13
»Tato ay hunu mak chiꞌah texol, chiyalni tato ischejabꞌ Komam Dios yehi, maka xin wayiklom, chiyalni tato ay hunu yechel maka kꞌaybꞌalkꞌule chiyuhi, 2 kat xin yijni isbꞌa yechel maka kꞌaybꞌalkꞌule chiyal tuꞌ, kat xin yalni teyet hakaꞌ tiꞌ: “Titanhwej kat jok tzujno yinta hunteqꞌanxa dios mach ohtabꞌilo heyu, kat jay jahno sataj,” ta xhi. 3 Mach cheyabꞌeto tzet chiyal huneꞌ mak chiyaliko isbꞌa ischejabꞌo Komam maka hunu wayiklom; yuto chexyako Komam yinh ilwebꞌal yunhe yilni tato chextzala yinh Komam yinh sunil heyanma yebꞌ yinh sunil hekꞌul. 4 Okanhwe tzujno yinta Komam, ayojabꞌ yelapno yul hesat, bꞌeybꞌalnhewe chejbꞌanile, cheyabꞌewe tzet chiyala, kat heyijeni. 5 Haꞌ hunu mak chiyaliko isbꞌa ischejabꞌo Komam tuꞌ, maka hunu wayiklom, yilal yaqꞌlax kamoj, yu chiꞌok yalaꞌ teyet ta chemanhkꞌo tzet chiyal Komam Dios, Jahawil, Komam konhinilti bꞌey Egipto, konhiskolnilo yalanh isyaꞌtajil bꞌay ayonhtikꞌa. Haꞌ hunteqꞌan mak tuꞌ, yilal iskami, yuto yoche kexishekꞌalo yinh tzet halbꞌilkano yu Komam Dios ta chebꞌeybꞌalnhe; hak tuꞌ xin chiyu heyinilo istxꞌojal texol.6 »Ta ay hunu heyuxhtaj, maka hunu hekꞌahol, maka hunu hekutzꞌin, maka heyixal, maka hunu heyamigo xahan ay heyu, chexok monteno yinh ewantajil heto heyinoyo hebꞌa tet hunteqꞌan tioxh chihal-lax diosal, hunteqꞌan mach ohtabꞌilo heyu yebꞌ mach ohtabꞌilo yu hemam hemiꞌ, 7 haꞌ ton isdiosal anma ay yul konhobꞌ hoyaniko teyinh, maka istioxh anma nahat yehilo teyinh, 8 mach chehunbꞌa hebꞌa yebꞌi, mach cheyahbꞌeto tzet chiyala, mach xin chitzꞌay hekꞌul yinh, mach cheyebꞌayo ismul. 9 Wal xin maqꞌbꞌil hemaqꞌnikamoj, hex bꞌabꞌel cheyikanh heqꞌabꞌ yinh yu hemaqꞌnikamoj. Tzujanxa xin kat istit sunil konhobꞌ ismaqꞌno kamoj. 10 Cheqꞌojkanh yu chꞌen chꞌen huneꞌ mak tuꞌ masan chikam heyu, yuto yoche kexispoholo yinh Komam Dios, Komam konhinilo bꞌey Egipto yalanh isyaꞌtajil bꞌay ayonhiko chejabꞌoj. 11 Yunhe yabꞌen sunil anma Israel, kat isxiwkanh, hak tuꞌ xin, matxa mak chu yaniko ismul hakaꞌ tuꞌ.
12 »Tato cheyabꞌelo isqꞌumal yinh hunu konhobꞌ chiyaqꞌ Komam Jahawil teyet; huneꞌ konhobꞌ bꞌay chexehayoj, 13 tato ay mak tiꞌ chimanhkꞌon tzet chiyal Komam Dios, kat yaqꞌni aykꞌayo anma ay yul konhobꞌ tuꞌ, kat isto yinoyo isbꞌa tet tioxh chihal-lax diosal, huneꞌ dios mach ohtabꞌilo heyu; 14 haꞌ tzet cheyabꞌe isqꞌumal tuꞌ, yilal kaw kam cheqꞌambꞌeloj, ta yeli ay ebꞌnaj yako ismul iswatxꞌen hunteqꞌan isyahbꞌetajil tuꞌ; 15 yinh hakaꞌ tuꞌ, mach chiꞌekꞌto yet hepotxꞌni kamoj sunil anma ay yul huneꞌ konhobꞌ tuꞌ yu chꞌen espada, yebꞌ sunil isnoqꞌ, kat xin heyetankanto sunil tzet ay yul konhobꞌ tuꞌ. 16 Chekutxbꞌako sunil isqꞌalomal yul txonhbꞌal, kat xin henhusnito huneꞌ konhobꞌ tuꞌ yebꞌ sunil tzet yilo tet anma ayko ishowal yinh yet yalanhtokanoj. Chenhusnitoj sunil tuꞌ hakaꞌ hunu yebꞌalqꞌabꞌeqꞌabꞌe tet Komam Dios Jahawil, kat xin istanhkanilo huneꞌ konhobꞌ tuꞌ yinh hunelnhe. Matxa bꞌaqꞌinhal chiwatxꞌelaxkanh hunelxa.
17 »Haꞌ sunil tzet yal Komam ta chitanhtzelaxiloj, machi hunu tiꞌ chikan yul heqꞌabꞌ yu yokkano heyu, hak tuꞌ xin mach chitit ishowal Komam Dios teyinh, kat yaqꞌni chꞌibꞌo Komam hebꞌisil hakaꞌ yu yalnikano Komam tet ebꞌnaj jichmam. 18 Yet cheyijen yul isnuqꞌ Komam Jahawil tuꞌ, kat hekꞌubꞌan sunil chejbꞌanile chiwalkanojan teyet tiꞌ, yu hewatxꞌen istoholal sata Komam Dios.