6 Iswatxꞌenpaxo naj ismajil teꞌ Kaxha, oro ok yinh; huneꞌ metro yok 12 (kabꞌlanhebꞌ) centímetro ispakꞌul teꞌ, wal sat teꞌ ismajil xin 67 (hujebꞌ iskanhwinaj) centímetro yu. 7 Iswatxꞌen naj kabꞌebꞌ yechel ebꞌnaj querubín oro, chakꞌbꞌil yu chꞌen martillo yet iswatxꞌelaxi, ayko hunun yibꞌanh istiꞌla ismajil Kaxha tuꞌ. 8 Iswatxꞌe naj ismajil Kaxha yebꞌ kabꞌebꞌ yechel ebꞌnaj querubín, hunnhe ye iswatxꞌebꞌanil, mach xijbꞌiloj. Hunun yechel ebꞌnaj querubín, ayiko yibꞌanh hunun istiꞌla ismajil teꞌ Kaxha tuꞌ. 9 Kawanh yechel ebꞌnaj querubín tuꞌ, ishakxiko ebꞌnaj yinh hunun, yajaꞌ yilnayo ebꞌnaj yibꞌanh ismajil teꞌ Kaxha tuꞌ; leyanto xikꞌ ebꞌnaj yibꞌanh ismajil teꞌ Kaxha tuꞌ, kꞌuxannhe ismajnayo xikꞌ ebꞌnaj tuꞌ ismajil teꞌ.

10 Iswatxꞌenpaxo naj huneꞌ teꞌ mexha, yaj teꞌ acacia ok yinh, 90 (lahonhebꞌ ishokꞌal) centímetro ispakꞌul teꞌ, wal sat teꞌ xin 45 (howebꞌ yoxkꞌal) centímetro. 67 (hujebꞌ iskanhwinaj) centímetro yekanh istel teꞌ. 11 Yaniko naj chꞌen oro kaw kꞌul yinh teꞌ, yanipaxiko naj chꞌen nabꞌa oro yelawilo yinh sunil istiꞌla teꞌ. 12 Hujebꞌ centímetro yutelo naj yelawil istiꞌ teꞌ, yaniko naj chꞌen oro yinh yelawil istiꞌ teꞌ. 13 Iswatxꞌenpaxo naj kanhebꞌ chꞌen argolla oro, ok yinh hunun istxikin teꞌ mexha yinh iskanhebꞌal yoj teꞌ. 14 Yalanh yelawil istiꞌ teꞌ mexha tuꞌ ok chꞌen argolla oro, yunhe yalaxikto te teꞌ chiꞌinikꞌo teꞌ mexha tuꞌ.

15 Iswatxꞌen naj te teꞌ yinh teꞌ acacia yunhe isbꞌatxlaxikꞌo teꞌ mexha tuꞌ, yanipaxiko naj chꞌen oro yinh teꞌ. 16 Iswatxꞌenpaxo naj ismunlabꞌal mexha tuꞌ, hunteqꞌan chiꞌokniko yibꞌanh, oro chꞌen ok yinh; watxꞌelax chꞌen sekꞌ, chꞌen cuchara, chꞌen xhalu, chꞌen vaso bꞌay chiꞌalaxayto yal teꞌ uva chꞌaqꞌlax yebꞌalqꞌabꞌehal.

17 Hak tuꞌ xin yu iswatxꞌen naj huneꞌ candelabro nabꞌa oro bꞌay chitzujbꞌalaxiko qꞌaꞌ. Haꞌ bꞌay chiꞌay bꞌatxnoj yebꞌ isteꞌal yoj tuꞌ, yebꞌ isnetbꞌal aceite, yebꞌ yelawil hakaꞌ jilni teꞌ manzan, yebꞌ isxumakil. Iswatxꞌe naj sunil tuꞌ yu martillo, huneꞌnhe ye iswatxꞌebꞌanil sunil. 18 Yinh qꞌaxqꞌep iskꞌul, ay oxox isqꞌabꞌ, haktikꞌapax tuꞌ yinh qꞌaxepxa. 19 Oxebꞌ net hakaꞌ isxumakil almendro ayko yinh huneꞌ isqꞌabꞌ, yebꞌpaxo yechel teꞌ manzan yebꞌ isxumakil. Hak tuꞌ yeko yechel iswajebꞌal isqꞌabꞌ chꞌen yet candelabro tuꞌ. 20 Haxa isteꞌal ayko yiktabꞌal chꞌen candelabro tuꞌ aypaxo kanhebꞌ isnet hakaꞌ jilni isxumakil teꞌ almendro, aypaxo ismansanil yebꞌ isxumakil. 21 Yalanh kabꞌkabꞌ isqꞌabꞌ chꞌen tuꞌ xin ayiko yechel sat teꞌ manzan, hak tuꞌ xin yalanh hunun kabꞌkabꞌ isqꞌabꞌ. Hak tuꞌ ye chꞌen yinh iswajebꞌal isqꞌabꞌ. 22 Haꞌ yechel sat teꞌ manzan yebꞌ isqꞌabꞌ tuꞌ, huneꞌnhe yiqꞌni isbꞌa yebꞌ candelabro, nabꞌa oro chꞌen ayko yinh, chakꞌlax yu martillo yet iswatxꞌi. 23 Iswatxꞌenpaxo naj hujebꞌ islamparahil oro, yebꞌ chꞌen tenaza, yebꞌ issekꞌal. 24 Hayet iswatxꞌi chꞌen candelabro tuꞌ yebꞌ ej ismunlabꞌal, 75 (holahonhebꞌ iskanhwinaj) libra chꞌen oro okniko yinh, chꞌen kaw kꞌul.

25 Iswatxꞌenpaxo naj mexha bꞌay chinhuslax teꞌ pom, huneꞌ mexha tuꞌ, acacia teꞌ. Lahan ispakꞌul yebꞌ sat, 45 (howebꞌ yoxkꞌal) centímetro yeko, yebꞌ xin 90 (lahonhebꞌ ishokꞌal) centímetro yekanh. Haxa yukꞌaꞌ ayko yinh iskanhebꞌal istxikin huneꞌnhe yeh iswatxꞌebꞌanil yebꞌ mexha tuꞌ. 26 Yaniko naj chꞌen oro kaw kꞌul yibꞌanh teꞌ mexha tuꞌ, yebꞌ yinhla iskanhebꞌal iskꞌul teꞌ yebꞌ yinh yukꞌaꞌ teꞌ; yaniko naj chꞌen oro yelawilo istiꞌ teꞌ yinhla ishoyanil. 27 Yanipaxiko naj chꞌen argolla oro yalanh yelawil istiꞌ teꞌ mexha tuꞌ, kabꞌkabꞌ chꞌen ok yinh hunun ispakꞌul teꞌ mexha, yunhe yekꞌto te teꞌ yul chꞌen; hak tuꞌ xin chisje isbꞌatxlaxikꞌo mexha tuꞌ. 28 Iswatxꞌen naj te teꞌ acacia yu yelto teꞌ yul chꞌen oro petpet yehi, yaniko naj chꞌen oro yinh teꞌ.

29 Iswatxꞌenpaxo naj teꞌ aceite chiꞌalaxayo yibꞌanh mak chiꞌok yinh ismunil Komam Dios, iswatxꞌenpaxo naj teꞌ pom, yaniko naj anh kaw xuqꞌ sam xol hunteqꞌan kaw kꞌul, hakaꞌ chiswatxꞌe ebꞌnaj watxꞌem perfume.