Yángel Komam Dios Jahawil bꞌey txꞌotxꞌ Boquim
2
Haꞌ yángel Komam Dios Jahawil, ahto bꞌey konhobꞌ Gilgal, isto bꞌey txꞌotxꞌ Boquim, yalni tet ebꞌnaj Israel hakaꞌ tiꞌ:«Hanintiꞌan kexwiltijan bꞌey txꞌotxꞌ Egipto, kexwinitijan sat txꞌotxꞌ waltekanojan tet heyichmam, walnikanojan tato machi bꞌaqꞌinhal chintanhtzehan huneꞌ tzet tꞌinhbꞌabꞌilkano wuhan yebꞌ hex,a 2 yunhe maxhtaj tet anma ay sat txꞌo txꞌotxꞌ bꞌay ay hex tiꞌ chetꞌinhbꞌakano hetzotiꞌ, wal xin to cheyuchkꞌakanto ismexhahil xahanbꞌal bꞌay chitxahli ebꞌnaj; yajaꞌ wal hex tiꞌ mach heyije yinh tzet walan. ¿Tzet yinh xin cheyute huneꞌ tiꞌ? 3 Yuxin chiwalkanojan teyet tato mach chiwilojan hunteqꞌan anma tiꞌ texol; wal xin hakaꞌ noꞌ tzꞌum chiꞌalaxayto yinh hemotx, hak tuꞌ chuko ebꞌnaj teyinh, haxa isdiosal ebꞌnaj xin, haꞌ chexaqꞌni txaqꞌmohoj,» xhi yángel Komam tuꞌ.
4 Hayet lahwi istzotelkano yángel Komam Dios, yaniko yip yul isnuqꞌ sunil anma Israel, yoqꞌi. 5 Yuxin Boquim yijkano isbꞌi txꞌotxꞌ.b Yaqꞌni ebꞌnaj isxahanbꞌal tet Komam Dios bꞌey tuꞌ.
Iskamikal yaꞌ Josué
6 Hayet lahwi istaqꞌlikano yaꞌ Josué tet konhobꞌ Israel, isto hunun majan ebꞌnaj sat istxꞌotxꞌ aqꞌlax ismajuloj. 7 Yulbꞌal istiempohal itzitz yaꞌ Josué kaw yijem yute isbꞌa konhobꞌ Israel; yinayo isbꞌa ebꞌnaj tet Komam Dios. Kaw yijem yutepaxo isbꞌa ebꞌnaj yulbꞌal yet aytokꞌo ebꞌnaj ichamta winaj Israel, ebꞌnaj kamto tzujanilxa yinta yaꞌ Josué, ebꞌnaj ilni sunil nimeta kꞌaybꞌalkꞌule iswatxꞌe Komam Dios yinh konhobꞌ Israel.
8 Wal yaꞌ Josué, ischejabꞌ Komam Dios Jahawil, iskꞌahol yaꞌ Nun, ekꞌyaꞌ 110 habꞌil yul sat yibꞌanhqꞌinal tiꞌ. 9 Ismujlax yaꞌ sat istxꞌotxꞌ bꞌey txꞌotxꞌ Timnat-sera, ayko yinh norte yinh wonhan Gaas, bꞌey chewal txꞌotxꞌ yul ismajul txꞌotxꞌ Efraín. 10 Iskampaxto ebꞌnaj ichamta winaj ekꞌ yulbꞌal istiempohal yaꞌ Josué; wal ebꞌnaj Israel pitzkꞌa yet tzujanilxa, matxa yohtajo ebꞌnaj Komam Dios yebꞌ matxa yohtanhelo ebꞌnaj iskꞌulal iswatxꞌe Komam yinh konhobꞌ Israel.
Ishinkano ebꞌnaj Israel Komam Dios yet ayiko ebꞌnaj juez ijbꞌalo xol ebꞌnaj
11 Haxa yet tzujanilxa xin ok ebꞌnaj Israel iswatxꞌeꞌ istxꞌojal sata Komam Dios, yok ebꞌnaj yinoyo isbꞌa tet hunteqꞌan tioxh chiyij Baal. 12 Isbꞌejnikano ebꞌnaj Komam Dios Jahawil, isDiosal ismam icham ebꞌnaj, Komam inilo ebꞌnaj bꞌey Egipto, yok ebꞌnaj yinoyo isbꞌa tet isdiosal anma ayayo bꞌay ay ebꞌnaj tuꞌ, hak tuꞌ yu yiniti ebꞌnaj ishowal Komam Dios Jahawil yinh. 13 Ishinnikano ebꞌnaj Komam Dios Jahawil, yinayo isbꞌa ebꞌnaj tet tioxh Baal yebꞌ tioxh Astarot.c 14 Hak tuꞌ yu istit ishowal Komam Dios Jahawil yinh ebꞌnaj Israel tuꞌ, yaniko Komam ebꞌnaj yul isqꞌabꞌ ebꞌnaj hoyaniko yinh ebꞌnaj tuꞌ, matxa xin yu iskolni isbꞌa ebꞌnaj tet ebꞌnaj. 15 Hunta el yet chiꞌelto ebꞌnaj yinh howal chiyako Komam Jahawil ebꞌnaj Israel yul isqꞌabꞌ ebꞌnaj ayko ishowal yinh. Hakaꞌtikꞌa yu yalnikano Komam, hak tuꞌ yu yaqꞌlax ekꞌoyaꞌ ebꞌnaj.
16 Issikꞌilo Komam Dios Jahawil ebꞌnaj chiꞌok juesal xol ebꞌnaj Israel chikolnilo ebꞌnaj yul isqꞌabꞌ ebꞌnaj chiꞌinilo tzet ay ebꞌnaj Israel tuꞌ. 17 Yajaꞌ xin mach yabꞌeto ebꞌnaj tzet yal ebꞌnaj ok juesal kolwal yinh ebꞌnaj yu Komam; wal xin ismanhkꞌo ebꞌnaj tzet yal Komam, yok ebꞌnaj yinoyo isbꞌa tet hunteqꞌan komon dios, ispohnilo isbꞌa ebꞌnaj yinh isbꞌeybꞌal ismam icham. Ismam icham ebꞌnaj tuꞌ, isyije ischejbꞌanil Komam Jahawil, yajaꞌ wal ebꞌnaj xin mach isyije ebꞌnaj hakaꞌ ismam icham. 18 Hunta el yet chiyinikanh Komam hunu mak chikolwa yinh ebꞌnaj Israel, ayko Komam yetbꞌiho huneꞌ mak tuꞌ, kat iskolni Komam ebꞌnaj Israel tuꞌ yul isqꞌabꞌ ebꞌnaj ayko ishowal yinh yulbꞌal istiempohal naj saybꞌiliko yu Komam, yuto chitzꞌay iskꞌul Komam yinh ebꞌnaj yet chiyabꞌen yel yaw ebꞌnaj yu isyaꞌtajil chul yibꞌanh yu ebꞌnaj ayko ishowal yinh. 19 Yajaꞌ hayet chikamto naj juez chikolwa yinh ebꞌnaj tuꞌ, kat yokpaxo ebꞌnaj iswatxꞌeno istxꞌojal hunelxa, ekꞌbꞌalto xin istxꞌojal chiswatxꞌe ebꞌnaj yibꞌanh istxꞌojal ismam icham. Yok tzujno ebꞌnaj yinta hunteqꞌan komon tioxh, yok ebꞌnaj yijemal tet, yinayo isbꞌa ebꞌnaj tet. Maxhtikꞌa isbꞌejkano ebꞌnaj isbꞌeybꞌal tuꞌ, kaw iswiꞌnhekano ebꞌnaj iswatxꞌen istxꞌojal.
20 Yuxin kaw tit ishowal Komam Dios yinh ebꞌnaj Israel, yalni Komam: «Hunteqꞌan anma tiꞌ, kaw chismanhkꞌokano tzet kaw tꞌinhbꞌabꞌilkano wuhan yebꞌ yichmam, mach chisyije ebꞌnaj tzet chiwalan; 21 yuxin mach chiwilojan hunteqꞌan konhobꞌ xol ebꞌnaj, hunteqꞌan kantokano yu yaꞌ Josué yet iskam yaꞌ,» xhi Komam. 22 Kankano hunteqꞌan konhobꞌ tuꞌ, yunhe yilni Komam tato chiꞌoktzujno anma Israel yinta isbꞌeybꞌal Komam maka mach xin, hakaꞌ yu yok tzujno ismam icham ebꞌnaj yinta Komam. 23 Yuxin mach yilo Komam hunteqꞌan konhobꞌ tuꞌ xol ebꞌnaj Israel, hunteqꞌan konhobꞌ tuꞌ mach yako Komam yul isqꞌabꞌ yaꞌ Josué.