yebꞌ yuninal naj, iskꞌatanh naj yahaw tuꞌ.

5 »Yaj ta mach chisjeto naj paxoj yu ayko yanma naj yinh yixal yebꞌ yinh yuninal, yebꞌ yu chitzala naj yinh yahaw tuꞌ; ta hak tuꞌ, chiꞌilaxto naj yu yahaw sata ebꞌnaj juez, 6 kat yok linhno naj istiꞌ pulta bꞌay ay naj juez tuꞌ, maka yul ismarcohal teꞌ, kat isholchalax istxikin naj chejabꞌ tuꞌ yu yahaw yu chꞌen akuxha, hak tuꞌ xin chiꞌokkano naj ischejabꞌo naj yinh sunilbꞌal ej tiempo.

7 »Ta ay hunu naj chistxonhto iskutzꞌin chejabꞌoj, mach lahano chu iskolchalo ix hakaꞌ ebꞌnaj winaj. 8 Ta mach chischah iskꞌul naj yahaw ix tuꞌ yok ix yixalo naj, yuto machi yoche naj ix, chisje ischahnipaxo naj yahaw ix tuꞌ istohol ix tet ismam. Mach chu istxonhnito naj yahaw ix tuꞌ tet hunu mak nan konhobꞌal, waxanhka matxa chisje naj yinh ix. 9 Yajaꞌ xin ta yet chisloqꞌni naj ix tuꞌ, kat yaqꞌni naj ix yixalo hunu iskꞌahol, yilal isyaꞌilnhen naj yahaw ix tuꞌ ix hakaꞌ chu isyaꞌilnhen naj iskutzꞌin. 10 Yajaꞌ ta chissay naj hunuxa yixal, mach komon ixo chukano ix bꞌabꞌel tuꞌ; wal xin chꞌaqꞌlax tzet chislo ix, kat yaqꞌni naj xil isqꞌap ix. Aypaxo yip ix isqꞌanni tet yichamil tuꞌ yinh tzet chiꞌoknikoj yu. 11 Yaj ta mach chisyije naj yaqꞌni oxebꞌ tzet majan tiꞌ tet ix xin, wal tuꞌ chisje iskolchalo ix, machi xin melyu chiqꞌanlax tet ismam ix iskolbꞌaniloj,» xhi Komam tet yaꞌ Moisés.

12 Yalnipaxo Komam tet yaꞌ Moisés: «Tato ay mak chimaqꞌnikamo hunu anma, yilal yaqꞌlax kamo huneꞌ mak tuꞌ. 13 Yajaꞌ ta mach kꞌulo yubꞌ chikam hunu anma yu, to istzꞌayikalxa iskam yul insatan, yinh istzujanilxa chiwalnihan tawet bꞌay chito yebꞌaꞌ isbꞌa huneꞌ mak tuꞌ. 14 Yajaꞌ wal mak chitit ishowal yinh yet anmahil, kat ismaqꞌnikamoj, waxanhka yul watutan bꞌey bꞌay ay ismexhahil yet xahanbꞌal chito yebꞌaꞌ isbꞌa, cheyiltij, kat heyaqꞌni kamoj.

15 »Haꞌ mak chimaqꞌni ismam maka ismiꞌ, chimaqꞌlaxkamoj.

16 »Haꞌ mak chiꞌelqꞌanto hunu yet anmahil, kat istxonhnitoj, maka chiꞌok ischejabꞌoj mach istohol chischah, yilal yaqꞌlax kamo huneꞌ mak tuꞌ.

17 »Haꞌ mak chitzꞌaktiꞌnhen ismam maka ismiꞌ, yilal yaqꞌlax kamoj.

18 »Ta ay kawanh ebꞌnaj chiyaqꞌle howal, yajaꞌ ta ay hunu naj chiꞌok islahwilal yu hunxa naj yu chꞌen qꞌojbꞌal mak yu chismaqꞌ yu isqꞌabꞌ, kat isto naj sat txꞌat yu naj, yajaꞌ mach chikam naj, 19 mach ismul naj maqꞌwa tuꞌ ta chiꞌahwano naj ok islahwilal tuꞌ, waxanhka xin ayko isqꞌojoch naj chiꞌekꞌ naj; yaj chistohla naj yanhtebꞌanil naj yebꞌ istzꞌayik naj.

20 »Ta ay hunu naj chismaqꞌkamo hunu ischejabꞌ maka hunu ix ischejabꞌ yu te teꞌ, kat iskami, yilal yok naj sata juez, kat yalaxayo isyaꞌtajil yibꞌanh naj. 21 Yajaꞌ ta chismaqꞌ naj hunu ischejabꞌ, matzet chu naj yinh bꞌabꞌel tzꞌayik maka yinh iskabꞌ tzꞌayik, chꞌekꞌayo yibꞌanh naj yuto yet naj ye ischejabꞌ tuꞌ. Matxa chistohla naj ismul.

22 »Ta ay kawanh ebꞌnaj chiyaqꞌle howal, kat yapni isqꞌabꞌ ebꞌnaj yinh hunu ix ix ayxa chꞌini, kat yel nichꞌan unin tuꞌ yinh ix, ay ismul ebꞌnaj; yajaꞌ ta matzet chu ix, yilal yaqꞌni ebꞌnaj maqꞌni ix tuꞌ ismulta, hantatikꞌa chisqꞌan yichamil ix tet naj juez. 23 Yajaꞌ ta chikam ix xin, yilal iskam ebꞌnaj yu ismul tuꞌ. 24 Haꞌ mak chiꞌinilti isbꞌaqꞌ sat yet anmahil, haktikꞌapax tuꞌ chu yelti isbꞌaqꞌ sat huneꞌ mak tuꞌ, haxa mak chimaqꞌnilti yeh yet anmahil, haktikꞌapax tuꞌ chu ismaqꞌlaxilti ye huneꞌ mak tuꞌ. Haꞌ mak chiwoqꞌnilto isqꞌabꞌ yet anmahil, haktikꞌapax tuꞌ chu iswoqꞌlaxilto isqꞌabꞌ huneꞌ mak tuꞌ; haxa mak chimaqꞌnilto yoj yet anmahil, haktikꞌapax tuꞌ chu ismaqꞌlaxpaxilto yoj. 25 Haꞌ mak chinhusnito yet anmahil maka chiyako islahwilal, hak tuꞌ chiꞌutelaxpaxoj; haxa mak chimaqꞌni yet anmahil, haktikꞌa tuꞌ chiꞌutelaxpaxoj.

26 »Ta ay hunu naj chimaqꞌnipoho isbꞌaqꞌ sat ischejabꞌ maka ix ischejabꞌ, chikolchakanilo naj maka ix yul isqꞌabꞌ yahawil isselelo isbꞌaqꞌ sat chiskꞌayto tuꞌ. 27 Taka yeh naj chejabꞌ tuꞌ chismaqꞌilti naj yahaw tuꞌ, chikolchapaxkanilo naj yul isqꞌabꞌ yahaw tuꞌ, selelo yeh chiꞌeltij.

28 »Ta ay hunu noꞌ wakax chitejnikamo hunu maka, yilal isqꞌojlaxkamo noꞌ, yaj xin mach chikꞌuxlax ischibꞌehal noꞌ; machi xin chiꞌalaxayo isyaꞌtajil yibꞌanh naj yahaw noꞌ tuꞌ. 29 Yajaꞌ ta qꞌaynaxatikꞌa noꞌ istejwa yinh anma, machi xin chisxekbꞌa naj yahaw tuꞌ noꞌ, kat ispotxꞌni noꞌ hunu anma; yilal isqꞌojlaxkamo noꞌ yebꞌ naj yahaw noꞌ tuꞌ. 30 Yaj ta melyu chaqꞌ naj selelo iskamikal tuꞌ, yilal yaqꞌni naj hantatikꞌa chꞌen chiqꞌanlax tet naj. Haꞌ ismulta naj tuꞌ chiyaqꞌ selelo iskawil. 31 Haꞌtikꞌa huneꞌ chejbꞌanile tiꞌ chiwakanojan yinh ebꞌnaj tzeh maka ebꞌix qꞌopo chitejlaxkamo yu noꞌ wakax tuꞌ. 32 Taka chistejkamo noꞌ hunu naj chejabꞌ maka hunu ix chejabꞌ, yilal ismaqꞌlaxkamo noꞌ, kat yaqꞌlax 30 (lahonhebꞌ iskawinaj) plata melyu tet naj yahaw naj chejabꞌ maka ix chejabꞌ tuꞌ.

33 »Ta ay hunu naj tonhe chishajbꞌakano hunu kꞌuh maka chiswatxꞌe hunu holan, tonhe xin chishajbꞌakanoj, machi xin chako naj ismajil, kat istokꞌay hunu noꞌ wakax maka hunu noꞌ burro yul kꞌuh tuꞌ, 34 yilal istohlan naj noꞌ tet yahaw tuꞌ, kat iskankano noꞌ tet naj.

35 »Ta ay hunu noꞌ wakax chistejkamo iswakax hunuxa naj, wal tuꞌ chitxonhlaxto noꞌ wakax chitejwa tuꞌ, kat ispohnikanh ebꞌnaj istohol noꞌ tuꞌ yinh, yikta yet hunun ebꞌnaj; hakpax tuꞌ ischibꞌehal noꞌ chitejlaxkamo tuꞌ, yikta yet hunun ebꞌnaj. 36 Yajaꞌ ta yohtaxa naj ta qꞌaynaxa noꞌ istejnikamo yet wakaxil tonhe xin chiyil naj yahaw noꞌ tuꞌ, wal tuꞌ haꞌ selel noꞌ chikam tuꞌ chiyaqꞌ naj, kat iskankano noꞌ chikam tuꞌ tet naj,» xhi Komam tet yaꞌ Moisés.