Isbꞌit ix Débora yebꞌ yaꞌ Barac
5
Haꞌ yinh huneꞌ tzꞌayik tuꞌ isbꞌitnhe ix Débora huneꞌ bꞌit yebꞌ yaꞌ Barac, iskꞌahol naj Abinoam, yalni hakaꞌ tiꞌ:2 «Haꞌ ebꞌnaj yahawil Israel hinan iskꞌul isto yinh howal,
aypaxo ebꞌnaj soldado bꞌey Israel tiꞌ istaqꞌwe isto yinh howal,
yu huneꞌ tuꞌ xin, bꞌitnhewe Komam Dios Jahawil.
3 Abꞌewe tzet chiwalan hex rey hex tiꞌ,
abꞌewe hex yahaw konhobꞌ, yuto chinbꞌitnihan tet Komam Dios Jahawil.
Chinbꞌitnihan tet koDiosal hanhonh Israelonh tiꞌ.
4 Hayet kach el bꞌey witz Seir, Mamin, hayet kach el bꞌey txꞌotxꞌ Edom isbꞌili txꞌotxꞌ,
istit haꞌ nhabꞌ yul satkanh, isbꞌejtzonayti moyan isqꞌal nhabꞌ tuꞌ.
5 Ej witz, bꞌili sata Komam Jahawil,
witz Sinaí bꞌili sata Yahawil ebꞌnaj Israel.
6 Haꞌ yul istiempohal yaꞌ Samgar iskꞌahol naj Anat, yebꞌ yul istiempohal ix Jael,
matxa ekꞌ ebꞌnaj bꞌelwom yul nimeta bꞌeh,
wal xin yul nixhte bꞌeh kotxkixhtanhe bꞌay ekꞌ ebꞌnaj.a
7 Haꞌ yulaj yaldeahil yet ismajul Israel matxa hunu mak kankanoj.
Haꞌ yinh hunteqꞌan habꞌil tiꞌ wikanh hinbꞌahan, hanin Débora intiꞌan, wokan hakaꞌ miꞌe xol anma Israel.
8 Haꞌ yinh hunteqꞌan habꞌil tiꞌ issayilo konhobꞌ Israel komon tioxh isdiosaloj,
yuxin hul howal bꞌey ispultahil konhobꞌ,
yajaꞌ machi mak chimajwahi,
yebꞌ machi hunu chꞌen escudo yebꞌ chꞌen lanza xol ebꞌnaj 40 (kawinaj) mil soldado Israel.
9 Haꞌ wanmahan hinan iskolwa teyinh hex yahaw konhobꞌ Israel,
yebꞌ xin ebꞌnaj Israel hinan isto yinh howal.
Yuxin jaqꞌaꞌweko ismay Komam Dios Jahawil.
10 Halwe tzet iswatxꞌe Komam Dios hex chexahto yibꞌanh noꞌ sajinh burro,
yebꞌpaxo hex chexekꞌ yinh hebꞌel.
11 Hata bꞌey ukꞌbꞌal haꞌ chiꞌabꞌelax isqꞌanhi chꞌen platillo cheyakoj,
cheyalnikꞌoj ta xaqꞌoji Komam yinh ebꞌnaj ayko ishowal yinh,
kat heyalnipaxikꞌoj ta xaqꞌoji sunil ebꞌnaj Israel ay yulaj yaldeahil.
Hak tuꞌ yu istit iskonhobꞌ Komam sat pulta.
12 Yalni ebꞌnaj hakaꞌ tiꞌ: Débora, ilo hawayanh, ilo hawayanh kat habꞌitni.
Haxa hach Barac, iskꞌahol naj Abinoam, ahanhwanoj,
kat hawinito ebꞌnaj preso yekoj hawu.
13 Hak tuꞌ yu yayilo ebꞌnaj Israel yu yaqꞌni howal yinh ebꞌnaj kaw ay yip,
yayilo ebꞌnaj iskonhobꞌ Komam yaqꞌaꞌ howal yinh ebꞌnaj soldado kaw helan yinh howal.
14 Yayilo ebꞌnaj soldado titna yinh yaꞌ Efraín, ebꞌnaj ay bꞌey witzlaj yet naj Amalec.
Ebꞌnaj tuꞌ tzujan yul ebꞌnaj soldado titna yinh yaꞌ Benjamín,
yulpaxo ebꞌnaj iscapitán yebꞌ issoldado naj Maquir.
Yulpaxo ebꞌnaj yahawil xol ebꞌnaj titna yinh yaꞌ Zabulón.
15 Yulpaxo ebꞌnaj yahawil xol ebꞌnaj titna yinh yaꞌ Isacar yinh howal yinta ix Débora.
Ebꞌnaj Isacar tuꞌ, ok ebꞌnaj yipo iskꞌul yaꞌ Barac,
isto lemna ebꞌnaj yinta yaꞌ yinh howal sat akꞌal.
Wal ebꞌnaj Israel yikꞌal yaꞌ Rubén,
mach kam iskꞌul ebꞌnaj iskolwahi.
16 Iskankano ebꞌnaj bꞌay chimajchelax noꞌ meꞌ,
chiyabꞌen ebꞌnaj yahwi ebꞌnaj chitanhen noꞌ meꞌ tuꞌ.
Xol ebꞌnaj Israel titna yinh yaꞌ Rubén tuꞌ ay ebꞌnaj nime winaj mach kam iskꞌul iskolwahi.
17 Haxapaxo ebꞌnaj yikꞌal naj Galaad xin,
kankano ebꞌnaj isqꞌaxebꞌikꞌto haꞌ Jordán.
Haxapaxo ebꞌnaj yikꞌal yaꞌ Dan, kankano ebꞌnaj bꞌay ay ej teꞌ barco.
Iskanpaxkano ebꞌnaj yikꞌal yaꞌ Aser istiꞌ haꞌ mar, bꞌay chiꞌapni teꞌ barco.
18 Yajaꞌ wal ebꞌnaj yikꞌal yaꞌ Zabulón yebꞌ ebꞌnaj yikꞌal yaꞌ Neftalí to ebꞌnaj yinh howal tuꞌ,
ishinni isbꞌa ebꞌnaj iskami.
19 Yapni ebꞌnaj rey cananeo bꞌey konhobꞌ Taanac, istiꞌ haꞌ Meguido,
yu yaqꞌni ebꞌnaj howal yalni, yajaꞌ xin machi qꞌalomal yebꞌ melyu yiqꞌ ebꞌnaj.
20 Hata bꞌey satkanh, yaqꞌle howal ej txꞌumel yet ayko yinh isbꞌel yinh naj Sísara.
21 Haꞌ niman Cisón, ha haꞌ ayxatikꞌa yettax kaw payat,
yijto haꞌ sunil ebꞌnaj tuꞌ.
Hach wanmatiꞌan, asiꞌ yebꞌ sunil hawip.
22 Kaw qꞌanhi yay yisqꞌaj noꞌ cheh yet isto lemna noꞌ yinh anhe yinh howal.
23 Istzotel yángel Komam Dios, yalni hakaꞌ tiꞌ:
“Tijabꞌ ishowal Komam Dios yibꞌanh konhobꞌ Meroz,
ayojabꞌ isyaꞌtajil yibꞌanh sunil ebꞌnaj winaj ay bꞌey tuꞌ,
yuto mach kolwa ebꞌnaj yinta Komam yinh howal,
yinh ebꞌnaj soldado kaw ay yip,” xhi yángel Komam tuꞌ.
24 Saqꞌal yet ix Jael xol yet ixal,
ix yixal naj Heber, naj ceneo. Saqꞌal yet ix xol yet ixal yul mantiado.
25 Yet isqꞌanni naj Sísara haꞌ yukꞌuꞌ tet ix,
lech noꞌ yaqꞌ ix yukꞌuꞌ naj.
Yaqꞌni ix crema islobꞌoꞌ naj yul huneꞌ sekꞌ kaw nanxa islow jilni.
26 Yinikanh ix huneꞌ teꞌ estaca yu ismekqꞌabꞌ,
yinipaxkanh ix teꞌ maqꞌbꞌal estaca yu iswatxꞌqꞌabꞌ,
teꞌ chiꞌokniko yu ebꞌnaj munlawom;
lahwi tuꞌ ismaqꞌnayto ix teꞌ yul iswiꞌ naj Sísara,
ishopcha iswiꞌ naj yu teꞌ, isqꞌaxponikꞌto teꞌ yul isqꞌon naj.
27 Iskꞌolbꞌan isbꞌa naj Sísara tuꞌ yu isyaꞌil yich yoj ix Jael.
Ispaxilo yip naj, istokano pakꞌna naj sat txꞌotxꞌ, iskamilo naj xin.
28 Wal ix ismiꞌ naj Sísara tuꞌ kaw ayko yinh iskꞌul ix,
chitꞌanhxilti ix yul isventanahil yatut, chalni ix:
“¿Tzet yinh xin qꞌahan yul wuninan yebꞌ iscarruaje?
¿Tzet yinh xin chꞌok linhno iscarruaje naj?” xhi ix.
29 Istaqꞌwi ebꞌix yet ixal ix kaw ay isnabꞌal chiyute yalni.
Haꞌ xin hunix chistxumni hakaꞌ ebꞌix tuꞌ, chalni ebꞌix hakaꞌ tiꞌ:
30 “¿Lanhanmi ispohnikanh ebꞌnaj tzet yilo tet ebꞌnaj aykꞌay yul isqꞌabꞌ yinh howal tuꞌ?
¿Hununmi ebꞌix qꞌopo maka kawanhmi chiꞌaqꞌlax tet hunun ebꞌnaj soldado tuꞌ?
¿Lanhanmi issikꞌlen naj Sísara tuꞌ qꞌap xilqꞌape kaw kꞌul?
¿Ham qꞌap kaw kꞌul yehiko yelawil yinh hunun istxikin,
ham qꞌap chissayilo naj, qꞌap chiꞌok yinh isnuqꞌ naj yahawil aqꞌni aykꞌayo ebꞌnaj tuꞌ?” xhi ebꞌix.
31 Mamin, hakojabꞌ tuꞌ chu istanhkanilo ebꞌnaj ayko ishowal tawinh.
Wal mak chaxhocheni, lahanojabꞌ istzejtzon hakaꞌ istzejla yoj tzꞌayik yet chꞌahiloj,» xhi ix Débora yebꞌ yaꞌ Barac yinh isbꞌit.
Hayet yekꞌto huneꞌ howal tuꞌ, aqꞌankꞌulalxanhe ye konhobꞌ Israel, matxa howal yulbꞌal 40 (kawinaj) habꞌil.