—Tinanh xin asiꞌ, elanh bꞌey tiꞌ yebꞌ konhobꞌ hawilo sat txꞌotxꞌ Egipto; asiꞌwe bꞌey txꞌo txꞌotxꞌ waltehan tet yaꞌ Abraham, yaꞌ Isaac yebꞌ tet yaꞌ Jacob, txꞌotxꞌ walan ta chiwaqꞌan tet yuninal chipohchalto yinh. 2 Chiwatijan wángelan chaxhijbꞌani; kat winilojan ebꞌnaj cananeo, ebꞌnaj amorreo, ebꞌnaj heteo, ebꞌnaj ferezeo, ebꞌnaj heveo, yebꞌ ebꞌnaj jebuseo sat huneꞌ txꞌo txꞌotxꞌ tuꞌ. 3 Kaw yaxkano sat huneꞌ txꞌotxꞌ tuꞌ, chꞌel yojomal noꞌ lech yebꞌ xin noꞌ kabꞌ sat txꞌotxꞌ. Yaj xin mach chintohan texol, yuto hex tiꞌ kaw lutꞌ hexkanoj, kaw mach heyabꞌe, ay ismay kexintanhtzenilojan yul bꞌeh, xhi Komam Dios.

4 Hayet yabꞌen konhobꞌ Israel hunteqꞌan tzotiꞌ tuꞌ, yokkano anma yinh bꞌiskꞌulal; matxa hunu mak xin anikto yome yebꞌ uwe. 5 Yuto yal Komam tet yaꞌ Moisés: «Hal tet ebꞌnaj Israel hakaꞌ tiꞌ: “Hex tiꞌ, kaw wiꞌe hexkanoj, tato chinokan hunepo texol, kaw yinh anhemi chextanhilo wuhan. Tinanh xin, iwelti heyome yebꞌ heyuwe, kat wilnihan tzet chexelikoj,” kachi,» xhi Komam. 6 Hak tuꞌ xin matxa hunu anma Israel anikto yome yebꞌ yuwe; haꞌ bꞌey witz Horeb^a tuꞌ xin, ichiti huneꞌ tuꞌ.

7 Yinikanh yaꞌ Moisés huneꞌ nha qꞌap watxꞌebꞌil yatuto Komam Dios, isto yaꞌ yanokanh yintalto iscampamento ebꞌnaj Israel, nahat xin el yinh campamento tuꞌ. Yaniko yaꞌ isbꞌi hakaꞌ tiꞌ: «Nha bꞌay chischah isbꞌa anma Israel yebꞌ Komam Dios,» xhi yaꞌ. Hayet ay mak choche yalaꞌ hunu tzet ye tuꞌ tet Komam xin, chibꞌey yaꞌ Moisés yul Yatut Komam aykanh yintalto campamento tuꞌ. 8 Hayet chibꞌey yaꞌ Moisés yul Yatut Komam tuꞌ xin, sunil anma chiꞌahwanoj, kat xin yok linhno istiꞌ ispultahil mantiado watxꞌebꞌil yu tuꞌ, kat xin istꞌanhxiko anma yinh yaꞌ masanto yet chiꞌokto yaꞌ yul Yatut Komam. 9 Hayet chiꞌokto yaꞌ Moisés yul Yatut Komam tuꞌ xin, kat yul huneꞌ topan moyan, kat yok hoyno yinh istiꞌ ispultahil Yatut Komam tuꞌ, yulbꞌal yet chitzotel Komam Dios tet yaꞌ Moisés.^b 10 Hayet chilni anma yul huneꞌ topan moyan tuꞌ, kat yok hoyno yinh istiꞌ ismantiado aykanh yatuto Komam Dios, kat yay jahno anma istiꞌ ispultahil yatut yu yinayo isbꞌa tet Komam Dios.

11 Haꞌ bꞌey tuꞌ xin chitzotel Komam tet yaꞌ Moisés, hakaꞌ kotanhxiko yinh sat hunu jamigo yet chonhtzotel tet, hak tuꞌ chu istzotel Komam tet yaꞌ, chixin meltzoti yaꞌ Moisés yul campamento; wal yaꞌ Josué, yaꞌ ischejabꞌ yaꞌ, yaꞌ iskꞌahol icham Nun, hunel yehikto yaꞌ yul Yatut Komam tuꞌ, mach chiꞌelti yaꞌ.

12 Yalni yaꞌ Moisés tet Komam Dios:

—Chawal wetan tato chiwijbꞌahan huneꞌ konhobꞌ tiꞌ, yaj xin mach chawal wetan mak chiꞌok wetbꞌihojan; yaj xin chawala ta kaw chikawxi hakꞌul winhan, yebꞌ ta kaw chachtzala winhan. 13 Yuxin wal tinanh, tato kaw chachtzala winhan, yelo wetan tzet chawoche chinwatxꞌehan, yunhe iskawxi inkꞌulan tawinh, hak tuꞌ xin tonhetikꞌa chachtzala winhan. Ilkꞌanabꞌi, huneꞌ konhobꞌ tiꞌ, hakonhobꞌ yehi, xhi yaꞌ tet Komam.

14 Yalni Komam tet yaꞌ Moisés:

—Haninan chinokan hawetbꞌihoj, kat kaxhwaqꞌni xewojan, xhi Komam.

15 Istaqꞌwi yaꞌ Moisés:

—Tato maxhtaj hach chaxhok jetbꞌihojanh, mach chonhhawilojanh bꞌay ayonh tiꞌanh. 16 Tato mach chaxhok jetbꞌihojanh, ¿tzet chu johtanhenilojanh tato chachtzala yinh hakonhobꞌ yebꞌpaxo winhan? Hak tuꞌ xin mach lahano honhanh yebꞌ hunteqꞌanxa konhobꞌ ay yul sat yibꞌanhqꞌinal tiꞌ, to kaw nantikꞌa jehanh, xhi yaꞌ.

17 Yalni Komam tet yaꞌ Moisés:

—Chinwatxꞌehan hakaꞌ chawal tiꞌ, yuto chikawxi inkꞌulan tawinh, chintzalapaxojan tawinh, kaw wohtajan habꞌi yuto jamigo kobꞌa, xhi Komam.

18 Yalnipaxo yaꞌ Moisés:

—Yeh isqꞌaqꞌal hawip wetan, inqꞌanaꞌan, xhi yaꞌ.

19 Yalni Komam tet yaꞌ:

—Chiwaqꞌaꞌ ekꞌotojan iskꞌulchꞌanil inkꞌulan tasataj, yebꞌ walnojan inbꞌihan tasataj haninan Hawahawil intiꞌan. Chitzꞌay inkꞌulan yinh mak chiwochehan, chiwaqꞌan iskꞌulchꞌanil inkꞌulan tet mak bꞌay chal inkꞌulan,^c xhi Komam. 20 Yalnipaxo Komam:

—Mach chu hawilni insatan, yuto haꞌ mak chitꞌanhxiko yinh insatan, chikami, xhi Komam. 21 Yalnipaxo Komam tet yaꞌ Moisés:

—Inkꞌatanhtiꞌan ay huneꞌ hawehobꞌal. Okanhlinhno yibꞌanh chꞌen niman chꞌen tiꞌ; 22 hayet chinekꞌotojan yebꞌ isqꞌaqꞌal wipan, chachwaqꞌaktojan yul huneꞌ isholanil iskꞌul chꞌen tiꞌ, kat waniko inqꞌabꞌan hawenheloj, masanto yet chinekꞌtojan. 23 Lahwi tuꞌ xin kat winilo inqꞌabꞌan, hak tuꞌ xin chu hawilni istel wichinhan, wal insatan xin machi hunu mak chu yok tꞌanhno yinh, xhi Komam tet yaꞌ Moisés.