—¿Tzet yinh xin hak tiꞌ maxawute jinhanh? ¿Tzet yinh xin mach konhhawawtehanh yet hato hawanoko howal yinh ebꞌnaj madianita? xhi ebꞌnaj.

2 Istaqꞌwi yaꞌ Gedeón:

—¿Tom mach chitxumchalo heyu tato ekꞌbꞌal niman tzet maxewatxꞌe insatajan? Haꞌ tzet maxewatxꞌe yinh islahobꞌalxa tiꞌ, ekꞌbꞌal niman yelapno sata tzet kowatxꞌhanh yet yichiko howal. ¿Tom mach heyohtajoj tato sat heyuva ekꞌbꞌalto sata yuva ebꞌnaj titna yinh yaꞌ Abiezer? 3 Yuto yako Komam Dios naj Oreb yebꞌ naj Zeeb yul heqꞌabꞌ, ebꞌnaj yahawil issoldado ebꞌnaj madianita. ¿Tom niman tzet inwatxꞌehan yibꞌanhilo hanta tzet hewatxꞌe tiꞌ? xhi yaꞌ.

Hayet yabꞌen ebꞌnaj yalni yaꞌ Gedeón hakaꞌ tuꞌ, isbꞌejni ebꞌnaj ishowal yinh naj.

4 Yapni yaꞌ Gedeón istiꞌ haꞌ Jordán yebꞌ ebꞌnaj 300 soldado tzujan yintaj, isqꞌaxponikꞌto ebꞌnaj yibꞌanh haꞌ, waxanhka kaw sikomxa ebꞌnaj, yaj ayko ebꞌnaj istzumbꞌen ebꞌnaj madianita. 5 Haxa yet yapni ebꞌnaj bꞌey konhobꞌ Sucot, yalni yaꞌ Gedeón tet anma ay bꞌey tuꞌ:

—Kaw chinqꞌanan teyet, aqꞌwe hanikꞌo tzet chislo ebꞌnaj tzujan wintatiꞌan, yuto kaw sikom ay ebꞌnaj. Wal hinan xin masan chintzujayojan ebꞌnaj yahawil ebꞌnaj madianita, haꞌ ton naj Zeba yebꞌ naj Zalmuna, xhi naj.

6 Haꞌ ebꞌnaj yahawil konhobꞌ Sucot, taqꞌwi ebꞌnaj hakaꞌ tiꞌ:

—¿Tom tzabꞌilxa naj Zeba yebꞌ naj Zalmuna tuꞌ hawu, yuxin chaqꞌana ta chijaqꞌanh tzet chislo ebꞌnaj tzujan tawinta tiꞌ? xhi ebꞌnaj.

7 Istaqꞌwi yaꞌ Gedeón:

—Hayet chilahwi yaniko Komam Dios naj Zeba yebꞌ naj Zalmuna yul inqꞌabꞌan, haxa yet chinmeltzohan xin, kat intzilnitojan henimanil yu teꞌ txꞌix ay bꞌey txꞌotxꞌ desierto, xhi yaꞌ.

8 Lahwi tuꞌ, yahto yaꞌ bꞌey konhobꞌ Peniel, isqꞌannipaxo yaꞌ tzet chislo ebꞌnaj soldado tet ebꞌnaj ay bꞌey tuꞌ. Hakaꞌtikꞌa yu istaqꞌwi ebꞌnaj ay bꞌey konhobꞌ Sucot, hak tuꞌ yu istaqꞌwipaxo ebꞌnaj tet yaꞌ Gedeón. 9 Yalni yaꞌ Gedeón tet ebꞌnaj ay bꞌey Peniel hakaꞌ tiꞌ:

«Hayet chinmeltzohan bꞌey tiꞌ yet xakinqꞌojihan, kat wekꞌan wuchkꞌanayojan huneꞌ torre tiꞌ,» xhi yaꞌ.

10 Wal naj Zeba yebꞌ naj Zalmuna, hata bꞌey konhobꞌ Carcor ay ebꞌnaj, yebꞌ 15 (holanhebꞌ) mil ebꞌnaj soldado; haxanhechꞌan ebꞌnaj mach tanhilo yinh ebꞌnaj ay yinh yetkꞌulal bꞌay chiꞌahilo tzꞌayik; wal ebꞌnaj kamilo xin, 120 mil ebꞌnaj. 11 Ahto yaꞌ Gedeón yebꞌ ebꞌnaj issoldado yul bꞌeh chiꞌekꞌ istiꞌla txꞌotxꞌ desierto, yinh yetkꞌulal bꞌay chiꞌahilo tzꞌayik yinh konhobꞌ Noba yebꞌ yinh konhobꞌ Jogbeha, yaniko ebꞌnaj howal yinh iscampamento ebꞌnaj madianita yet tona nahul ay ebꞌnaj. 12 Wal naj Zeba yebꞌ naj Zalmuna tuꞌ elkanh ebꞌnaj, yok tzujno yaꞌ Gedeón yinta ebꞌnaj, istzabꞌnayo yaꞌ ebꞌnaj kawanh isreyal ebꞌnaj madianita, haꞌ naj Zeba yebꞌ naj Zalmuna; issajlemito issoldado ebꞌnaj yu xiwkilal yu yaꞌ Gedeón.

13 Haxa yet ismeltzoxati yaꞌ Gedeón iskꞌahol yaꞌ Joás yinh howal yet maxhto chiꞌah tzꞌayik, 14 istzabꞌayo yaꞌ huneꞌ naj tzeh ah konhobꞌ Sucot, isqꞌambꞌen yaꞌ tet naj tzettaj isbꞌi hunun ebꞌnaj yahawil konhobꞌ. Istzꞌibꞌnhenayo yaꞌ isbꞌi hunun ebꞌnaj yahawil konhobꞌ yebꞌ ebꞌnaj iswiꞌehal yul konhobꞌ tuꞌ, 77 (hujebꞌlanhebꞌ iskanhwinaj) isbꞌisil ebꞌnaj yinh sunil.

15 Lahwi tuꞌ, isto yaꞌ Gedeón bꞌey konhobꞌ Sucot, yalni yaꞌ tet ebꞌnaj ay bꞌey tuꞌ:

«Ay naj Zeba yebꞌ naj Zalmuna lah; nawetij tato kexok bꞌuchwal winhan yu ebꞌnaj yet heyalni hakaꞌ tiꞌ: “¿Tom tzabꞌilxayo naj Zeba yebꞌ naj Zalmuna hawu yuxin chaqꞌan ta chijaqꞌanh tzet chislo ebꞌnaj hasoldado sikom aya?” kexchi,» xhi yaꞌ.

16 Yiniti yaꞌ Gedeón teꞌ txꞌix, yiti bꞌey txꞌotxꞌ desierto, yaqꞌni yaꞌ ekꞌoyaꞌ yanma ebꞌnaj yahawil konhobꞌ Sucot tuꞌ yu teꞌ. 17 Lahwi tuꞌ, istopaxo yaꞌ bꞌey konhobꞌ Peniel, yuchkꞌanayo yaꞌ huneꞌ torre ay bꞌey tuꞌ, ispotxꞌnikamo yaꞌ sunil anma ay bꞌey tuꞌ.

18 Isqꞌambꞌen yaꞌ tet naj Zeba yebꞌ tet naj Zalmuna:

—¿Tzet jilni ebꞌnaj winaj hepotxꞌkamo bꞌey konhobꞌ Tabor? xhi yaꞌ.

Istaqꞌwi ebꞌnaj:

—Hakaꞌ kach jilni tiꞌ, hak tuꞌ jilni ebꞌnaj. Lahan jilni ebꞌnaj hakaꞌ iskꞌahol ebꞌnaj rey, xhi ebꞌnaj.

19 Hayet yabꞌen yaꞌ Gedeón yalni ebꞌnaj hakaꞌ tuꞌ, yah yaw yaꞌ, yalni:

—Wuxhtajan ebꞌnaj hepotxꞌkamo tuꞌ, huneꞌnhe inmiꞌan yebꞌ ebꞌnaj. Haꞌ tinanh xin, chiwaqꞌ bꞌinahojan isbꞌi Komam Jahawil, tato mach hemaqꞌkamo ebꞌnaj tuꞌ, machim chexinpotxꞌkamojan tinanh, xhi yaꞌ.

20 Yalni yaꞌ Gedeón tet naj Jeter, naj isbꞌabꞌel kꞌahol:

«Ahanhwanoj, kat hapotxꞌnikamo ebꞌnaj tiꞌ,» xhi yaꞌ.

Wal naj Jeter tuꞌ machi yihti naj yespada yul yatut yuto chixiw naj; nichꞌan tzehto naj.

21 Yalni naj Zeba yebꞌ naj Zalmuna tet yaꞌ Gedeón:

«¿Tzet yinh mach tajach chonhhapotxꞌkamojanh? Yuto hakaꞌ kach jilni tiꞌ, hakpax tuꞌ hawipal,» xhi ebꞌnaj.

Yah lemna yaꞌ Gedeón, ispotxꞌnikamo yaꞌ naj Zeba yebꞌ naj Zalmuna, yinilo yaꞌ hunteqꞌan yechel ixahaw ayko yelawilo isnuqꞌ iscamello ebꞌnaj.

22 Yalni ebꞌnaj Israel tet yaꞌ Gedeón hakaꞌ tiꞌ:

—Hach tiꞌ chaxhok jahawilojanh yebꞌ hawuninal, yuto konhhakolilojanh yul isqꞌabꞌ ebꞌnaj madianita, xhi ebꞌnaj.

23 Istaqꞌwi yaꞌ Gedeón tet ebꞌnaj Israel:

—Mach chinokan heyahawiloj, mach chiꞌokpaxo wuninalan, wal xin haꞌ Komam Dios, hanhechꞌan Jahawil. 24 Haꞌ huneꞌ chinqꞌanan teyet ta cheyaqꞌ wetan sunil chꞌen ome heyilo tet ebꞌnaj madianita, xhi yaꞌ Gedeón.

25 Istaqꞌwi ebꞌnaj tet yaꞌ Gedeón:

—Yinh sunil kokꞌulanh chijaqꞌanh chꞌen tawet, xhi ebꞌnaj. Islebꞌanto ebꞌnaj huneꞌ qꞌap qꞌap, yanayo ebꞌnaj chꞌen ome yilo ebꞌnaj tet ebꞌnaj bꞌay qꞌoji tuꞌ.

26 Haꞌ xin yalil chꞌen oro ayko yinh chꞌen ome tuꞌ, 1,700 siclo yalil chꞌen, nanyepaxo hunteqꞌan yelawil yebꞌ hunteqꞌan chꞌen chꞌen kaw ay istohol, yebꞌ hunteqꞌan qꞌap qꞌap kajmutzꞌmunhe iqꞌbꞌil yu ebꞌnaj isreyal ebꞌnaj madianita tuꞌ, yebꞌ chꞌen uwe ayko yinh isnuqꞌ iscamello ebꞌnaj. 27 Yinh sunil chꞌen oro tuꞌ xin, iswatxꞌe yaꞌ Gedeón huneꞌ efod, yechel xilqꞌape chiyako ebꞌnaj yahawil sacerdote, yanito yaꞌ chꞌen yul iskonhobꞌ, haꞌ ton Ofra. Wal sunil ebꞌnaj Israel xin, isbꞌejkano ebꞌnaj Komam Dios, yok ebꞌnaj yinoyo isbꞌa tet huneꞌ tuꞌ. Huneꞌ chꞌen tuꞌ, okpaxo latzꞌabꞌil yinh yaꞌ Gedeón, yebꞌ yuninal.^a

28 Ebꞌnaj madianita tuꞌ okkanto ebꞌnaj yalanh yip ebꞌnaj Israel, matxatikꞌa xin yikanh isbꞌa ebꞌnaj. Yulbꞌal 40 (kawinaj) habꞌil aqꞌankꞌulal ye ebꞌnaj Israel, yet itzitzto yaꞌ Gedeón.

29 Lahwi tuꞌ, ispaxto yaꞌ Jerobaal bꞌey yatut, yaꞌ iskꞌahol yaꞌ Joás.^b 30 70 (Lahonhebꞌ iskanhwinaj) yuninal yaꞌ Gedeón, yuto kaw txꞌiꞌal yixal yaꞌ. 31 Haꞌ xin huneꞌ yixal yaꞌ ay bꞌey konhobꞌ Siquem, ay huneꞌ yuninal yaꞌ yebꞌ ix, Abimelec yako yaꞌ isbꞌihoj.

32 Kaw ichamxa yaꞌ Gedeón tuꞌ yet iskam yaꞌ, ismujlax yaꞌ yul ispantionh ismam, haꞌ ton yaꞌ Joás, bꞌey konhobꞌ Ofra bꞌay ay ebꞌnaj yikꞌal yaꞌ Abiezer.

33 Haxa yet xakamto yaꞌ Gedeón, ispohnipaxilo isbꞌa ebꞌnaj Israel yinh Komam Dios, yok ebꞌnaj yinoyo isbꞌa tet ej yechel tioxh Baal; haꞌ xin tioxh Baal-berit issayiko ebꞌnaj isdiosaloj. 34 Isnahulnhenkanto ebꞌnaj Israel tuꞌ Komam Dios Jahawil, isDiosal ebꞌnaj, Komam kolni ebꞌnaj tet ebꞌnaj ayko ishowal yinh, ebꞌnaj hoyaniko bꞌay ay ebꞌnaj. 35 Maxhtikꞌapaxo hunu tzet iskꞌulal iswatxꞌe ebꞌnaj Israel yinh yuninal yaꞌ Jerobaal, haꞌ ton yaꞌ Gedeón, ispaj selelo iskꞌulal iswatxꞌe yaꞌ yinh ebꞌnaj Israel tuꞌ.