Xahanbꞌal chaqꞌ mak chꞌetan yet anmahil
6
Istzotelpaxo Komam Dios tet yaꞌ Moisés, yalni Komam tet yaꞌ hakaꞌ tiꞌ: 2 «Ta ay hunu mak chiyako ismul sata Komam Dios yu yetan yet anmahil yinh tzet ye tuꞌ abꞌebꞌiliko tet, maka chelqꞌalo hunu tzet ye tuꞌ, maka yinilo hunu tzet ye tuꞌ yu leqꞌtiꞌal tet yet anmahil; 3 maka mach chisje yalaꞌlo hunu tzet xaꞌilcha yu; maka yaqꞌ bꞌinaho isbꞌi Komam Dios yinh tzet ye tuꞌ mach yeloj. Bꞌaytetnhetikꞌa yinh hunteqꞌan istxꞌojal tiꞌ chiꞌaykꞌay hunu mak tuꞌ, 4 chako ismul, yuxin yilal yaqꞌni meltzoho tzet yelqꞌa tuꞌ yebꞌ tzet yiqꞌ yinh leqꞌtiꞌal, maka tzet ye tuꞌ abꞌebꞌiliko tet, maka tzet issikꞌa, 5 maka hunu tzet ye tuꞌ mach yelo bꞌay yaqꞌ bꞌinaho isbꞌi Komam Dios yinh. Sunil hunteqꞌan tuꞌ, yilal yaqꞌni meltzoho tet mak ay yet, kat yaqꞌnipaxo huneꞌ ishoꞌ majan isselel yibꞌanhilo selel chaqꞌ tuꞌ. 6 Kat yaqꞌni naj isxahanbꞌal tet Komam Jahawil yinh ismul tuꞌ; haꞌ isxahanbꞌal naj chiyaqꞌa, haꞌ ton hunu noꞌ winaj meꞌ machi istzakaꞌil, xol ismeꞌ naj tuꞌ, kat xin yil-laxi hanta istohol noꞌ meꞌ tuꞌ, kat yinito naj noꞌ tet naj sacerdote xahanbꞌalo yinh ismul. 7 Haxa xin naj sacerdote tuꞌ chiꞌaqꞌni noꞌ xahanbꞌalo yinh ismul naj sata Komam, kat xin yaqꞌnikano Komam nimankꞌulal yinh hunteqꞌan bꞌaytet yinh yako naj ismul tuꞌ,» xhi Komam tet yaꞌ Moisés.Chejbꞌanile yinh tzet chu yaqꞌlax xahanbꞌal
8 Istzotelpaxo Komam Dios tet yaꞌ Moisés, yalni Komam tet yaꞌ: 9 «Hal hunteqꞌan chejbꞌanile tiꞌ tet yaꞌ Aarón yebꞌ tet ebꞌnaj iskꞌahol yaꞌ yinh tzet chu yaqꞌni ebꞌnaj xahanbꞌal chinhuslax wetan. Haꞌ no noqꞌ chinhuslax xahanbꞌalil tuꞌ, sunilbꞌal aqꞌbꞌal chꞌahto noꞌ yibꞌanh tzaqꞌaqꞌ ayahto yibꞌanh mexha yet xahanbꞌal, yunhe istzꞌakanto noꞌ yul qꞌaꞌ. 10 Kat yaniko naj sacerdote xil isqꞌap watxꞌebꞌil yinh qꞌap lino, yebꞌ qꞌap yul wexe linopaxoj, kat yinilo naj istanhil noꞌ tzꞌato tuꞌ yibꞌanh yet xahanbꞌal, kat yanayo naj yinh qꞌaxep iskꞌul ismexhahil xahanbꞌal. 11 Lahwi tuꞌ, kat ishelnipaxilo naj xil isqꞌap tuꞌ, kat yaniko naj hunteqꞌanxa xil isqꞌap yinh, kat yinilto naj istanhil xahanbꞌal tuꞌ yintalto campamento, kat yanikanayo naj bꞌay machi tzꞌil.
12 »Haꞌ qꞌa qꞌaꞌ ayahto yibꞌanh ismexhahil xahanbꞌal tuꞌ, maxhtikꞌa chitanh qꞌaꞌ yinh; wal xin hunun sakꞌayal yanahto naj sacerdote teꞌ siꞌ yibꞌanh qꞌaꞌ, kat yanahto naj sacerdote xahanbꞌal nhuslaxo yibꞌanh teꞌ siꞌ tuꞌ, kat isnhusnipaxo naj ismantecahil no noqꞌ chꞌaqꞌlax yinh xahanbꞌalil yet aqꞌankꞌulal. 13 Ayojabꞌnhetikꞌako qꞌa qꞌaꞌ yibꞌanh ismexhahil xahanbꞌal tuꞌ, maxhtikꞌa chichalax tanho qꞌaꞌ yinh.
14 »Haꞌ hunteqꞌanxa chejbꞌanile tiꞌ, haꞌ ton yinh sat tzꞌunubꞌ chꞌaqꞌlax yebꞌalqꞌabꞌehal, haꞌ hunteqꞌan tuꞌ, chiyalte ebꞌnaj sacerdote, iskꞌahol yaꞌ Aarón, tet Komam sata ismexhahil xahanbꞌal. 15 Kat yinikanh hunu ebꞌnaj tuꞌ hun pul ixim harina kaw kꞌul, chꞌaqꞌlax yebꞌalqꞌabꞌehal, yebꞌpaxo teꞌ aceite yebꞌ sunil teꞌ pom ayayo yibꞌanh yebꞌalqꞌabꞌe tuꞌ, kat isnhusni naj yibꞌanh ismexhahil xahanbꞌal, huneꞌ yebꞌalqꞌabꞌe tuꞌ nabꞌanile yehi, wal xin kaw xuqꞌ chꞌapni sam sata Komam. 16 Haxa yaqꞌbꞌilxa yebꞌalqꞌabꞌe chikankano xin, haꞌ chislo yaꞌ Aarón yebꞌ ebꞌnaj iskꞌahol, machi xin chiꞌok yanhal ixim yet chiswahni ebꞌnaj ixim. Haꞌ bꞌey istiꞌ isTabernáculo Komam bꞌay chiskutxbꞌa isbꞌa ebꞌnaj Israel yebꞌ Komam, haꞌ yul yamaqꞌil yatut tuꞌ chiswah ebꞌnaj ixim bꞌey huneꞌ ehobꞌal Txahul. 17 Yet chitahtzelax tzet chilolaxi chꞌaqꞌlax yebꞌalqꞌabꞌe tuꞌ, machi alaxayto yanhal. Haꞌ yebꞌalqꞌabꞌe chihaltelax wettiꞌan xawaqꞌan ismajul ebꞌnaj sacerdote yinh. Hunteqꞌan yebꞌalqꞌabꞌe tuꞌ txahul yet Komam yehi, yuto lahan hakaꞌ xahanbꞌal chiꞌaqꞌni tanho mule yebꞌ xahanbꞌal chitohlan mule. 18 Sunil ebꞌnaj winaj chipoh yinh yuninal yaꞌ Aarón ay ismajul ebꞌnaj yinh hunteqꞌan yebꞌalqꞌabꞌe chinhuslax tet Komam, chisje islohni ebꞌnaj. Huneꞌ tiꞌ chejbꞌanile chukano tet ebꞌnaj yinh sunilbꞌal tiempo. Tzijxanhe tzet chitzabꞌni, yet Komam Dios chiyukanikoj, kachi,» xhi Komam tet yaꞌ Moisés.
19 Yal Komam Dios tet yaꞌ Moisés hakaꞌ tiꞌ: 20 «Haꞌ ton huneꞌ xahanbꞌal tiꞌ chiyaqꞌ yaꞌ Aarón yebꞌ ebꞌnaj iskꞌahol tet Komam yinh istzꞌayikal yet chiꞌalaxayo aceite yibꞌanh ebꞌnaj yet chiꞌokkano ebꞌnaj yinh ismunil Komam yinh sacerdotehal. Yilal yaqꞌni ebꞌnaj kanhebꞌ libra ixim harina, ixim kaw kꞌul, huneꞌ tuꞌ isyebꞌalqꞌabꞌ ebꞌnaj yinh sat tzꞌunubꞌ. Yikta xin ixim chalte ebꞌnaj yinh sakꞌayal, yikta ixim xin chaltepaxo ebꞌnaj yinh qꞌejbꞌiyal, hak tuꞌ chute ebꞌnaj yinh sunilbꞌal ej tiempo, yinh hunun tzꞌayik. 21 Chiqꞌantzelax ixim yul xhaltin xol aceite, lahwi tuꞌ kat isqꞌaxponayo ebꞌnaj ixim, kat yalten ebꞌnaj ixim isyebꞌalqꞌabꞌo tet Komam; kaw xin xuqꞌ sam huneꞌ yebꞌalqꞌabꞌe tuꞌ yul sat Komam Jahawil. 22 Hakpax tuꞌ xin chiyute hunun ebꞌnaj chiꞌok selelo yaꞌ Aarón, yaꞌ iswiꞌehal sacerdote, ebꞌnaj iskꞌahol yaꞌ chipohchakanokanh. Haꞌ isyebꞌalqꞌabꞌ ebꞌnaj chiyaqꞌ tuꞌ, yetpaxo Komam Jahawil yehi yinh sunilbꞌal tiempo, chinhuslax sunil sata Komam. 23 Sunil isyebꞌalqꞌabꞌ ebꞌnaj sacerdote chiyaqꞌ tuꞌ, chinhuslaxto yinh hunelnhe, machi mak chiloni, kachi,» xhi Komam tet yaꞌ Moisés.
24 Yalnipaxo Komam Dios tet yaꞌ Moisés: 25 «Hal tet yaꞌ Aarón yebꞌ tet ebꞌnaj iskꞌahol yaꞌ hakaꞌ tiꞌ: Huneꞌ tiꞌ chejbꞌanil yinh tzet chu yaqꞌlax xahanbꞌal yinh mule. Haꞌ bꞌay chipotxꞌlax no noqꞌ chinhuslax yinh xahanbꞌalil, haꞌ tuꞌ chipotxꞌlax noꞌ chꞌaqꞌlax xahanbꞌalo yinh mule sata Komam Jahawil. Huneꞌ xahanbꞌal tuꞌ, txahul yet Komam yehi. 26 Haꞌ naj sacerdote chihalten noꞌ yinh xahanbꞌal yinh mule tuꞌ, chu iskꞌuxni naj ischibꞌehal noꞌ bꞌey huneꞌ ehobꞌal yet Komam yehi, yul yamaqꞌil Yatut Komam watxꞌebꞌil yinh qꞌap qꞌap bꞌay chiskutxbꞌa isbꞌa ebꞌnaj Israel yebꞌ Komam. 27 Tzijxanhe tzet chipitni ischibꞌehal no noqꞌ chꞌaqꞌlax xahanbꞌalil tuꞌ, yet Komam chiyukanikoj. Ta chiꞌok tixhna ischikꞌil noꞌ yinh xil isqꞌap ebꞌnaj xin, yilal istxꞌahlax xil isqꞌap ebꞌnaj tuꞌ bꞌey ehobꞌal yet Komam. 28 Ta yul txꞌotxꞌ xi chitahtzelax ischibꞌehal noꞌ chꞌaqꞌlax xahanbꞌalil tuꞌ, yilal ismaqꞌlaxpoho txꞌotxꞌ xi tuꞌ, taka yul chꞌen bronce xi chitahtzelax noꞌ xin, kaw kam chinhijlax yul chꞌen, kat istxꞌahlax chꞌen yu haꞌ.
29 »Huneꞌ xahanbꞌal tuꞌ txahul yuto yet Komam yehi. Sunil ebꞌnaj sacerdote chu iskꞌuxni ebꞌnaj ischibꞌehal noꞌ. 30 Yajaꞌ mach chu iskꞌuxlax ischibꞌehal noꞌ chiꞌilaxikto ischikꞌil yul Yatut Komam watxꞌebꞌil yinh qꞌap qꞌap bꞌay chiskutxbꞌa isbꞌa ebꞌnaj Israel yebꞌ Komam. Wal ischibꞌehal noꞌ tuꞌ chihaltelax xahanbꞌalil yinh mule tet Komam, chinhuslaxto yibꞌanh qꞌaꞌ.