2 »Cheyuchkꞌato sunil bꞌay chiyiyo isbꞌa anma, chexok heyiqꞌalo sat txꞌo txꞌotxꞌ chiꞌok heyu tuꞌ; cheyetanto bꞌay chitxahli yichla witz, yebꞌ iswiꞌla wonhan, yebꞌ yichla teꞌ nime qꞌebꞌtaj. 3 Kat heyuchkꞌanayo chꞌen chꞌen latzꞌbꞌabꞌilkanh mexhahil, kat hemaqꞌnipoho yechel sunil tzetaj ye tuꞌ watxꞌebꞌil bꞌay chiꞌay jahno hunteqꞌan anma tuꞌ, kat henhusnipaxto yechel istioxh Asera, kat hetanhtzenkanilo yechel istioxh chiyal isdiosaloj, yunhe matxa chibꞌina hunteqꞌan tuꞌ sat txꞌo txꞌotxꞌ.

4 »Tajka hak tuꞌ chu heyinayo hebꞌa tet Komam Dios Jahawil. 5 Haꞌ bꞌay chissayilo Komam Dios, haꞌ tuꞌ chiꞌah yatut texol hex Israel hex tiꞌ, haꞌ tuꞌ chexto heyiqꞌayo hebꞌa sata Komam, yuto haꞌ bꞌey tuꞌ chiꞌaqꞌlax bꞌinaho isbꞌi. 6 Haꞌ tuꞌ xin, cheyaqꞌ hexahanbꞌal, kat henhusni no noqꞌ yu heyaniko ismay Komam. Haꞌ bꞌey tuꞌ xin, cheyipaxto hediezmo, yebꞌ tzet xaheyalte tet Komam, yebꞌ yebꞌalqꞌabꞌe chitit yinh hekꞌul heyaqꞌni. Haꞌ tuꞌ xin, cheyipaxto bꞌabꞌel yunin hewakax yebꞌ noꞌ bꞌabꞌel yunin hemeꞌ tet Komam. 7 Kat hewaꞌ bꞌey tuꞌ sata Komam Dios, Jahawil, yebꞌ heyixal yebꞌ heyuninal yinh tzalahilal. Cheloni sat hetzꞌunubꞌ tzꞌunbꞌil heyu, yuto haꞌ Komam Jahawil, koDiosal chiꞌanayo isyaxil teyibꞌanh.

8 »Haꞌ bꞌey tuꞌ, mach chewatxꞌe tzet chewatxꞌe bꞌey tiꞌ, yuto bꞌey tiꞌ, haꞌ tzet chal hekꞌul, haꞌ chewatxꞌe. 9 Yuto tinanh maxhto chexapni sat txꞌotxꞌ bꞌay chexxewi, bꞌay ay hemajul yu Komam Dios, Jahawil. 10 Lanhanxa yapni istzꞌayikal heqꞌaxponikꞌto yibꞌanh haꞌ Jordán, kat heyapni sat txꞌo txꞌotxꞌ chiyaqꞌ Komam teyet. Haꞌ bꞌey tuꞌ xin, chexkolchakanilo yul isqꞌabꞌ anma ayko ishowal teyinh. Hayet ay hex bꞌey tuꞌ matxa mak tet chexxiwi. 11 Haꞌ xin, bꞌay chissayilo Komam Dios bꞌay chiꞌah yatut yu isbꞌina isbꞌi, haꞌ bꞌey tuꞌ cheyito sunil tzet chiwaltiꞌan. Cheyito no noqꞌ chiꞌaqꞌlax yinh xahanbꞌalil yebꞌ noꞌ chinhuslax tet Komam yu yalaxiko ismay. Cheyipaxto hediezmo, yebꞌ heyebꞌalqꞌabꞌ cheyaqꞌ tet Komam, yebꞌ sunil iskꞌulal xaheyalte ta cheyaqꞌ tet Komam. 12 Kat heyaqꞌni tzalaho hekꞌul sata Komam Dios, Jahawil, yebꞌ heyixal, heyuninal, yebꞌ hechejabꞌ, yebꞌ ebꞌnaj levita ay texol; yuto ebꞌnaj levita tuꞌ, machi istxꞌotxꞌ ebꞌnaj yebꞌ ismajul ebꞌnaj texol.

13 »Kaw cheyil hebꞌa, mach cheyako no noqꞌ yinh xahanbꞌalil tet Komam bꞌayejtuꞌwal chal hekꞌul. 14 Wal xin, hanhechꞌan bꞌay chissayilo Komam Jahawil xol hunu majan hex Israelex tiꞌ, haꞌ tuꞌ chenhus no noqꞌ hexahanbꞌaloj; haꞌ tuꞌ xin cheyito sunil tzet chiwaltiꞌan.

15 »Yaj xin chiyu hepotxꞌni henoqꞌ hekꞌuxuꞌ yulaj hekonhobꞌ yet cheyocheni hatatikꞌa isyaxil chiyayo Komam Dios, Jahawil teyibꞌanh. Chisje hekꞌuxni noꞌ chibꞌe tuꞌ, machi yok yinh ta saj heyehi hakaꞌ yalni kuybꞌanile, maka machoj; chiyu hekꞌuxni noꞌ, hakaꞌ chu hekꞌuxni noꞌ miꞌe sajche maka noꞌ winaj sajche. 16 Kachannhe ischikꞌil noꞌ, mach cheloh, chetixhto noꞌ sat txꞌo txꞌotxꞌ, hakaꞌ chu istixhlaxto ha haꞌ.

17 »Yaj mach chewah isdiezmohal ixim trigo yulaj hekonhobꞌ, maka isdiezmohal hevino, maka isdiezmohal teꞌ aceite. Mach chekꞌuxpaxo noꞌ bꞌabꞌel yunin hewakax maka noꞌ bꞌabꞌel yunin hemeꞌ. Mach chu hetzꞌabꞌnipaxo hunu tzet xaheyalte tet Komam, maka hunu heyebꞌalqꞌabꞌ xaꞌel yinh hekꞌul heyaqꞌni, maka yebꞌalqꞌabꞌ pohbꞌilxalo yu heqꞌabꞌ. 18 Kachannhe haꞌ bꞌay chissayilo Komam Dios Jahawil, haꞌ tuꞌ chekꞌux no noqꞌ cheyaqꞌ xahanbꞌalil. Haꞌ tuꞌ chekꞌux noꞌ sata Komam yebꞌ hekꞌahol, yebꞌ hekutzꞌin, yebꞌ ebꞌnaj hechejabꞌ yebꞌ ebꞌix hechejabꞌ, yebꞌ ebꞌnaj levita ay tekꞌatanh; cheyaqꞌni tzalaho hekꞌul yinh sat hetzꞌunubꞌ. 19 Yulbꞌal tiempo ay hex sat txꞌo txꞌotxꞌ tuꞌ, mach chenahulnheto ebꞌnaj levita.

20 »Hayet chichꞌibꞌto hetxꞌotxꞌ yu Komam Dios Jahawil, hakaꞌtikꞌa yu yalnikanoj, ta xin chiyoche hekꞌul hekꞌuxuꞌ chibꞌe, chisje hekꞌuxni tzijxanhe tzꞌayikal. 21 Ta haꞌ bꞌay chissayilo Komam bꞌay chiꞌah yatut kaw nahat yehilo teyinh, chisje hepotxꞌnikamo hewakax maka hemeꞌ chiyaqꞌ Komam teyet, kat hekꞌuxni hantatikꞌa cheyoche bꞌay ay hex tuꞌ, hakaꞌ yu walnikanojan teyet. 22 Lahan hakaꞌ yet chekꞌuxni ischibꞌehal noꞌ miꞌe sajche maka noꞌ winaj, machi yok yinh tato saj heyehi hakaꞌ yalni chejbꞌanile, maka mach sajo heyehi. 23 Kachannhe huneꞌ tiꞌ mach cheloh noꞌ chikꞌ, yuto haꞌ ischikꞌil noꞌ tuꞌ iskawil noꞌ yekoj; yuxin mach chu hekꞌuxni noꞌ yebꞌ iskawil. 24 Wal xin mach cheloh ischikꞌil noꞌ, tonhe chetixhayo noꞌ sat txꞌotxꞌ hakaꞌ ha haꞌ. 25 Mach cheloh noꞌ haxinwal kꞌul chiꞌekꞌ heyilaꞌ yebꞌ heyuninal, yuto haꞌ istoholal chewatxꞌe sata Komam Jahawil. 26 Wal hunteqꞌan cheyaqꞌ heyebꞌalqꞌabꞌo tet Komam, maka tzet haltebꞌilxa tet Komam heyu, yilal heyinito sata Komam bꞌay chissayilo bꞌay aykanh yatut. 27 Haꞌ tuꞌ xin, cheyalte hexahanbꞌal, ischibꞌehal noꞌ yebꞌ ischikꞌil noꞌ yibꞌanh mexha sata Komam Jahawil. Haꞌ ischikꞌil no noqꞌ cheyaqꞌ tuꞌ chitixhlaxayo yibꞌanh ismexhahil xahanbꞌal tet Komam Jahawil, yajaꞌ wal ischibꞌehal noꞌ xin chisje hekꞌuxni.

28 »Kam cheyabꞌe sunil tzet chiwaltiꞌan, kat heyijeni, haxinwal yet chewatxꞌen iskꞌulal yebꞌ istoholal sata Komam, kꞌul chiꞌekꞌ heyilaꞌ yebꞌ heyuninal yinh sunilbꞌal tzꞌayik.

29 »Hayet xaꞌistanhtzelo Komam Dios Jahawil anma ayayo sat txꞌo txꞌotxꞌ bꞌay chexapni, yu yok txꞌotxꞌ heyu, kat heyehayo sat txꞌotxꞌ, 30 kaw cheyil hebꞌa, haxinwal mach chewatxꞌe tzet chiswatxꞌe hunteqꞌan anma tuꞌ yet chinayo isbꞌa sata hunteqꞌan tioxh chiyal isdiosaloj. Hayet xatanhtzelaxilo hunteqꞌan anma tuꞌ tesataj, mach cheqꞌambꞌe yinh isdiosal, mach cheyal hakaꞌ tiꞌ: “Hakaꞌtikꞌa yu yinayo isbꞌa hunteqꞌan anma tiꞌ tet isdiosal, hak tuꞌ chu jinayo kobꞌa,” tajka kexchi. 31 Mach chewatxꞌe istxꞌojal sata Komam Jahawil, koDiosal, hakaꞌ istxꞌojal iswatxꞌe hunteqꞌan anma tuꞌ tet istioxh, yuto hunteqꞌan anma tuꞌ, chisnhusto nixhte yuninal xahanbꞌalil tet istioxh.

32 »Kaw cheyil hebꞌa yinh heyijen sunil tzet chiwaltiꞌan. Machi hunu kuybꞌanile tiꞌ cheyako istzꞌaj, machi hunu tiꞌ cheyipaxilo istzꞌaj.