Yaꞌ Job yohtanhelo yaꞌ yitzꞌatil iswiꞌ Komam Dios
42
Istaqꞌwi yaꞌ Job tet Komam Jahawil, yalni yaꞌ:2 «Hanintiꞌan wohtajan tato sunil chisje hawu,
machi hunu tzet chꞌekꞌ yinh isnabꞌal anma chu yebꞌanilo tawet.
3 “¿Mak anmahil mach isnabꞌal, aniko ishelanil Komam Dios xol qꞌejholo?”
Hak tuꞌ yu intzotelan, yuto mach intxuman tzet walan;
ay tzetaj ye tuꞌ tiꞌ kaw kꞌaybꞌalkꞌule yoki, maxhtikꞌa txumcha wuhan.
4 Hach hawal wetan hakaꞌ tiꞌ: “Abꞌe tzet chiwalan, yuto chintzotelan tawet,
ay tzet tiꞌ chinqꞌambꞌehan tawet, chawaqꞌni ispaj wetan,” kachi.a
5 Hayet yalanhto tonhe chiwabꞌehan habꞌinahi,
yajaꞌ wal tinanh xin haꞌ kaw isbꞌaqꞌ insatan chachilni.
6 Yuxin chichiwa inkꞌulan winhan;
chinaytzꞌonhnojan xol pojoj yebꞌ xol tanh tiꞌ yu isnahni isbꞌa inkꞌulan,» xhi yaꞌ Job.b
7 Haxa yet lahwi yalnikano Komam Jahawil hunteqꞌan tzotiꞌ tuꞌ tet yaꞌ Job, yalni Komam tet naj Elifaz, naj temanita hakaꞌ tiꞌ: «Kaw ayti inhowalan tawinh yebꞌ yinh kawanh ebꞌnaj hawetbꞌi, yuto machi heyalilo istoholal winhan hakaꞌ yalni yaꞌ Job, inchejabꞌtiꞌan. 8 Wal tinanh xin iweto hujkꞌonho noꞌ wakax yebꞌ hujkꞌonho noꞌ meꞌ, kat heto iskꞌatanh yaꞌ Job inchejabꞌan, haꞌ yaꞌ chiꞌaniko noꞌ xahanbꞌalil yinh hemul, kat istxahli yaꞌ teyinh, yuto yinh kaw yeli chiwabꞌehan istxah yaꞌ Job tuꞌ, hak tuꞌ xin matxa chiwayojan isyaꞌtajil teyibꞌanh yu mach toholo yu hetzotel winhan, hakaꞌ yu yaꞌ Job inchejabꞌan,» xhi Komam.
9 Hak tuꞌ yu isto naj Elifaz, naj temanita, yebꞌ naj Bildad, naj suhita yebꞌ naj Zofar, naj naamatita iskꞌatanh yaꞌ Job, isyijen ebꞌnaj tzet yal Komam Jahawil, yabꞌen Komam istxah yaꞌ Job tuꞌ.
Meltzo isqꞌalomal yaꞌ Job hunelxa
10 Lahwi istxahlikano yaꞌ Job yinh ebꞌnaj yamigo, yinilo Komam Jahawil isyaꞌtajil yibꞌanh yaꞌ. Yaqꞌni meltzoho Komam isyaxil tet yaꞌ Job hunelxa, kaw xin kayelto ekꞌbꞌal isyaxil ischah yaꞌ sata yet bꞌabꞌelal. 11 Yul ebꞌnaj yuxhta yaꞌ Job yebꞌ ebꞌix yanabꞌ yaꞌ ilwal yinh, yulpaxo ebꞌnaj ohtanhe yaꞌ; iswaꞌ ebꞌnaj iskꞌatanh yaꞌ yul yatut, istzꞌay iskꞌul ebꞌnaj yinh yaꞌ, yok ebꞌnaj yaqꞌno yaqꞌlobꞌal iskꞌul yaꞌ yu sunil isyaꞌtajil ay yibꞌanh yaꞌ yu Komam Jahawil. Issahni ebꞌnaj tuꞌ hunun chꞌen plata yebꞌ chꞌen jolqꞌabꞌ oro tet yaꞌ Job.
12 Yanayo Komam Jahawil isyaxil yibꞌanh yaꞌ Job, kaw xin ekꞌbꞌal isyaxil ischah yaꞌ sata yet bꞌabꞌelal. 14 Kanhlahonhebꞌ mil ismeꞌ yaꞌ, wajebꞌ mil iscamello yaꞌ, huneꞌ mil noꞌ wakax katakꞌonh yiqꞌni isbꞌa yinh munil, yok huneꞌ mil noꞌ burro. 13 Ispitzkꞌa hujwanh iskꞌahol yaꞌ yok oxwanh iskutzꞌin yaꞌ. 14 Haꞌ ix bꞌabꞌel Jemima isbꞌi ix, ix iskabꞌ Cesia isbꞌi ix, haxa ix yox Keren-hapuc isbꞌi ix. 15 Machi hunu ebꞌix ix kaw kawla ix sat txꞌo txꞌotxꞌ hakaꞌ ebꞌix iskutzꞌin yaꞌ Job tuꞌ. Yaqꞌni yaꞌ Job ismajul iskutzꞌin tuꞌ yinta ebꞌnaj iskꞌahol.