5 Haxa yet yekꞌto hunteqꞌan tzꞌayik tuꞌ xin, yekꞌtzenpaxo naj rey Asuero hujebꞌxa tzꞌayik qꞌinh bꞌey yamaqꞌil palacio bꞌay ay teꞌ kaj, yawten naj anma ay yul konhobꞌ Susa, iscapital ej konhobꞌ tuꞌ. Sunil anma awtelaxi, anma ay yelapnoj yebꞌ anma machi yelapnoj. 6 Haꞌ bꞌey huneꞌ yamaqꞌil tuꞌ aykanh qꞌap bandera saj jilni yebꞌ yax yebꞌ yaxtzꞌantzꞌonhe, tꞌunhan qꞌap yinh txꞌanh lino yebꞌ yinh txꞌanh púrpura kajmutzꞌmunhe, haꞌ yargoyahil qꞌap tuꞌ plata, haꞌ pilal bꞌay ximbꞌilkanh qꞌap mármol. Aypaxiko chꞌen oro yebꞌ chꞌen plata yinhla xhila, haxa sata yamaqꞌil tuꞌ xin ayayo chꞌen pórfido, chꞌen mármol, chꞌen alabastro yebꞌ chꞌen jacinto. 7 Haꞌ vaso chiꞌoknikoj nabꞌa oro, nananta xin jilni hunun vaso tuꞌ, kaw xin niman vino aqꞌlax yukꞌuꞌ ebꞌnaj kutxaniko tuꞌ, hakaꞌtikꞌa el yinh iskꞌul naj rey tuꞌ, haꞌ vino alaxiko tuꞌ, vino kaw kꞌul. 8 Yajaꞌ yal naj rey chejbꞌanile tet ebꞌnaj chiꞌanikꞌo vino, tato ay mak mach chisje yukꞌuꞌ vino, mach chilanhlax yukꞌni, yuto hak tuꞌ yute yalni naj tet ebꞌnaj yilomal yatut, yuxin haꞌ tzet yoche iskꞌul hunun ebꞌnaj haꞌ yij isbꞌa.

9 Hakpax tuꞌ ix reina Vasti, yekꞌtzepaxo ix qꞌinh yebꞌ yet ixal bꞌey yatut naj rey Asuero.

10 Haxa yet hujebꞌxa tzꞌayik yichi qꞌinh, yet kaw xatzala yanma naj rey Asuero yu vino, ischejnito naj hujwanh ebꞌnaj eunuco chimunla yul ispalacio, haꞌ ton naj Mehumán, naj Bizta, naj Harbona, naj Bigta, naj Abagta, naj Zetar, yebꞌ naj Carcas, 11 isto ebꞌnaj yinoti ix reina Vasti sata naj Asuero tuꞌ yebꞌ iscorona toxanhe chitzejtzoni, yu yilni konhobꞌ yebꞌ ebꞌnaj yahaw konhobꞌ iskꞌulchꞌanil ix, yuto haꞌ ix reina Vasti tuꞌ kaw kawla ix ix. 12 Yajaꞌ xin mach isyije ix reina Vasti chejbꞌanile yalto naj rey Asuero tet ebꞌnaj eunuco tuꞌ, yuxin kaw tit ishowal naj rey. 13 Yuxin isqꞌambꞌe naj rey tet ebꞌnaj yohta ley, yuto haꞌ tet ebꞌnaj yohta ley tuꞌ yebꞌ istoholal chisqꞌambꞌe naj rey tzet chiyute isbꞌa yinh hunu tzet ye tuꞌ. 14 Ebꞌnaj ayko iskꞌatanh naj bꞌay chislahtiꞌnhe isbꞌa, haꞌ ebꞌnaj tiꞌ: Naj Carsena, naj Setar, naj Admata, naj Tarsis, naj Meres, naj Marsena, yebꞌ naj Memucán. Haꞌ ebꞌnaj hujwanh tuꞌ yahawil yeko yinh Persia yebꞌ Media, haꞌ ebꞌnaj tuꞌ bꞌabꞌel ok tzꞌonhno sata naj rey Asuero islahtiꞌnhe isbꞌa naj yebꞌ ebꞌnaj. 15 Isqꞌambꞌen naj rey Asuero tet ebꞌnaj:

—¿Tzet wal yutelax ix reina Vasti hakaꞌ yalni ley, yu mach isyije ix ischejbꞌanil naj rey yinh tzet yal ebꞌnaj eunuco? xhi naj.

16 Yalni naj Memucán tet naj rey sata ebꞌnaj yahaw kutxaniko tuꞌ:

—Haꞌ ix reina Vasti tiꞌ machnhetaj tawet mam rey mayako ix ismul, wal xin mayapaxiko ix ismul tet ebꞌnaj yahawil konhobꞌ, yebꞌ tet sunil konhobꞌ ayko yalanh hawip, mam rey Asuero. 17 Haꞌ tzet maswatxꞌe ix chiyohtanhelo sunil ebꞌix ix, kat isqꞌaytzen isbꞌa ebꞌix ismanhkꞌon tzet chiyal yichamil; chalni ebꞌix hakaꞌ tiꞌ: “Haꞌ yaꞌ rey Asuero yawte yaꞌ ix reina Vasti, yajaꞌ xin mach isyije ix tzet yal yaꞌ,” xhim ebꞌix. 18 Yebꞌpaxo xin hayet chiyabꞌeno ebꞌix yixal ebꞌnaj yahaw Persia yebꞌ Media tato mach isyije ix reina Vasti tzet yal yaꞌ rey, chalaꞌ ebꞌix huneꞌ tiꞌ tet yichamil, kat istit ishowal ebꞌnaj yinh ebꞌix. 19 Yuxin tato chischah hawiꞌ mam rey chiwatxꞌikano hunu chejbꞌanile, kat istzꞌibꞌnhelaxkanoj, kat yokkano yinh ismunil xol ebꞌnaj Persia yebꞌ Media, machi xin bꞌaqꞌinh chitanhilo huneꞌ chejbꞌanile tiꞌ. Haꞌ chejbꞌanile chiwatxꞌikanoj chal hakaꞌ tiꞌ: “Haꞌ ix reina Vasti matxa chihul ix sata yaꞌ rey Asuero,” haxa xin hunuxa ix ix ekꞌbꞌal kawla ix chiꞌok reinahil selelo ix. 20 Waxanhka kaw nimajal konación tiꞌ yilal yaqꞌlax huneꞌ chejbꞌanil tiꞌ yohtanhelo sunil anma, haxinwal ay yelapno yichamil ebꞌix ix yul sat, machi yok yinh makxanhetikꞌa anmahil, ta ay yelapnoj maka machi yelapnoj, xhi naj Memucán.

21 Haꞌ tzet yal naj Memucán tuꞌ, ischah iswiꞌ naj rey Asuero yebꞌ ebꞌnaj yahawil konhobꞌ, yalaxiko huneꞌ chejbꞌanile tuꞌ yinh ismunil yu naj rey tuꞌ. 22 Yalaxto carta yul hunun konhobꞌ ayko yul ismajul naj rey tuꞌ. Tzꞌibꞌnhelaxto carta tuꞌ hatatikꞌa yabꞌxubꞌal hunun konhobꞌ, yal-laxtoj tato haꞌ ebꞌnaj winaj, haꞌ ebꞌnaj ay yip yul yatut, yebꞌ xin ta chipujbꞌalaxikꞌo huneꞌ tuꞌ yinh yabꞌxubꞌal hunun konhobꞌ.