Isbꞌi ebꞌyaꞌ sacerdote yebꞌ ebꞌnaj levita
12
Haꞌ ebꞌyaꞌ sacerdote yebꞌ ebꞌnaj levita meltzoti yinta yaꞌ Zorobabel iskꞌahol yaꞌ Salatiel yebꞌ yinta naj Jesúa, haꞌ ebꞌnaj tiꞌ: Yaꞌ Seraías, yaꞌ Jeremías, yaꞌ Esdras, 2 yaꞌ Amarías, yaꞌ Maluc, yaꞌ Hatús, 3 yaꞌ Secanías, yaꞌ Rehum, yaꞌ Meremot, 4 yaꞌ Iddo, yaꞌ Gineto, yaꞌ Abías, 5 yaꞌ Mijamín, yaꞌ Maadías, yaꞌ Bilga, 6 yaꞌ Semaías, yaꞌ Joiarib, yaꞌ Jedaías, 7 yaꞌ Salú, yaꞌ Amoc, yaꞌ Hilcías, yebꞌ yaꞌ Jedaías; haꞌ ebꞌyaꞌ tuꞌ yahawil xol yet sacerdotehal yinh istiempohal naj Jesúa.8 Haxa ebꞌnaj levita haꞌ ebꞌnaj tiꞌ: Naj Jesúa, naj Binúi, naj Cadmiel, naj Serebías, naj Judá, yebꞌ naj Matanías, haꞌ ebꞌnaj tuꞌ ijbꞌalom xol yet levitahil yinh bꞌit tet Komam Dios. 9 Hakpax tuꞌ naj Bacbuquías yebꞌ naj Uni yet levitahil ebꞌnaj tuꞌ, ayko hunun ebꞌnaj yinh ismunil.
10 Naj Jesúa haꞌ naj ismam yaꞌ Joiacim, yaꞌ Joiacim, haꞌ yaꞌ ismam yaꞌ Eliasib, yaꞌ Eliasib haꞌ yaꞌ ismam yaꞌ Joiada, 11 yaꞌ Joiada haꞌ yaꞌ ismam yaꞌ Jonatán, haxa yaꞌ Jonatán, haꞌ yaꞌ ismam yaꞌ Jadúa.
12 Haꞌ yinh istiempohal yaꞌ Joiacim haꞌ ebꞌyaꞌ yahawil sacerdote yinh hunun majan yikꞌal, haꞌ ebꞌyaꞌ tiꞌ: yinh yet yaꞌ Seraías yaꞌ Merarías yahaw, yinh yet yaꞌ Jeremías yaꞌ Hananías yahaw, 13 yinh yet yaꞌ Esdras yaꞌ Mesulam yahaw, yinh yet yaꞌ Amarías yaꞌ Johanán yahaw, 14 yinh yet yaꞌ Melicú yaꞌ Jonatán yahaw, yinh yet yaꞌ Sebanías yaꞌ José yahaw, 15 yinh yet yaꞌ Harim, yaꞌ Adna yahaw, yinh yet yaꞌ Meraiot yaꞌ Helcai yahaw, 16 yinh yet yaꞌ Iddo yaꞌ Zacarías yahaw, yinh yet yaꞌ Ginetón yaꞌ Mesulam yahaw, 17 yinh yet yaꞌ Abías, yaꞌ Zicri yahaw, yinh yet yaꞌ Miniamín yebꞌ yinh yet yaꞌ Moadías yaꞌ piltai yahaw, 18 yinh yet yaꞌ Bilga yaꞌ Samúa yahaw, yinh yet yaꞌ Semaías yaꞌ Jonatán yahaw, 19 yinh yet yaꞌ Joiarib yaꞌ Matenai yahaw, yinh yet yaꞌ Jedaías yaꞌ Uzi yahaw, 20 yinh yet Salai, yaꞌ Calai yahawil, yinh yet yaꞌ Amoc, yaꞌ Eber yahaw, 21 yinh yet yaꞌ Hilcías, yaꞌ Hasabías yahaw, yinh yet yaꞌ Jedaías, yaꞌ Natanael yahaw.
22 Haxa ebꞌnaj yahawil levita yinh istiempohal yaꞌ Eliasib, yaꞌ Joiada, yaꞌ Johanán, yaꞌ Jadúa, tzꞌibꞌnhelax isbꞌi ebꞌnaj levita tuꞌ yinh hunun majan yikꞌal, haktikꞌapax tuꞌ ebꞌyaꞌ sacerdote masanta yinh istiempohal naj Darío isreyal Persia. 23 Haxa isbꞌi ebꞌnaj yahawil ye yinh hunun majan yikꞌal levita, tzꞌibꞌnhebꞌilkano yul libro Crónicas, tzꞌibꞌnhelax isbꞌi ebꞌnaj tuꞌ masanta yinh istiempohal yaꞌ Johanán, iskꞌahol yaꞌ Eliasib. 24 Haꞌ ebꞌnaj yahaw xol ebꞌnaj yet levitahila haꞌ ebꞌnaj tiꞌ: Naj Hasabías, naj Serebías naj Jesúa iskꞌahol naj Cadmiel, haꞌ xin ebꞌnaj ayko ijbꞌalomal yinh yet levitahil chibꞌitni yul Yatut Komam Dios yinh istxolal yinh hunun majan hakaꞌ yu ischejnikano yaꞌ rey David, ischejabꞌ Komam Dios. 25 Haxa ebꞌnaj tanhem pulta bꞌay chonhokapnoj haꞌ ebꞌnaj tiꞌ: Naj Matanías, naj Bacbuquías, naj Obadías, naj Mesulam, naj Talmón, yebꞌ naj Acub. 26 Haꞌ ebꞌnaj chibꞌina tiꞌ ok ebꞌnaj yinh ismunil yinh istiempohal yaꞌ Joiacim, iskꞌahol yaꞌ Jesúa, iskꞌahol yaꞌ Josadac yebꞌ yinh istiempohal yaꞌ gobernador Nehemías yebꞌ yinh istiempohal yaꞌ Esdras, sacerdote yebꞌ kuywawom yinh ley.
Ekꞌtzelax isqꞌinhal iskꞌubꞌal Jerusalén
27 Hayet yapni istzꞌayikal yalaxkaniko iskꞌubꞌal Jerusalén yul isqꞌabꞌ Komam Dios issaylax ebꞌnaj levita ay yulajla sunil konhobꞌ Judá, yilaxti ebꞌnaj bꞌey Jerusalén yu yekꞌtzelax isqꞌinhal kꞌubꞌ; yalni ebꞌnaj kꞌul-la tzotiꞌ, isbꞌitni ebꞌnaj yebꞌ chꞌen cimbalo yebꞌ teꞌ salterio yebꞌ cítaras. 28 Iskutxbꞌalaxiko iskꞌahol ebꞌnaj bꞌitnom ay yulajla konhobꞌ ayko yinhla ishoyanil Jerusalén, yebꞌ ebꞌnaj ay yulajla yaldeahil yet ebꞌnaj netofatita. 29 Yebꞌ ebꞌnaj bꞌitnom ay bꞌey Gilgal, ebꞌnaj ay bꞌey Geba yebꞌ ebꞌnaj ay bꞌey Azmavet, yuto haꞌ ebꞌnaj bꞌitnom tuꞌ watxꞌenkanh yaldeahil yinhla ishoyanil Jerusalén. 30 Issajnhen isbꞌa ebꞌyaꞌ sacerdote yebꞌ ebꞌnaj levita, issajnhenkano ebꞌnaj konhobꞌ yebꞌ chꞌen kꞌubꞌ yebꞌ ispultahil.b
31 Lahwi tuꞌ inchejnahtojan ebꞌnaj yahawil Judá yibꞌanh chꞌen kꞌubꞌ, yahpaxto kabꞌ majan ebꞌnaj bꞌitnom yibꞌanh chꞌen, ebꞌnaj bꞌitnom tuꞌ kaw niman isbꞌisil ebꞌnaj, isbꞌelwikꞌo ebꞌnaj yibꞌanh kꞌubꞌ tuꞌ yinh istxolal. Haꞌ bꞌabꞌel majan ebꞌnaj bꞌitnom bꞌelwito yibꞌanh chꞌen kꞌubꞌ yinh yetkꞌulal kowatxꞌqꞌabꞌ yapni bꞌay yetkꞌulal pulta bꞌay chꞌapnikano qꞌalem. 32 Haxa yinta ebꞌnaj tuꞌ tzujaniko naj Osaías yebꞌ yikta majan ebꞌnaj yahawil Judá, 33 haꞌ ton naj Azarías, yaꞌ Esdras, naj Mesulam, 34 naj Judá, naj Benjamín, naj Semaías, yebꞌ yaꞌ Jeremías. 35 Haꞌ hunpaxo ebꞌnaj iskꞌahol ebꞌyaꞌ sacerdote yebꞌ istrompeta, haꞌ ton yaꞌ Zacarías, iskꞌahol yaꞌ Jonatán, haꞌ xin ebꞌnaj yichmam yaꞌ Zacarías tuꞌ, haꞌ ton ebꞌnaj tiꞌ: naj Semaías, naj Matanías, naj Micaías, naj Zacur iskꞌahol yaꞌ Asaf. 36 Haꞌ hunpaxo hunteqꞌanxa yetbꞌi ebꞌnaj chibꞌitni yintaj, haꞌ ton naj Semaías, naj Azarael, naj Milalai, naj Gilalai, naj Maai, naj Natanael, naj Judá, yebꞌ naj Hanani; haꞌ ebꞌnaj tuꞌ chiꞌaniko munlabꞌal yet bꞌit, hunteqꞌan aqꞌbꞌilkano yu yaꞌ rey David ischejabꞌ Komam Dios. Haꞌ sata ebꞌnaj tuꞌ xin bꞌabꞌeliko yaꞌ Esdras, yaꞌ tzꞌibꞌlom yinh ley. 37 Yekꞌto ebꞌnaj sataj, yibꞌanh ispultahil isnuqꞌ ha haꞌ; isbꞌelwahto ebꞌnaj yibꞌanh isqꞌochal iskonhobꞌ yaꞌ David, chiꞌichito bꞌey yatut yaꞌ David masanta bꞌey ispultahil ha haꞌ ayko yinh yetkꞌulal bꞌay chiꞌahilo tzꞌayik.
38 Haxa iskabꞌ majan ebꞌnaj bꞌitnom chiꞌekꞌto yinh yetkꞌulal komekqꞌabꞌ, tzujan inikojan yinta ebꞌnaj yebꞌ yikta majan konhobꞌ yibꞌanh chꞌen kꞌubꞌ, kobꞌelwitojanh bꞌay ay torre chiyij Hornos, masanta konhapnihanh bꞌey chꞌen kꞌubꞌ nimajal sat. 39 Jekꞌtojanh yibꞌanh pulta chiyij Efraín, yebꞌ bꞌey pulta chiyij Vieja, yebꞌ bꞌey pulta chiyij noꞌ Kay, jekꞌtojanh bꞌey torre chiyij Hananeel, yebꞌ bꞌey torre Hamea masanta bꞌey pulta yet noꞌ Meꞌ. Lahwi tuꞌ jok linhnojanh bꞌey ispultahil preso.
40 Yapni kabꞌ majan ebꞌnaj bꞌitnom bꞌey Yatut Komam Dios, wapnipaxojan yebꞌ yikta majan ebꞌnaj oficial tzujan wintajan. 41 Haxa ebꞌyaꞌ sacerdote chiꞌaniko chꞌen trompeta haꞌ ebꞌyaꞌ tiꞌ: yaꞌ Eliacim, yaꞌ Maaseías, yaꞌ Miniamín, yaꞌ Micaías, yaꞌ Elioenai, yaꞌ Zacarías, yaꞌ Hananías, 42 yaꞌ Maasías, yaꞌ Semaías, yaꞌ Eleazar, yaꞌ Uzi, yaꞌ Johanán, yaꞌ Malquías, yaꞌ Elam, yebꞌ yaꞌ Ezer. Chixin bꞌitni ebꞌnaj bꞌitnom yinh kaw ip, haꞌ xin naj Izrahías ayko ijbꞌalomal xol ebꞌnaj bꞌitnom tuꞌ.
43 Hayet huneꞌ tzꞌayik tuꞌ kaw niman no noqꞌ nhuslax xahanbꞌalil tet Komam Dios, kaw xin tzalahilal ye konhobꞌ yuto haꞌ Komam aqꞌni huneꞌ niman tzalahilal tet, istzalapaxo ebꞌix ix yebꞌ nixhte unin yinh huneꞌ tzꞌayik tuꞌ. Haꞌ huneꞌ niman tzalahilal yu bꞌey Jerusalén tuꞌ abꞌelax bꞌay kaw nahata.
Hunteqꞌan tzet chislo ebꞌyaꞌ sacerdote yebꞌ ebꞌnaj levita
44 Hayet huneꞌ tzꞌayik tuꞌ alaxiko ebꞌnaj chitanhen kꞌuwanbꞌal bꞌay chikꞌubꞌalax yebꞌalqꞌabꞌe yebꞌ bꞌabꞌel sat tzꞌunubꞌ yebꞌ diezmo, yunhe iskꞌubꞌalax tzet chitit yul hunun konhobꞌ. Haꞌ yinh tzet chikutxiko tuꞌ xin chiꞌaqꞌlax tzet chislo ebꞌyaꞌ sacerdote yebꞌ ebꞌnaj levita hakaꞌ yalni ley, yuto kaw niman tzalahilal ye ebꞌnaj Judá yinh ebꞌyaꞌ sacerdote yebꞌ yinh ebꞌnaj levita chimunlahi. 45 Yuto haꞌ tuꞌ chimunla yinh ismunil Komam Dios, yebꞌ yu isyijen ebꞌnaj ismunil isqꞌanni nimankꞌulal yinh ismul konhobꞌ. Haktikꞌapax tuꞌ ebꞌnaj bꞌitnom yebꞌ ebꞌnaj chitanhen pulta, isyije ebꞌnaj ismunil hakaꞌ yu ischejnikano yaꞌ David yebꞌ yaꞌ Salomón, iskꞌahol yaꞌ David. 46 Yuto hataxtikꞌa yinh istiempohal yaꞌ David yebꞌ yaꞌ Asaf yettax payat ayxatikꞌa huneꞌ mak ijbꞌalom yinh ebꞌnaj bꞌitnom chiꞌaniko bꞌit, chalni kꞌul-la tzotiꞌ yinh Komam Dios, chaqꞌni yuchꞌandiosal tet Komam. 47 Yuxin haꞌ yinh istiempohal yaꞌ Zorobabel yebꞌ yinh istiempohal yaꞌ Nehemías hunun tzꞌayik yaqꞌni sunil konhobꞌ Israel tzet chislo ebꞌnaj bꞌitnom, ebꞌnaj tanhem pulta; chaqꞌnipaxo ebꞌnaj tuꞌ yinh tzet chislo tet ebꞌnaj levita, hantatikꞌa tꞌinhan ischahni ebꞌnaj, haxa ebꞌnaj levita xin chiꞌaqꞌni tzet chislo ebꞌyaꞌ titna yinh yuninal yaꞌ Aarón, hantatikꞌa tꞌinhan ischahni ebꞌyaꞌ.