4 Haꞌ ebꞌnaj iskꞌahol yaꞌ Job tuꞌ chiyekꞌtze ebꞌnaj qꞌinh bꞌey hunun yatut yinh istxolal, chiyawten ebꞌnaj oxwanh yanabꞌ waꞌo iskꞌatanh. 5 Haxa yet chilahwi hunun qꞌinh tuꞌ, chiyawten yaꞌ Job yuninal, chisqꞌanni yaꞌ nimankꞌulal yinh ebꞌnaj tet Komam Dios; kaw xin hunun sahabꞌ sakꞌayal yahwano yaꞌ, chinhusni yaꞌ xahanbꞌal hakaꞌtikꞌa isbꞌisil sunil yuninal yaꞌ, chalni yaꞌ hakaꞌ tiꞌ: «Kꞌuxantaxka ay bꞌay maꞌok ismul wuninaltiꞌan yebꞌ kꞌuxantaxka bꞌuchwa isnabꞌal yinh Komam Dios,» xhi yaꞌ. Haknhetikꞌa tuꞌ xin chu yaꞌ Job tuꞌ yinh hunun tzꞌayik.

6 Hayet huneꞌ tzꞌayik xin apni yuninal Komam Dios Jahawil iskutxbꞌako isbꞌa sata Komam, haꞌ xol yuninal Komam tuꞌ apnipaxo naj Matzwalil.^c

7 Isqꞌambꞌen Komam Dios, Jahawil tet naj Matzwalil:

—¿Bꞌaytuꞌwal hapeto? xhi Komam.

Istaqꞌwi naj Matzwalil:

—Inpetohan inhoynihan txꞌo txꞌotxꞌ, yebꞌ wekꞌan sat txꞌotxꞌ, xhi naj. 8 Yalni Komam Dios, Jahawil tet naj:

—¿Chimtxumchalo hawu yibꞌanhilo yaꞌ Job, inchejabꞌan? Haꞌ sat txꞌo txꞌotxꞌ machi hunuxa mak hakaꞌ yaꞌ, yuto kaw toholkano yaꞌ yebꞌ kaw kꞌulkano isbꞌeybꞌal yaꞌ, chinanonkano yaꞌ wetan, chispohnilo isbꞌa yaꞌ xol sunil istxꞌojal, xhi Komam.

9 Istaqꞌwi naj Matzwalil tet Komam Dios, Jahawil:

—¿Mach tonheho chixiw naj Job tuꞌ tawet yinh isnabꞌnhehal? 10 ¿Tom mach tajach hoynhe naj yu hakꞌulal, yebꞌ xin hawayo hakꞌulal yibꞌanh yuninal naj yebꞌ yibꞌanh sunil tzettaj ay naj? Wal xin kaw ayayo hayaxil yibꞌanh ismunil naj, yuxin kaw qꞌalomxa naj sikꞌlebꞌil sat txꞌo txꞌotxꞌ tuꞌ. 11 Yajaꞌ tato chawato haqꞌabꞌ chawetanto tzet ay naj tinanh, chawilaꞌ tato mach chiꞌok naj bꞌuchwal tawinh, xhi naj.

12 Yalni Komam Dios Jahawil tet naj Matzwalil:

—Haꞌ sunil tzet ay yaꞌ Job tuꞌ chiwakojan yul haqꞌabꞌ, yajaꞌ wal isnimanil yaꞌ xin mach hawako haqꞌabꞌ yinh, xhi Komam tet naj.^d

Lahwi tuꞌ yel naj Matzwalil sata Komam Jahawil.

13 Ay huneꞌ tzꞌayik tiꞌ xin yet lanhan iswaꞌ ebꞌnaj iskꞌahol yaꞌ Job yebꞌ iskutzꞌin yaꞌ, chukꞌnipaxo vino bꞌey yatut naj bꞌabꞌel winaj. 14 Yapni huneꞌ naj ischejabꞌ yaꞌ Job, yalno tet yaꞌ:

—Mamin, yet lanhan kotꞌokwi txꞌotxꞌanh yebꞌ noꞌ wakax, haꞌ noꞌ burro xin lanhan islow noꞌ kokawilalanh, 15 yinhnhena tuꞌ yapni ebꞌnaj sabeo yelqꞌanoto noꞌ, ispotxꞌnikamo ebꞌnaj ebꞌnaj hamunlawom yu chꞌen espada, haninxanhehan xin makinelkanhan yu wulan walnojan tawet, xhi naj.

16 Hayet lanhanto istzotel naj chejabꞌ tuꞌ, yapni huneꞌxa naj ischejabꞌ yaꞌ Job, yalni naj:

—Mamin, mayati Komam Dios qꞌa qꞌaꞌ yul satkanh, masnhusnito qꞌaꞌ noꞌ meꞌ yebꞌ ebꞌnaj lanhan istanhen noꞌ, haninxanhehan xin makinelkanhan yu walnihan tawet, xhi naj.

17 Lanhanto xin istzotel naj tuꞌ yet yapni huneꞌxa ischejabꞌ yaꞌ Job, yalni naj:

—Mamin, ay ox majan ebꞌnaj caldeo maꞌapni yinh noꞌ camello, mayelqꞌanto ebꞌnaj noꞌ, maspotxꞌnikamo ebꞌnaj ebꞌnaj chitanhen noꞌ yu chꞌen espada, haninxanhehan xin makinelkanhan yu wulan walnojan tawet, xhi naj.

18 Maxhtotikꞌa xin chilahwi istzotel naj tuꞌ, yapni huneꞌxa ischejabꞌ yaꞌ Job, yalni naj:

—Mamin, ebꞌnaj hakꞌahol yebꞌ ebꞌix hakutzꞌin yet lanhan iswaꞌ ebꞌnaj yebꞌ yukꞌni vino bꞌey yatut naj habꞌabꞌel kꞌahol, 19 yapni huneꞌ niman jaqꞌeqꞌ tit bꞌey txꞌotxꞌ desierto yinh teꞌ nha, ismaqꞌnilto jaqꞌeqꞌ tuꞌ iskanhebꞌal istxikin teꞌ bꞌay kutxaniko tuꞌ, yaykꞌay teꞌ yibꞌanh ebꞌnaj hakꞌahol, iskam ebꞌnaj, haninxanhehan xin makinelkanhan yu wulan walnojan tawet, xhi naj.

20 Hayet yabꞌen yaꞌ Job sunil tuꞌ, yahwano yaꞌ, istzilnilo yaꞌ xil isqꞌap, pilpon yutelo yaꞌ xil iswiꞌ, yay jahno yaꞌ sat txꞌotxꞌ, yaniko yaꞌ ismay Komam Dios. 21 Yalni yaꞌ hakaꞌ tiꞌ:

22 Haꞌ yinh sunil isyaꞌtajil hul yinh yaꞌ Job tuꞌ machi bꞌay yako yaꞌ ismul, machipaxo hunu istxꞌojal yal yaꞌ yinh Komam Dios.