Txꞌo txꞌotxꞌ kaw kꞌul bꞌay chiꞌapni ebꞌnaj Israel
8
»Wal xin chebꞌeybꞌalnhe sunil chejbꞌanile chiwalkanojan teyet tiꞌ tinanh, hak tuꞌ xin ay hekawil, yebꞌ xin chipohchakanokanh hebꞌisil, kat heyoktoj, kat heyehayo sat txꞌotxꞌ yaltekano Komam tet ebꞌyaꞌ jichmam. 2 Kat xin henaniti bꞌeh bꞌay kexyijbꞌakꞌo Komam sat txꞌotxꞌ desierto yulbꞌal 40 (kawinaj) habꞌil. Kexyaniko Komam yinh isyaꞌtajil, kexyilweni yu yohtanhen Komam henabꞌal, tato cheyije ischejbꞌanil maka machoj. 3 Kexyako Komam yinh isyaꞌtajil yet heyijlen wahil, lahwi tuꞌ yaqꞌni Komam maná hewabꞌ, huneꞌ itah mach ohtabꞌilo heyu, yebꞌ mach ohtabꞌilo yu ebꞌnaj heyichmam, yunhe heyohtanheni tato machnhetaj yu tzet chikolo yuxin ay kokawil, machoj, to yupaxo Istzotiꞌ Komam Dios chiꞌelti yul istiꞌ. 4 Yulbꞌal 40 (kawinaj) habꞌil tuꞌ, maxhtikꞌa xilbꞌilo xil heqꞌap ayko teyinh, machi xin malpaxokanh heyoj yinh hebꞌel. 5 Ohtanheweloj tato yayo Komam isyaꞌtajil teyibꞌanh yu yaqꞌni hekuybꞌanil, hakaꞌ chu iskuyni hunu naj mame iskꞌahol. 6 Yuxin yijewe chejbꞌanile chal Komam Dios Jahawil, xiwanhwe tet Komam, okanhwe tzujno yinta kuybꞌanile xayaqꞌ teyet. 7 Yuto Komam Dios Jahawil chexyito sat huneꞌ txꞌo txꞌotxꞌ kaw kꞌulkanoj, huneꞌ txꞌotxꞌ bꞌay kaw ay haꞌ nixhte haꞌ chiꞌel yojomal, yebꞌ haꞌ nime haꞌ ay isnuqꞌ yaxtzꞌantzꞌonhe, yebꞌ ha haꞌ chiꞌahilo sat akꞌal yebꞌ yinhla witz. 8 Huneꞌ txꞌo txꞌotxꞌ tuꞌ, kaw chaqꞌ ixim trigo sat txꞌotxꞌ yebꞌ ixim cebada, yebꞌ teꞌ uva, yebꞌ teꞌ higuera, yebꞌ teꞌ granada, yebꞌ teꞌ olivo, yebꞌpaxo noꞌ kabꞌ. 9 Bꞌey tuꞌ, mach chiꞌok yinh hekꞌul ta matzet cheloh, machi hunu tzet ye tuꞌ tiꞌ matzet yul heqꞌabꞌ. Haꞌ chꞌen chꞌen bꞌey tuꞌ, haꞌ chꞌok hierrohal heyu, haxa yinhla iskꞌul witz xin cheyilti chꞌen cobre, 10 kat hewaꞌi masanta kaw chinohkano hekꞌul, cheyaqꞌni yuchꞌandiosal tet Komam Dios Jahawil yu txꞌo txꞌotxꞌ kaw kꞌul, chaqꞌ teyet.Iptzebꞌal yinh ebꞌnaj Israel ta mach chisnahulnheto ebꞌnaj Komam Dios
11 »Cheyil hebꞌa tajka chenahulnheto Komam Dios Jahawil. Mach chebꞌej heyijen chejbꞌanile yebꞌ kuybꞌanile yinh tzet chal Komam, hakaꞌ chu walnikanojan teyet tiꞌ. 12 Tajka hayet chilahwi hewaꞌkanoj, yet kaw chinohkano hekꞌul, yebꞌ yet chexehayo yul hunteqꞌan nha kaw kꞌul chewatxꞌekanh, 13 yebꞌ yet kaw xapohchakanh hewakax yebꞌ hemeꞌ, yebꞌ yet kaw ayxa chꞌen oro yebꞌ chꞌen plata kꞌuwan heyu, yebꞌ yet ayxa sunil yul heqꞌabꞌ, 14 lahwi tuꞌ, kat yok loloꞌal teyinh, kat xin henahulnhento Komam Dios Jahawil konhinilti bꞌey Egipto, bꞌay ayonhiko chejabꞌoj. 15 Konhyinikꞌo Komam sat txꞌotxꞌ niman desierto kaw aykano ismay, bꞌay kaw ay noꞌ howla labꞌa, yebꞌpaxo noꞌ kꞌolotx; bꞌay machi ha haꞌ, bꞌay elilo ha haꞌ yul iskꞌul huneꞌ chꞌen niman chꞌen. 16 Haꞌ xin maná yaqꞌ Komam kowabꞌ sat txꞌotxꞌ desierto tuꞌ, huneꞌ itah mach ohtabꞌilo yu ebꞌnaj hemam. Yayo Komam isyaꞌtajil teyibꞌanh kexyilweni, yu iskꞌulalo teyinh yet tzujaniloxa. 17 Machojabꞌ cheyal yebꞌ heyanma hakaꞌ tiꞌ: “Yu jip yebꞌ yu komunil, yuxin kaw ay koqꞌalomal tiꞌ,” tajka kexchi. 18 Wal xin yilal henaniti Komam Dios Jahawil, yuto haꞌ Komam chiꞌaqꞌni heyip heyok qꞌalomal, hak tuꞌ xin chu yijnikano isbꞌa yinh tzet tꞌinhbꞌabꞌilkano yu Komam tet ebꞌnaj jichmam, hakaꞌ chijil yijni isbꞌa tiꞌ.
19 »Yaj tato chenahulnheto Komam Dios Jahawil, kat heyok tzujno yinta tzet chiyal anma isdiosaloj, kat heyinayo hebꞌa tet, yinh kaw yeli chiwalkanojan teyet tinanh, tato chexistanhtzelo Komam yinh hunelnhe, 20 hakaꞌ chu istanhtzenilo Komam ej konhobꞌ tesataj, hak tuꞌ chu kexistanhtzenilo Komam ta mach cheyabꞌeto tzet chiyal Komam Dios Jahawil,» xhi yaꞌ Moisés.