4 Hayet maxhto chiyu hun tuꞌ yet ayko yaꞌ sacerdote Eliasib yahawilo yinh iskꞌuwanbꞌal Yatut Komam Dios kaw xahan yil isbꞌa yaꞌ yebꞌ naj Tobías, yuto ayto yu isbꞌa ebꞌnaj. 5 Yuxin yaqꞌ yaꞌ Eliasib huneꞌ niman cuarto bꞌay chikꞌubꞌalax tzet yet Komam Dios yehi, tet naj Tobías. Haꞌ yul huneꞌ niman cuarto tuꞌ chitikꞌa kꞌubꞌalax ofrenda, yebꞌ incienso, yebꞌ munlabꞌal chiꞌokniko yul Yatut Komam Dios; haꞌtikꞌapaxo bꞌey tuꞌ chikꞌubꞌalax isdiezmohal ixim trigo, vino, aceite; hunteqꞌan hal-laxi tato chiꞌaqꞌlax tet ebꞌnaj levita, yebꞌ tet ebꞌnaj bꞌitnom, yebꞌ tet ebꞌnaj tanhem pulta. Haꞌ tuꞌ xin chikꞌubꞌalaxpaxo tzet chiꞌaqꞌlax tet ebꞌyaꞌ sacerdote. 6 Hayet yuni huneꞌ tuꞌ, hanintiꞌan machi hinan bꞌey Jerusalén, yuto hayet 32 (kabꞌlanhebꞌ iskawinaj) habꞌilxa yok naj Artajerjes isreyalil Babilonia inmeltzohan sata naj rey tuꞌ; haxa yet yekꞌto hanikꞌ tiempo xin inqꞌannihan tet naj, 7 tato chinmeltzohan bꞌey Jerusalén hunelxa. Hak tuꞌ yu wohtanhenilojan istxꞌojal iswatxꞌe yaꞌ Eliasib, yet yaqꞌni yaꞌ huneꞌ niman cuarto yet iskꞌuwanbꞌal Komam Dios tet naj Tobías. 8 Haꞌ huneꞌ tuꞌ kaw yaꞌ yuko yinh wanmahan, wokan inqꞌojniltijan isqꞌuybꞌe naj Tobías ayikto yul cuarto tuꞌ. 9 Lahwi tuꞌ walnihan tato chisajnhelax cuarto, kat yaqꞌlax meltzoho ismunlabꞌal Yatut Komam Dios yul, yebꞌ ofrenda yebꞌ teꞌ pom.

10 Wilchanpaxtijan tato matxa chiꞌaqꞌlax tzet chislo ebꞌnaj levita, yuxin ebꞌnaj levita tuꞌ yebꞌ ebꞌnaj chibꞌitni yul Yatut Komam Dios isbꞌejkano ebꞌnaj ismunil tuꞌ, isto ebꞌnaj sat ejla istxꞌotxꞌ. 11 Yuxin inmayan ebꞌnaj oficial, walnihan tet ebꞌnaj: «¿Tzet yinh xin bꞌejbꞌilkano Yatut Komam Dios?» kinchihan tet ebꞌnaj. Lahwi tuꞌ inkutxbꞌanikojan ebꞌyaꞌ sacerdote yebꞌ ebꞌnaj levita tuꞌ wanikojan ebꞌnaj yinh ismunil. 12 Hak tuꞌ yu yiniti sunil anma Judá isdiezmohal ixim trigo, vino yebꞌ aceite bꞌey iskꞌuwanbꞌal Yatut Komam Dios. 13 Wanikojan yaꞌ sacerdote Selemías yebꞌ yaꞌ Sadoc, yaꞌ kuywawom yinh ley, yebꞌ huneꞌ naj levita chiyij Pedaías yilomalo diezmo chiꞌilaxti tuꞌ. Wanipaxikojan naj Hanán iskꞌahol naj Zacur yu iskolwa naj yinh ebꞌnaj. Haꞌ naj Zacur, iskꞌahol naj Matanías ye naj. Haꞌ ebꞌnaj tuꞌ wakojan yinh munil yuto tohol isbꞌeybꞌal ebꞌnaj, haꞌ xin ebꞌnaj chipohnikanh tzet chilolax tuꞌ yinh ebꞌnaj yetbꞌi.

14 Walnihan yinh intxahan tet Komam Dios: «Hach inDiosalan nati hunteqꞌan tzet chinwatxꞌetiꞌan yinh hawatut yebꞌ yinh hamunil,» kinchihan.

15 Haꞌ yinh hunteqꞌan tzꞌayik tuꞌ wilnipaxojan tato ay ebꞌnaj Judá tiꞌ chixanhnilti yal teꞌ uva yinh istzꞌayikal xewilal kat yekꞌpaxo ebꞌnaj ijo trigo, chiyijnipaxikꞌo isburro ebꞌnaj vino, yebꞌ teꞌ uva, yebꞌ teꞌ higo yebꞌ hunteqꞌanxa ijatz, chiyiniti ebꞌnaj bꞌey Jerusalén yinh istzꞌayikal xewilal, inkachnihan ebꞌnaj, yuto chistxꞌonhpaxo ebꞌnaj tzet chiyiti tuꞌ yinh istzꞌayikal xewilal. 16 Ay xin ebꞌnaj Tiro ay bꞌey Jerusalén tuꞌ chibꞌeykꞌo iqꞌo kay yebꞌ sunil tzetaj ye tuꞌ, kat istxonhni ebꞌnaj yinh istzꞌayikal xewilal tet ebꞌnaj Judá. 17 Yuxin inkachan ebꞌnaj yahawil xol ebꞌnaj Judá, walnihan tet ebꞌnaj hakaꞌ tiꞌ: «Haꞌ tzet chewatxꞌe kaw txꞌojkanoj, yuto haꞌ tzꞌayik xewilal kaw matxa yelapno yul hesat. 18 ¿Tom mach chenatij tato hak tuꞌ yute ebꞌnaj komam jichmam yuxin yati Komam Dios isyaꞌtajil tiꞌ jibꞌanh yebꞌ yibꞌanh konhobꞌ tiꞌ? Haꞌ yu tzet chewatxꞌe tiꞌ, lanhan heyiniti yaqꞌbꞌil ishowal Komam Dios yibꞌanh Israel, yuto matxa yelapno istzꞌayikal xewilal yul hesat,» kinchihan tet ebꞌnaj.

19 Yuxin walan ta chipebꞌalax ispultahil konhobꞌ Jerusalén yet qꞌejbꞌiyalil yet lanhanxa yichiko istzꞌayikal xewilal, walnihan tato hato yet xaꞌekꞌto istzꞌayikal xewilal tuꞌ katto ishajlax pulta tuꞌ, wanipaxikojan haywanh ebꞌnaj inchejabꞌan tanheno pulta tuꞌ yu machi mak chiꞌekꞌto yebꞌ yijatz.^a 20 Hak tuꞌ yu iskankano ebꞌnaj txonhom tzet ye tuꞌ kayel oxel yintalto Jerusalén yinh istzꞌayikal xewilal. 21 Inkachnihan ebꞌnaj walnihan tet ebꞌnaj hakaꞌ tiꞌ: «¿Tzet yinh xin chexkankano yintalto chꞌen iskꞌubꞌal konhobꞌ tiꞌ? Tato chexkankano hunelxa chexintzabꞌayojan, kat kexwanikojan preso,» kinchihan tet ebꞌnaj. Hak tuꞌ yu isbꞌejni ebꞌnaj yapni txonhwo yinh istzꞌayikal xewilal. 22 Walnihan tet ebꞌnaj levita tato chissajnhe isbꞌa ebꞌnaj kat yok ebꞌnaj istanheno pulta yinh istzꞌayikal xewilal, yunhe isxahannhen ebꞌnaj istzꞌayikal xewilal tuꞌ. Intxahlihan tet Komam Dios, walnihan yinh intxahan: «Mamin hach inDiosalan nahinpaxtijan yu huneꞌ tiꞌ, kat hawaqꞌni nimankꞌulal winhan yu hanta iskꞌulal hakꞌul,» kinchihan.

23 Haꞌ yinh hunteqꞌan tzꞌayik tuꞌ wilpaxojan tato ay ebꞌnaj judío tiꞌ iqꞌnikanh ebꞌix ix ah Asdod, yebꞌ ebꞌix amonita, yebꞌ ebꞌix moabita yixaloj. 24 Haxa yuninal ebꞌnaj tuꞌ xin yabꞌxubꞌalxa konhobꞌ Asdod chala yebꞌ yabꞌxubꞌal hunteqꞌanxa konhobꞌ, yuto matxa yohtajo yabꞌxubꞌal ebꞌnaj Judá. 25 Yu tuꞌ yuxin inteyele hinbꞌahan yebꞌ ebꞌnaj, intzꞌaktiꞌnhenan ebꞌnaj. Ay ebꞌnaj tiꞌ inmaqꞌan, ay ebꞌnaj intzilkanhan xil iswiꞌ, walnihan tet ebꞌnaj: «Chistaqꞌweko ebꞌnaj yinh sata Komam Dios tato mach chiyiqꞌ ebꞌnaj ebꞌix ix nan konhobꞌal yebꞌ tato mach chaqꞌ ebꞌnaj iskutzꞌin yixalo ebꞌnaj nan konhobꞌal tuꞌ, yebꞌ ta mach chiyaqꞌ mohyo ebꞌnaj iskꞌahol yebꞌ iskutzꞌin ebꞌnaj nan konhobꞌal.^b 26 Yuto yinh huneꞌ tuꞌ yako yaꞌ Salomón ismul, yaꞌ isreyal Israel. Waxanhka machi hunuxa rey yulajla ej konhobꞌ hakaꞌ yaꞌ tuꞌ, kaw xahan ay yaꞌ yu Komam Dios, yuxin yako Komam yaꞌ isreyalo Israel; yajaꞌ haꞌ ebꞌix ix nan konhobꞌal yiqꞌ yaꞌ, haꞌ ebꞌix aqꞌni aykꞌayo yaꞌ, yaniko yaꞌ ismul. 27 Yuxin ¿tom toxanhe chijilanh chewatxꞌen huneꞌ niman istxꞌojal tiꞌ, cheyaniko hemul sata Komam Dios, koDiosal, cheyiqꞌnikanh ebꞌix ix nan konhobꞌal?» kinchihan tet ebꞌnaj.

28 Ay xin huneꞌ iskꞌahol yaꞌ Joiada, iskꞌahol yaꞌ Eliasib yahawil yinh ebꞌyaꞌ sacerdote iqꞌnikanh iskutzꞌin naj Sanbalat, naj horonita, yajaꞌ naj tuꞌ intzumbꞌelojan naj inkꞌatanhan. 29 Intxahlihan tet Komam Dios walnihan: «Mamin, hach inDiosalan, nati ebꞌnaj chiꞌetanto hamunil, yet sacerdote, yebꞌ ebꞌnaj matxa chiyijen tzet taqꞌwebꞌil tawet yu yinh sacerdotehal yebꞌ levitahil,» kinchihan.

30 Hak tuꞌ yu insajnhenkanojan sunil tzet etabꞌilkanto yu ebꞌnaj nan konhobꞌal. Wanikanikojan ebꞌyaꞌ sacerdote yebꞌ ebꞌnaj levita yinh ismunil yinh hunun majan. 31 Walnipaxojan tzet tzꞌayikal chiꞌilaxti teꞌ siꞌ chiꞌokniko yinh xahanbꞌal yebꞌ tzet tzꞌayikal chiꞌilaxti bꞌabꞌel sat tzꞌunubꞌ, walnihan yinh intxahan tet Komam: «Mamin, hach inDiosalan, nahintijan yu iskꞌulalo winhan, kinchihan,» xhi yaꞌ Nehemías.