2 Yawten yaꞌ Moisés naj Bezaleel yebꞌ naj Aholiab yebꞌ sunil ebꞌnaj winaj kaw ay ishelanil iswatxꞌen munil kaw kꞌul, yebꞌ ebꞌnaj aqꞌbꞌil ishelanil yu Komam, yebꞌ ebꞌnaj yako Komam yinh yanma iskolwa yinh hunteqꞌan munil tuꞌ yinh sunil yanma. 3 Haꞌ ebꞌnaj tuꞌ chahni yul isqꞌabꞌ yaꞌ Moisés, sunil sabꞌehal yiti anma Israel.

Yajaꞌ wal anma Israel yexnhetotikꞌa xin yiniti sabꞌehal hunun sakꞌayal, hatatikꞌa chiꞌel yinh yanma. 4 Hayet yilni ebꞌnaj chiwatxꞌen tzet chiꞌokniko yinh Yatut Komam huneꞌ tuꞌ, islinhbꞌan ebꞌnaj ismunlahi, isto ebꞌnaj, 5 yalni ebꞌnaj tet yaꞌ Moisés hakaꞌ tiꞌ: «Anma Israel yexnhetotikꞌa yiniti sabꞌehal, kaw xapalkꞌon hakaꞌ isqꞌan Komam chiꞌokniko yinh ismunil halbꞌilkanoj,» xhi ebꞌnaj tet yaꞌ Moisés.

6 Yuxin ischej yaꞌ Moisés hal-laxo tet ebꞌnaj winaj yebꞌ tet ebꞌix Israel yunhe matxa chiswatxꞌe tzet chiyito sabꞌehal; hak tuꞌ yu iskachni yaꞌ Moisés anma Israel yunhe matxa chiyiti sabꞌehal tuꞌ. 7 Yuto kaw hantaxa tzet chiꞌokniko yinh munil chiwatxꞌi tuꞌ, kaw xin xapalkꞌoni.

8 Xol sunil ebꞌnaj chimunla tuꞌ, ebꞌnaj kaw ay ishelanil iswatxꞌen munil kaw kꞌul, haꞌ ebꞌnaj watxꞌen Yatut Komam yinh qꞌap qꞌap. Lahonhebꞌ pelan qꞌap lino ok yinh Yatut Komam tuꞌ, kaw watxꞌebꞌiliko yelawil qꞌap, ay qꞌap yax qꞌap, qꞌap kajmutzꞌmunhe, qꞌap kaj jilni; yalaxiko yechel kawanh ebꞌnaj querubín yinh qꞌap yu ebꞌnaj kaw helan iswatxꞌen tuꞌ. 9 Qꞌap qꞌap tuꞌ, 12 (kabꞌlanhebꞌ) metro, yok 60 (oxkꞌal) centímetroxa istelbꞌal qꞌap, haxa issatbꞌal qꞌap, huneꞌ metro yok 80 (kanhwinaj) centímetroxa; sunil qꞌap qꞌap tuꞌ, lahannhe ismalil qꞌap. 10 Howebꞌ pelan qꞌap tuꞌ hunbꞌalaxayoj, haktikꞌapax tuꞌ yu howebꞌxa qꞌap, yuxin kabꞌ majan eliko qꞌap. 11 Yalaxiko nixhte isholanil istiꞌ qꞌap bꞌabꞌel qꞌap qꞌap watxꞌelaxayo yinh qꞌap howebꞌ, txꞌal txꞌal yaxtzꞌantzꞌonhe alaxiko yinh isholanil istiꞌ qꞌap tuꞌ, haktikꞌapax tuꞌ yu qꞌap iskabꞌ majan. 12 50 (lahonh yoxkꞌal) xin isholanil qꞌap bꞌabꞌel majan tuꞌ ok yinh istiꞌ, yebꞌ 50 (lahonh yoxkꞌalpaxo) isholanil qꞌap iskabꞌ majan; lahannhe xin ischalen isholanil istiꞌ qꞌap iskabꞌ majanil. 13 Iswatxꞌepaxo ebꞌnaj 50 (lahonhebꞌ yoxkꞌal) chꞌen gancho oro yunhe ischalen istiꞌ qꞌap bꞌabꞌel majan yebꞌ qꞌap iskabꞌ majan tuꞌ; hak tuꞌ xin yu iswatxꞌayo Yatut Komam yinh qꞌap.

14 Iswatxꞌenpaxo 11 (hunlahonhebꞌ) qꞌap cortina yinh istzꞌumal noꞌ chiw, yunhe yahto yibꞌanh Yatut Komam watxꞌebꞌil yinh qꞌap qꞌap. 15 Hunun qꞌap cortina watxꞌebꞌil yinh istzꞌumal noꞌ chiw tuꞌ, 13 (oxlahonhebꞌ) metro yok yiktaxa istel, wal issatbꞌal xin huneꞌ metro yok 80 (waxajebꞌ ishokꞌal) centímetro, haꞌ 11 (hunlahonhebꞌ) cortina tuꞌ lahannhe ismalil sunil. 16 Howebꞌ cortina yinh istzꞌumal noꞌ chiw tuꞌ istzꞌisayo naj, hunxanhe eliko noꞌ yinh sunil, hakpax tuꞌ noꞌ wajebꞌxa cortina yinh istzꞌumal noꞌ chiw istzꞌisayo naj, hunxanhe eliko noꞌ yinh sunil. Yuxin kabꞌ majan cortina eliko yinh istzꞌumal noꞌ chiw tuꞌ. 17 Yalaxiko 50 (lahonh yoxkꞌal) isholanil istiꞌ huneꞌ bꞌabꞌel majan istzꞌumal noꞌ, haktikꞌapax tuꞌ hunxa majan noꞌ tuꞌ, okpaxo 50 (lahonh yoxkꞌal) isholanil istiꞌ noꞌ. 18 Iswatxꞌenpaxo naj 50 (lahonh yoxkꞌal) chꞌen gancho bronce chihunbꞌanayo iskabꞌil istiꞌ noꞌ. Huneꞌ niman litxꞌan elkaniko noꞌ ismajchakanayo yibꞌanh Yatut Komam yu noꞌ.

19 Iswatxꞌenpaxo naj istzꞌumal noꞌ meꞌ kaj yelawil aykoj, yahto yibꞌanh istzꞌumal noꞌ chiw ayko yibꞌanh Yatut Komam; iswatxꞌenpaxo naj hunteqꞌan istzꞌumal no noqꞌ kaw ay istohol. Haꞌ noꞌ ahkanto islahobꞌal yibꞌanh Yatut Komam. 20 Iswatxꞌenpaxo naj teꞌ aqꞌinteꞌ acacia, kaw tohol yute naj teꞌ, yuto yinh Yatut Komam chiꞌok teꞌ. 21 Hunun teꞌ aqꞌinteꞌ tuꞌ, yikta ishoꞌ metro yute naj istel teꞌ, haxa sat teꞌ xin 67 (hujebꞌ iskanhwinaj) centímetro. 22 Hunun teꞌ aqꞌinteꞌ ayko isholanil istiꞌ teꞌ yunhe ischalen isbꞌa istiꞌ teꞌ tuꞌ; hak tuꞌ xin yute naj sunil teꞌ aqꞌinteꞌ okniko yinh Yatut Komam. 23 20 (Hunkꞌal) teꞌ aqꞌinteꞌ ok yinh ispakꞌul yinh yetkꞌulal sur. 24 Yalaxpaxayo 40 (kawinaj) chꞌen plata yalanh bꞌay tzꞌonhi teꞌ, kabꞌkabꞌ chꞌen alaxikto yalanh hunun teꞌ aqꞌinteꞌ, hunun yinh bꞌay chischah isbꞌa teꞌ. 25 Haxa yinh hunxa ispakꞌul Yatut Komam, yinh yetkꞌulal norte 20 (hunkꞌal) teꞌ aqꞌinteꞌ tuꞌ watxꞌipaxoj. 26 Yalaxayo 40 (kawinaj) chꞌen plata isxeꞌaloj, bꞌay tzꞌonhi sunil teꞌ aqꞌinteꞌ tuꞌ, kabꞌkabꞌ chꞌen yalanh hunun teꞌ. 27 Yinh Yatut Komam yetkꞌulal bꞌay chito tzꞌayik, wajebꞌ teꞌ aqꞌinteꞌ watxꞌelaxi. 28 Yinh iskabꞌebꞌ istxikin yinta Yatut Komam tuꞌ xin iswatxꞌe naj hunun teꞌ aqꞌinteꞌ yinh hunun istxikin Yatut Komam. 29 Haꞌ teꞌ aqꞌinteꞌ tuꞌ, hunbꞌalax istiꞌ teꞌ yinh yich masanta chiꞌahapno bꞌay hunbꞌabꞌil istxikin yu chꞌen jolqꞌabꞌ petpet yehi; hak tuꞌ ye iskabꞌebꞌal istxikin. 30 Yuxin yalanh teꞌ waxajebꞌ aqꞌinteꞌ tuꞌ, okto 16 (wajlahonhebꞌ) chꞌen plata bꞌay tzꞌonhi teꞌ, kabꞌkabꞌ chꞌen kankano yalanh hunun teꞌ aqꞌinteꞌ tuꞌ.

31 Watxꞌipaxo teꞌ regla acacia, howebꞌ teꞌ okniko yinh teꞌ aqꞌinteꞌ yinh qꞌaxep iskꞌul Yatut Komam. 32 Yebꞌ xin howebꞌxapaxo teꞌ regla ok yinh qꞌaxepxa ispakꞌul, yebꞌ xin howebꞌxapaxo teꞌ ok yinta Yatut Komam yinh yetkꞌulal bꞌay chꞌay tzꞌayik. 33 Haxa teꞌ regla chiꞌok yiktabꞌal teꞌ aqꞌinteꞌ chiꞌichito teꞌ yinh huneꞌ istxikin masanta chiꞌapni teꞌ yinh hunxa istxikin.^a 34 Yalaxiko chꞌen oro yinh teꞌ aqꞌinteꞌ tuꞌ, iswatxꞌelaxpaxo chꞌen oro petan yehi bꞌay chiꞌekꞌto teꞌ regla tuꞌ; yalaxpaxiko chꞌen oro yinh teꞌ regla.

35 Iswatxꞌipaxo qꞌap velo yinh qꞌap yax qꞌap, qꞌap kajmutzꞌmunhe, qꞌap kaj jilni, yebꞌ yinh qꞌap lino bꞌatxꞌobꞌil. Ischemlaxiko yechel kawanh ebꞌnaj querubín yinh qꞌap yu mak kaw helan. 36 Islokbꞌalaxkanh qꞌap qꞌap yu kanhebꞌ chꞌen oro gancho, yinh kanhebꞌ teꞌ oy watxꞌebꞌil yinh isteꞌal teꞌ acacia. Teꞌ oy tuꞌ, alaxiko chꞌen oro yinh teꞌ, yalaxiko kanhebꞌ xeꞌal plata bꞌay chitzꞌonhi teꞌ.

37 Iswatxꞌelax qꞌap qꞌap ok yinh ispultahil Yatut Komam. Haꞌ qꞌap qꞌap tuꞌ watxꞌelax qꞌap yinh qꞌap yax, yinh qꞌap kajmutzꞌmunhe, qꞌap kaj, yebꞌ qꞌap lino bꞌatxꞌobꞌil yechel aykoj; watxꞌebꞌiliko yelawil qꞌap kaw kꞌulchꞌan jilni. 38 Iswatxꞌelax howebꞌ teꞌ oy, yebꞌ howebꞌ chꞌen gancho oro, iswatxꞌelaxpaxo howebꞌ isxeꞌal bronce bꞌay chitzꞌonhi teꞌ oy tuꞌ; yalaxpaxiko chꞌen oro yinh teꞌ oy yebꞌ isjolqꞌabꞌil.