3 »Ta ay hunu naj iswiꞌehal sacerdote chako ismul, haꞌ ismul naj tuꞌ chiꞌaykꞌaypaxo yibꞌanh konhobꞌ, yilal xin yalten naj hunu noꞌ tzehla wakax machi nino istzakaꞌil yinh xahanbꞌalil wetan yinh ismul. 4 Chito naj noꞌ sata istiꞌ ispultahil Yatut Komam watxꞌebꞌil yinh qꞌap qꞌap bꞌay chiskutxbꞌa isbꞌa ebꞌnaj Israel yebꞌ Komam, kat xin yanayo naj isqꞌabꞌ yibꞌanh iswiꞌ noꞌ, kat ispotxꞌni naj noꞌ sata Komam, Jahawil. 5 Lahwi tuꞌ xin, kat yinikanh naj iswiꞌehal sacerdote tuꞌ hanikꞌ ischikꞌil noꞌ tzehla wakax tuꞌ, kat yinito naj yul qꞌap qꞌap aykanh yatuto Komam bꞌay chiskutxbꞌa isbꞌa ebꞌnaj Israel yebꞌ Komam. 6 Kat islabꞌanayto naj yiximal isqꞌabꞌ xol ischikꞌil noꞌ tuꞌ, hujel xin chistxihiko naj ischikꞌil noꞌ sata Komam, satalti qꞌap velo aykanh sata huneꞌ Ehobꞌal kaw ekꞌna Txahul. 7 Kat yanipaxiko naj chikꞌ tuꞌ yinh yukꞌaꞌil ismexhahil yet pom kaw xuqꞌkano sam, huneꞌ mexha tuꞌ ayayo sata Komam yul yatut watxꞌebꞌil yinh qꞌap qꞌap bꞌay chiskutxbꞌa isbꞌa ebꞌnaj Israel iskꞌatanh Komam. Haxa yaqꞌbꞌilxa chikꞌ xin chisjobꞌayo naj yich chꞌen bꞌay chinhuslax no noqꞌ yinh xahanbꞌalil, huneꞌ ayayo sat istiꞌ ispultahil Yatut Komam watxꞌebꞌil yinh qꞌap qꞌap bꞌay chiskutxbꞌa isbꞌa anma Israel iskꞌatanh Komam. 8 Lahwi tuꞌ kat yinito naj ismantecahil yul iskꞌul noꞌ wakax chꞌaqꞌlax yinh xahanbꞌalil yinh ismul naj. 9 Yebꞌ kabꞌebꞌ yubꞌal noꞌ yebꞌ ismantecahil, yebꞌ ismantecahil yichinh noꞌ, yebꞌ ismantecahil issasibꞌ, yebꞌ isqꞌejtxꞌotxꞌ noꞌ, hun xin chu yilaxilo yebꞌ kabꞌebꞌ yubꞌal noꞌ. 10 Hakaꞌtikꞌa chu yilaxilo yet noꞌ wakax chꞌaqꞌlax yinh xahanbꞌalil yet aqꞌankꞌulal. Lahwi tuꞌ kat isnhusni naj sacerdote noꞌ yibꞌanh mexha yet xahanbꞌal. 11 Haxa istzꞌumal noꞌ xin yebꞌ sunil ischibꞌehal noꞌ, yebꞌ iswiꞌ noꞌ yebꞌ yoj noꞌ, yebꞌ sunil yul iskꞌul noꞌ yebꞌ istzaꞌ noꞌ, 12 haꞌ xin sunil noꞌ mach ok yinh xahanbꞌal tuꞌ, chiꞌilaxilto yintalto campamento, bꞌay machi tzꞌil, bꞌay chiꞌalaxayo tanh; haꞌ bꞌey tuꞌ xin chinhuslaxto noꞌ yibꞌanh teꞌ siꞌ.

13 »Ta sunil anma Israel chako ismul, mach xin nabꞌilo yu, yebꞌ xin machi hunu ebꞌnaj chiꞌilchantij ta haꞌ tzet iswatxꞌe tuꞌ chikachwa ischejbꞌanil Komam yinh, yinh hakaꞌ tuꞌ yako ismul sata Komam yuto iswatxꞌe hunu tzet halbꞌilkanoj ta mach chiswatxꞌe. 14 Haxa yet chiꞌixtanhwilo ismul yako tuꞌ, yilal yalten sunil anma hunu noꞌ tzehla wakax xahanbꞌalil yinh ismul tuꞌ, kat yinito ebꞌnaj noꞌ istiꞌ Yatut Komam bꞌay chiskutxbꞌa isbꞌa anma Israel yebꞌ Komam Dios. 15 Haxa xin ebꞌnaj ichamta winaj Israel chayo isqꞌabꞌ yibꞌanh iswiꞌ noꞌ tzehla wakax tuꞌ, kat ispotxꞌni ebꞌnaj noꞌ sata Komam. 16 Lahwi tuꞌ xin, kat yinikanh naj iswiꞌehal sacerdote tuꞌ hanikꞌ ischikꞌil noꞌ tzehla wakax, kat yinito naj yul qꞌap qꞌap aykanh yatuto Komam bꞌay chiskutxbꞌa isbꞌa ebꞌnaj Israel yebꞌ Komam, 17 kat islabꞌanayto naj yiximal isqꞌabꞌ xol ischikꞌil noꞌ, kat istxihnayo naj hujel sata Komam Jahawil, satalti qꞌap velo. 18 Kat yanipaxiko naj chikꞌ tuꞌ yinh yukꞌaꞌil ismexhahil pom ayayo sata Komam yul yatut bꞌay chiskutxbꞌa isbꞌa anma Israel iskꞌatanh Komam. Haxa hanikꞌxa ischikꞌil noꞌ tuꞌ chisjobꞌayo naj yich ismexhahil bꞌay chinhuslax no noqꞌ xahanbꞌalil, ayayo istiꞌ ispultahil Yatut Komam bꞌay iskutxbꞌa isbꞌa anma Israel iskꞌatanh Komam. 19 Chiꞌilaxilo sunil ismantecahil noꞌ wakax tuꞌ, kat isnhuslax noꞌ yibꞌanh mexha yet xahanbꞌal.^a 20 Lahan xin chiꞌutelax noꞌ hakaꞌ chiꞌutelax noꞌ tzehla wakax chꞌaqꞌlax yinh xahanbꞌalil yinh ismul huneꞌ naj, hak tuꞌ xin chu yaqꞌni naj noꞌ yinh xahanbꞌalil yinh ismul anma, kat yaqꞌlaxkano nimankꞌulal yinh ismul yu Komam. 21 Kat yinilto naj iswiꞌehal sacerdote noꞌ xahanbꞌal tuꞌ yintalto campamento, kat isnhusni naj noꞌ, hakaꞌ yu isnhusni naj noꞌ bꞌabꞌel tzeh wakax. Haꞌ noꞌ chꞌaqꞌlax xahanbꞌalil yu istanhbꞌal ismul anma.

22 »Taka hunu naj iswiꞌehal konhobꞌ chiyako ismul, chismanhkꞌon chejbꞌanile chal Komam Jahawil, isDiosal naj, waxanhka mach nano yu naj, kaw yeli ay ismul naj. 23 Haxa yet chiyohtanhenilo naj ismul tuꞌ, yilal yalten naj hunu noꞌ winaj chiw machi nino istzakaꞌil tet Komam. 24 Lahwi tuꞌ kat yanayo naj isqꞌabꞌ yibꞌanh iswiꞌ noꞌ tuꞌ, kat ispotxꞌni naj noꞌ sata Komam bꞌay chipotxꞌlax no noqꞌ chinhuslax yinh xahanbꞌalil, yuto haꞌ noꞌ chꞌaqꞌlax xahanbꞌalil yinh ismul naj. 25 Haxa naj sacerdote xin chiyikanh naj hanikꞌ ischikꞌil noꞌ yu yiximal isqꞌabꞌ, kat yaniko naj chikꞌ tuꞌ yinh yukꞌaꞌil bꞌay chinhuslax noꞌ yinh xahanbꞌal. Haxa yaqꞌbꞌil chikꞌ tuꞌ chistixhayo naj yich bꞌay chꞌok xahanbꞌal. 26 Kat isnhusni naj ismantecahil noꞌ yibꞌanh yet xahanbꞌal, hakaꞌ chu isnhuslax ismantecahil noꞌ chꞌaqꞌlax xahanbꞌalil yet aqꞌankꞌulal. Hak tuꞌ xin chu yaqꞌni naj sacerdote noꞌ xahanbꞌalil yinh ismul naj iswiꞌehal konhobꞌ tuꞌ kat yaqꞌni Komam nimankꞌulal yinh naj.

27 »Ta ay hunu anma komon yul konhobꞌ Israel chako ismul, yaj mach nabꞌilo yu chaniko ismul, chismanhkꞌon chejbꞌanil chal Komam Dios; 28 haxa yet chiyohtanhenilo naj ismul tuꞌ, yilal yinito naj hunu noꞌ miꞌe chiw machi istzakaꞌil xahanbꞌal yinh ismul. 29 Kat yanayo naj isqꞌabꞌ yibꞌanh iswiꞌ noꞌ kat ispotxꞌni naj noꞌ bꞌay chipotxꞌlax no noqꞌ chinhuslax xahanbꞌalil. 30 Lahwi tuꞌ, kat yinikanh naj sacerdote hanikꞌ ischikꞌil noꞌ yu yiximal isqꞌabꞌ, kat yaniko naj yinh yukꞌaꞌil bꞌay chinhuslax xahanbꞌal, haxa hunteqꞌanxa ischikꞌil noꞌ tuꞌ chistixhayo naj yich yet xahanbꞌal. 31 Kat yinilo naj sunil ismantecahil noꞌ hakaꞌ chu yilaxilo ismantecahil noꞌ chꞌaqꞌlax yinh xahanbꞌalil yet aqꞌankꞌulal; kat isnhusni naj noꞌ yibꞌanh yet xahanbꞌal; huneꞌ xahanbꞌal tuꞌ, kaw xuqꞌ chꞌapni sam sata Komam Jahawil. Hak tuꞌ chu yaqꞌni naj sacerdote noꞌ xahanbꞌalil yinh ismul huneꞌ naj tuꞌ, kat yaqꞌni Komam nimankꞌulal yinh ismul.

32 »Taka xin noꞌ meꞌ chiyaqꞌ huneꞌ mak tuꞌ xahanbꞌalil yinh ismul, yilal yiniti hunu noꞌ miꞌe meꞌ machi istzakaꞌil. 33 Kat yanayo naj isqꞌabꞌ yibꞌanh iswiꞌ noꞌ, kat ispotxꞌni naj noꞌ xahanbꞌalo yinh ismul bꞌay chipotxꞌlax no noqꞌ chinhuslax yinh xahanbꞌalil. 34 Haxa naj sacerdote xin chiꞌinikanh hanikꞌ ischikꞌil noꞌ chiꞌok xahanbꞌalil tuꞌ yu yiximal isqꞌabꞌ, kat yaniko naj yinh yukꞌaꞌil bꞌay chinhuslax xahanbꞌal, haxa yaqꞌbꞌilxa ischikꞌil noꞌ, chistixhayo naj yich yet xahanbꞌal. 35 Lahwi tuꞌ, kat yinilo naj ismantecahil noꞌ, hakaꞌ chiꞌutelax noꞌ tzehla meꞌ chꞌaqꞌlax xahanbꞌalil yet aqꞌankꞌulal, kat isnhusni naj sacerdote noꞌ yibꞌanh yet xahanbꞌal chinhuslaxto sata Komam Jahawil. Hak tuꞌ chu yaqꞌlax noꞌ xahanbꞌalil yinh ismul huneꞌ mak tuꞌ, yunhe yaqꞌlaxkano nimankꞌulal yinh ismul yu Komam.