41
»Hakpax tuꞌ noꞌ leviatán,a ¿chimyu hawinahti noꞌ yu chꞌen anzuelo?Maka ¿chimyu haximniko hunu txꞌanh yinh yaqꞌ noꞌ kat hawinahti noꞌ?
2 ¿Chimyu halekꞌnayo istxam noꞌ yu txꞌanh lasu? yebꞌ xin
¿chimyu haholchanpax yalanh istiꞌ noꞌ yu hunu chꞌen chꞌen lokich yehi, qꞌaqꞌiꞌ istxam?
3 ¿Tom chꞌay sat noꞌ tawet yunhe istzꞌay hakꞌul yinh noꞌ? maka
¿tom chissay noꞌ tzotiꞌ kꞌulchꞌan yok tawet yu hasubꞌcha yu noꞌ?
4 ¿Tom ay tzet istꞌinhbꞌa noꞌ yebꞌ hach yunhe yok noꞌ isyijeno tzet chawal yinh sunilbꞌal ej tiempo?
5 ¿Chimyu hasajchiko yinh noꞌ hakaꞌ chu hatzalako yinh hunu noꞌ chꞌik,
maka chimyu haxekbꞌan noꞌ yu issajchi hakutzꞌin yebꞌ noꞌ?
6 ¿Chimeliko noꞌ yu ebꞌnaj chitxonhwi kat iskꞌuxnayto ebꞌnaj noꞌ?
¿Chimyu ispohnikꞌo ebꞌnaj chitxonhwi noꞌ yinh?
7 ¿Chimyu hapolnayo istzꞌumal isnimanil noꞌ yu chꞌen cuchillo?
¿chimyu yekꞌ chꞌen arpón yul iswiꞌ noꞌ hakaꞌ noꞌ kay?
8 Tato chawayo haqꞌabꞌ yibꞌanh noꞌ, haꞌ xin ishowal noꞌ chanatij,
hak tuꞌ xin matxa bꞌaqꞌinh chatzabꞌ noꞌ hunelxa.
9 Ta ay huneꞌ mak chiqꞌaytzeniko noꞌ yinh, chitzebꞌi anma yinh huneꞌ anma tuꞌ,
yuto haꞌ mak chitꞌanhxiko yinh noꞌ chipáxilo yip yu xiwkilal.
10 Machi hunu mak tiꞌ chishin isbꞌa istzotzeniko noꞌ. Hajxam hinan,
¿tom ay hunu mak chu islinhbꞌaniko isbꞌa insatajan?
11 ¿Tom ay hunu mak xaꞌaqꞌni hunu tzet ye tuꞌ wetan huneloj,
kat intohlanan tet? Wal xin haꞌ sunil tzet ay yalanh satkanh wetan yehi.
12 Mach chinbꞌejan intzotelan yinh noꞌ leviatán,
yuto kaw aykano yip noꞌ, machi hunuxa no noqꞌ hakaꞌ noꞌ.
13 ¿Mak chiyu yinilo istzꞌumal isnimanil noꞌ?
¿Mak hunu tiꞌ chihitziko iskꞌatanh noꞌ yebꞌ iscoraza yu iskolni isbꞌa tet noꞌ?
14 Machi hunu mak chu ishajni istiꞌ noꞌ yuto kaw xiwkilal yil-lax yeh noꞌ.
15 Haꞌ istzꞌumal yichinh noꞌ lahan hakaꞌ chꞌen escudo,
ayko yinh istxolal kaw tzabꞌlebꞌil isbꞌa, kaw ay yip hakaꞌ chꞌen chꞌen.
16 Kaw hunbꞌabꞌil isbꞌa ispetxal yinh noꞌ,
kaw mach chu yokto jaqꞌeqꞌ bꞌay chishunbꞌa isbꞌa.
17 Tzakꞌlebꞌil isbꞌa ispetxal istzꞌumal noꞌ tuꞌ yinh yetbꞌi,
kaw hunbꞌabꞌil isbꞌa, yuxin mach chu ispohni isbꞌa.
18 Hayet chꞌah ishatixh noꞌ lahan hakaꞌ yet chijepla kꞌuh,
haxa isbꞌaqꞌ sat noꞌ chitzejla hakaꞌ istzejla yoj tzꞌayik yet chꞌahiloj.
19 Haꞌ yul istiꞌ noꞌ chiꞌelti tzꞌitqꞌaꞌ yebꞌ nimeta xaj qꞌaꞌ.
20 Chiꞌelilo nhubꞌ yul istxam noꞌ hakaꞌ yah xobꞌ hunu xi yet lanhan ishuji yibꞌanh qꞌaꞌ.
21 Hayet chiꞌelti xobꞌ istiꞌ noꞌ,
chitzuji qꞌaꞌ yinh tzaqꞌaqꞌ, haxa yul istiꞌ noꞌ chiꞌelti xaj qꞌaꞌ.
22 Haꞌ istel isnuqꞌ noꞌ kaw aykano yip, sunil mak chiꞌilni noꞌ chixiw tet noꞌ.
23 Haꞌ ischibꞌehal noꞌ kaw kaw, machi hunu tzet ye tuꞌ chiqꞌaxponikꞌto yul,
kaw kaw hakaꞌ chꞌen chꞌen.
24 Haꞌ yanma noꞌ kaw kaw hakaꞌ hunu chꞌen chꞌen,
kaw ay yip hakaꞌ chꞌen kaꞌ.
25 Kaw nime noqꞌkano noꞌ, haꞌ ebꞌnaj winaj kaw ay yip,
chipax ebꞌnaj yintaj yu chipáxilo yip yu xiwkilal yet chibꞌilikanh noꞌ.
26 Tato ay hunu mak chitzujnayo noꞌ machi qꞌoji yespada,
maka islanza, maka islitꞌ maka chꞌen nixhte qꞌojbꞌal lanza yinh noꞌ.
27 Hakaꞌ chꞌen hierro, lahan chꞌen hakaꞌ teꞌ chꞌim yul sat noꞌ;
haxa chꞌen bronce lahan chꞌen hakaꞌ teꞌ qꞌanaj teꞌ yul sat noꞌ.
28 Mach chꞌelkanh noꞌ tet teꞌ litꞌ,
matzet chalpaxo iskꞌul noꞌ tet qꞌojbꞌal ula, yuto lahan hakaꞌ teꞌ chꞌim yul sat noꞌ.
29 Haꞌ sunil chꞌen chꞌen yet howal lahan chꞌen hakaꞌ istajinal xaj te teꞌ yul sat noꞌ,
chibꞌuchwa noꞌ yabꞌen isqꞌanhi chꞌen nixhte qꞌojbꞌal lanza.
30 Chikankano isholanil txꞌo txꞌotxꞌ yu isqꞌaqꞌiꞌal yalanh iskꞌul noꞌ,
yet chishatxnikꞌo isbꞌa noꞌ sat txꞌotxꞌ.
31 Chihujikanh haꞌ mar yu noꞌ hakaꞌ ishuji hunu xi,
maka hakaꞌ chu yuji hunu xi bꞌay chiwatxꞌelax anh kaw xuqꞌ sam.
32 Sajhoponhe jilni ha haꞌ bꞌay chiꞌekꞌ noꞌ,
hakaꞌ xil wiꞌe kaw saj, hakxanhe tuꞌ jilni.
33 Machi hunu tzet ay sat txꞌo txꞌotxꞌ chisje islahbꞌan isbꞌa yebꞌ noꞌ;
huneꞌ noꞌ tiꞌ mach yohtajo noꞌ isxiwi, yu hak tuꞌ yu inwatxꞌenkanojan noꞌ.
34 Haꞌ sunil tzet kaw ay yelapnoj matzet chalilo yul sat noꞌ,
yahawil yukaniko noꞌ xol sunil noꞌ howla noqꞌ,» xhi Komam Dios Jahawil.