—Aarón, ahanhwanoj, watxꞌe kotioxhanh chonhijbꞌananh, yuto yaꞌ Moisés, yaꞌ konhinilojanh sat txꞌotxꞌ Egipto mach johtajojanh tzet mayu yaꞌ, xhi anma.

2 Istaqꞌwi yaꞌ Aarón tet anma hakaꞌ tiꞌ:

—Iwelti yome heyixal yebꞌ heyuninal, chꞌen oro ayikto yul istxikin, kat heyiniti chꞌen wetan, xhi yaꞌ.

3 Sunil konhobꞌ yilti yome oro ayikto yul istxikin, yinito anma chꞌen tet yaꞌ Aarón; 4 ischahnilo yaꞌ Aarón chꞌen tet anma, yaqꞌni uluto yaꞌ chꞌen oro tuꞌ yul qꞌaꞌ, lahwi tuꞌ iswatxꞌen yaꞌ huneꞌ yechel noꞌ tzehla wakax^b yul molde yebꞌ yu chꞌen cincel. Yalni anma sunil hakaꞌ tiꞌ:

—Hanhonh Israelonh tiꞌ haꞌ huneꞌ tiꞌ kodiosal konhinilo sat txꞌotxꞌ Egipto, xhi anma sunil.^c 5 Hayet yilni yaꞌ Aarón huneꞌ tuꞌ, iswatxꞌen yaꞌ huneꞌ ismexhahil yet xahanbꞌal sata huneꞌ yechel wakax tuꞌ, yalni yaꞌ yinh kaw ip hakaꞌ tiꞌ:

—Yet hekal chijekꞌtze qꞌinh yu janiko ismay Komam Dios, Jahawil, xhi yaꞌ.

6 Haxa yinh hunxa tzꞌayik xin kaw sahabꞌ ahwano anma, isnhusni anma no noqꞌ yinh xahanbꞌalil, yebꞌ hunteqꞌanxa xahanbꞌal chiqꞌanni aqꞌankꞌulal. Lahwi tuꞌ xin yay tzꞌonhno anma, yok waꞌoj yebꞌ ukꞌuj, tzujan tuꞌ xin yah bꞌulna anma, yok kanhalwoj, iswatxꞌen anma tzet choche iskꞌul.^d 7 Yalni Komam tet yaꞌ Moisés:

—Asiꞌ, ayanhtoj, yuto hawet konhobꞌ hawilo sat txꞌotxꞌ Egipto mayaqꞌ kꞌayoto isbꞌa. 8 Kaw yinh anhe maꞌishekꞌilo isbꞌa anma yul bꞌeh chejbꞌil wuhan ta chitohi. Xaꞌiswatxꞌe anma huneꞌ yechel noꞌ wakax yinh chꞌen oro yul huneꞌ molde, haꞌ tet xin, lanhan yinayo isbꞌa anma, chaqꞌnipaxo anma isxahanbꞌal tet; chalni anma hakaꞌ tiꞌ: “Hanhonh Israelonh tiꞌ, haꞌ huneꞌ tiꞌ kotioxh konhinilo sat txꞌotxꞌ Egipto,” xhi anma. 9 Yalnipaxo Komam tet yaꞌ Moisés:

—Kaw xawilan yebꞌ kaw wohtajan tato hunteqꞌan anma tiꞌ kaw wiꞌekano chute isbꞌa sikꞌlebꞌil. 10 Tinanh xin, kaw ayti inhowalan, matzet xin chawal wetan yinh huneꞌ tiꞌ, chintanhtzelojan sunil hunteqꞌan anma tiꞌ, tawinh xin chinpohchakanhan huneꞌ niman konhobꞌ, xhi Komam tet yaꞌ.

11 Wal yaꞌ Moisés xin ok yaꞌ txahlo tet Komam, isDiosal yaꞌ, yalni yaꞌ hakaꞌ tiꞌ:

—Mamin, ¿tzet yuxinto chawiti hahowal yinh hakonhobꞌ, hach kaw hach hawilo sat txꞌotxꞌ Egipto yet hayenilo isqꞌaqꞌal hawip yu haqꞌabꞌ? 12 Mamin, ta chawatxꞌe huneꞌ tiꞌ xin chalaꞌ ebꞌnaj ah Egipto hakaꞌ tiꞌ: “Kꞌul yubꞌ Komam Dios yinilo Komam ebꞌnaj yunhe yaqꞌlax kamo ebꞌnaj xolaj witz, yunhe istanhkanilo yikꞌal ebꞌnaj sat txꞌotxꞌ tiꞌ,” xhim ebꞌnaj. Wal xin mach chawiti hahowal, ekꞌojabꞌto ishowal hakꞌul, haxinwal mach hawayo isyaꞌtajil yibꞌanh hakonhobꞌ. 13 Nati yaꞌ Abraham, yaꞌ Isaac yebꞌ yaꞌ Israel ebꞌyaꞌ hachejabꞌ; hawawte habꞌi hawalni tet ebꞌyaꞌ hakaꞌ tiꞌ: “Chiwaqꞌ pohchahokanhan heyuninal, hakaꞌ isbꞌisil txꞌumel ay satkanh, hak tuꞌ isbꞌisil. Haxa txꞌo txꞌotxꞌ walan ta chiwaqꞌan tet heyuninal, chiwaqꞌan txꞌotxꞌ ismajulo yinh sunilbꞌal ej tiempo,” kachi, xhi yaꞌ Moisés tet Komam Dios.

14 Hak tuꞌ xin isnah isbꞌa Komam yinh tzet yala tato chayo isyaꞌtajil yibꞌanh iskonhobꞌ. 15 Ispaxayti yaꞌ Moisés yinh iswiꞌ witz tuꞌ, haꞌ xin chꞌen kabꞌebꞌ chꞌen paqꞌan yehi iqꞌbꞌil chꞌen yu yaꞌ yul isqꞌabꞌ, tzꞌibꞌnhebꞌiliko chejbꞌanile yinh chꞌen yu Komam Dios, tzꞌibꞌnhebꞌil sata chꞌen yebꞌ yinta chꞌen iskabꞌil. 16 Haꞌ kaw Komam Dios watxꞌenhe chꞌen kabꞌebꞌ chꞌen paqꞌan ye tuꞌ, yebꞌ xin haꞌ kaw Komam anipaxiko tzꞌibꞌ ayko yinh chꞌen.

17 Hayet yabꞌen yaꞌ Josué yel yaw anma tuꞌ, yalni yaꞌ tet yaꞌ Moisés hakaꞌ tiꞌ:

—Huneꞌ aw chijabꞌe bꞌey campamento tuꞌ, kochan ay mak chaqꞌle howal, xhi yaꞌ.

18 Istaqꞌwi yaꞌ Moisés:

—Mach bꞌito yet chiqꞌoji anma yinh howal, mach bꞌitopaxo bꞌiskꞌulal yet chikꞌaywa anma yinh howal, wal xin nan bꞌital chiwabꞌehan, xhi yaꞌ Moisés. 19 Hayet ishitziko yaꞌ Moisés yinh campamento tuꞌ, yilni yaꞌ huneꞌ yechel noꞌ wakax, yilnipaxo yaꞌ iskanhalwi anma, kaw kaj pulilo yaꞌ yu ishowal, wal chꞌen kabꞌebꞌ chꞌen paqꞌan yehi ayko yul isqꞌabꞌ bꞌay tzꞌibꞌnhebꞌiliko chejbꞌanile, isqꞌojayo yaꞌ chꞌen yich witz tuꞌ, ispohkanto chꞌen. 20 Lahwi tuꞌ xin yok tzabꞌno yaꞌ yinh huneꞌ yechel wakax tuꞌ, isqꞌojnito yaꞌ xol qꞌa qꞌaꞌ, lahwi tuꞌ xin iskokꞌbꞌito chꞌen yu yaꞌ, kaw pojoj elkanikoj, istixhnayo yaꞌ ispojojal tuꞌ yibꞌanh ha haꞌ, yaqꞌni yaꞌ ha haꞌ tuꞌ yukꞌuꞌ anma Israel. 21 Yalni yaꞌ Moisés tet yaꞌ Aarón:

—¿Tzet kach yute hunteqꞌan anma tiꞌ, yuxin kaw mayako anma huneꞌ niman ismul yul sat Komam Dios hawu? xhi yaꞌ Moisés.

22 Istaqꞌwi yaꞌ Aarón tet yaꞌ:

—Mamin, mach chitit hahowal winhan, yuto kaw hawohtaj tato hunteqꞌan anma tiꞌ kaw chitzala iskꞌul iswatxꞌe istxꞌojal. 23 Haꞌ anma halni wetan hakaꞌ tiꞌ: “Watxꞌe hunu kotioxhanh chonhijbꞌananh, yuto mach johtajojanh tzet yu yaꞌ Moisés, yaꞌ konhiniltijanh sat txꞌotxꞌ Egipto,” xhi anma wetan. 24 Walnihan tet anma: “Haꞌ mak ay yoro, yiqꞌabꞌti chꞌen,” kinchihan. Hak tuꞌ yu yaqꞌni ebꞌnaj chꞌen oro wetan, waniktojan chꞌen yul qꞌaꞌ, hak tuꞌ yu iswatxꞌi huneꞌ yechel wakax tiꞌ, xhi yaꞌ Aarón.

25 Hayet istꞌanhxito yaꞌ Moisés yinh anma tuꞌ, yilni yaꞌ tato bꞌejtzobꞌil anma yinh tzet choche iskꞌul, yuto yaꞌ Aarón mach qꞌoji yaꞌ iskachwa yinh ebꞌnaj, yuxin kaw txꞌixobꞌal yute isbꞌa ebꞌnaj sata anma ayko ishowal yinh. 26 Yok linhno yaꞌ Moisés istiꞌ campamento tuꞌ, yalni yaꞌ:

—Mak chako isbꞌa yinh Komam, tijabꞌ inkꞌatanhan, xhi yaꞌ. Sunil xin ebꞌnaj levita iskutxbꞌa isbꞌa iskꞌatanh yaꞌ. 27 Yalni yaꞌ Moisés tet ebꞌnaj:

—Haꞌ Komam Dios, isDiosal anma Israel chihalni hakaꞌ tiꞌ: “Hunun hex tiꞌ, cheyiqꞌ heyespada, kat hemeltzokto yul campamento tuꞌ, kat xin heyokto yul ispultahil hunun nha, kat hepotxꞌnikamo heyuxhtaj, heyamigo yebꞌ mak ayayo iskawilal heyatut,” xhi Komam, xhi yaꞌ Moisés tet ebꞌnaj.

28 Ebꞌnaj levita tuꞌ, isyije ebꞌnaj chejbꞌanile yaqꞌ yaꞌ Moisés; oxebꞌ mil ebꞌnaj winaj kam yinh huneꞌ tzꞌayik tuꞌ. 29 Yalni yaꞌ Moisés tet ebꞌnaj levita:

—Wal tinanh, chechahkano heyip sata Komam Dios, yuto hemaqꞌkamo hekꞌahol yebꞌ heyuxhtaj; yuxin tinanh chakanayo Komam Dios isyaxil teyibꞌanh, xhi yaꞌ Moisés.

30 Haxa yinh hunxa tzꞌayik xin, yalni yaꞌ Moisés tet anma:

—Hex tiꞌ kaw maxeyako huneꞌ niman mule, tinanh xin chinahtojan hunelxa bꞌay ay Komam, hamta chabꞌeto Komam tzet chiwalan, kat yaqꞌni nimankꞌulal teyinh, xhi.

31 Meltzoto yaꞌ Moisés iskꞌatanh Komam, yalni yaꞌ tet Komam hakaꞌ tiꞌ:

—Yinh kaw yeli anma tuꞌ kaw mayako huneꞌ niman mule tawet, yuto iswatxꞌe anma huneꞌ istioxh, yinh chꞌen oro. 32 Chinqꞌanan tawet ta chawaqꞌ nimankꞌulal yinh anma, tato mach chawaqꞌ nimankꞌulal xin, chahokanh inbꞌihan yul teꞌ hum tzꞌibꞌnhebꞌil hawu, xhi yaꞌ.

33 Istaqꞌwi Komam Dios tet yaꞌ:

—Wal xin hanhe mak chako ismul, haꞌ chinhokanhan isbꞌi yul wuman. 34 Wal xin, asiꞌ, ito anma tuꞌ bꞌey txꞌotxꞌ bꞌay walan tawet; naj wángelan chibꞌabꞌi tasataj; yajaꞌ yet chul istzꞌayikal wanayojan isyaꞌtajil yibꞌanh, kat wanayojan isyaꞌtajil yibꞌanh anma tiꞌ yu ismul yakoj, xhi Komam. 35 Yaniti Komam huneꞌ isyaꞌtajil yibꞌanh anma tuꞌ, yuto yiyo isbꞌa anma tet yechel noꞌ wakax iswatxꞌe yaꞌ Aarón.