Yet yok naj Abimelec yahawil
9
Wal naj Abimelec,a iskꞌahol yaꞌ Jerobaal to naj tzotelo tet ebꞌnaj isnoh ismiꞌ ay bꞌey konhobꞌ Siquem, yebꞌ tet sunil yikꞌal ismam ismiꞌ, yalni naj tet ebꞌnaj:2 «Kaw chinqꞌanan teyet ta chexok heyalaꞌ tet sunil ebꞌnaj ay bꞌey konhobꞌ Siquem tiꞌ; tato ekꞌbꞌalto kꞌul ta hunnhe mak chiꞌok yahawilo ebꞌnaj, sata yaqꞌni ebꞌnaj 70 (lahonhebꞌ iskanhwinaj) iskꞌahol yaꞌ Jerobaal yahawilal yibꞌanh ebꞌnaj. Nawetij tato hanhonh tiꞌ juxhtato kobꞌa, hechikꞌilto wehan,» xhi naj.
3 Yajaꞌ yu ayto yu isbꞌa ebꞌnaj yebꞌ naj Abimelec tuꞌ, yuxin yako isbꞌa ebꞌnaj yinh naj, yok ebꞌnaj ismonteno ebꞌnaj ay bꞌey Siquem tuꞌ, yunhe yaniko isbꞌa ebꞌnaj yinh naj.
4 Yinilti ebꞌnaj tuꞌ 70 (lahonhebꞌ iskanhwinaj) chꞌen melyu plata yul yatut istioxh Baal-berit, yaqꞌni ebꞌnaj chꞌen tet naj Abimelec. Yinh chꞌen melyu tuꞌ istohla naj Abimelec hunteqꞌan ebꞌnaj isah winaj, tonhe chiꞌekꞌi, yunhe yok ebꞌnaj yetbꞌiho naj, yok tzujno ebꞌnaj yinta naj. 5 Isto naj bꞌey konhobꞌ Ofra, bꞌay ekꞌlena ismam naj; haꞌ bꞌey tuꞌ xin ismaqꞌkamo naj Abimelec tuꞌ ebꞌnaj 70 (lahonhebꞌ iskanhwinaj) yuxhtaj yibꞌanh huneꞌ chꞌen chꞌen. Haxanhe xin naj Jotam kolchahi, yuto yebꞌa isbꞌa naj, haꞌ xin naj islahobꞌal iskꞌahol yaꞌ Jerobaal. 6 Lahwi tuꞌ xin iskutxbꞌaniko isbꞌa sunil anma ay bꞌey konhobꞌ Siquem yebꞌ anma ah Bet-milo, iskꞌatanh huneꞌ chꞌen chꞌen kaw txahul yul sat ebꞌnaj, huneꞌ chꞌen chꞌen tuꞌ sat huneꞌ akꞌal ayayo bꞌey Siquem; haꞌ bꞌey tuꞌ xin alaxiko naj Abimelec yahawilo yu anma sunil.
7 Hayet yabꞌenilo naj Jotam tato alaxiko naj Abimelec yahawiloj, yahto naj yinh iswiꞌ witz Gerizim, yahwi naj yinh kaw ip, yalni naj hakaꞌ tiꞌ:
«Hex ay hex bꞌey konhobꞌ Siquem tiꞌ, kaw kam cheyabꞌe tzet chiwalan,
hak tuꞌ xin chiyabꞌepaxo Komam Dios tzet cheyala.
8 Hayet hunel yoche ej te teꞌ tato ay hunu te teꞌ ok yahawil,
yuxin yal ej teꞌ tet teꞌ olivo: “Okanh jahawilojanh,” xhi ej teꞌ.
9 Istaqꞌwi teꞌ olivo: “Machoj, yuto ta chinokan heyahawiloj,
matxa chiwaqꞌan teꞌ aceite chiꞌaniko ismay Komam Dios yebꞌ ismay ebꞌnaj winaj,” xhi teꞌ.
10 Lahwi tuꞌ, yalnipaxo ej te teꞌ tuꞌ tet teꞌ higuera:
“Wal tinanh chaxhok yahawo jinhanh,” xhi ej teꞌ.
11 Istaqꞌwi teꞌ higuera hakaꞌ tiꞌ: “Machoj,
tato chinokan yahawil teyinh matxa chu waqꞌni insatan kaw kꞌul yebꞌ kaw chiꞌ,” xhi teꞌ.
12 Lahwi tuꞌ, yalnipaxo ej te teꞌ tuꞌ tet yoj teꞌ uva:
“Kata, okanh yahawilo jinhanh,” xhi ej teꞌ.
13 Istaqꞌwi yoj teꞌ uva tuꞌ hakaꞌ tiꞌ:
“Machoj, yuto ta chinokan yahawil teyinh, matxa chiwaqꞌan teꞌ vino chiꞌaqꞌni tzalaho iskꞌul Komam Dios,
yebꞌ xin waqꞌni tzalahojan iskꞌul anma,” xhi teꞌ.
14 Haxa yinh kaw istzujanilxa xin, yalni ej te teꞌ tet teꞌ txꞌix:
“Wal tinanh chachok yahawilo jinhanh,” xhi ej teꞌ.
15 Isjeni teꞌ txꞌix tuꞌ, yalni teꞌ tet ej te teꞌ:
“Tato kaw yinh sunil hekꞌul chinheyakojan heyahawiloj; katawej,
kat heyok yalanh wenheltiꞌan hesunil.
Ta mach isje hekꞌul chinokpaxojan yahawil teyinh xin,
elojabꞌto huneꞌ niman qꞌaꞌ winhan,
kat istzꞌalo teꞌ cedro ay bꞌey Líbano yu qꞌaꞌ chꞌel winhan,” xhi teꞌ txꞌix tet ej te teꞌ tuꞌ.
16 »Tinanh xin, chinqꞌambꞌehan teyet: ¿tom haꞌ isyelal chewatxꞌe yebꞌ istoholal yet cheyaniko naj Abimelec tiꞌ heyahawiloj? ¿Hakaꞌmi iskꞌulal iswatxꞌe yaꞌ Jerobaal teyinh, hakmi tuꞌ ispaj selel cheyaqꞌ tet yaꞌ yebꞌ tet yuninal yaꞌ? 17 Haꞌ inmamtuꞌan, ishin isbꞌa isto yinh howal, kexiskolnilo yul isqꞌabꞌ ebꞌnaj madianita. 18 Yajaꞌ wal hex ah konhobꞌ Siquem, xakexmeltzoko yinh yuninal inmaman, hepotxꞌni ebꞌnaj 70 (lahonhebꞌ iskanhwinaj) iskꞌahol yibꞌanh huneꞌ chꞌen chꞌen; heyaniko naj Abimelec jahawiloj, naj yunin ix ischejabꞌ inmaman, yunhem heyuxhtato hebꞌa yebꞌ naj. 19 Chiwalkanojan teyet tinanh tato kaw yeli hewatxꞌe istoholal yinh inmaman, yebꞌ yinh yuninal inmaman, kꞌulojabꞌ chexeliko yebꞌ naj Abimelec tiꞌ, kꞌulojabꞌ chiꞌelpaxiko naj yebꞌ hex. 20 Ta mach xin elojabꞌ hunu niman qꞌaꞌ yinh naj Abimelec, kat istanhtzenilo anma ay bꞌey konhobꞌ Siquem tiꞌ, yebꞌ anma ay bꞌey Bet-milo. Yebꞌ elojabꞌ hunu niman qꞌaꞌ yinh anma ah Siquem yebꞌ anma bꞌey Bet-milo, kat istanhtzenilo naj Abimelec,» xhi naj Jotam.
21 Lahwi yalni naj Jotam hunteqꞌan tzotiꞌ tiꞌ, yelkanh naj, isto naj bꞌey konhobꞌ Beer, iskankano naj bꞌey tuꞌ yuto chixiw naj tet naj Abimelec, naj yuxhta naj tuꞌ.
22 Oxebꞌ habꞌil ok naj Abimelec yahawilo ebꞌnaj Israel. 23 Lahwi tuꞌ, yaniko Komam huneꞌ kajlebꞌahil xol naj Abimelec yebꞌ anma ay bꞌey Siquem, yu ismeltzoko ebꞌnaj manhkꞌomal tet naj; 24 yunhe istohlan naj Abimelec iskamikal ebꞌnaj 70 (lahonhebꞌ iskanhwinaj) yuxhta ispotxꞌkamoj, yebꞌ yunhe istohlanpaxo ebꞌnaj ah Siquem tuꞌ, yuto kolwa ebꞌnaj yinta naj yet ispotxꞌnikamo naj yuxhtaj. 25 Haꞌ ebꞌnaj ah Siquem tuꞌ ischejto ebꞌnaj hunteqꞌan ebꞌnaj yebꞌano isbꞌa istiꞌla bꞌeh chiꞌekꞌ yinh iswiꞌ witz, chiyelqꞌanilo ebꞌnaj yijatz anma chiꞌekꞌ yul bꞌeh iskawilal konhobꞌ tuꞌ. Yabꞌen xin naj Abimelec huneꞌ tuꞌ.
26 Ay huneꞌ tzꞌayik tiꞌ xin apni naj Gaal, iskꞌahol naj Ebed yebꞌ ebꞌnaj yuxhtaj bꞌey Siquem, iskan naj kꞌulal yul sat ebꞌnaj ay bꞌey tuꞌ. 27 Yet hunel tuꞌ, elto ebꞌnaj xol tzꞌunubꞌ yinilo ebꞌnaj sat teꞌ uva, iswatxꞌen ebꞌnaj teꞌ vino yinh teꞌ, yekꞌtzen ebꞌnaj huneꞌ niman qꞌinh, yichiko ebꞌnaj iswaꞌi yebꞌ yukꞌni vino yul yatut istioxh, chistzꞌaktiꞌnhen ebꞌnaj naj Abimelec.
28 Yalni naj Gaal, iskꞌahol naj Ebed hakaꞌ tiꞌ:
«¿Tzet yelapno ye naj Abimelec tuꞌ, heyalni? Naj tuꞌ iskꞌahol yaꞌ Jerobaal ye naj, wal ischejabꞌ naj xin, haꞌ ton naj Zebul. Haxa hanhonh ah Siquem tiꞌ, ¿tzet jehi yuxin chonhok ischejabꞌo naj? Wal xin haꞌ tet naj Hamor chonhok yijemoj, yuto haꞌ naj watxꞌenkanh konhobꞌ Siquem tiꞌ. Yuxin jiqꞌawelo kobꞌa yul isqꞌabꞌ naj Abimelec tiꞌ. 29 Tato haninan ayinikojan heyahawiloj, kaw yinh anhemi chintanhtzelojan naj Abimelec. Chiwalnihan tet naj: “Kutxbꞌako ebꞌnaj hasoldado, kat hatita, kat jaqꞌlen howal,” kinchimihan tet naj,» xhi naj.
30 Hayet yabꞌen naj Zebul, naj ayko yalkalilo konhobꞌ tuꞌ, yinh tzet yal naj Gaal, istit ishowal naj. 31 Yinh anhe xin yato naj hunteqꞌan ischejabꞌ yalno tet naj Abimelec yinh ewantajil hakaꞌ tiꞌ: «Naj Gaal, iskꞌahol naj Ebed, xahul naj yebꞌ ebꞌnaj yuxhta bꞌey Siquem tiꞌ, lanhan xin yok ebꞌnaj aqꞌokꞌule tet anma yunhe ismeltzoko tawinh. 32 Yuxin ahanhwanoj, titanh yinh aqꞌbꞌalil tiꞌ yebꞌ ebꞌnaj hasoldado, kat heyebꞌan hebꞌa yintalto konhobꞌ tiꞌ. 33 Haxa yet chisajbꞌolo xin, yet chiꞌahilo tzꞌayik kat hawaniko howal yinh konhobꞌ tiꞌ; haxa yet chiꞌelto naj Gaal yebꞌ issoldado yaqꞌle howal yebꞌ hex, hachxa chawil yinh tzet chawute naj,» xhito naj Zebul tuꞌ.
34 Hak tuꞌ xin yu istit naj Abimelec yinh aqꞌbꞌalil yebꞌ issoldado, kanhebꞌ xin majan yute isbꞌa ebꞌnaj, yebꞌan isbꞌa ebꞌnaj yinhla ishoyanil konhobꞌ Siquem. 35 Haxa yet yelto naj Gaal istiꞌ ispultahil konhobꞌ tuꞌ, yelti naj Abimelec yebꞌ issoldado bꞌay ebꞌabꞌil isbꞌa.
36 Hayet yilni naj Gaal tuꞌ ebꞌnaj, yalni naj tet naj Zebul hakaꞌ tiꞌ:
—Ilkꞌanabꞌi, lanhan yayilo hunteqꞌan ebꞌnaj soldado yinhla witz tuꞌ lah, xhi naj. Istaqꞌwi naj Zebul:
—Hakpax tuꞌ bꞌey wonhan chihal-lax ismuxuk txꞌo txꞌotxꞌ ay ebꞌnaj chiꞌayiloj. Aypaxo hunmajanxa ebꞌnaj ayko yul isbꞌehal teꞌ hih yet ebꞌnaj ahbꞌelom, xhi naj.
38 Yalni naj Zebul tet naj:
—Yajaꞌ hach tiꞌ, hawal hakaꞌ tiꞌ: “¿Mak anmahil naj Abimelec yuxin chonhok ischejabꞌo naj?” kachi. Wal xin haꞌ ebꞌnaj issoldado naj tiꞌ bꞌay chaxhbꞌuchwahi; yuxin elanhto yinh howal yinh ebꞌnaj tinanh, xhi naj Zebul.
39 Lahwi tuꞌ, yelti naj Gaal yijbꞌano ebꞌnaj ay bꞌey Siquem, yaqꞌni howal yebꞌ naj Abimelec. 40 Yajaꞌ xin istzumbꞌe naj Abimelec naj Gaal, yelkanh naj tet naj. Yul ispultahil konhobꞌ tuꞌ, kaw hantanhe mak kami. 41 Lahwi tuꞌ, ismeltzo naj Abimelec bꞌey konhobꞌ Aruma. Haxa naj Zebul xin tzumbꞌenilo naj Gaal yebꞌ ebꞌnaj yuxhta naj bꞌey Siquem yinh hunelnhe.
42 Yinh hunxa tzꞌayikal yabꞌenilo naj Abimelec tato chiꞌelti ebꞌnaj ah Siquem xol munil. 43 Yuxin iskutxbꞌayo naj issoldado yinh anhe, ispohnayo naj ebꞌnaj yinh oxebꞌ majan, yebꞌanto isbꞌa ebꞌnaj xol ismunil ebꞌnaj ah Siquem. Haxa yet yilni ebꞌnaj yelilo ebꞌnaj ah Siquem yul ispultahil konhobꞌ, yelti ebꞌnaj bꞌay ebꞌabꞌil isbꞌa tuꞌ, yaniko ebꞌnaj howal yinh ebꞌnaj. 44 Tzujan tuꞌ xin isto naj Abimelec yebꞌ hunmajan ebꞌnaj soldado tzujan yinta naj, ismajcheꞌ istiꞌ ispultahil konhobꞌ, haxa kabꞌ majanxa ebꞌnaj soldado xin haꞌ aniko howal yinh ebꞌnaj Siquem ayko xol munil, ispotxꞌnikamo ebꞌnaj ebꞌnaj tuꞌ. 45 Sunilbꞌal tzꞌayik yako naj Abimelec howal yinh konhobꞌ tuꞌ, ispotxꞌnikamo naj sunil anma. Yuchkꞌanayo naj huneꞌ konhobꞌ tuꞌ, istixhnikanayo naj atzꞌam yibꞌanh.b
46 Hayet yabꞌenilo anma ay bꞌey Migdal-Siquem tato istanhtzelo naj Abimelec konhobꞌ Siquem, isto anma tuꞌ yebꞌano isbꞌa yul yatut tioxh chiyij isbꞌi Berit.c 47 Hayet yabꞌenilo naj Abimelec tato kutxan anma bꞌey Migdal-Siquem, 48 isto naj yebꞌ sunil issoldado bꞌey witz Salmón. Istzokꞌnilo naj isqꞌabꞌ huneꞌ te teꞌ yu huneꞌ chꞌen eche, yanahto naj teꞌ yibꞌanh iswixikꞌ, yalni naj tet sunil ebꞌnaj soldado ta hak tuꞌ chutepaxo ebꞌnaj yinh anhe.
49 Yuxin sunil ebꞌnaj soldado tzokꞌnipaxilo isqꞌabꞌ te teꞌ, yok tzujno ebꞌnaj yinta naj Abimelec masanta apni ebꞌnaj bꞌey torre yebꞌ yatut istioxh ebꞌnaj; ishoybꞌaniko ebꞌnaj isqꞌabꞌ teꞌ yinh, lahwi tuꞌ xin yaniko ebꞌnaj qꞌaꞌ yinh teꞌ. Hak tuꞌ xin yu iskam sunil anma yul huneꞌ torre; aymi hunu mil ebꞌnaj winaj yebꞌ ebꞌix ix.d
50 Lahwi tuꞌ xin, isto naj Abimelec yanoko howal yinh konhobꞌ Tebes. Ishoynayo ebꞌnaj konhobꞌ tuꞌ, yokto ebꞌnaj yul. 51 Yul yiktabꞌal konhobꞌ tuꞌ ay huneꞌ niman nha kaw nahat yekanh istel bꞌay chiskol isbꞌa anma. Isto sunil anma yebꞌano isbꞌa bꞌey tuꞌ, kaw xin kꞌul yu ismajchenkano anma ispultahil huneꞌ nha tuꞌ, yahto anma yibꞌanh yakꞌalil iswiꞌ nha tuꞌ. 52 Yapni naj Abimelec yanoko howal yinh anma, ishitziko naj istiꞌ ispultahil huneꞌ niman nha tuꞌ, lanhanxa yaniko naj qꞌa yinh. 53 Ay xin huneꞌ ix ix bꞌejtzonayti ischꞌenal chꞌen molino, yayilo chꞌen yibꞌanh iswiꞌ naj Abimelec tuꞌ, ispohto iswiꞌ naj yu chꞌen. 54 Kaw yinh anhe xin yawte naj Abimelec huneꞌ naj chiꞌinikꞌo tzet chaqꞌbꞌalnhe naj yinh howal, yalni naj tet naj:
«Ihti hawespada yul yatut, kat kinhapotxꞌnikamojan; yuto mach chiwochehan tato chihal-laxi tato haꞌ huneꞌ ix ix kinaqꞌni kamojan,» xhi naj. Hak tuꞌ yu yinahti naj yespada, ishopchanikto naj chꞌen yul iskꞌul naj, iskam naj xin. 55 Hayet yilni ebꞌnaj israelita, issoldado naj Abimelec tuꞌ ta kam naj, ispaxto ebꞌnaj yatut.
56 Hak tuꞌ yu ispajtzen Komam Dios istxꞌojal iswatxꞌe naj Abimelec yinh ismam, yuto ismaqꞌkamo naj 70 (lahonhebꞌ iskanhwinaj) yuxhtaj. 57 Ispajtzenpaxo Komam Dios tet ebꞌnaj ah Siquem yu istxꞌojal iswatxꞌepaxo ebꞌnaj. Hak tuꞌ yu yijni isbꞌa tzꞌaktiꞌ yalkanilto naj Jotam yibꞌanh ebꞌnaj, naj iskꞌahol yaꞌ Jerobaal.