2 «Haꞌ yinh bꞌabꞌel tzꞌayik yinh bꞌabꞌel ixahaw chawakanh watutan yinh qꞌap qꞌap. Haꞌ bꞌey tuꞌ xin chinkutxbꞌa hinbꞌahan yebꞌ hex. 3 Kat hawanikto teꞌ Kaxha yet trato yul watuttuꞌan, kat hawanikanh qꞌap velo yenhelo teꞌ. 4 Kat hawanipaxikto teꞌ mexha yebꞌ sunil munlabꞌal chiꞌoknikoj yebꞌ chꞌen candelabro, kat hawaniko qꞌaꞌ yinh islamparahil chꞌen. 5 Kat hawanikto chꞌen mexha oro, bꞌay chinhuslax pom satalti Kaxha yet istꞌinhanil intratohan, kat hawanikanh qꞌap qꞌap bꞌay chonhoknapno yul watuttuꞌan. 6 Kat hawanayo chꞌen ismexhahil yet xahanbꞌal bꞌay chinhuslax no noqꞌ yinh xahanbꞌalil wetan, bꞌay chonhoknapno yul watutan watxꞌebꞌilayo yinh qꞌap qꞌap bꞌay chekutxbꞌa hebꞌa inkꞌatanhan. 7 Kat hawanayo chꞌen niman pechꞌan xolbꞌal watutan bꞌay chekutxbꞌa hebꞌa inkꞌatanhan, yebꞌ xolbꞌal ismexhahil yet xahanbꞌal; kat hanohtzen chꞌen niman pechꞌan tuꞌ yu ha haꞌ. 8 Lahwi tuꞌ, kat hawanikanh qꞌap cortina yinhla ishoyanil yamaqꞌil watutan, kat hawanikanh qꞌap cortina bꞌay chonhoknapno yul yamaqꞌil tuꞌ.

9 »Kat hawiniti teꞌ aceite chiꞌalaxayo yibꞌanh mak chiꞌok munil yinh inmunilan, kat hajobꞌnayo teꞌ yibꞌanh qꞌap qꞌap aykanh yibꞌanh watuttuꞌan, yebꞌ yibꞌanh sunil tzet ayikto yul watuttuꞌan. Hak tuꞌ xin chu yokkano sunil yinh ismunil, kat yokkano wetojan. 10 Kat hajobꞌnayo teꞌ yibꞌanh ismexhahil yet xahanbꞌal bꞌay chinhuslax xahanbꞌal wetan, yebꞌ yibꞌanh sunil ismunlabꞌal ismexhahil yet xahanbꞌal tuꞌ, hak tuꞌ chu yokkano yinh ismunil, kat yokkano wetojan. 11 Kat hajobꞌnayo aceite yibꞌanh chꞌen niman pechꞌan yebꞌ yinh yoj yebꞌ yich chꞌen, kat yokkano chꞌen yinh inmunilan.

12 »Lahwi tuꞌ, kat hawinito yaꞌ Aarón yebꞌ ebꞌnaj iskꞌahol yaꞌ iskawilal istiꞌ ispultahil qꞌap watutan bꞌay chekutxbꞌa hebꞌa inkꞌatanhan, kat hechejni axhno ebꞌnaj. 13 Kat yaniko yaꞌ Aarón xil isqꞌap, qꞌap chiꞌokniko yinh inmunilan, lahwi tuꞌ kat hawanayo aceite yibꞌanh yaꞌ, yu yokkano yaꞌ munil yinh sacerdotehal. 14 Kat hahitznipaxiko ebꞌnaj iskꞌahol yaꞌ Aarón tuꞌ, kat hawaniko qꞌap túnika yinh ebꞌnaj. 15 Lahwi tuꞌ kat hawanipaxayo aceite yibꞌanh ebꞌnaj, hakaꞌ hawu yinh ismam ebꞌnaj, kat yokkano ebꞌnaj insacerdotehojan. Hayet chawanayo aceite yibꞌanh ebꞌnaj tuꞌ, hak tuꞌ chiyu iskankano huneꞌ munil tiꞌ yul isqꞌap ebꞌnaj, kat isyijenpaxo iskꞌahol ebꞌnaj chipohcha yinh yet bꞌaqꞌinh; huneꞌ munil tiꞌ chisyije ebꞌnaj yinh sunilbꞌal ej tiempo,» xhi Komam.

16 Hakaꞌ yu yalnikano Komam Dios tet yaꞌ Moisés tuꞌ, hak tuꞌ yu iswatxꞌen yaꞌ. 17 Yuxin hayet yichiko iskabꞌ habꞌil yel anma Israel sat txꞌotxꞌ Egipto, yinh bꞌabꞌel tzꞌayik yinh bꞌabꞌel ixahaw tuꞌ, iswatxꞌelaxkanh qꞌap qꞌap yatuto Komam Dios. 18 Iswatxꞌenkanh yaꞌ Moisés Yatut Komam tuꞌ, yanayo yaꞌ isxeꞌal, istzꞌonhbꞌanayo yaꞌ yoyal yibꞌanh xeꞌ tuꞌ, yaniko yaꞌ teꞌ aqꞌinteꞌ yich, yaniko yaꞌ isreglahil teꞌ. 19 Islebꞌaniko yaꞌ qꞌap cortina yichoj, islebꞌanahto yaꞌ noꞌ tzꞌum, oxebꞌ majan yuteto yaꞌ noꞌ yibꞌanh Yatut Komam, hakaꞌtikꞌa yu yalni Komam tet yaꞌ.

20 Lahwi tuꞌ, yiniti yaꞌ Moisés chꞌen kabꞌebꞌ chꞌen paqꞌan yehi, bꞌay ayko chejbꞌanile yu Komam, yanayto yaꞌ chꞌen yul isKaxha Komam Dios. Yanikto yaꞌ te teꞌ yul chꞌen argolla petan yehi ayko yalanh istiꞌ teꞌ Kaxha, yanipaxiko yaꞌ ismajil Kaxha tuꞌ. 21 Yinikto yaꞌ teꞌ Kaxha tuꞌ yul Yatut Komam Dios, islokbꞌankanh yaꞌ qꞌap velo yenhelo teꞌ Kaxha tuꞌ, hakaꞌtikꞌa yu yalni Komam Dios tet yaꞌ.

22 Yanipaxikto yaꞌ ismexhahil ixim pan yul Yatut Komam, bꞌay chiskutxbꞌa isbꞌa ebꞌnaj Israel yebꞌ Komam. Yayo yaꞌ mexha tuꞌ yinh yetkꞌulal norte yul Yatut Komam, satalti qꞌap velo. 23 Yanayo yaꞌ ixim pan yibꞌanh mexha tuꞌ sata Komam Dios, iswatxꞌe yaꞌ ixim pan hakaꞌtikꞌa yu yalnikano Komam tet yaꞌ Moisés tuꞌ.

24 Yanikto yaꞌ candelabro yul Yatut Komam bꞌay chiskutxbꞌa isbꞌa anma sata Komam, satakꞌti teꞌ mexha yet ixim pan, yinh yetkꞌulal sur sata qꞌap cortina. 25 Yaniko yaꞌ qꞌaꞌ yinh isnet aceite sata Komam Jahawil, hakaꞌtikꞌa yu yalnikano Komam tet yaꞌ Moisés.

26 Yanipaxikto yaꞌ mexha nabꞌa oro, ismexhahil xahanbꞌal yet teꞌ pom, yul Yatut Komam bꞌay chiskutxbꞌa isbꞌa anma, satalti qꞌap velo litxꞌankanh yiktabꞌal Yatut Komam. 27 Isnhusni yaꞌ pom kaw xuqꞌ sam yibꞌanh mexha tuꞌ, hakaꞌtikꞌa yu yalnikano Komam tet yaꞌ Moisés.

28 Lahwi tuꞌ, yanikanh yaꞌ qꞌap cortina ispultahil Yatut Komam bꞌay chonhoknapnoj. 29 Yanayo yaꞌ mexha yet xahanbꞌal bꞌay chinhuslax no noqꞌ yinh xahanbꞌalil tet Komam Dios sata bꞌay chonhoknapnoj yul Yatut Komam bꞌay chiskutxbꞌa isbꞌa anma Israel yebꞌ Komam Dios. Isnhusni yaꞌ Moisés no noqꞌ yebꞌ ixim harina yinh xahanbꞌalil tet Komam Dios; hakaꞌ yu yalnikano Komam Dios, Jahawil tet yaꞌ.

30 Yanayo yaꞌ chꞌen niman pechꞌan xolbꞌal Yatut Komam Dios bꞌay chiskutxbꞌa isbꞌa anma yebꞌ Komam, yebꞌ ismexhahil yet xahanbꞌal, isnohtzen yaꞌ chꞌen yu ha haꞌ, yu istxꞌahni isqꞌabꞌ ebꞌnaj sacerdote. 31 Yaꞌ Moisés yebꞌ yaꞌ Aarón yebꞌ ebꞌnaj iskꞌahol yaꞌ chistxꞌah ebꞌnaj isqꞌabꞌ yebꞌ yoj yinh ha haꞌ ay yul huneꞌ pechꞌan tuꞌ. 32 Hayet chiꞌokto ebꞌnaj yul Yatut Komam Dios bꞌay chiskutxbꞌa isbꞌa anma iskꞌatanh Komam, chistxꞌahni ebꞌnaj isqꞌabꞌ yebꞌ yoj, hakpax tuꞌ yet chihitziko ebꞌnaj iskꞌatanh mexha yet ismexhahil yet xahanbꞌal, chistxꞌahnipaxo ebꞌnaj isqꞌabꞌ yebꞌ yoj, hakaꞌtikꞌa yu yalnikano Komam tet yaꞌ Moisés.

33 Haxa yinh islahobꞌal xin, ishoynayo yaꞌ yamaqꞌil Yatut Komam yebꞌpaxo ismexhahil yet xahanbꞌal yu qꞌap cortina; islokbꞌankanh yaꞌ qꞌap cortina istiꞌ ispultahil yamaqꞌil Yatut Komam, bꞌay chonhoknapnoj.

34 Hayet lahwi iswatxꞌikano Yatut Komam Dios yu yaꞌ Moisés xin, yul huneꞌ moyan, yok hoyno yinh qꞌap qꞌap ayko Yatut Komam bꞌay chiskutxbꞌa isbꞌa anma Israel iskꞌatanh Komam, isnohilo isqꞌaqꞌal yip Komam yul yatut tuꞌ.^a 35 Machi xin chu yokto yaꞌ Moisés yul qꞌap qꞌap ayko yatuto Komam tuꞌ, bꞌay chiskutxbꞌa isbꞌa anma iskꞌatanh Komam, yuto ayayo huneꞌ moyan tuꞌ yibꞌanh, yebꞌ nohnakto isqꞌaqꞌal yip Komam yul.

36 Hayet chiꞌel moyan yibꞌanh qꞌap Yatut Komam tuꞌ, kat yinikanh ebꞌnaj Israel yatut, kat yok ebꞌnaj yinh isbꞌel. 37 Yaj tato mach chiꞌel huneꞌ moyan yibꞌanh Yatut Komam tuꞌ, mach chikanh ebꞌnaj iscampamento, wal xin chechma ebꞌnaj masanto yet chiꞌel moyan yibꞌanh Yatut Komam. 38 Yet tzꞌayikal ayayo huneꞌ moyan tuꞌ yibꞌanh Yatut Komam, wal yet aqꞌbꞌalil xin huneꞌ topan qꞌaꞌ ayayo yibꞌanh Yatut Komam tuꞌ; yil ebꞌnaj Israel huneꞌ tuꞌ yinh sunil tiempo yet yekꞌ ebꞌnaj yinh isbꞌel.