2 »Taka ay hunu mak chitzabꞌni hunu tzet ye tuꞌ mach sajo yul sat Komam Dios, hakaꞌ isnimanil no noqꞌ mach sajoj, waxanhka xoltelajil noqꞌ maka noꞌ chipohchalax yul nha, maka noꞌ chishatxikꞌo iskꞌul yet chibꞌelwi, haꞌ mak chitzabꞌni noꞌ tuꞌ chitzꞌilbꞌilo yul sat Komam hakaꞌ yalni chejbꞌanile, waxanhka xin mach yohtajoj; yinh hakaꞌ tuꞌ chako ismul huneꞌ mak tuꞌ.

3 »Ta ay mak chitzabꞌni hunu tzet chiꞌel yinh anma, hunteqꞌan chitzꞌilbꞌito anma yu hakaꞌ yalni chejbꞌanile, yajaꞌ xin mach chohtanheloj, yaj ta tzujanxa, kat yohtanheniloj, chiꞌok huneꞌ tuꞌ ismuloj.

4 »Ta ay hunu mak chihalni hunu tzet ye tuꞌ yinh anhe, chiyaqꞌni bꞌinaho isbꞌi Komam Dios yinh iswatxꞌen hunu iskꞌulal maka istxꞌojal; sunil tzet chiyal hunu mak chiyaqꞌni bꞌinaho isbꞌi Komam yinh, mach xin chistxum yinh tzet chal tuꞌ, yajaꞌ ta tzujanxa kat istxumchalo yu, ay ismul yinh hakaꞌ tuꞌ.

5 »Ta ay hunu mak chiꞌaykꞌay yinh hunteqꞌan tiꞌ, yilal yalnatij bꞌaytet yinh aykꞌayi. 6 Yuxin yilal yinito hunu noꞌ miꞌe meꞌ maka noꞌ miꞌe chiw xahanbꞌalil yinh ismul. Yu huneꞌ xahanbꞌal chaqꞌ naj sacerdote yinh ismul naj tuꞌ, chiyaqꞌkano Komam Dios nimankꞌulal yinh ismul naj.

7 »Yajaꞌ ta machi loqꞌcha hunu noꞌ meꞌ yu naj xin, yilal yinito naj kakꞌonho noꞌ palamuch maka kakꞌonh noꞌ yunin kuwis yinh ismul tet Komam Jahawil. Huneꞌ noꞌ chaqꞌ naj xahanbꞌalo yinh ismul, hunxa noꞌ xin chinhuslaxto sunil sata Komam Dios, 8 kat yaqꞌni naj noꞌ tet naj sacerdote. Yinh bꞌabꞌel chiyalte naj noꞌ chꞌaqꞌlax xahanbꞌalil yinh ismul naj, chiswoqꞌnilto naj isnuqꞌ noꞌ, yajaꞌ mach wiyom yeltoj. 9 Lahwi tuꞌ, kat istxihniko naj ischikꞌil noꞌ yinh iskꞌul bꞌay chꞌok xahanbꞌal tuꞌ. Haxa hanikꞌxa ischikꞌil noꞌ xin chistꞌulayo naj yich mexha yet xahanbꞌal, yuto xahanbꞌal huneꞌ tuꞌ yinh mule. 10 Wal hunxa noꞌ xin chisnhusto naj sacerdote noꞌ hakaꞌ yalni chejbꞌanile. Hak tuꞌ chu yaqꞌni naj noꞌ yinh xahanbꞌalil yinh ismul naj, kat yaqꞌnikano Komam Dios nimankꞌulal yinh ismul naj.

11 »Yajaꞌ ta machi loqꞌcha kakꞌonh noꞌ palamuch maka kakꞌonh noꞌ yunin kuwis tuꞌ yu naj, yilal yinito naj kanhebꞌ libra ixim harina kaw kꞌul isyebꞌalqꞌabꞌo yinh ismul tuꞌ, mach chiꞌalaxiko aceite yibꞌanh ixim maka teꞌ pom, yuto haꞌ ixim tuꞌ yebꞌalqꞌabꞌe chꞌaqꞌlax yinh ismul naj. 12 Kat xin yinito naj ixim tet naj sacerdote, kat yinikanh naj sacerdote hun pul ixim, haꞌ chꞌaqꞌni isnabꞌ naj, kat isnhusni naj sacerdote ixim yibꞌanh hunteqꞌanxa xahanbꞌal lanhan isnhuslaxi; haꞌ ixim tuꞌ yebꞌalqꞌabꞌe chꞌaqꞌlax tet Komam Jahawil yinh ismul naj. 13 Chaqꞌ naj sacerdote xahanbꞌal yinh ismul hunu mak chiꞌaykꞌay yinh hunteqꞌan mule tuꞌ, kat xin yaqꞌlax nimankꞌulal yinh yu Komam Dios. Hantatotikꞌa tzet chikan yinh xahanbꞌal tuꞌ, yet naj sacerdote yehi, hakaꞌ hunteqꞌan yebꞌalqꞌabꞌe chꞌaqꞌlax yinh tzet chilolaxi,» xhi Komam tet yaꞌ Moisés.

14 Istzotelpaxo Komam Dios Jahawil tet yaꞌ Moisés, yalni hakaꞌ tiꞌ: 15 «Ta ay hunu mak mach nabꞌilo yu kat yaniko ismul yinh tzet ye tuꞌ yet Komam Dios yehi, yilal yiniti hunu noꞌ winaj meꞌ tet Komam, machi istzakaꞌil xahanbꞌalo yinh ismul, kat yil-lax hanta istohol noꞌ meꞌ tuꞌ yinh chꞌen plata, hakaꞌ yalil chꞌen chꞌaqꞌlax yul Yatut Komam Dios yebꞌalqꞌabꞌe yinh mule. 16 Haꞌ huneꞌ mak tuꞌ, yilal istohlan tzet ye tuꞌ yet Komam Dios mach yaqꞌa, kat xin yaqꞌnipaxo huneꞌ ishoꞌ majan yibꞌanh istohol yaqꞌ tuꞌ tet naj sacerdote; kat xin yaqꞌni naj sacerdote noꞌ meꞌ tuꞌ xahanbꞌalo yinh ismul naj, kat yaqꞌlaxkano nimankꞌulal yinh naj yu Komam Dios.

17 »Ta ay hunu mak chako ismul chismanhkꞌon hunu chejbꞌanile yet Komam Jahawil, haꞌ hunteqꞌan tzet ye tuꞌ halbꞌilkanoj ta mach chu iswatxꞌeni; waxanhka xin mach chistxumu, huneꞌ mak tuꞌ chiꞌok ismul. 18 Yuxin yilal yiniti naj hunu noꞌ winaj meꞌ, machi nino istzakaꞌil, kat xin yil-laxi hanta istohol noꞌ, kat yiniti naj noꞌ tet naj sacerdote xahanbꞌalo yinh ismul mach nabꞌilo yu yanikoj; kat yaqꞌlaxkano nimankꞌulal yinh ismul naj yu Komam. 19 Huneꞌ tuꞌ, xahanbꞌal yinh mule, yuto huneꞌ mak tuꞌ yako ismul sata Komam Dios,» xhi Komam tet yaꞌ Moisés.