5 Hak tuꞌ yu yehayo ebꞌnaj Israel xol ebꞌnaj cananeo, ebꞌnaj heteo, ebꞌnaj amorreo, ebꞌnaj ferezeo, ebꞌnaj heveo, yebꞌ ebꞌnaj jebuseo. 6 Haxa iskꞌahol yebꞌ iskutzꞌin ebꞌnaj Israel yiqꞌlekanh isbꞌa yebꞌ iskutzꞌin yebꞌ iskꞌahol ebꞌnaj ay yul hunteqꞌan konhobꞌ tuꞌ; yuxin yaqꞌ chejaꞌ isbꞌa ebꞌnaj Israel tet istioxh hunteqꞌan konhobꞌ tuꞌ.

7 Iswatxꞌe ebꞌnaj Israel istxꞌojal yul sat Komam Dios Jahawil yet isnahulnheto ebꞌnaj Komam isDiosal; yinayo isbꞌa ebꞌnaj tet tioxh Baal yebꞌ tet yechel huneꞌ tioxh chiyij Asera.^a 8 Yuxin tit ishowal Komam yinh ebꞌnaj Israel tuꞌ, yaniko Komam ebꞌnaj yul isqꞌabꞌ naj Cusan-risataim, isreyal txꞌotxꞌ Mesopotamia; yulbꞌal waxajebꞌ habꞌil ok ebꞌnaj ischejabꞌo naj rey tuꞌ. 9 Haxa yet yah yaw ebꞌnaj Israel tet Komam, yinikanh Komam huneꞌ yaꞌ ok kolwal yinh ebꞌnaj Israel, isbꞌejtzolax ebꞌnaj. Haꞌ yaꞌ tuꞌ, Otoniel isbꞌi yaꞌ, islahobꞌal iskꞌahol naj Cenaz, haꞌ naj Cenaz tuꞌ yuxhta yaꞌ Caleb ye naj. 10 Yaniti Komam Dios yespíritu yinh yaꞌ Otoniel, yok yaꞌ yahawilo ebꞌnaj Israel. Isto yaꞌ yinh howal yinh naj Cusan-risataim, yaniko Komam naj yul isqꞌabꞌ yaꞌ; isqꞌoji yaꞌ yinh naj Cusan-risataim, isreyal txꞌotxꞌ Siria.^b 11 Lahwi tuꞌ xin yok ebꞌnaj Israel yinh aqꞌankꞌulal yulbꞌal 40 (kawinaj) habꞌil masanto yet kam yaꞌ Otoniel, iskꞌahol naj Cenaz.

12 Haxa yinh istzujanilxa yokpaxo ebꞌnaj Israel iswatxꞌeno istxꞌojal yul sat Komam Dios Jahawil, yuxin yaqꞌ Komam yip naj Eglón, isreyal ebꞌnaj Moab, yaniko howal yinh ebꞌnaj Israel yu istxꞌojal iswatxꞌe ebꞌnaj yul sat Komam Jahawil. 13 Islahtiꞌnhen isbꞌa naj Eglón yebꞌ ebꞌnaj amonita yebꞌ ebꞌnaj amalecita yu isto ebꞌnaj yaqꞌaꞌko howal yinh ebꞌnaj Israel. Isqꞌoji ebꞌnaj yinh ebꞌnaj Israel, yaykꞌay konhobꞌ chihal-lax palmera yul isqꞌabꞌ ebꞌnaj. 14 Yulbꞌal 18 (waxajlahonhebꞌ) habꞌil ok ebꞌnaj Israel tuꞌ ischejabꞌo naj rey Eglón tuꞌ.

15 Haxa xin yet yah yaw ebꞌnaj Israel tuꞌ tet Komam Dios, hato tuꞌ yinikanh Komam huneꞌ mak chikolnilo ebꞌnaj. Haꞌ xin yaꞌ Aod kolnilo ebꞌnaj Israel tuꞌ; iskꞌahol naj Gera ye yaꞌ Aod, titna yinh yaꞌ Benjamín. Yaꞌ Aod tuꞌ, haꞌ ismekqꞌabꞌ yaꞌ chiyaqꞌbꞌalnhe yinh howal.

Ay huneꞌ tzꞌayik tiꞌ chejlaxto yaꞌ Aod yaqꞌaꞌkano istohlabꞌal ebꞌnaj Israel tet naj Eglón, isreyal Moab tuꞌ. 16 Yajaꞌ xaꞌiswatxꞌe yaꞌ Aod tuꞌ huneꞌ yespada, ayahti yeh yintaj iswiꞌ yebꞌ sataj; nichꞌanxanhe mach yiktajo metro istel. Iskꞌalbꞌaniko yaꞌ yespada tuꞌ yinh yiktaj, yinh iswatxꞌqꞌabꞌ, yalanh xil isqꞌap. 17 Yinito yaꞌ Aod tuꞌ chꞌen tohlabꞌal tet naj rey Eglón; naj rey tuꞌ kaw bꞌaqꞌichkanoj. 18 Lahwi yaqꞌnikano yaꞌ Aod chꞌen tohlabꞌal tet naj rey, istaqꞌli yaꞌ Aod tet ebꞌnaj tzujan yinta yaꞌ. 19 Yajaꞌ hayet yapni yaꞌ Aod bꞌay aykanh hunteqꞌan tioxh iskawilal Gilgal, ismeltzo yaꞌ iskꞌatanh naj Eglón hunelxa, yalni yaꞌ tet naj:

—Mam rey, ay huneꞌ inchejbꞌanilan tawet, yajaꞌ yinh ewantajil chiwalan tawet, xhi yaꞌ. Yuxin yal naj rey tet ebꞌnaj chimunla iskꞌatanh ta chiskach istiꞌ ebꞌnaj. Hak tuꞌ xin yu yelti ebꞌnaj munlawom ayikto bꞌey tuꞌ.

20 Ishitziko yaꞌ Aod iskꞌatanh naj rey bꞌay tzꞌonhan naj ischukil yul ischem, yul iscuarto bꞌay chixewi yet hajan. Yalni yaꞌ tet naj rey tuꞌ:

—Haꞌ hunteqꞌan tzotiꞌ chiwalan tawet tiꞌ, yet Komam Dios yehi, xhi yaꞌ. Hayet yabꞌen naj rey hakaꞌ tuꞌ, yah linhno naj.

21 Yanito yaꞌ Aod ismekqꞌabꞌ yinh iswatxꞌqꞌabꞌ bꞌay ayko yespada, yinahti yaꞌ chꞌen yinh iswiꞌ isbꞌul yu iswatxꞌqꞌabꞌ, istejnito yaꞌ chꞌen yul iskꞌul naj rey Eglón tuꞌ. 22 Machnhetaj xin iswiꞌ chꞌen espada tuꞌ to yul iskꞌul naj, wal xin lahwito chꞌen yebꞌ sunil yoj yul iskꞌul naj, ismajikanto chꞌen espada tuꞌ yu isbꞌaqꞌichal naj. Matxa xin yilti yaꞌ Aod chꞌen yul iskꞌul naj rey tuꞌ. Hak tuꞌ xin yu yelti hapna istzaꞌ naj yul iskꞌul. 23 Lahwi tuꞌ yelti yaꞌ Aod istinha, ismajchenkano yaꞌ pulta, yanikaniko yaꞌ istel.

24 Hayet xaꞌelti yaꞌ Aod, yapni ebꞌnaj ischejabꞌ naj rey tuꞌ, hayet yilni ebꞌnaj tato ayko istel pulta, yalni ebꞌnaj xin:

«Etza lanhan istxuli yaꞌ yuxin ayko istel pulta,» xhi ebꞌnaj.

25 Hayet yilni ebꞌnaj tato maxhtikꞌa chiꞌelti naj rey tuꞌ, yechma ebꞌnaj yu mach yohtajo ebꞌnaj tzet yinh; lahwi tuꞌ yiniti ebꞌnaj chꞌen lawe. Haxa yet ishajni ebꞌnaj pulta yilniti ebꞌnaj tato kamomxa naj isreyal ebꞌnaj, pakꞌankanh naj sat txꞌotxꞌ.

26 Hayet qꞌahan yilni ebꞌnaj tzet yu naj rey, yelkanh yaꞌ Aod, yekꞌto yaꞌ bꞌay aykanh hunteqꞌan tioxh, isto yaꞌ iskolno isbꞌa bꞌey konhobꞌ Seirat. 27 Haxa yet yapni yaꞌ bꞌey wonhan bꞌay ay ismajul yaꞌ Efraín, yoqꞌtzen yaꞌ noꞌ yukꞌaꞌ wakax yu iskutxbꞌan isbꞌa ebꞌnaj Israel. Yayti ebꞌnaj bꞌey chewal txꞌotxꞌ tuꞌ, haꞌ xin yaꞌ Aod bꞌabꞌel sata ebꞌnaj. 28 Yalni yaꞌ tet ebꞌnaj:

«Okanhwe tzujno wintajan, yuto mayako Komam Jahawil ebꞌnaj moabita yul koqꞌabꞌ, ebꞌnaj ayko ishowal jinh,» xhi yaꞌ.

Hak tuꞌ xin yu isto ebꞌnaj yinta yaꞌ, yok ebꞌnaj majwal istiꞌ haꞌ Jordán bꞌay kawil yehayto yich haꞌ, machi xin hunu ebꞌnaj moabita ischakꞌti ebꞌnaj. 29 Yet hunel tuꞌ, 10 (lahonhebꞌ) mil ebꞌnaj moabita ispotxꞌkamo ebꞌnaj Israel. Sunil ebꞌnaj kam tuꞌ, kaw ay yip yanma ebꞌnaj yebꞌ kaw helan ebꞌnaj yinh howal, yajaꞌ maxhtikꞌa hunu ebꞌnaj tuꞌ yu iskolni isbꞌa. 30 Hak tuꞌ yu isqꞌoji ebꞌnaj Israel yinh ebꞌnaj moabita yinh huneꞌ tzꞌayik tuꞌ. Yok ebꞌnaj Israel yinh aqꞌankꞌulal yulbꞌal 80 (kanhwinaj) habꞌil.

31 Tzujan tuꞌ xin iskolnipaxilo yaꞌ Samgar ebꞌnaj Israel, yaꞌ iskꞌahol naj Anat. Ispotxꞌnikamo yaꞌ 600 ebꞌnaj filisteo yu huneꞌ te teꞌ ayko chꞌen chꞌen qꞌaqꞌiꞌ yinh iswiꞌ, huneꞌ teꞌ chiꞌokniko isyoni noꞌ wakax. Hak tuꞌ yu iskolnipaxo yaꞌ Samgar ebꞌnaj Israel.