—¿Bꞌaytuꞌwal hapeto? xhi Komam.

Istaqꞌwi naj tet Komam:

—Inpetohan inhoynihan txꞌo txꞌotxꞌ yebꞌ wekꞌan sat txꞌotxꞌ, xhi naj.

3 Yalni Komam Dios Jahawil tet naj Matzwalil:

—¿Chimtxumchalo hawu yibꞌanhilo yaꞌ Job inchejabꞌan? ¡Haꞌ yul sat yibꞌanhqꞌinal, machi hunu mak hakaꞌ yaꞌ, yuto kaw toholkano yanma yaꞌ yebꞌ kaw kꞌulkano isbꞌeybꞌal yaꞌ, chixin xiw yaꞌ wetan, chispohnilo isbꞌa yaꞌ xol sunil istxꞌojal, waxanhka machi ismul yaꞌ, yajaꞌ waqꞌan tawet hatanhtzenilo sunil tzet ay yaꞌ! xhi Komam.

4 Istaqꞌwi naj Matzwalil tet Komam Dios Jahawil:

—Hayet kaw kaw naj winaj, kꞌul isnabꞌal naj, yajaꞌ hinan naj waxanhka chilahwilo sunil tzet ay naj, yu iskolnikanilo iskawil. 5 Yajaꞌ ta chayeto haqꞌabꞌ kat hapitni isbꞌajil naj, yebꞌ ischibꞌehal naj, lahwi tuꞌ chawilnoj tato mach chibꞌuchwaho naj tawinh bꞌay ay hach tiꞌ, xhi naj Matzwalil.

6 Istaqꞌwi Komam Jahawil tet naj:

—Chiwakojan yaꞌ Job tuꞌ yul haqꞌabꞌ, yaj mach chawaqꞌ kamo yaꞌ, xhi Komam.

7 Lahwi tuꞌ yel naj matzwalil sata Komam Jahawil, yul naj yanoko huneꞌ txꞌak yabꞌil kaw how yinh isnimanil yaꞌ Job, ichiti huneꞌ yabꞌil tuꞌ yalanh ispaqꞌanil yoj yaꞌ masanta ahapno yinh ischꞌuj yaꞌ.^b 8 Yuxin yiti yaꞌ Job huneꞌ txꞌotxꞌ pohlen, yay tzꞌonhno yaꞌ xol tanh, ishotzꞌni isbꞌa yaꞌ yu txꞌotxꞌ pohlen tuꞌ.

9 Haxa yixal yaꞌ Job halni hakaꞌ tiꞌ:

—¿Tom yilalto yijem chawute habꞌa tet haDiosal tuꞌ? Maqꞌbꞌil hatzꞌaktiꞌnhenkano haDiosal, kat hakami, xhi ix tet yaꞌ.

10 Istaqꞌwi yaꞌ Job tet yixal tuꞌ:

—Kaw hakaꞌ istzotel ebꞌix komon ix machi yitzꞌatil iswiꞌ, hak tuꞌ hatzoteli ¿tom hanhe iskꞌulal chikochah tet Komam Dios, haꞌ xin istxꞌojal mach chikochahpaxoj? xhi yaꞌ.

Haꞌ yinh sunil isyaꞌtajil tuꞌ machi yako ismul yaꞌ yalni txꞌojla tzotiꞌ yinh Komam.

11 Haꞌ yaꞌ Job tuꞌ ay oxwanh yamigo yaꞌ, haꞌ ton naj Elifaz temanita, yebꞌ naj Bildad suhita yebꞌ naj Zofar naamatita; hayet yabꞌen ebꞌnaj isyaꞌtajil hul yibꞌanh yaꞌ Job, islahtiꞌnhen isbꞌa ebꞌnaj, yel ebꞌnaj bꞌay aya, yapni ebꞌnaj iskꞌatanh yaꞌ, yu isyeni ebꞌnaj isbꞌiskꞌulal yinh yaꞌ, yebꞌ yu yaqꞌnipaxo ebꞌnaj yaqꞌlobꞌal iskꞌul yaꞌ Job tuꞌ. 12 Nahatto ay ebꞌnaj yilnito ebꞌnaj yaꞌ Job, machi xin txumchalo yaꞌ yu ebꞌnaj, ishatzꞌchankanh ebꞌnaj yul isnuqꞌ yoqꞌ yu bꞌiskꞌulal yilni yaꞌ Job, istzilnilo ebꞌnaj xil isqꞌap, yanahto ebꞌnaj yoxwanhil tuꞌ pojoj xol xil iswiꞌ, istixhnikanh ebꞌnaj pojoj satkanh. 13 Yay tzꞌonhno ebꞌnaj iskꞌatanh yaꞌ Job sat txꞌotxꞌ yulbꞌal hujebꞌ tzꞌayik yebꞌ hujebꞌ aqꞌbꞌal, machi xin hunu ebꞌnaj halni hunu tzotiꞌ tet yaꞌ, yuto yil ebꞌnaj tato kaw lanhan yekꞌyaꞌ yanma yaꞌ Job tet huneꞌ yabꞌil tuꞌ.