2 Yalni Komam Jahawil tet yaꞌ Gedeón:

«Kaw niman anma iqꞌbꞌil hawu, tato chiwakojan ebꞌnaj madianita tiꞌ yul heqꞌabꞌ kat heqꞌoji yinh ebꞌnaj, chimheyikanh hebꞌa insatajan, kat heyalni hakaꞌ tiꞌ: “Koqꞌabꞌ tiꞌanh makolwa jinhanh,” kexchimi. 3 Yuxin hal tet sunil ebꞌnaj soldado tato ay ebꞌnaj chixiw isto yinh howal, sahabꞌojabꞌ chiꞌahwano hekal, kat yel bꞌey witz Galaad tiꞌ, kat ispaxto yatut,» xhi Komam.

Hak tuꞌ yu yilwen yaꞌ Gedeón ebꞌnaj tuꞌ, yuxin 22 mil ebꞌnaj paxto yatut, haxanhe xin 10 mil ebꞌnaj kankanoj.

4 Yajaꞌ xin yalpaxo Komam:

«Kaw nimantopaxo ebꞌnaj, wal tinanh ito ebꞌnaj ukꞌu haꞌ istiꞌ ha haꞌ, kat wilwenan ebꞌnaj, kat walnojan tawet makta ebꞌnaj chito tawintaj yebꞌ makta ebꞌnaj mach chitohi,» xhi Komam.

5 Hak tuꞌ xin yu yinito yaꞌ Gedeón ebꞌnaj soldado tuꞌ ukꞌu haꞌ, yalni Komam tet yaꞌ:

«Haꞌ ebꞌnaj tonhe chiꞌetxnati haꞌ yu isqꞌabꞌ, kat isleqꞌnati ebꞌnaj haꞌ hakaꞌ metx txꞌiꞌ, chapohilo ebꞌnaj xol ebꞌnaj chiꞌay jahnoj kat yukꞌni haꞌ,» xhi Komam.

6 Wal isbꞌisil ebꞌnaj leqꞌnati haꞌ yul isbꞌetx yet chaniko yinh istiꞌ, 300 ebꞌnaj, wal hunteqꞌanxa ebꞌnaj xin, ay jahnoj yet yukꞌni haꞌ.

7 Lahwi tuꞌ yalni Komam Dios Jahawil tet yaꞌ Gedeón:

«Kꞌuxan 300 ebꞌnaj tiꞌ chexkolnilo yul isqꞌabꞌ ebꞌnaj madianita wuhan, hanhe ebꞌnaj tiꞌ chinqꞌanan isqꞌoji yinh ebꞌnaj madianita, wal hunteqꞌanxa ebꞌnaj xin paxojabꞌto ebꞌnaj bꞌay aya,» xhi Komam.

8 Yuxin yal yaꞌ Gedeón tato chimeltzo ebꞌnaj yatut. Yet maxhto chito ebꞌnaj yinikanilo yaꞌ Gedeón tzet chislo ebꞌnaj yebꞌ noꞌ yukꞌaꞌ wakax chiyoqꞌtze ebꞌnaj. Haxanhe xin ebꞌnaj 300 pohlaxilo tuꞌ kankano iskꞌatanh yaꞌ Gedeón. Haꞌ xin yinh iswiꞌ witz ayayo iscampamento ebꞌnaj, wal ebꞌnaj madianita xin, yehayto iscampamento ebꞌnaj.

9 Yinh huneꞌ aqꞌbꞌal tuꞌ yal Komam Jahawil tet yaꞌ Gedeón:

«Ahanhwanoj, kat hawayto bꞌey campamento, yuto xawakojan ebꞌnaj madianita yul haqꞌabꞌ. 10 Yajaꞌ tato chaxhxiw hawaniko howal yinh ebꞌnaj xin, ayanhto yebꞌ hachejabꞌ naj Fura bꞌey iscampamento ebꞌnaj madianita yinh ewantajil; 11 kat hawabꞌen yinh tzet chal ebꞌnaj, lahwi tuꞌ kat yok yip hawanma, kat hawayto hawanoko howal yinh ebꞌnaj,» xhi Komam.

Hak tuꞌ yu yayto yaꞌ Gedeón yebꞌ ischejabꞌ, haꞌ ton naj Fura, yapni ebꞌnaj bꞌay ay ebꞌnaj soldado madianita chitanhen campamento tuꞌ. 12 Wal ebꞌnaj madianita yebꞌ ebꞌnaj amalecita yebꞌ ebꞌnaj ay yinh yetkꞌulal bꞌay chiꞌahilo tzꞌayik, tokano lehno ebꞌnaj sunil sat akꞌal tuꞌ, hakaꞌ noꞌ qꞌul yet chiꞌekꞌ noꞌ yetanoto tzꞌunubꞌ. Kaw xin hantanhekano isbꞌisil iscamello ebꞌnaj, lahanxa isbꞌisil hakaꞌ arena ay istiꞌ haꞌ mar.

13 Hayet yapni yaꞌ Gedeón istiꞌ campamento tuꞌ, yabꞌen yaꞌ yet lanhan yalni huneꞌ naj soldado iswayik tet hunxa naj, yalni naj hakaꞌ tiꞌ:

—Manwaykehan tato ay huneꞌ ixim pan cebada, matit petpon bꞌey kokampamento tiꞌ, haxa yet mahul ixim ismaqꞌnoko isbꞌa yinh kokampamento tiꞌ, maꞌuchkꞌato iswiꞌ campamento yebꞌ yich, lahwi tuꞌ xin maꞌaywejnahi, xhi naj.^a

14 Istaqꞌwi naj yetbꞌi naj tuꞌ hakaꞌ tiꞌ:

—Haꞌ tzet chal yelapno hawayik tiꞌ maxhtaj hunuxa tzet ye tuꞌ chala; wal xin haꞌ yespada yaꞌ Gedeón, iskꞌahol yaꞌ Joás, yaꞌ ah Israel. Haꞌ Komam Dios chonhaniko yul isqꞌabꞌ yaꞌ yebꞌ kokampamento tiꞌ, xhi naj.

15 Hayet yabꞌen yaꞌ Gedeón yal-lax huneꞌ wayike tuꞌ yebꞌ yinh tzet chal yelapnoj, yay jahno yaꞌ sata Komam. Lahwi tuꞌ ismeltzo yaꞌ bꞌay ay iscampamento ebꞌnaj Israel, yalni yaꞌ:

«Ahanhwewanoj, yuto mayako Komam Jahawil iscampamento ebꞌnaj madianita yul koqꞌabꞌ,» xhi yaꞌ.

16 Ispohni yaꞌ ebꞌnaj 300 soldado tuꞌ yinh oxebꞌ majan; yaniko yaꞌ noꞌ yukꞌaꞌ wakax yul isqꞌap hunun ebꞌnaj yunhe yoqꞌtzen ebꞌnaj, yebꞌ hunun txꞌotxꞌ tzꞌahabꞌ, ayayto istah ebꞌnaj yul, ayko qꞌaꞌ yinh. 17 Yalni yaꞌ Gedeón tet ebꞌnaj:

«Hayet chinekꞌapnojan isqꞌaxebꞌikꞌto iscampamento ebꞌnaj tuꞌ, kaw kam cheyil yinh tzet chiwutehan, haktikꞌapax tuꞌ xin cheyute. 18 Hayet chiwoqꞌtzenan noꞌ yukꞌaꞌ meꞌ yebꞌ ebꞌnaj tzujan wintajan, kat xin heyoqꞌtzenpaxo heyet yinhla ishoyanil campamento, kat heyahwi, cheyalni hakaꞌ tiꞌ: “¡Yu Komam Dios Jahawil yebꞌ yu yaꞌ Gedeón!” kexchi,» xhi yaꞌ Gedeón.

19 Lahwi tuꞌ, yekꞌapno yaꞌ Gedeón isqꞌaxebꞌikꞌto campamento yebꞌ ebꞌnaj 100 (hokꞌal) soldado tzujan yintaj yinh chuman aqꞌbꞌal yet lanhan ishelni isbꞌa ebꞌnaj soldado madianita chitanhen campamento. Yok ebꞌnaj yoqꞌtzeno noꞌ yukꞌaꞌ, ispohnito ebꞌnaj txꞌotxꞌ tzꞌahabꞌ iqꞌbꞌil yu.^b 20 Huneꞌnhe xin yu yoqꞌtzen ebꞌnaj noꞌ yukꞌaꞌ tuꞌ isyox majanil, ispohnipaxto ebꞌnaj txꞌotxꞌ tzꞌahabꞌ iqꞌbꞌil yu. Haꞌ ismekqꞌabꞌ ebꞌnaj tzejnhe istah tuꞌ, haxa iswatxꞌqꞌabꞌ ebꞌnaj xin iqꞌnhe noꞌ yukꞌaꞌ chiyoqꞌtze tuꞌ. Chalni ebꞌnaj yinh kaw ip hakaꞌ tiꞌ:

—¡Jaqꞌaꞌwe howal yu yespada Komam Jahawil yebꞌ yu yaꞌ Gedeón! xhi ebꞌnaj.

21 Wal ebꞌnaj Israel tuꞌ huneꞌnhetikꞌa haꞌ bꞌay linhaniko hunun ebꞌnaj yinh ishoyanil campamento tuꞌ; wal ebꞌnaj madianita xin elkanh ebꞌnaj, yawxanhe ebꞌnaj yu xiwkilal. 22 Hayet yoqꞌtzen ebꞌnaj 300 Israel noꞌ yukꞌaꞌ tuꞌ, issomchanto Komam Jahawil isnabꞌal ebꞌnaj madianita, haꞌtikꞌa ebꞌnaj ispotxꞌlekamo isbꞌa, aypaxo xin ebꞌnaj elkanh, yapni ebꞌnaj bꞌey konhobꞌ Bet-sitá, yinh yetkꞌulal Zerera, masanta bꞌey ismohonal Abel-mehola, iskawilal Tabat.

23 Iskutxbꞌaniko isbꞌa ebꞌnaj Israel; ebꞌnaj titna yinh yaꞌ Neftalí, yebꞌ ebꞌnaj titna yinh yaꞌ Aser, yebꞌpaxo sunil ebꞌnaj titna yinh yaꞌ Manasés. Haꞌ xin ebꞌnaj ok tzujno yinta ebꞌnaj madianita.

24 Yanito yaꞌ Gedeón tzotiꞌ bꞌey chewal txꞌotxꞌ tet ebꞌnaj Israel titna yinh yaꞌ Efraín tato chiꞌayti ebꞌnaj kat ismajni ebꞌnaj isbꞌeh ebꞌnaj madianita bꞌey istiꞌ ha haꞌ bꞌey Bet-bará, yebꞌ bꞌey istiꞌ haꞌ Jordán, bꞌay kawil yehayto yich haꞌ, yet yalanhto maxhto chiꞌapni ebꞌnaj madianita bꞌey tuꞌ.

Isyijen ebꞌnaj titna yinh yaꞌ Efraín tuꞌ, hakaꞌ yu yalni yaꞌ Gedeón. 25 Istzabꞌnayo ebꞌnaj kawanh ebꞌnaj yahawil ebꞌnaj madianita; huneꞌ naj chiyij Oreb, huneꞌxa naj xin chiyij Zeeb. Ispotxꞌnikamo ebꞌnaj naj Oreb bꞌey chꞌen niman chꞌen chihal-lax Oreb, haxa naj Zeeb, potxꞌlaxkamo naj bꞌey bꞌay chixanhlaxilti yal teꞌ uva, yuxin huneꞌ tuꞌ Zeeb isbꞌi tinanh. Lahwi tuꞌ xin istzumbꞌen ebꞌnaj yikꞌal yaꞌ Efraín ebꞌnaj madianita, yinito ebꞌnaj iswiꞌ naj Oreb yebꞌ naj Zeeb tet yaꞌ Gedeón bꞌey isqꞌaxebꞌikꞌto haꞌ Jordán.