Huneꞌ mexha bꞌay chinhuslax pom
30
Yalnipaxo Komam Dios tet yaꞌ Moisés: «Chawatxꞌepaxo huneꞌ ismexhahil yet xahanbꞌal, bꞌay chinhuslax teꞌ pom, yajaꞌ teꞌ acacia chawako yinh. 2 Lahan chawute ispakꞌul yebꞌ sat, 45 (howebꞌ yoxkꞌal) centímetro chawute ispakꞌul, 45 (howebꞌ yoxkꞌal) centímetro chawutepaxo sat, haxa istelbꞌal xin 90 (lahonhebꞌ ishokꞌal) centímetro chawutekanh; wal yukꞌaꞌ teꞌ, huneꞌnhe chu yebꞌ ismexhahil tuꞌ. 3 Kat hawaniko chꞌen oro kaw kꞌul yinh, chawako chꞌen yibꞌanh yebꞌ yinh iskanhebꞌal iskꞌul, yebꞌ yinh yukꞌaꞌil ismexhahil yet xahanbꞌal tuꞌ; kat hawaniko yelawil istiꞌlaj, oro chawako yinh. 4 Kat hawanipaxiko chꞌen argolla oro, petkixhtanhe yehi, yalanh yelawil istiꞌ tuꞌ, hunun chꞌen yinh hunun istxikin, yuxin kabꞌkabꞌ yinh hunun iskꞌul; yul chꞌen chꞌalaxilto te teꞌ chibꞌatxnikanh mexha tuꞌ. 5 Haxa yet chawatxꞌen kabꞌebꞌ te teꞌ chibꞌatxnikanh ismexhahil yet xahanbꞌal tuꞌ acacia teꞌ chawahkoj, kat hawaniko chꞌen oro yinh teꞌ. 6 Chawanayo xin ismexhahil bꞌay chinhuslax pom tuꞌ sata qꞌap cortina, qꞌap aykanh sata Kaxha bꞌay ayayto intratohan, sata ismajil Kaxha tuꞌ, bꞌay chintzotelan yebꞌ hach.7 »Hunun sakꞌayal yet chiꞌalaxayto aceite yul chꞌen lámpara, kat isnhusni yaꞌ Aarón pom kaw xuqꞌ sam wetan yibꞌanh ismexhahil tuꞌ. 8 Hakpax tuꞌ xin yet chiqꞌejbꞌayoj yet chiꞌalaxiko qꞌaꞌ yinh chꞌen lámpara, chisnhuspaxo yaꞌ pom wetan. Cheyije huneꞌ tiꞌ insatajan yinh sunilbꞌal ej tiempo. 9 Mach cheyalte yibꞌanh huneꞌ ismexhahil yet xahanbꞌal tiꞌ hunuxa nan pomal, maka no noqꞌ chinhuslaxi, mach chetixhpaxayo vino cheyaqꞌ heyebꞌalqꞌabꞌeho yibꞌanh. 10 Huneꞌ ismexhahil yet xahanbꞌal tiꞌ, kaw wetan yehi; hunelchꞌan yul hunun habꞌil xin chiyalte yaꞌ Aarón ischikꞌil no noqꞌ yibꞌanh yukꞌaꞌil ismexhahil yet xahanbꞌal tiꞌ, noꞌ chꞌaqꞌlax yinh xahanbꞌalil yu waqꞌnihan nimankꞌulal yinh ismul anma. Huntaꞌelnhechꞌan yul hunun habꞌil chihaltelax xahanbꞌal tiꞌ yu waqꞌni nimankꞌulalan yinh ismul anma, chilan iswatxꞌen yuninal yuninal ebꞌnaj huneꞌ tuꞌ,»a xhi Komam Jahawil tet yaꞌ Moisés.
Ismelyuhal kolbꞌanile
11 Yalnipaxo Komam tet yaꞌ Moisés hakaꞌ tiꞌ:
12 «Hayet chawinikanh isbꞌisil anma Israel tiꞌ, yilal yaqꞌni ebꞌnaj melyu wetan iskolbꞌanilo iskawil; haxinwal machi hunu isyaꞌtajil chul xol ebꞌnaj kat iskam ebꞌnaj yu, yet chiꞌilaxkanh isbꞌisil ebꞌnaj. 13 Haꞌ mak chitzꞌunlax isbꞌi tuꞌ, yilal istohlan howebꞌ gramo plata wetan, lahan hakaꞌ yikta yip chꞌen peso chꞌaqꞌlax yul watutan. 14 Sunil mak tzꞌajanxa yinh 20 (hunkꞌal) habꞌil yebꞌ makta ekꞌbꞌalxa yinh 20 (hunkꞌal) habꞌil tuꞌ, haꞌ chꞌaqꞌni huneꞌ yebꞌalqꞌabꞌe tiꞌ wetan, hanin Yahawilintiꞌan. 15 Hayet chaqꞌni anma isyebꞌalqꞌabꞌ iskolbꞌanilo iskawil wetan, lahan chaqꞌ, anma qꞌalom, mach ekꞌbꞌalo chu yaqꞌni, haxa anma mebꞌaꞌ xin tzꞌajan chaqꞌa, howebꞌ gramo plata chaqꞌ hunun. 16 Yuxin chakutxbꞌakanh chꞌen melyu chaqꞌ ebꞌnaj iskꞌahol yaꞌ Israel tuꞌ iskolbꞌanilo iskawil, haꞌ chꞌen xin chiꞌokniko yul watutan watxꞌebꞌil yinh qꞌap qꞌap, bꞌay chinchah hinbꞌahan yebꞌ hach. Hak tuꞌ xin chu isnahniti anma Israel insatajan yinh sunilbꞌal tiempo tato yaqꞌ anma isyebꞌalqꞌabꞌ wetan iskolbꞌanilo iskawil,» xhi Komam tet yaꞌ Moisés.
Huneꞌ chꞌen pechꞌan bronce
(Ex. 38:8)
17 Ayto tzet yal Komam tet yaꞌ Moisés hakaꞌ tiꞌ:
18 «Watxꞌepaxo huneꞌ pechꞌan nabꞌa bronce, kat hawatxꞌenpaxo yoyal pechꞌan tuꞌ, bronce chꞌen chawapaxikoj, haꞌ tuꞌ xin chistxꞌah isqꞌabꞌ yaꞌ Aarón. Chawayo huneꞌ pechꞌan tuꞌ xolbꞌal bꞌay chonhoknapno yul watutan bꞌay chinye hinbꞌahan tawet yebꞌ ismexhahil yet xahanbꞌal; kat xin hanohtzen yu ha haꞌ. 19 Haꞌ xin yaꞌ Aarón yebꞌ ebꞌnaj iskꞌahol chihti ebꞌnaj haꞌ yul pechꞌan tuꞌ, kat istxꞌahni ebꞌnaj isqꞌabꞌ yebꞌ yoj. 20 Chistxꞌah ebꞌnaj isqꞌabꞌ yebꞌ yoj tuꞌ yet chiꞌokto ebꞌnaj yul watuttuꞌan watxꞌebꞌil yinh qꞌap qꞌap, bꞌay chinchah hinbꞌahan yebꞌ ebꞌnaj; yebꞌpaxo yet chihitziko ebꞌnaj sata ismexhahil yet xahanbꞌal yu isyijen ismunil, yet chalten ebꞌnaj yebꞌalqꞌabꞌ chinuxhlax yinh xahanbꞌalil wetan; hak tuꞌ xin mach chikam ebꞌnaj. 21 Chistxꞌah ebꞌnaj isqꞌabꞌ yebꞌ yoj tuꞌ yunhe mach chikam ebꞌnaj. Huneꞌ tiꞌ chejbꞌanile chukano yinh sunilbꞌal ej habꞌil tet yaꞌ Aarón yebꞌ tet sunil yuninal yuninal yaꞌ chipohchahi,» xhi Komam.
Teꞌ aceite yebꞌ teꞌ pom chiꞌokniko yinh ismunil Komam Dios
22 Aytopaxo tzet yal Komam Dios tet yaꞌ Moisés hakaꞌ tiꞌ:
23 «Chasayilo hunteqꞌan te teꞌ kaw xuqꞌkano sam: 12 (kabꞌlanhebꞌ) libra iskꞌolal teꞌ mirra, teꞌ kaw kꞌul chasayiloj, yebꞌ wajebꞌ libra teꞌ canela, kaw xuqꞌ sam, yebꞌ wajebꞌ libra teꞌ waleꞌ kaw xuqꞌ sam; 24 yebꞌ 12 (kabꞌlanhebꞌ) libra teꞌ casia, hakaꞌ yalil chꞌen peso chꞌaqꞌlax yul watutan, yebꞌ yikta iskanh litro aceite chꞌel yinh teꞌ olivo. 25 Yinh hunteqꞌan teꞌ aceite tiꞌ xin chawatxꞌe teꞌ aceite chiꞌalaxayo yibꞌanh iswiꞌ ebꞌnaj chꞌok yinh inmunilan; chawatxꞌe yinh kaw kꞌul hakaꞌ chu iswatxꞌen ebꞌnaj chiwatxꞌen perfume, huneꞌ aceite tuꞌ kaw kꞌul yinh inmunilan. 26 Kat xin hajobꞌnayo aceite tuꞌ yibꞌanh watutan watxꞌebꞌil yinh qꞌap qꞌap, bꞌay chinchah hinbꞌahan yebꞌ hex, yebꞌ yibꞌanh teꞌ isKaxhahil inTratohan. 27 Chajobꞌnipaxayo yibꞌanh teꞌ mexha yebꞌ ismunlabꞌal teꞌ, yebꞌ yinh chꞌen lámpara, bꞌay chiꞌok qꞌaꞌ yinh teꞌ aceite, yebꞌ ismunlabꞌal chꞌen; yebꞌ yibꞌanh mexha bꞌay chinhuslax pom. 28 Chajobꞌnipaxayo yibꞌanh ismexhahil yet xahanbꞌal bꞌay chinhuslax no noqꞌ yinh xahanbꞌalil, yebꞌ yibꞌanh ismunlabꞌal ismexhahil yet xahanbꞌal; yebꞌ yibꞌanh chꞌen pechꞌan yebꞌ yoyal. 29 Hak tuꞌ xin chu yokkano sunil tuꞌ wetojan, kaw xin txahul chꞌelkanikoj; sunil tzet bꞌay chiꞌalaxayo aceite tuꞌ, wetan chukanikoj.
30 »Chajobꞌpaxayo aceite tuꞌ yibꞌanh yaꞌ Aarón yebꞌ ebꞌnaj iskꞌahol, hak tuꞌ chu yok ebꞌnaj insacerdotehojan yinh inmunilan. 31 Kat xin hawalni tet anma Israel hakaꞌ tiꞌ: “Haꞌ huneꞌ aceite tiꞌ, haꞌ chiqꞌanlax yinh sunilbꞌal tiempo, haꞌ chiꞌalaxayo yibꞌanh tzet chiꞌokkano yeto Komam. 32 Huneꞌ aceite tiꞌ, mach chiꞌalaxayo yibꞌanh hunu komon anma, machi xin chexok hewatxꞌe aceite hakaꞌ huneꞌ tiꞌ. Huneꞌ aceite tiꞌ wetan yehi, txahulojabꞌ teyet. 33 Ta ay hunu mak chiwatxꞌen hunu aceite hakaꞌ tiꞌ, maka ta chisjobꞌayo huneꞌ aceite tiꞌ yibꞌanh hunu komon anma, chiꞌilaxilo huneꞌ mak tuꞌ texol,” kachi,» xhi Komam tet yaꞌ Moisés.
34 Yalnipaxo Komam tet yaꞌ Moisés:
«Saypaxo hunteqꞌanxa te teꞌ kaw xuqꞌ sam, lahan xin chawute ismalil hunun teꞌ, chasay teꞌ bálsamo, yebꞌ teꞌ chihal-lax isqꞌajehal kaw xuqꞌkano sam, yebꞌ teꞌ pom, yebꞌ teꞌ gálbano kaw xuqꞌ sam. 35 Haꞌ teꞌ xin chawako pomal, yaj haꞌ teꞌ pom tuꞌ xin wetan chꞌaqꞌlax teꞌ. Kaw chasom teꞌ hakaꞌ chu iswatxꞌelax perfume yu ebꞌnaj watxꞌem perfume. 36 Chakokꞌtzen hanikꞌo teꞌ pom tuꞌ, kaw kokꞌ chu, kat hawanayo sata teꞌ Kaxha bꞌay ayayto trato watxꞌebꞌil wuhan yebꞌ hex, teꞌ ayikto yul qꞌap qꞌap aykanh watutojan, bꞌay chinchah hinbꞌahan yebꞌ hach. Teꞌ pom tuꞌ kaw niman yelapno yul insatan yuto wetan chꞌaqꞌlaxi.b 37 Machi hunu mak xin chiꞌok iswatxꞌe hunu teꞌ pom hakaꞌ huneꞌ chawatxꞌe tuꞌ; kaw nimanojabꞌ yelapno yul hasat yuto wetan yehi. 38 Ta ay hunu mak chꞌok watxꞌeno hunu teꞌ pom lahan sam hakaꞌ tuꞌ yu isxuqꞌxen sam, chiꞌilaxilo huneꞌ mak tuꞌ xol inkonhobꞌan,» xhi Komam.