40
Ispajtzen Komam Jahawil tet yaꞌ Job, yalni Komam hakaꞌ tiꞌ:
2 «¿Haꞌ mak chisteyele isbꞌa yebꞌ hinan, Hanin Kaw Aykano Wiptiꞌan,
aymi ishelanil? Haꞌ mak chꞌok aqꞌokꞌule winhan,
ispajtzehabꞌ tzet chinqꞌambꞌetiꞌan,» xhi Komam.
3 Istaqꞌwi yaꞌ Job tet Komam Jahawil, yalni yaꞌ hakaꞌ tiꞌ:
4 «Hanintiꞌan machi welapnojan, ¿tzet chu intaqꞌwihan tawet?
Chinmajche intiꞌan yu inqꞌabꞌan.
5 Hunel, kayelnhe inpajtzehan tawet,
lahwi tuꞌ wokkano tuknojan, matxa tzet wal walnihan,» xhi yaꞌ Job.
Isyelo isbꞌa yip Komam Dios
6 Istaqꞌwipaxo Komam Jahawil tet yaꞌ Job xol huneꞌ niman kajtuxkum, yalni hakaꞌ tiꞌ:
7 «Wal tinanh xin kaw chawute habꞌa,
kaw kꞌul chu haximniko hatxꞌambꞌal yinh hawiktaj hakaꞌ winaj,
yuto ay tzet chinqꞌambꞌehan tawet, chawaqꞌni ispaj wetan.
8 ¿Chimhalinhbꞌa habꞌa chawalni tato mach toholo tzet chiwalan?
¿Chimkaxhok aqꞌokꞌule winhan yunhe hakan kꞌulal?
9 ¿Tom lahan yip haqꞌabꞌ hakaꞌ yip inqꞌabꞌan?
¿Tom lahan isbꞌili yul hanuqꞌ hakaꞌ yul innuqꞌan?
10 Wal tinanh xin yelo hawip yebꞌ hawelapnoj;
ako isqꞌaqꞌal hamay yebꞌ hakꞌulchꞌanil hakaꞌ hunu xilqꞌape.
11 Ayo hahowal yibꞌanh ebꞌnaj kaw chiyikanh isbꞌa,
kat hawaqꞌni ekꞌoyaꞌ yanma ebꞌnaj.
12 Iyo sunil mak kaw loloꞌ chute isbꞌa,
kat hatanhtzenilo anma txꞌoj bꞌay aya.
13 Chamujni sunil ebꞌnaj xol pojoj,
chamajchen sat ebꞌnaj xol qꞌejholo.
14 Yinh hakaꞌ tuꞌ, hakinpax tuꞌan chiwalan tawet tato haꞌ yip hawatxꞌqꞌabꞌ chachkolni.
15 Chisje hatxumni yinh noꞌ behemot tinanh,a haninan watxꞌenhe noꞌ,
hakaꞌ yu kach inwatxꞌenan, haꞌ noꞌ tuꞌ telaj chislo noꞌ hakaꞌ noꞌ wakax.
16 Haꞌ noꞌ behemot tuꞌ kaw aykano yip istel yichinh noꞌ,
aypaxo yip iskꞌul noꞌ.
17 Chisbꞌile noꞌ isnhe hakaꞌ isbꞌili isqꞌabꞌ teꞌ cedro,
kaw chembꞌil iswatxꞌebꞌanil istxꞌanhal noꞌ yinh isbꞌul.
18 Haꞌ isbꞌajil noꞌ kaw aykano yip hakaꞌ chꞌen bronce,
haxa yoj noꞌ lahan hakaꞌ chꞌen hierro.
19 Wal noꞌ tuꞌ kaw kꞌaybꞌalkꞌule yil-lax xol sunil no noqꞌ watxꞌebꞌil yu Komam Dios,
hanhechꞌan Komam chu ishitziko iskꞌatanh noꞌ yebꞌ chꞌen espada.
20 Haꞌ satla witz bꞌay chisajchi no noqꞌ,
ha tuꞌ chichꞌibꞌ telaj chislo noꞌ.
21 Chꞌay kotno noꞌ yalanh yenhel te teꞌ,
bꞌay ewan xolaj teꞌ ah bꞌay ay ha haꞌ.
22 Chiyenhelnhe isbꞌa noꞌ yalanh teꞌ qꞌebꞌtaj,
yebꞌ xolaj teꞌ sauce,b istiꞌla ha haꞌ.
23 Waxanhka chichꞌibꞌkanh ha haꞌ kat ismalto haꞌ, mach chixiw noꞌ,
waxanhka chiꞌahapno haꞌ Jordán yinh istiꞌ noꞌ matzet chal iskꞌul noꞌ.
24 Aymi hunu mak chu istzabꞌnayo noꞌ,
kat ischꞌotnilti isbꞌaqꞌ sat noꞌ, maka
¿aymi hunu mak chu yanilto txꞌanh lasu yul istxam noꞌ?