39
Yalnipaxo Komam hakaꞌ tiꞌ:«¿Hawohtami tzettaj tzꞌayikal chipitzkꞌa yunin noꞌ xoltelajil chiw?
¿Hawohtami tzet chu ispitzkꞌa yunin noꞌ miꞌe sajche?
2 ¿Hawohtami hayebꞌ ixahaw chiyijikꞌo noꞌ yunin?
¿hawohtami xin tzet ej tzꞌayikal chꞌay yunin noꞌ?
3 Chiskꞌonhbꞌa isbꞌa noꞌ yet chipitzkꞌa yunin noꞌ,
kat yekꞌayo isyaꞌil yet xapitzkꞌa yunin noꞌ.
4 Chiyiqꞌnikanh yip yunin noꞌ tuꞌ kat ischꞌibꞌkanh noꞌ yu teꞌ telaj,
kat isto noꞌ, matxa xin chimeltzo noꞌ iskꞌatanh ismiꞌ.
5 ¿Mak bꞌejtzonkano noꞌ xoltelajil burro?
¿Mak inikanilo yet istiꞌ noꞌ?
6 Haninan walkanojan bꞌay chiꞌeh noꞌ,
sat txꞌotxꞌ desierto satla cheqꞌanh bꞌay machi anma chiꞌekꞌi.
7 Mach chiyoche noꞌ iswejcha anma yulaj konhobꞌ,
machi mak chu yaniko noꞌ yinh munil.
8 Haꞌ bꞌay kaw ewan, haꞌ tuꞌ chiꞌekꞌ noꞌ lowoj,
chiꞌekꞌ noꞌ issayaꞌ telaj islobꞌ.
9 ¿Chimyu isyijen noꞌ búfalo tzet chawala,
kat yokto noꞌ yul yatut noꞌ cheh?
10 ¿Chimyu hawaniko teꞌ yibꞌanh isnuqꞌ noꞌ kat isnhikꞌnikꞌo noꞌ yinh hatꞌoko yu ishajni noꞌ txꞌotxꞌ yinh istxolal? maka
¿tom chu yok tzujno noꞌ tawinta ishotxni txꞌotxꞌ iswatxꞌen hamunil?
11 ¿Tom yu kaw ay yip noꞌ yuxin chikawxi hakꞌul yinh noꞌ?
maka ¿kat xin hataqꞌenpaxo hamunil tet noꞌ?
12 ¿Chimkawxi hakꞌul yinh noꞌ iskolwa tawinh,
iskutxbꞌankanh sat hatrigo kat istenbꞌankanh noꞌ ixim bꞌay chixanhlaxilti sat ixim?
13 ¿Tom hach hawatxꞌe isxikꞌ noꞌ pavo real kaw kꞌulchꞌan jilni?
Maka ¿tom hach hawatxꞌe xil yebꞌ isxikꞌ noꞌ avestruz?
14 Haꞌ xol arena chisbꞌejkano noꞌ ishos,
kat isqꞌaxnakanh ishos noꞌ yu yoj tzꞌayik.
15 Machi xin yok noꞌ yinh tato ay mak chixanhnayo ishos noꞌ,
maka tato ay no noqꞌ chayo yoj yibꞌanh.
16 Machi yok noꞌ yinh nixhte yunin chꞌelti yul ishos tuꞌ,
hakaꞌto mach yunino noꞌ.
Machi yelapno yul sat noꞌ waxanhka machi elti yunin noꞌ yul ishos tuꞌ.
17 Yuto mach aqꞌbꞌilokano ishelanil noꞌ wuhan,
yebꞌ xin machipaxo isnabꞌal noꞌ aqꞌbꞌilkano wuhan.
18 Yajaꞌ yet chꞌok noꞌ yinh anhe sat txꞌotxꞌ,
kat istzebꞌi noꞌ yinh noꞌ cheh yebꞌ yinh mak ayahto yibꞌanh noꞌ.
19 ¿Tom hach chawaqꞌpaxo yip noꞌ cheh?
¿tom hach chawatxꞌe xil istel isnuqꞌ noꞌ yelawiloj?
20 ¿Tom hach chawaqꞌ bꞌilokanh noꞌ yet chꞌah tꞌujla noꞌ hakaꞌ yah tꞌujla noꞌ qꞌul?
Wal xin kaw chixiw anma yabꞌen ishorla istxam noꞌ.
21 Chishot noꞌ txꞌo txꞌotxꞌ yu yoj,
yu chitzala noꞌ yinh yip, mach chixiw noꞌ isto yinh howal.
22 Chitzebꞌi noꞌ yinh mak chixubꞌten noꞌ yuto machi xiw noꞌ,
mach chiꞌok tꞌanhno noꞌ yinh chꞌen espada yu mach chixiw noꞌ tet chꞌen.
23 Haꞌ yibꞌanh noꞌ tuꞌ xin chiqꞌanhahto chꞌen yatut litꞌ,
yebꞌ chꞌen lanza yebꞌ chꞌen flecha.
24 Wal xin haꞌ yinh sunil yip yebꞌ ishowal noꞌ chishot noꞌ txꞌo txꞌotxꞌ;
matxa chislinhbꞌa isbꞌa noꞌ yet chiꞌoqꞌ chꞌen trompeta.
25 Hayet chiyabꞌen noꞌ yoqꞌ chꞌen trompeta tuꞌ kat yoqꞌpaxo noꞌ.
Nahatto ay noꞌ kat yabꞌen noꞌ bꞌay ay howal;
chiyabꞌenpaxo noꞌ yul isnuqꞌ ebꞌnaj chiꞌijbꞌali, yebꞌ xin ebꞌnaj chꞌel yaw isto yinh howal.
26 ¿Tom yu hahelanil yuxin chꞌekꞌ noꞌ kꞌukꞌum satkanh,
chislebꞌanto noꞌ xikꞌ isto bꞌey sur?
27 ¿Tom hach chachej noꞌ tꞌiw isto nahat satkanh,
kat iswatxꞌenahto yatut bꞌay kaw nahat yekantoj?
28 Chꞌehikꞌo noꞌ yinhahto iswiꞌ chꞌen pahaw,
yebꞌ xin yinhahto iswiꞌ chꞌen nimeta chꞌen.
29 Hata tuꞌ chimujlayti noꞌ yu issayni tzet chislo,
yuto kaw nahatta chꞌapni ismujlubꞌal noꞌ.
30 Haꞌ bꞌay chikam no noqꞌ yu ismiꞌ noꞌ,
haꞌ tuꞌ chukꞌ noꞌ nixhte tuꞌ ischikꞌil noꞌ,» xhi Komam.