2. ISTEYELE ISBꞌA YAꞌ JOB YEBꞌ OXWANH YAMIGO
(3:1–27:23)
Istzꞌaktiꞌnhe yaꞌ Job huneꞌ tzꞌayik bꞌay pitzkꞌahi
3
Lahwi tuꞌ yicheniko yaꞌ Job istzoteli, istzꞌaktiꞌnhen yaꞌ tzꞌayik bꞌay pitzkꞌahi. 2 Yalni yaꞌ Job tuꞌ hakaꞌ tiꞌ:3 «¡Tanhojabꞌilo tzꞌayik bꞌay kinpitzkꞌahan,
yebꞌ aqꞌbꞌal bꞌay hal-laxi: “Winaj naj mapitzkꞌahi!” xhi.
4 Meltzojabꞌiko huneꞌ tzꞌayik tuꞌ qꞌejholohal,
ayxikꞌa isnahulnheto Komam Dios ay satkanh huneꞌ tzꞌayik tuꞌ.
Ayxikꞌa machi yoj tzꞌayik mujli yinh huneꞌ tzꞌayik tuꞌ.
5 Ayxikꞌa hul qꞌejholo yibꞌanh tzꞌayik tuꞌ yu isbꞌutlax tanho yu kamikal.
Ayxikꞌa aykꞌay moyan yibꞌanh huneꞌ tzꞌayik tuꞌ, yuni hakaꞌ hunu niman qꞌejholo yet xiwkilal.
6 Ayojabꞌ tzet yu iskꞌaykanh huneꞌ aqꞌbꞌal tuꞌ xol qꞌejholoj.
Haꞌ huneꞌ tzꞌayik tuꞌ xin ayxikꞌa machi ok isbꞌisilo xolbꞌal tzꞌayik yet habꞌil.
Ayxikꞌa xin matxa chibꞌinapaxo xol istzꞌayikal yet hunun ixahaw.
7 ¡Ayxikꞌa machi alaxpaxiko bꞌit yinh huneꞌ aqꞌbꞌal tuꞌ!
8 Tzꞌaktiꞌnhelaxojabꞌ huneꞌ aqꞌbꞌal tuꞌ yu ebꞌnaj chitzꞌaktiꞌnhen tzꞌayik,
ebꞌnaj chiꞌinilo iswayanh noꞌ Leviatán.
9 Hantam saqꞌal ta mach ahilo huneꞌ sajbꞌes yet lanhanxa issajbꞌiloj.
Hantam saqꞌal ta mach ahilo sajilqꞌinal huneꞌ echmabꞌiltikꞌa yahiloj.
Hamtampaxo saqꞌal ta mach isyekanh isbꞌa issajilqꞌinal yet issajbꞌiloj.
10 Tzꞌaktiꞌnhelaxojabꞌ huneꞌ tzꞌayik kinchahni pitzkꞌahojan, yuto mach chebꞌato isyaꞌtajil huneꞌ lanhan wilnitiꞌan.
11 ¿Tzet yinh xin machi kinkamnahan yet maxhto chinpitzkꞌahan yinh inmiꞌan?
maka ¿tzet yinh xin machi maji inhaqꞌohan yet lanhan welan yinh inmiꞌan?
12 ¿Tzet yinh xin kinischahan witxꞌiꞌe?
¿Tzet yinh xin aqꞌlax ime intxutxuꞌan?
13 Kamommi hinan tinanh, lanhanmi inxewan,
wayanhmi chiwuhan, hakmi tuꞌ xin xewan hinan tinanh,
14 iskꞌatanh ebꞌnaj rey yebꞌ ebꞌnaj aqꞌom kuybꞌanile ekꞌlena sat txꞌo txꞌotxꞌ tiꞌ,
ebꞌnaj watxꞌenkanh nime nha uchkꞌabꞌilxatoj,
15 maka iskꞌatanh ebꞌnaj yahaw konhobꞌ,
kaw niman oro ekꞌlena yul isqꞌabꞌ,
isnohtzen ebꞌnaj yatut yu chꞌen plata.
16 ¿Tzet yinh xin machi kinmujlaxan,
hakaꞌ nixhte unin chiꞌel yinh ismiꞌ,
hakaꞌ nixhte unin maxhtikꞌa ilni issajilqꞌinal?
17 Haꞌ bꞌay mujan ebꞌnaj kamnaxa tuꞌ,
chisbꞌej ebꞌnaj mulum iswatxꞌen istxꞌojal.
Haꞌ tuꞌ chixewpaxo ebꞌnaj matxa yip.
18 Haꞌ tuꞌ chixewpaxo ebꞌnaj presowom,
matxa xin chiyabꞌe ebꞌnaj yul isnuqꞌ ebꞌnaj yahaw munil.
19 Haꞌ bꞌey tuꞌ ay ebꞌnaj machi yelapnoj,
yebꞌ ebꞌnaj niman yelapnoj.
Haꞌ bꞌey tuꞌ bꞌejtzobꞌilxa ebꞌnaj chejabꞌ yul isqꞌabꞌ yahawil.
20 ¿Tzet yinh xin chiꞌaqꞌlax issajilqꞌinal yilaꞌ makta kaw yaꞌta chaqꞌle?
¿Tzet yinh xin itzitz makta bꞌiskꞌulal yehi?
21 Haꞌ hunteqꞌan mak tuꞌ chechma kamikal,
yajaꞌ machi apni yinh, waxanhka chissayikꞌo kamikal hakaꞌ issaylaxikꞌo hunu qꞌalomal.
22 Haꞌ istzalahilal huneꞌ mak tuꞌ chichalo yu yet chiꞌilaxto bꞌay chimuji.
23 ¿Tzet yinh xin chiꞌaqꞌlax iskawil hunu naj winaj mach yohtajo bꞌay chitohi,
hakaꞌta majchebꞌil isbꞌeh yu Komam Dios?
24 Yet maxhto chinwaꞌan, chꞌah inkꞌulan yu bꞌiskꞌulal.
Haꞌ inqꞌajxihan, kat yel yal insatan,
hakaꞌ yel yojomal ha haꞌ.
25 Yuto haꞌ tzet bꞌay kaw chinxiwan,
haꞌ mahul wibꞌanhan mayijkano isbꞌa winhan,
yinh tzetaj bꞌaytet yinh chinxiwan.
26 Mach aqꞌankꞌulalo wehan, mach chintzalapaxojan,
mach chinxewpaxoninojan, wal xin haꞌ kabꞌkꞌulal ay winhan,» xhi yaꞌ Job.