2 »Hak tiꞌ chu heyaqꞌni nimankꞌulal yinh: Makxanhetikꞌa yaqꞌ hunu tzet ye tuꞌ kꞌamil tet hunuxa yet anmahil, chiyaqꞌ nimankꞌulal yinh tzet yaqꞌ kꞌamil tuꞌ; matxa chisqꞌan tet yet anmahil maka tet yuxhta tuꞌ ta chistohla, yuto yinh huneꞌ habꞌil tuꞌ chihal-laxi ta ishabꞌilal bꞌay chiꞌaqꞌlax nimankꞌulal yinh mak ay iskꞌas, yu yalaxiko ismay Komam Dios. 3 Wal tet anma mach Israelo ay texol xin cheqꞌanayo iskꞌas tuꞌ, yajaꞌ wal tet heyet konhobꞌ maka tet heyuxhta matxa cheqꞌanpaxoj tzet heyaqꞌ kꞌamil tet. 4 Hak tuꞌ xin machi mak mebꞌaꞌ texol, haꞌ xin Komam Dios Jahawil chiꞌanayo isyaxil teyibꞌanh yet ayexxa sat txꞌotxꞌ chiyaqꞌ teyet, yu yokkano heyu, 5 tato cheyije, kat hebꞌeybꞌalnhen sunil chejbꞌanile chiwalan teyet tiꞌ. 6 Yet chanayo Komam Dios Jahawil isyaxil teyibꞌanh hakaꞌ yu yalnikanoj; cheyaqꞌ kꞌamil tet txꞌiꞌal ej txꞌotxꞌ konhobꞌ, yaj wal hex tiꞌ xin, mach chexekꞌ kꞌam; txꞌiꞌal konhobꞌ chiꞌokto yalanh heyip, yajaꞌ wal hex xin, mach chexokto yalanh yip hunteqꞌan konhobꞌ tuꞌ.

7 »Tato ay hunu jet konhobꞌ kaw mebꞌaꞌ texol yul hunu konhobꞌ sat txꞌo txꞌotxꞌ chiyaqꞌ Komam Dios Jahawil teyet, mach chemanhkꞌo heyaqꞌni kꞌamil tet, tajka mach chikam hekꞌul yinh. 8 Wal xin kꞌulchꞌan cheyute hekꞌul yinh, cheyaqꞌni iskꞌamnheꞌ tzet kaw chiꞌokniko yu. 9 Machojabꞌ cheyaqꞌ hamanil tet istxꞌojal yinh henabꞌal, chetxumni hakaꞌ tiꞌ: “Mach chiwaqꞌan kꞌamil, yuto toxa chiꞌayilo istzꞌayikal istzꞌajna hujebꞌ habꞌil yet chiꞌaqꞌlax nimankꞌulal yinh iskꞌas anma,” tajka kexchi. How xin cheyute hesat yinh heyet konhobꞌ kaw mebꞌaꞌ tuꞌ, machi xin tzet cheyaqꞌ tet, yuxin chiꞌok naj yalaꞌ tet Komam Jahawil yinh tzet cheyute naj tuꞌ, kat yok hemul yul sat Komam. 10 Wal xin, yilal hekolwa yinh, machojabꞌ chexoqꞌ heyaqꞌni kꞌamil tet, haxinwal chiyayo Komam Dios Jahawil isyaxil yibꞌanh hemunil, yebꞌ tzet cheyoche hewatxꞌeꞌ. 11 Yuto anma mebꞌaꞌ aynhetikꞌa sat yibꞌanhqꞌinal tiꞌ, yuxin chiwalan teyet tato kꞌulchꞌan cheyute hekꞌul yinh heyuxhtaj yaꞌta yekoj, yebꞌ yinh heyet konhobꞌ matzet aya.

12 »Tato ay hunu heyet konhobꞌ hebreo winaj maka ix chistxonhto isbꞌa teyet chejabꞌoj; wajebꞌnhe habꞌil chiꞌok hechejabꞌoj, haxa yinh ishuj habꞌil chebꞌejtzo. 13 Hayet chiꞌel tekꞌatanh tuꞌ, mach laqꞌbꞌilo isqꞌabꞌ chitohi. 14 Wal xin chesah ismeꞌ, yebꞌ istrigo, yebꞌ isvino; chal yelapnoj chexkolwa yinh sunil isyaxil chiyayo Komam Dios Jahawil teyibꞌanh. 15 Mach chenahulnhetoj ta kexok ischejabꞌo anma ah Egipto, yajaꞌ xin haꞌ Komam Dios Jahawil kexkolniloj; yuxin chiwalan hunteqꞌan chejbꞌanile tiꞌ teyet.

16 »Yajaꞌ ta mach chisjeto paxoj hechejabꞌ tuꞌ, yuto chitzala teyinh, yebꞌ yinh heyuninal, yu kaw xahan ay heyu, 17 yinh hakaꞌ tuꞌ, cheyiti hunu chꞌen nime akuxha, cheyinito hechejabꞌ tuꞌ iskawilal ispultahil heyatut, kat heholni istxikin yu chꞌen. Haꞌ chihalniloj tato hechejabꞌ chiyukaniko huneꞌ mak tuꞌ yinh hunelnhe, kat iskankano tekꞌatanh; haktikꞌapax tuꞌ cheyute ta ix ix ayko hechejabꞌoj. 18 Machojabꞌ tzet chal hekꞌul yet chebꞌejtzonto hechejabꞌ tuꞌ, yuto yulbꞌal wajebꞌ habꞌil munla tekꞌatanh, yiktanhe xin istohol yiqꞌa. Ta cheyije hakaꞌ tuꞌ, chiyayo Komam Dios Jahawil isyaxil yibꞌanh sunil tzet chewatxꞌe.

19 »Sunil noꞌ bꞌabꞌel yunin hewakax yebꞌ noꞌ bꞌabꞌel yunin hemeꞌ winaj chipitzkꞌahi, chepohilo noꞌ yeto Komam Dios, Jahawil.

»Mach cheyako noꞌ bꞌabꞌel yunin hewakax winaj chipitzkꞌa yinh munil. Mach cheyipaxilo xil noꞌ bꞌabꞌel yunin hemeꞌ winaj chipitzkꞌahi. 20 Wal xin yinh hunun habꞌil chekꞌux noꞌ yebꞌ heyixal yebꞌ heyuninal sata Komam Dios Jahawil, koDiosal bꞌay chissayilo Komam bꞌay chiꞌehayoj. 21 Yajaꞌ tato ay hunu istzakaꞌil noꞌ, maka ta mach kꞌulo ye yoj noꞌ, maka isbꞌaqꞌ sat noꞌ, maka tato ay hunuxa tzet mach tzꞌajano yinh isnimanil noꞌ, mach cheyito noꞌ xahanbꞌalil tet Komam. 22 Chisje hekꞌuxni noꞌ yul hekonhobꞌ, makojxanhetikꞌa ay tekꞌatanh chisje iskꞌuxni noꞌ, machi yok yinh ta saj yehi maka mach sajo yehi hakaꞌ yalni chejbꞌanile. Chekꞌux noꞌ, hakaꞌ chu hekꞌuxni ischibꞌehal noꞌ winaj sajche, maka noꞌ miꞌe sajche. 23 Yajaꞌ wal ischikꞌil noꞌ, mach chu heloni, wal xin chejobꞌayo sat txꞌotxꞌ hakaꞌ chu isjobꞌlaxto ha haꞌ.