3 »Mach chekꞌux no noqꞌ mach sajoj.

4 »Haꞌ hunteqꞌan no noqꞌ tiꞌ chisje hekꞌuxni: noꞌ wakax, noꞌ meꞌ, yebꞌ noꞌ chiw, 5 noꞌ winaj sajche, noꞌ miꞌe sajche, noꞌ corzo, noꞌ chiw xoltelajil, noꞌ íbice, noꞌ antílope, noꞌ meꞌ xoltelajil; 6 sunil no noqꞌ pohbꞌil yisqꞌaj, yebꞌ xin chiskayenhe tzet chislo, chisje hekꞌuxni noꞌ. 7 Yajaꞌ ay noꞌ tiꞌ mach chisje hekꞌuxni, waxanhka chiskayenhe tzet chislo, maka pohbꞌil yisqꞌaj: hakaꞌ noꞌ camello, noꞌ liebre, noꞌ xhik, noꞌ tuꞌ chiskayenhe noꞌ tzet chislo, yajaꞌ xin mach pohbꞌilo yisqꞌaj noꞌ, noꞌ tuꞌ mach sajo noꞌ. 8 Yebꞌpaxo noꞌ txitam, mach chekꞌux noꞌ, pohbꞌil isbꞌa yisqꞌaj noꞌ, yajaꞌ xin mach chiskayenhe noꞌ tzet chislo, yuxin mach sajo noꞌ. Mach chekꞌux ischibꞌehal hunteqꞌan noqꞌ tuꞌ, mach chetzabꞌ isnimanil noꞌ yet kamomxa.

9 »Xol sunil no noqꞌ ay xol ha haꞌ, noꞌ ay nixhte xikꞌ yebꞌ noꞌ ay ismelyaxhil yinh, haꞌ noꞌ chekꞌuxu. 10 Wal sunil noꞌ machi xikꞌ yebꞌ machi ismelyaxhil yinh, mach chekꞌux noꞌ, mach sajo noꞌ.

11 »Sunil noꞌ chꞌik saj, chisje hekꞌuxni noꞌ. 12 Yajaꞌ ay noꞌ tiꞌ, mach chu hekꞌuxni; hakaꞌ noꞌ tꞌiw, noꞌ xulem, noꞌ usmij, 13 noꞌ gallinazo, noꞌ tꞌiw yebꞌ hunteqꞌanxa noꞌ yetbꞌi isbꞌa yebꞌ noꞌ tꞌiw tuꞌ, 14 noꞌ hoh yebꞌ hunteqꞌanxa noꞌ yetbꞌi isbꞌa yebꞌ noꞌ hoh tuꞌ. 15 Noꞌ avestruz, noꞌ kuꞌ, noꞌ gaviota, noꞌ kꞌukꞌum, yebꞌ hunteqꞌanxa noꞌ yetbꞌi isbꞌa yebꞌ noꞌ kꞌukꞌum tuꞌ, 16 noꞌ pop, noꞌ ibis, noꞌ calamón, 17 noꞌ pelícano, noꞌ usmij, noꞌ somormujo, 18 noꞌ cigüeña, noꞌ garza, yebꞌ hunteqꞌanxa noꞌ yetbꞌi isbꞌa, yebꞌ noꞌ garza tuꞌ, yebꞌ noꞌ abubilla, yebꞌ noꞌ sotzꞌ.

19 »Sunil noꞌ nixhte komon noqꞌ ay xikꞌ, mach sajo noꞌ, mach chu hekꞌuxni noꞌ. 20 Sunil noꞌ chꞌik saj, chisje hekꞌuxni noꞌ.

21 »Mach chekꞌux no noqꞌ tonhe chikamkanh, yuto kexiskonhobꞌ Komam Dios Jahawil, yet Komam heyehi. Yajaꞌ chisje heyaqꞌni noꞌ tet ebꞌnaj mach Israelo ay texol, ebꞌnaj tuꞌ chisje iskꞌuxni ebꞌnaj noꞌ, maka chisje hetxonhni noꞌ tet mak nan konhobꞌal chiꞌekꞌ tukla tekꞌatanh.

»Mach chetxik noꞌ nixhte chiw xol yal yim ismiꞌ.

22 »Hunun habꞌil yilal hepohnilo isdiezmohal sat hetzꞌunubꞌ cheyiqꞌa. 23 Haꞌ ton isdiezmohal hetrigo, hevino, heyaceite; kat hepohnipaxilo noꞌ bꞌabꞌel yunin hewakax, yebꞌ noꞌ bꞌabꞌel yunin hemeꞌ wetan. Cheloni sunil tuꞌ sata Komam Dios Jahawil, bꞌay chissikꞌle Komam bꞌay chiꞌah Yatut Komam, haꞌ ton Tabernáculo, bꞌay cheyiyo hebꞌa sataj, hak tuꞌ xin kaw ay yelapno Komam yul hesat. 24 Yajaꞌ ta kaw nahat heyehilo yinh bꞌay chissikꞌle Komam bꞌay ayiko isbꞌi, bꞌay cheyiyo hebꞌa sataj, yuxin mach chu heyinito isdiezmohal yet chiyaqꞌni Komam isyaxil yibꞌanh hetzꞌunubꞌ, 25 chisje hetxonhnitoj, kat hekꞌubꞌanto istohol, haxa xin yet chexto heyinoyo hebꞌa tet Komam Dios Jahawil bꞌay sikꞌlebꞌil yu Komam, 26 kat heloqꞌni yu chꞌen melyu tuꞌ sunil tzet cheyoche; hakaꞌ noꞌ wakax, maka noꞌ meꞌ, maka vino, maka hunuxa howla vino, tzijxanhe tzet cheyoche, kat hewaꞌ bꞌey tuꞌ sata Komam Dios yinh tzalahilal yebꞌ heyixal yebꞌ heyuninal.^a

27 »Mach cheyintanhekanilto ebꞌnaj levita ay texol, yuto mach istxꞌotxꞌ ebꞌnaj ischah texol.

28 »Haxa yoxebꞌ habꞌil xin haxa yul hekonhobꞌ cheyito hediezmo, haꞌ sat hetzꞌunubꞌ tuꞌ, chekꞌubꞌato yul hekonhobꞌ, 29 haxinwal yet chihul ebꞌnaj levita, ebꞌnaj machi istxꞌotxꞌ ischah, chislo ebꞌnaj hediezmo kꞌuwan tuꞌ, hak tuꞌ xin nohnanhetikꞌa iskꞌul ebꞌnaj. Chislonipaxo ebꞌnaj nan konhobꞌal ay texol, maka mebꞌaꞌ unin kamnaxa ismam, kamnaxa ismiꞌ, maka ebꞌix hunix; hak tuꞌ xin chiyayo Komam Dios iskꞌulal yibꞌanh sunil tzet chewatxꞌe yinh hemunil.