7 »Wal xahanbꞌal chitohlan mule, yebꞌ xahanbꞌal chiꞌaqꞌni tanho mule lahan chu iswatxꞌebꞌanil. Haꞌ naj sacerdote chiwatxꞌen xahanbꞌal tuꞌ, yet naj tuꞌ ye ischibꞌehal noꞌ. 8 Hakpax tuꞌ yet chisnhusni naj sacerdote xahanbꞌal, yet naj chukaniko noꞌ istzꞌumal. 9 Hakpax tuꞌ xin, hunteqꞌan xahanbꞌal chiqꞌanbꞌi yul horno yebꞌ hunteqꞌan chiqꞌantzelax yul xhaltin maka chitahtzelax yul chꞌen xi, yet naj sacerdote chukoj, haꞌ naj xin chikꞌuxnitoj. 10 Hakpax tuꞌ, hunteqꞌan yebꞌalqꞌabꞌ yinh ixim harina sombꞌil yebꞌ aceite, yebꞌpaxo hunteqꞌan qꞌanbꞌinaj, yet ebꞌnaj iskꞌahol yaꞌ Aarón, lahan xin chu ispohnayo ebꞌnaj yinh.

11 »Haꞌ hunteqꞌan tiꞌ chejbꞌanile yibꞌanhilo xahanbꞌal yet aqꞌankꞌulal chihaltelax tet Komam Jahawil. 12 Ta yu yaqꞌlax yuchꞌandiosal tet Komam, yuxin chihaltelax noꞌ xahanbꞌal, yilal yaqꞌlax ixim nime pan machi yanhal aykoj, sombꞌiliko aceite xol, yebꞌpaxo ixim wonhkꞌox pan machi yanhal, sombꞌiliko nichꞌan aceite xol, yebꞌpaxo ixim nime pan watxꞌebꞌil yinh ixim harina kaw kꞌul, chisomlax xol aceite. 13 Hun chu yaqꞌlax ixim pan ayko yanhal, yebꞌ xahanbꞌal bꞌay chꞌaqꞌlax yuchꞌandiosal tet Komam yebꞌ xahanbꞌal yet aqꞌankꞌulal. 14 Yinh sunil hunteqꞌan xahanbꞌal tuꞌ, chiyikanh naj sacerdote hanikꞌoj kat yalten naj sata Komam, hakaꞌ hunu sabꞌehal chikan yul isqꞌabꞌ naj sacerdote, naj chitixhnayo ischikꞌil no noqꞌ chꞌaqꞌlax yinh xahanbꞌalil yet aqꞌankꞌulal.

15 »Haꞌ noꞌ chibꞌe chꞌaqꞌlax yinh xahanbꞌal yet aqꞌankꞌulal, yu yaqꞌlax yuchꞌandiosal tet Komam, yilal iskꞌuxlaxto noꞌ yinhtikꞌa istzꞌayikal yet chihaltelax noꞌ tet Komam, matxa xin nino noꞌ chikankano yinh hunxa tzꞌayik. 16 Yajaꞌ ta chalte huneꞌ xahanbꞌal tuꞌ, yu isyijen hunu tzet ye tuꞌ tet Komam, maka tonhe chiꞌel yinh iskꞌul chiyaqꞌni huneꞌ xahanbꞌal tuꞌ; wal xin chikꞌuxlax ischibꞌehal noꞌ, yinh huneꞌ tzꞌayik chihaltelax noꞌ tuꞌ, yajaꞌ ta ayto noꞌ chikan yinh hunxa tzꞌayik xin chiyu iskꞌuxlax noꞌ. 17 Yajaꞌ ta ayto noꞌ chibꞌe yinh xahanbꞌal chitokan yinh yoxihal, yilal isnhuslaxkanto noꞌ sunil. 18 Yaj ta ay mak chikꞌuxni ischibꞌehal noꞌ xahanbꞌal yet aqꞌankꞌulal yinh yoxihal, haꞌ huneꞌ xahanbꞌal tuꞌ mach chischah Komam, mach chiꞌok yinh ismunil. Huneꞌ tuꞌ, kaw txꞌoj yul sat Komam, haꞌ mak chikꞌuxni noꞌ chibꞌe tuꞌ, chiꞌok huneꞌ tuꞌ ismuloj.

19 »Tato ay noꞌ chibꞌe yet xahanbꞌal tuꞌ, chiꞌekꞌ pitno hunu tzet ye tuꞌ mach sajoj, noꞌ chibꞌe tuꞌ, mach chikꞌuxlax noꞌ, wal xin wiyom isnhuslaxkanto noꞌ.

»Haꞌ mak saj yehi, chu iskꞌuxni hunteqꞌanxa noꞌ chibꞌe yet xahanbꞌal. 20 Yaj ta ay mak mach sajoj, kat iskꞌuxni ischibꞌehal noꞌ xahanbꞌal yet aqꞌankꞌulal, haꞌ huneꞌ mak tuꞌ, wiyom yilaxilo xol yet konhobꞌ.

21 »Haꞌ mak chitzabꞌni tzet ye tuꞌ mach sajoj, hakaꞌ tzet mach sajo chiꞌel yinh anma, maka istzabꞌni isnimanil no noqꞌ mach sajoj, maka hunu tzet ye tuꞌ mach sajoj hakaꞌ yalni kuybꞌanile, kat iskꞌuxni ischibꞌehal noꞌ chꞌaqꞌlax yinh xahanbꞌalil yet aqꞌankꞌulal, xahanbꞌal yet Komam yehi, haꞌ huneꞌ mak tuꞌ, wiyom yilaxilo xol yet konhobꞌ,» xhi Komam tet yaꞌ Moisés.

22 Istzotelpaxo Komam Jahawil tet yaꞌ Moisés, yalni Komam: 23 «Hal hunteqꞌan tiꞌ tet ebꞌnaj Israel: Mach chu islohni ebꞌnaj ismantecahil noꞌ wakax, noꞌ meꞌ, maka noꞌ chiw. 24 Yebꞌpaxo ismantecahil noꞌ tonhe chikamkanh, maka noꞌ chixitlaxkamo yu noꞌ howla noqꞌ; chisje yokniko noꞌ yinh hunuxa tzet ye tuꞌ, yajaꞌ mach chu iskꞌuxlax noꞌ.

25 »Maknhetikꞌa chiloni ismantecahil no noqꞌ chinhuslax xahanbꞌalil tet Komam Jahawil, haꞌ huneꞌ mak tuꞌ, wiyom yilaxilo xol yet konhobꞌ.

26 »Bꞌajxanhetuꞌwal chexehayoj, mach cheloh ischikꞌil no noqꞌ, nitam heloni ischikꞌil noꞌ chꞌik. 27 Haꞌ mak chiloni ischikꞌil no noqꞌ tzijxanhe noqꞌal, haꞌ huneꞌ mak tuꞌ, wiyom yilaxilo xol yet konhobꞌ, kachi,» xhi Komam tet yaꞌ Moisés.

28 Istzotelpaxo Komam Dios Jahawil tet yaꞌ Moisés, yalni Komam: 29 «Hal hunteqꞌan tiꞌ tet ebꞌnaj Israel: Mak chihalten xahanbꞌal yet aqꞌankꞌulal tet Komam Jahawil, yilal yinito xahanbꞌal tuꞌ sata Komam. 30 Haꞌ mak chiꞌinito huneꞌ noꞌ xahanbꞌal chinhuslax sata Komam tuꞌ chiyito naj noꞌ yul isqꞌabꞌ; noꞌ ismantecahil, yebꞌ noꞌ istxam iskꞌul, kat isbꞌatxnikanh naj noꞌ sata Komam. 31 Haꞌ ismantecahil noꞌ tuꞌ, chisnhus naj sacerdote yibꞌanh ismexhahil xahanbꞌal, haxa noꞌ istxam iskꞌul xin yet yaꞌ Aarón ye noꞌ yebꞌ ebꞌnaj iskꞌahol. 32 Haxa isbꞌul noꞌ chiꞌaqꞌlax yinh xahanbꞌalil yet aqꞌankꞌulal, noꞌ isbꞌul yinh iswatxꞌqꞌabꞌ chꞌaqꞌlax noꞌ tet naj sacerdote. 33 Haꞌ isbꞌul noꞌ yinh iswatxꞌqꞌabꞌ tuꞌ yet naj sacerdote iskꞌahol yaꞌ Aarón, naj chihalten ismantecahil noꞌ yebꞌ ischikꞌil noꞌ xahanbꞌalil yet aqꞌankꞌulal. 34 Haꞌ yinh xahanbꞌal yet aqꞌankꞌulal chiyaqꞌ ebꞌnaj Israel tet Komam, haꞌ noꞌ istxam iskꞌul chibꞌatxlaxkanh tet Komam yebꞌ noꞌ isbꞌul, haꞌ chꞌaqꞌlax sabꞌehal tet yaꞌ Aarón yaꞌ sacerdote, yebꞌ tet ebꞌnaj iskꞌahol. Huneꞌ tuꞌ, chejbꞌanile chukano tet ebꞌnaj Israel yinh sunilbꞌal ej tiempo,» xhi Komam tet yaꞌ Moisés.

35 Haꞌ ton hunteqꞌan tuꞌ, ismajul yaꞌ Aarón yebꞌ ebꞌnaj iskꞌahol, yinh hunteqꞌan xahanbꞌal chinhuslax tet Komam, hataxtikꞌa yinh istzꞌayikal yet yaniko Komam ebꞌnaj sacerdotehal yinh ismunil. 36 Haꞌ Komam Jahawil halnhekanoj ta chꞌaqꞌlax tet ebꞌnaj yettaxtikꞌa issaylaxkaniko ebꞌnaj sacerdotehal xol ebꞌnaj Israel. Huneꞌ tiꞌ chejbꞌanile chukano yinh sunilbꞌal ej habꞌil.

37 Haꞌ ton hunteqꞌan tiꞌ chejbꞌanile yinh xahanbꞌal chinhuslaxi, yebꞌ yebꞌalqꞌabꞌe yinh sat tzꞌunubꞌ, yebꞌ xahanbꞌal yinh mule, yebꞌ xin xahanbꞌal chitohlan mule, yebꞌ xahanbꞌal yet chisikꞌlaxilo hunu mak yinh ismunil Komam, yebꞌ xahanbꞌal yet aqꞌankꞌulal. 38 Hunteqꞌan chejbꞌanile tiꞌ, yaqꞌ Komam Dios tet yaꞌ Moisés bꞌey witz Sinaí, yet ay ebꞌnaj sat txꞌotxꞌ desierto, yet yalni Komam tet anma Israel ta chꞌaqꞌlax xahanbꞌal tet Komam.