Isyebꞌalqꞌabꞌ anma tet Komam
2
»Hayet chiyiniti hunu mak sat istzꞌunubꞌ yebꞌalqꞌabꞌehalo tet Komam Dios, yilal yiniti ixim harina kaw kꞌul, kat isjobꞌnayo aceite yebꞌ yanayo pom yibꞌanh ixim.a 2 Kat yinito tet ebꞌnaj sacerdote, ebꞌnaj iskꞌahol yaꞌ Aarón, kat yinikanh naj sacerdote tuꞌ yikta bꞌetx ixim harina ayko aceite yebꞌ pom xol, kat isnhusni naj yibꞌanh yet xahanbꞌal; huneꞌ isyebꞌalqꞌabꞌ naj tuꞌ nabꞌanile yehi kaw xuqꞌ chꞌahapno sata Komam Dios, Jahawil. 3 Haxa yaqꞌbꞌilxa ixim tuꞌ, yet yaꞌ Aarón yebꞌ ebꞌnaj iskꞌahol ye ixim. Ixim harina tuꞌ, kaw txahul, yuto yetbꞌi isbꞌa ixim yebꞌ ixim chinhuslax sata Komam Jahawil.4 »Hayet chꞌaqꞌlax yebꞌalqꞌabꞌe tet Komam, cheyaqꞌ ixim pan qꞌanbꞌina yul horno, watxꞌebꞌil yinh ixim harina kaw kꞌul mach yanhal, sombꞌilto aceite xol; maka ixim wonhkꞌox pan, machi yanhal aykoj, masbꞌiliko aceite yinh.
5 »Ta ay heyebꞌalqꞌabꞌ qꞌantzebꞌil yul xhaltin cheyaqꞌ tet Komam, haꞌ ixim harina kaw kꞌul, machi yanhal aykoj sombꞌiliko aceite xol, 6 kat ispohlaxayo ixim, kat isjobꞌlaxayo aceite yibꞌanh ixim. Ixim tuꞌ, yebꞌalqꞌabꞌe chiꞌaqꞌlax tet Komam yinh sat tzꞌunubꞌ.
7 »Ta heyebꞌalqꞌabꞌ tahna yul chꞌen cacerola cheyaqꞌ tet Komam, cheyaqꞌ ixim harina kaw kꞌul, sombꞌiliko aceite xol. 8 Kat xin, heyinito heyebꞌalqꞌabꞌ watxꞌebꞌil tuꞌ sata Komam Jahawil, kat heyaqꞌni tet naj sacerdote, kat yinito naj bꞌey bꞌay chꞌok xahanbꞌal. 9 Chiyikanh naj sacerdote hanikꞌo isyebꞌalqꞌabꞌ naj tuꞌ, haꞌ chiyeniloj tato yet Komam ye huneꞌ yebꞌalqꞌabꞌe tuꞌ, kat isnhusni naj sacerdote ixim yibꞌanh yet xahanbꞌal; haꞌ huneꞌ tuꞌ kaw xuqꞌ chꞌahapno sam sata Komam. 10 Haxa yaqꞌbꞌilxa yebꞌalqꞌabꞌe tuꞌ, yet yaꞌ Aarón yebꞌ ebꞌnaj iskꞌahol yaꞌ yehi, kaw niman yelapno yul sat Komam yuto yetbꞌi isbꞌa yebꞌ yebꞌalqꞌabꞌe chinhuslax tet Komam.
11 »Machojabꞌ hunu heyebꞌalqꞌabꞌ cheyalte tet Komam ayko yanhal, yuto mach chu isnhuslax yanhal ixim pan yebꞌ noꞌ kabꞌ heyebꞌalqꞌabꞌehal tet Komam Jahawil. 12 Chisje heyaqꞌni ixim pan ayko yanhal yebꞌ noꞌ kabꞌ heyebꞌalqꞌabꞌoj hakaꞌ bꞌabꞌel sat tzꞌunubꞌ; yajaꞌ mach chu isnhuslax ixim ayko yanhal maka noꞌ kabꞌ yibꞌanh mexha yet xahanbꞌal, hunteqꞌan kaw xuqꞌ sam yul sat Komam Jahawil.b
13 »Sunil heyebꞌalqꞌabꞌ cheyalte tet Komam, yilal cheyako yatzꞌamil, machojabꞌ hunu tiꞌ machi yatzꞌamil, yuto haꞌ chiyenilo ta tꞌinhbꞌabꞌil hetzotiꞌ yebꞌ Komam Dios. Sunil heyebꞌalqꞌabꞌ cheyaqꞌ tet Komam, yilal heyaniko yatzꞌamil.c
14 »Ta cheyaqꞌ heyebꞌalqꞌabꞌ yinh bꞌabꞌel sat hetzꞌunubꞌ tet Komam, cheqꞌantzewe iswiꞌ ixim trigo, ixim yaxto, kat hechilnilo sat ixim, kat heyaqꞌni ixim heyebꞌalqꞌabꞌehal tet Komam.d 15 Kat hejobꞌnayo aceite yibꞌanh kat heyanayo pom yibꞌanh, yuto huneꞌ heyebꞌalqꞌabꞌ tuꞌ, sat hetzꞌunubꞌ yehi. 16 Lahwi tuꞌ, kat isnhusni naj sacerdote hanikꞌo sat ixim trigo chilbꞌililo tuꞌ, yebꞌ aceite yebꞌ sunil pom ayko yinh. Haꞌ huneꞌ heyebꞌalqꞌabꞌ tuꞌ chinanitij tato yet Komam Jahawil ye sunil.