Yet yawtelax yaꞌ Gedeón
6
Iswatxꞌenpaxo ebꞌnaj Israel istxꞌojal yul sat Komam Dios Jahawil, yuxin isbꞌejiko Komam ebꞌnaj yul isqꞌabꞌ ebꞌnaj madianita yulbꞌal hujebꞌ habꞌil. 2 Kaw xin hunun tzꞌayik islahniko ebꞌnaj madianita yanayo isyaꞌtajil yibꞌanh ebꞌnaj Israel tuꞌ, yuxin ok ebꞌnaj iswatxꞌe holan yinhla witz bꞌay chiyebꞌa isbꞌa yu xiwkilal tet ebꞌnaj. Chiyebꞌanpaxo isbꞌa ebꞌnaj yulaj chꞌen nhachꞌen, chanipaxkaniko ebꞌnaj ismajil chꞌen yunhe yaꞌtaj yilchalo ebꞌnaj. 3 Haxa ebꞌnaj madianita yebꞌ ebꞌnaj amalecita yebꞌ ebꞌnaj ay bꞌey txꞌotxꞌ ayko yinh yetkꞌulal bꞌay chiꞌahilo tzꞌayik, hayet chiyilni ebꞌnaj yaniko ebꞌnaj Israel tuꞌ istzꞌunubꞌ, kat yahapno ebꞌnaj yetano ebꞌnaj. 4 Chiswatxꞌenkanh ebꞌnaj iscampamento sat istxꞌotxꞌ ebꞌnaj Israel tuꞌ, chiyetanto ebꞌnaj sat istzꞌunubꞌ ebꞌnaj masanta chiꞌapni ebꞌnaj bꞌey konhobꞌ Gaza, matxa xin tzet chislo ebꞌnaj Israel tuꞌ chákano ebꞌnaj. Chiyelqꞌanpaxto ebꞌnaj ismeꞌ ebꞌnaj yebꞌ noꞌ wakax yebꞌ noꞌ burro. 5 Chiyinito ebꞌnaj sunil isnoqꞌ sat istxꞌotxꞌ ebꞌnaj Israel yet chiswatxꞌenkanh ebꞌnaj iscampamento tuꞌ. Chiyetanto ebꞌnaj sunil istzꞌunubꞌ ebꞌnaj; chiyinito ebꞌnaj iscamello, lahanxa xin isbꞌisil iscamello ebꞌnaj hakaꞌ isbꞌisil noꞌ qꞌul yet chiꞌekꞌ bꞌulbꞌon noꞌ. 6 Hak tuꞌ yu yokkano mebꞌaꞌil yinh ebꞌnaj Israel yu tzet utelax ebꞌnaj yu ebꞌnaj madianita tuꞌ, yuxin ah yaw ebꞌnaj Israel tet Komam Dios Jahawil ta chikolwa Komam yinh ebꞌnaj.7 Hayet yah yaw ebꞌnaj Israel isqꞌanni ebꞌnaj ta chiskolilo Komam Jahawil ebꞌnaj yul isqꞌabꞌ ebꞌnaj madianita tuꞌ; 8 ischejniti Komam huneꞌ ischejabꞌ, yalni yaꞌ tet ebꞌnaj Israel hakaꞌ tiꞌ:
«Hak tiꞌ yu yalni Komam Dios Jahawil, koDiosal hanhonh Israelonh tiꞌ: “Haninan kexwilojan sat txꞌotxꞌ Egipto bꞌay ayexiko chejabꞌoj. 9 Haninan kexinkolilojan yul isqꞌabꞌ ebꞌnaj Egipto tuꞌ, kexinkolnipaxilojan yul isqꞌabꞌ ebꞌnaj kexetani, intzumbꞌenilojan ebꞌnaj tesataj, waqꞌnihan istxꞌotxꞌ ebꞌnaj teyet. 10 Walnipaxojan teyet: Haninan heYahawil yebꞌ heDiosal, yuxin mach chexxiw tet hunteqꞌan komon tioxh chal ebꞌnaj amorreo tiꞌ isdiosaloj, hunteqꞌan ay sat istxꞌotxꞌ ebꞌnaj bꞌay ay hex tiꞌ. Yajaꞌ xin mach heyije tzet walan,” xhi Komam,» xhi yaꞌ ischejabꞌ Komam tet ebꞌnaj Israel tuꞌ.
11 Lahwi tuꞌ, yapni yángel Komam Dios, yay tzꞌonhno yich huneꞌ teꞌ hih ay bꞌey Ofra, sat istxꞌotxꞌ yaꞌ Joás, yaꞌ iskꞌahol naj Abiezer. Yaꞌ Joás tuꞌ ay huneꞌ iskꞌahol yaꞌ chiyij Gedeón. Haꞌ yinh huneꞌ tzꞌayik tuꞌ lanhan isxunilo yaꞌ Gedeón tuꞌ qꞌalem xol ixim trigo yinh ewantajil tet ebꞌnaj madianita. Haꞌ xin bꞌay chixanhlaxilti yal teꞌ uva, haꞌ tuꞌ lanhan iswatxꞌenilo yaꞌ ixim. 12 Yet isyenikanh isbꞌa yángel Komam Jahawil tet yaꞌ Gedeón tuꞌ, yalni hakaꞌ tiꞌ:
—Haꞌ Komam Dios Jahawil ayko hawetbꞌihoj, hach tiꞌ kaw ay yip hawanma, yebꞌ kaw helan hach, xhi yángel Komam.a
13 Istaqꞌwi yaꞌ Gedeón:
—Mamin, aqꞌ nimankꞌulal chiwalnihan huneꞌ tiꞌ: Tato ayko Komam Jahawil jetbꞌihojanh, ¿tzet yinh yuxin hak tiꞌ chijaqꞌlehanh? ¿Bꞌaytuꞌwal chijilanh kꞌaybꞌalkꞌule tinanh, hakaꞌ yu yilni jichmamanh yet yinilo Komam Dios ebꞌnaj sat txꞌotxꞌ Egipto? Wal xin xakonhisbꞌejkanojanh Komam, konhyanikojanh yul isqꞌabꞌ ebꞌnaj madianita, xhi yaꞌ Gedeón.
14 Yok tꞌanhno Komam Jahawil yinh yaꞌ Gedeón, yalni hakaꞌ tiꞌ:
—Haninan chaxhinchejtojan, ako sunil hawip hakolnilo ebꞌnaj Israel yul isqꞌabꞌ ebꞌnaj madianita, xhi yángel Komam tet yaꞌ.
15 Isqꞌambꞌen yaꞌ Gedeón:
—Mamin, aqꞌ nimankꞌulal yinh tzet chiwalpaxojan tawet tiꞌ. ¿Tzet xin chu inkolnilojan konhobꞌ Israel? Hanhonhtiꞌanh mebꞌaꞌ honhanh xol ebꞌnaj titna yinh yaꞌ Manasés. Hanintiꞌan xin islahobꞌal unin xol yuninal inmaman, xhi yaꞌ.b
16 Istaqꞌwi Komam tet yaꞌ:
—Haninan chinokan hawetbꞌihoj, hach tiꞌ xin chatanhtzelo ebꞌnaj madianita, hakaꞌta huneꞌnhe winaj naj chawaqꞌ aykꞌayoj, xhi Komam.
17 Yalni yaꞌ Gedeón:
—Mamin, tato kꞌulinan yul hasat, aqꞌ hunu yechel wetan yunhe wohtanhenilojan tato hach chaxhtzotel wetan. 18 Chinqꞌanan tawet, tato maxhtonhe chaxhto bꞌey tiꞌ masanto yet chinhulujan yebꞌ inxahanbꞌalan, kat wanayojan tasataj, xhi yaꞌ.
Istaqꞌwi Komam Jahawil:
—Chiwechmahan masanto yet chachhuluj, xhi Komam. 19 Isto yaꞌ Gedeón, ispotxꞌnikamo yaꞌ huneꞌ noꞌ nichꞌan chiw, iswatxꞌenpaxo yaꞌ ixim pan yinh 20 (hunkꞌal) kilo ixim harina, machi xin yanhal ixim yako yaꞌ. Lahwi tuꞌ, yanayto yaꞌ noꞌ chibꞌe yul huneꞌ motx, haxa yal noꞌ xin yayto yaꞌ yul huneꞌ txꞌotxꞌ xi, yinito yaꞌ yich teꞌ hih tuꞌ.
20 Yalni yángel Komam Dios tet yaꞌ:
—Ikanh noꞌ chibꞌe tiꞌ yebꞌ ixim pan machi yanhal aykoj, kat hawanahto yibꞌanh huneꞌ chꞌen niman chꞌen tiꞌ, kat xin hatixhnayo yal noꞌ tuꞌ yibꞌanh, xhi yángel Komam.
21 Haꞌ yángel Komam Jahawil tuꞌ xin, yayo iswiꞌ isqꞌojoch yibꞌanh noꞌ chibꞌe yebꞌ ixim pan, yah qꞌa qꞌaꞌ yinh chꞌen niman chꞌen tuꞌ, istzꞌato noꞌ chibꞌe yebꞌ ixim pan yu qꞌaꞌ. Lahwi tuꞌ iskꞌayayo yángel Komam yinh sat yaꞌ Gedeón.
22 Hak tuꞌ yu yohtanhenilo yaꞌ Gedeón tato yángel Komam Dios ye huneꞌ mak tzotel tet yaꞌ. Yalni yaꞌ hakaꞌ tiꞌ:
—Mam Wahawil, mawilikojan yinh yángel Komam Jahawil yu insatan, xhi yaꞌ.
23 Yalni Komam Jahawil tet yaꞌ xin:
—Haꞌ aqꞌankꞌulal chiꞌokkano takꞌatanh. Mach chaxhxiwi, yuto mach chaxhkami, xhi Komam.
24 Wal yaꞌ Gedeón xin, islatzꞌbꞌakanh yaꞌ chꞌen chꞌen mexhahil yet xahanbꞌal tet Komam Jahawil bꞌey tuꞌ, yaniko yaꞌ isbꞌi hakaꞌ tiꞌ: «Haꞌ Komam Dios yet aqꞌankꞌulal yehi,» xhi. Haꞌ chꞌen mexha tuꞌ aytokꞌo tinanh bꞌey konhobꞌ Ofra, iskonhobꞌ ebꞌnaj yuninal yaꞌ Abiezer.
25 Yinhtikꞌa huneꞌ aqꞌbꞌal tuꞌ, yal Komam Dios tet yaꞌ Gedeón hakaꞌ tiꞌ:
«Iti hunu noꞌ winaj wakax xol noꞌ iswakax hamam, noꞌ yet iskabꞌ yunin ayko yinh hujebꞌ habꞌil, kat hawuchkꞌanayo huneꞌ chꞌen mexha yet tioxh Baal, huneꞌ yet hamam, kat hatzokꞌnito huneꞌ yechel tioxh Asera ayko iskꞌatanh chꞌen tuꞌ. 26 Haꞌ yinh iswiꞌ huneꞌ wonhan tuꞌ chalatzꞌbꞌakanh chꞌen chꞌen chꞌok mexhahil wetan, hanin Yahawilintiꞌan, heDiosal. Kat xin hapotxꞌnikamo noꞌ wakax tuꞌ, kat hanhusni noꞌ yinh xahanbꞌalil, haxa teꞌ isteꞌal tioxh Asera chatzokꞌayo tuꞌ, haꞌ chꞌok siꞌal yalanh xahanbꞌal chawaqꞌ wettuꞌan,» xhi Komam tet yaꞌ.
27 Lahwi tuꞌ, yinito yaꞌ Gedeón 10 (lahonhwanh) ischejabꞌ, iswatxꞌen yaꞌ hakaꞌtikꞌa yu yalni Komam. Mach chiswatxꞌe yaꞌ huneꞌ tuꞌ yinh tzꞌayikal wal xin aqꞌbꞌalil iswatxꞌe yaꞌ tuꞌ yu chixiw yaꞌ tet sunil yuxhta ismam, yebꞌ tet anma ay yul konhobꞌ tuꞌ.
28 Haxa yet issajbꞌiloj, yet yahwano anma ay yul konhobꞌ, yilni tato uchkꞌabꞌilxato ismexhahil yet xahanbꞌal yet tioxh Baal, yebꞌ tzokꞌlaxayo huneꞌ yechel tioxh Asera ayko iskꞌatanh chꞌen mexha tuꞌ, yilnipaxo anma noꞌ winaj wakax nhuslaxto yibꞌanh huneꞌ mexha yet xahanbꞌal akꞌto iswatxꞌikanh. 29 Yok anma isqꞌambꞌeno tet hunun hakaꞌ tiꞌ:
—¿Mak mawatxꞌen huneꞌ tiꞌ? xhi.
Hayet kaw xalahwilo yekꞌkano anma isqꞌambꞌenoj, yabꞌchalo yu anma tato yaꞌ Gedeón, iskꞌahol yaꞌ Joás watxꞌen huneꞌ tuꞌ; yuxin to ebꞌnaj yalaꞌ tet yaꞌ Joás hakaꞌ tiꞌ:
30 —Ilti naj hakꞌahol, chikopotxꞌkamojanh naj, yuto mayuchkꞌayo naj ismexhahil xahanbꞌal yet tioxh Baal, yebꞌ mastzokꞌayo naj yechel tioxh Asera ayko iskꞌatanh mexha tuꞌ, xhi ebꞌnaj.
31 Istaqꞌwi yaꞌ Joás tet ebꞌnaj apni iskꞌatanh tuꞌ:
—¿Tom chexkolwa yinh tioxh Baal tuꞌ, kat heyanito hebꞌa yinh? Makxanhetikꞌa chikolnilo tioxh Baal tuꞌ, kamojabꞌ yinh huneꞌ sahabꞌ sakꞌayal tiꞌ. Tato kaw yeli dios huneꞌ Baal tuꞌ, iskolabꞌ isbꞌa ischukil tet mak maꞌuchkꞌanayo yet xahanbꞌal tuꞌ, xhi yaꞌ.
32 Yinh huneꞌ tzꞌayik tuꞌ, Jerobaal alaxiko isbꞌiho yaꞌ Gedeón, huneꞌ tiꞌ chal yelapnoj: «Iskolabꞌ isbꞌa Baal tet naj,» xhi; yuto haꞌ yaꞌ Gedeón tuꞌ uchkꞌanayo ismexha yet xahanbꞌal yet tioxh Baal.
33 Iskutxbꞌaniko isbꞌa ebꞌnaj madianita yebꞌ ebꞌnaj amalecita, yebꞌ ebꞌnaj ay yinh yetkꞌulal bꞌay chiꞌahilo tzꞌayik, isqꞌaxponikꞌto ebꞌnaj yibꞌanh haꞌ Jordán, iswatxꞌenkanh ebꞌnaj ismantiado sat akꞌal Jezreel. 34 Lahwi tuꞌ yul Yespíritu Komam Jahawil yinh yaꞌ Gedeón, yoqꞌtzen yaꞌ yukꞌaꞌ noꞌ meꞌ, iskutxbꞌaniko isbꞌa ebꞌnaj yikꞌal yaꞌ Abiezer iskꞌatanh yaꞌ. 35 Yanito yaꞌ tzotiꞌ tet ebꞌnaj Israel titna yinh yaꞌ Manasés, iskutxbꞌaniko isbꞌa ebꞌnaj iskꞌatanh yaꞌ. Yanipaxto yaꞌ tzotiꞌ tet ebꞌnaj Israel yikꞌal yaꞌ Aser yebꞌ tet ebꞌnaj yikꞌal yaꞌ Zabulón, yebꞌ ebꞌnaj yikꞌal yaꞌ Neftalí; istitpaxo ebꞌnaj tuꞌ, iskutxbꞌaniko isbꞌa yinta yaꞌ.
36 Yalni yaꞌ Gedeón tet Komam Dios:
«Tato yeli chinhawakojan inkoloꞌan anma Israel, hakaꞌ hawalni wetan. 37 Chiwayojan hunteqꞌan xil noꞌ meꞌ kaw pim xil bꞌay chixanhlaxilti ixim trigo, tato yet hekal yet chisajbꞌiloj kaw chakꞌan xil noꞌ meꞌ tuꞌ yu yal chew, haxapaxo sat txꞌotxꞌ yinhla ishoyanil tuꞌ, tajinpaxoj. Yinh hakaꞌ tuꞌ, chiwohtanhelojan tato haninan chinhawakojan inkoloꞌan anma Israel, hakaꞌ hawalni wetan,» xhi yaꞌ.
38 Hakaꞌ yu yalni yaꞌ tuꞌ, hak tuꞌ elikoj. Hayet yahwano yaꞌ yinh sahabꞌ sakꞌayal, isyatzꞌnilo yaꞌ xil noꞌ meꞌ tuꞌ, huneꞌ vaso yal chew yilo yaꞌ yinh noꞌ. 39 Yalnipaxo yaꞌ Gedeón tet Komam:
«Mach chitit hahowal winhan Mamin, yuto chintzotelan hunelxa tawet, ayto huneꞌxa yechel chiwochehan yinh xil noꞌ meꞌ. Hayet hunelxa tiꞌ, chiwochehan tato machi haꞌ chiꞌay yibꞌanh xil noꞌ meꞌ tuꞌ, haxa txꞌo txꞌotxꞌ istiꞌla noꞌ tuꞌ xin chichakꞌanbꞌi,» xhi yaꞌ.
40 Haꞌ yinh huneꞌ aqꞌbꞌal tuꞌ xin iswatxꞌe Komam Dios hakaꞌ yalni yaꞌ. Hanhechꞌan yibꞌanh xil noꞌ meꞌ tuꞌ tajin, wal yibꞌanh txꞌo txꞌotxꞌ istiꞌla noꞌ xin akꞌilo yu yal chew.