Kaw aykano yelapno Komam Jahawil
11
Yalnipaxo yaꞌ Moisés: «Ochewe Komam Dios, Jahawil, kat hekꞌubꞌan Istzotiꞌ Komam, yebꞌ kuybꞌanile, yebꞌ chejbꞌanile, yebꞌ isley yinh sunil tzꞌayik. 2 Txumchahojabꞌilo heyu yinh sunil tzet xaꞌiswatxꞌe Komam jinh. Maxhtaj tet heyuninal chintzotelan, yuto maxhto bꞌay chiyabꞌe, yebꞌ xin maxhto bꞌay ilbꞌil yu. Wal hex xin ilbꞌilxa isyaꞌtajil yayo Komam yibꞌanh anma, heyilnipaxo isqꞌaqꞌal yip, yebꞌ kꞌaybꞌalkꞌule iswatxꞌe, yebꞌ iskꞌulchꞌanil iskꞌul, yebꞌ isqꞌabꞌ leyantoj. 3 Heyilnipaxo sunil nimeta isyaꞌtajil yati Komam yibꞌanh naj rey faraón bꞌey Egipto yebꞌ yibꞌanh sunil anma tuꞌ, 4 yebꞌ yet istanhtzenilo Komam ebꞌnaj soldado Egipto, yebꞌ ischeh ebꞌnaj yebꞌ iscarruaje ebꞌnaj yet howal yet istokano sunil tuꞌ yich haꞌ Kajinh Mar yu Komam, yet yok tzujno ebꞌnaj jintaj, istanhtzenkanilo Komam ebꞌnaj yinh hunelnhe. 5 Nawepaxti iskꞌulal iswatxꞌe Komam jinh yet jekꞌ sat txꞌotxꞌ desierto masanta bꞌay ayonh tiꞌ. 6 Nawepaxti tzet yute Komam naj Datán yebꞌ naj Abiram, ebꞌnaj iskꞌahol naj Eliab, yebꞌ ebꞌnaj titna yinh yaꞌ Rubén, yet ishajni isbꞌa txꞌo txꞌotxꞌ yalanh ebꞌnaj, istokano ebꞌnaj yalanh txꞌotxꞌ yinh kosat hanhonh Israelonh tiꞌ. Istopaxo yixal, yebꞌ yuninal, yebꞌ ismantiado aykanh yatuto yebꞌ sunil isnoqꞌ ebꞌnaj. 7 Yuxin hex, kaw hex, heyil sunil nimeta kꞌaybꞌalkꞌule xaꞌisye Komam Jahawil jet.Huneꞌ txꞌotxꞌ kaw kꞌul yalte Komam
8 »Yijewe sunil chejbꞌanile yal Komam chiwalkanojan teyet tinanh, yu heyiqꞌni heyip, kat heto heyanoko howal yinh anma ayayo sat txꞌo txꞌotxꞌ chiꞌok heyu, kat heqꞌoji yinh, kat yokkano txꞌotxꞌ heyu. 9 Ta hak tuꞌ, txꞌiꞌal tiempo chexekꞌ sat txꞌo txꞌotxꞌ kaw kꞌul yebꞌ yax sat, txꞌotxꞌ yalte Komam tet ebꞌyaꞌ jichmam yebꞌ tet anma titna yinh ebꞌyaꞌ. 10 Haꞌ txꞌo txꞌotxꞌ bꞌay ay anma chexqꞌoji yinh tuꞌ, mach lahano txꞌotxꞌ hakaꞌ txꞌotxꞌ Egipto bꞌay konhyilo Komam Dios. Bꞌey Egipto tuꞌ, lahwi heyaniko hetzꞌunubꞌ, kat heyok hehayenopaxoj, hakaꞌ nixhte tzꞌunubꞌ ay yul hunu peyabꞌ. 11 Yajaꞌ walpaxo txꞌo txꞌotxꞌ bꞌay chexapni tuꞌ xin, ay iswitzal txꞌotxꞌ, aypaxo yakꞌalil txꞌotxꞌ, chakꞌannhetikꞌa sat txꞌotxꞌ yu haꞌ nhabꞌ chiyati Komam. 12 Haꞌ huneꞌ txꞌo txꞌotxꞌ tuꞌ, tanhebꞌilnhetikꞌa txꞌotxꞌ yu Komam Jahawil, koDiosal, ilbꞌil txꞌotxꞌ yu Komam sunilbꞌal tiempo.
13 »Tato cheyije chejbꞌanile chal Komam chiwalan teyet tiꞌ tinanh, kat hetzala yinh Komam Jahawil, kat hewatxꞌen tzet chiyal yinh sunil heyanma yebꞌ yinh sunil hekꞌul, 14 tato hak tuꞌ cheyu, chiyaqꞌ haꞌ nhabꞌ teyet yinh istzꞌayikal; haꞌ bꞌabꞌel nhabꞌa yebꞌ xin haꞌ islahobꞌal nhabꞌ chꞌaqꞌni chꞌibꞌoj yebꞌ watxꞌeno sat hetrigo, heyuva yebꞌ heyaceite. 15 Kat yaqꞌlaxpaxo teꞌ yaxla chꞌim islobꞌe henoqꞌ; kaw xin aynhetikꞌa tzet cheloh. 16 Yajaꞌ kaw cheyil hebꞌa, tajka cheyaqꞌ subꞌchaho hebꞌa, mach chehekꞌilo hebꞌa yinh Komam, yu heto heyinoyo hebꞌa tet tzetaj chihal-lax diosal, mach chexay jahno sataj. 17 Yuto ta hak tuꞌ cheyu, chitit ishowal Komam Dios teyinh, matxa chati Komam haꞌ nhabꞌ, hak tuꞌ xin matxa chiyaqꞌ sat hetzꞌunubꞌ, kat xin hekamilo sat txꞌotxꞌ kaw kꞌul chiyaqꞌ Komam teyet.
18 »Kanojabꞌkano chejbꞌanile chal Komam tiꞌ yinh heyanma yebꞌ yinh henabꞌal, chekꞌaliko yinh heqꞌabꞌ yebꞌ yinh hepalanh. 19 Yilal hekuyni nixhte heyuninal, cheyalni chejbꞌanile yal Komam teyet, yet ay hex yul heyatut, yebꞌ yet ayexiko yinh hebꞌel, yebꞌ yet chexok wayoj, yebꞌ yet chexahwanoj. 20 Chetzꞌibꞌnhepaxiko yinh ispilalil heyatut, yebꞌ xin yinh hepulta, 21 yunhe henahatli yebꞌ heyuninal sat txꞌo txꞌotxꞌ haltebꞌil yu Komam tet ebꞌnaj jichmam, yulbꞌal ayko satkanh yibꞌanh txꞌo txꞌotxꞌ.
22 »Tato kaw kam cheyije chejbꞌanile chal Komam chiwalkanojan teyet tiꞌ, kat hebꞌeybꞌalnheni, yebꞌ ta chextzala yinh Komam Jahawil, koDiosal, kat heyok tzujno yinta sunil tzet chala, 23 wal tuꞌ chistzumbꞌelo Komam sunil anma ayayo sat txꞌotxꞌ chiyaqꞌ teyet yinh hesat, kat xin heqꞌoji yinh hunteqꞌan konhobꞌ kaw nimej, yebꞌ kaw aykano yip tesataj. 24 Sunil txꞌo txꞌotxꞌ bꞌay cheyayo heyoj heyet chukanikoj; chiꞌichiti hetxꞌotxꞌ tuꞌ yinh txꞌotxꞌ desierto masanta chiꞌapni bꞌey txꞌotxꞌ Líbano, kat yichipaxti txꞌotxꞌ yinh haꞌ Éufrates masanta chiꞌapni txꞌotxꞌ yinh haꞌ mar Mediterráneo. 25 Machi hunu mak tiꞌ chislinhbꞌa isbꞌa tesataj yu yaniko howal teyinh. Haꞌ Komam chiꞌaniko xiwkilal xol anma bꞌay chexekꞌi, hakaꞌtikꞌa yu yalnikano Komam.
26 »Ilwekꞌano tinanh chiwayojan tesataj hesikꞌlenkano iskꞌulal maka tzꞌaktiꞌ. 27 Chechah iskꞌulal tato cheyije chejbꞌanile chal Komam Jahawil, koDiosal, chiwalan teyet tinanh. 28 Yajaꞌ tato chemanhkꞌo chejbꞌanile kat hepohnilo hebꞌa yinh tzet chiwalan teyet tiꞌ, kat heto heyinoyo hebꞌa tet hunteqꞌan tioxh chihal-lax diosal mach ohtabꞌilo heyu, hak tuꞌ xin, chiꞌay isyaꞌtajil teyibꞌanh.
29 »Hayet chexyanikto Komam Jahawil, koDiosal sat txꞌo txꞌotxꞌ chiyaqꞌ teyet, cheqꞌan iskꞌulal Komam Dios bꞌey witz Gerizim, kat heqꞌanni isyaꞌtajil bꞌey witz Ebal.b 30 Haꞌ hunteqꞌan witz tuꞌ, ayayo isqꞌaxebꞌikꞌto haꞌ Jordán, satakꞌto niman bꞌeh, yinh yetkꞌulal bꞌay chito tzꞌayik, bꞌey istxꞌotxꞌ ebꞌnaj cananeo, anma ayayo istiꞌ yakꞌalil haꞌ niman Jordán, satakꞌto Gilgal, hun yehayo yebꞌ qꞌebꞌtala nabꞌa hih, yet naj More. 31 Lanhanxa yapni yorahil heqꞌaxponikꞌto haꞌ Jordán, kat yokkano txꞌo txꞌotxꞌ tuꞌ heyu yu Komam Jahawil, koDiosal. Haxa yet xaꞌok txꞌotxꞌ yul heqꞌabꞌ xin, kat heyehayo sat txꞌotxꞌ. 32 Kam cheyako yinh hekꞌul heyijen chejbꞌanile yebꞌ kuybꞌanile chiwalkanojan teyet tiꞌ.