Aykꞌay naj Sísara yu ix Débora yebꞌ yu yaꞌ Barac
4
Hayet xalahwi iskamto yaꞌ Aod, ismeltzo ebꞌnaj Israel iswatxꞌen istxꞌojal yul sat Komam Jahawil. 2 Yuxin yako Komam Jahawil ebꞌnaj Israel yul isqꞌabꞌ naj Jabín, isreyal ebꞌnaj cananeo ay bꞌey Hazor. Haxa naj yahawil issoldado naj rey tuꞌ, haꞌ ton naj Sísara ay bꞌey Haroset-goim. 3 900 iscarruaje naj Jabín yet howal, nabꞌa hierro. 20 (Hunkꞌalxa) habꞌil yokto ebꞌnaj Israel yalanh yip naj rey tuꞌ, kaw xin etalax ebꞌnaj yu naj. Yuxin ah yaw ebꞌnaj Israel tuꞌ tet Komam yu iskolni Komam ebꞌnaj.4 Haꞌ yinh hunteqꞌan habꞌil tuꞌ, haꞌ ix Débora, ayko yahawil xol anma Israel. Ix Débora tuꞌ yixal naj Lapidot ye ix, chal ix tzotiꞌ chitit tet Komam Dios. 5 Ix Débora tuꞌ, chiꞌay tzꞌonhno ix yich huneꞌ teꞌ palmera ay bꞌey chewal txꞌotxꞌ yinh wonhan bꞌey txꞌotxꞌ ismajul Efraín, ayko xolbꞌal konhobꞌ Ramá yebꞌ konhobꞌ Bet-el; haꞌ tuꞌ xin chibꞌey ebꞌnaj Israel isqꞌambꞌeꞌ tet ix yu yalnilo ix tzet chiꞌeliko howal chiꞌah xol ebꞌnaj. Yuxin chihal-lax yinh teꞌ «Teꞌ palmera yet ix Débora,» xhi.
6 Ay huneꞌ tzꞌayik tiꞌ yawte ix Débora yaꞌ Barac, iskꞌahol naj Abinoam ay bꞌey konhobꞌ Cedes, yul txꞌotxꞌ ismajul ebꞌnaj yikꞌal yaꞌ Neftalí, yalni ix tet yaꞌ:
—Haꞌ Komam Dios, koDiosal hanhonh Israelonh tiꞌ, chalni hakaꞌ tiꞌ: “Asiꞌ bꞌey witz Tabor, kat hakutxbꞌaniko 10 (lahonhebꞌ) mil ebꞌnaj soldado yikꞌal yaꞌ Neftalí yebꞌ yikꞌal yaꞌ Zabulón. 7 Haninan xin chiwaqꞌtijan naj Sísara, yahawil issoldado naj rey Jabín bꞌey haꞌ nichꞌan Cisón, yebꞌ iscarruaje yet howal, yu yaniko ebꞌnaj howal teyinh, yajaꞌ xin haninan chiwakojan ebꞌnaj yul haqꞌabꞌ,” xhi Komam, xhi ix.
8 Istaqꞌwi yaꞌ Barac tet ix, yalni yaꞌ:
—Tato chaxhto wintajan chintohan, yajaꞌ ta mach chaxhtohi, mach chintohan, xhi yaꞌ.
9 Istaqꞌwi ix:
—Chintohan, yajaꞌ maxhtaj hach chaxhbꞌina yinh huneꞌ howal bꞌay chachto tuꞌ, yuto yul isqꞌabꞌ huneꞌ ix ix chako Komam naj Sísara, xhi ix.
Lahwi tuꞌ, isto ix Débora yebꞌ yaꞌ Barac bꞌey konhobꞌ Cedes. 10 Iskutxbꞌaniko yaꞌ Barac 10 (lahonhebꞌ) mil ebꞌnaj soldado Israel titna yinh yaꞌ Zabulón yebꞌ titna yinh yaꞌ Neftalí, ahto ebꞌnaj yinta yaꞌ; tzujanpaxo ix Débora.
11 Haꞌ iskawilal konhobꞌ Cedes bꞌey akꞌal Zaanaim, haꞌ tuꞌ ay iscampamento huneꞌ naj ceneo chiyij Heber, yuto ispohilo isbꞌa naj xol ebꞌnaj ceneo; ebꞌnaj ceneo tuꞌ titna yinh naj Hobab. Naj Hobab xin, haꞌ naj tuꞌ ismam yixal yaꞌ Moisés. 12 Hayet yabꞌenilo naj Sísara tato ahto yaꞌ Barac yinh iswiꞌ witz Tabor, 13 iskutxbꞌaniko naj sunil iscarruaje yet howal, 900 iscarruaje naj, nabꞌa chꞌen. Iskutxbꞌanpaxiko naj sunil issoldado, yel ebꞌnaj bꞌey konhobꞌ Haroset-goim, yapni ebꞌnaj bꞌey haꞌ nichꞌan haꞌ Cisón.
14 Yalni ix Débora tet yaꞌ Barac hakaꞌ tiꞌ:
«Asiꞌ, yuto yinh huneꞌ tzꞌayik tiꞌ chiyako Komam Dios naj Sísara yul haqꞌabꞌ, haꞌ xin Komam chibꞌabꞌi tasataj,» xhi ix.
Lahwi tuꞌ yayti yaꞌ Barac iswiꞌ witz Tabor yebꞌ 10 (lahonhebꞌ) mil ebꞌnaj soldado. 15 Hayet yaniko yaꞌ Barac howal yinh ebꞌnaj tuꞌ, yaniti Komam Dios huneꞌ niman xiwkilal yinh ebꞌnaj iqꞌnhe chꞌen carruaje yet howal, yebꞌ yinh ebꞌnaj soldado. Isxiwpaxokanh naj Sísara, naj yahaw ebꞌnaj soldado tuꞌ, yayti naj yul iscarruaje, yelkanh naj yu yoj. 16 Yok tzujno yaꞌ Barac yebꞌ issoldado yinta issoldado yebꞌ yinta iscarruaje naj Sísara masanta bꞌey konhobꞌ Haroset-goim, yaykꞌay ebꞌnaj issoldado naj tuꞌ, ispotxꞌlaxkamo ebꞌnaj issoldado naj Sísara yu chꞌen espada, matxa hunu ebꞌnaj kolchahi.
17 Isto naj Sísara yu yoj iskolno isbꞌa bꞌey yatut ix Jael, yixal naj Heber, naj ceneo; yuto naj Heber yebꞌ yikꞌal naj Jabín, isreyal Hazor, ayko aqꞌankꞌulal xol ebꞌnaj. 18 Yelti ix ischahno naj, yalni ix tet naj:
—Okanh yul nha tiꞌ mamin, okanh, mach chaxhxiwi, xhi ix tet naj.
Yokto naj yul ismantiado ix, yebꞌanto ix naj, yaniko ix huneꞌ qꞌap sábana yibꞌanh naj.
19 Isqꞌanni naj yaꞌ tet ix, yuto kaw chitaj istiꞌ naj, yinilo ix ismajil istiꞌ noꞌ tzꞌum bꞌay kꞌuwan noꞌ lech, yaqꞌni ix noꞌ yukꞌuꞌ naj, lahwi tuꞌ xin yanipaxiko ix yenhel naj hunelxa.
20 Yalni naj Sísara tet ix:
—Elanhto linhno istiꞌ mantiado tiꞌ, tato ay mak chihuli, kat isqꞌambꞌeni tato ay mak ayikti bꞌey tiꞌ, chawal tet tato machi maka, kachi, xhi naj. 21 Wal naj Sísara tuꞌ, kaw sikom ay naj, yuxin ok huneꞌ niman wayanh yinh naj, iswaykanh naj. Yiniti ix Jael huneꞌ teꞌ estaca kaw xixiꞌ iswiꞌ bꞌay chiximlaxiko istxꞌanhal qꞌap ismantiado yebꞌ huneꞌ teꞌ maqꞌbꞌal estaca, nanhkꞌulal xin hitziko ix iskꞌatanh naj, ismaqꞌnayto ix teꞌ estaca tuꞌ yul iswiꞌ naj, yetkꞌulal isnabꞌal naj, isqꞌaxponikꞌto teꞌ yul iswiꞌ naj, isto teꞌ yul txꞌotxꞌ; hak tuꞌ yu iskam naj.
22 Haxa yet yapni yaꞌ Barac saywal yinh naj Sísara tuꞌ, yelti ix Jael chawal yinh yaꞌ, yalni ix:
«Okanh, kat inyenihan tawet naj chasayikꞌoj,» xhi ix.
Yokto yaꞌ Barac yul ismantiado ix, yilni yaꞌ tato kamomxa naj Sísara sat txꞌotxꞌ, ayikto teꞌ estaca yul iswiꞌ naj.