Chikachwa naj Elifaz yinh yaꞌ Job
4
Lahwi tuꞌ istaqꞌwi naj Elifaz temanita tet yaꞌ Job, yalni naj hakaꞌ tiꞌ:2 «Ta chijaqꞌlehanh kotzotelanh tawet, machmi chischah hawiꞌ,
yajaꞌ ¿aymi hunu mak tiꞌ chitecha yu tonhe chꞌok tuknoj, machi hunu tzotiꞌ chiyala?
3 Hach tiꞌ txꞌiꞌal mak hakuyu, hawaqꞌni yip makta matxa yip isqꞌabꞌ.
4 Haꞌ mak txaqꞌmohi, hatoholbꞌanheko yu hatzotiꞌ,
hawaqꞌni yip iswitxꞌiꞌ makta aykꞌayi.
5 Haxa tinanh xin chikabꞌkonkanh hakꞌul yu isyaꞌtajil xahul tawibꞌanh tiꞌ,
kat issomchapaxkanh hanabꞌal yu isyaꞌtajil tiꞌ.
6 ¿Tom mach chikawxi hakꞌul, tato chachxiw tet Komam Dios?
¿Tom maxhtaj habꞌeybꞌal kaw tohol ayko yipo hawanma?
7 Wal tinanh xin istxumabꞌ isbꞌa hakꞌul yinh tzet chiwaltiꞌan,
¿aymi hunu mak machi ismul tiꞌ chikꞌaytoj? yebꞌ xin
¿aymi bꞌay chijabꞌe istanhtzelaxilo ebꞌnaj tohol isbꞌeybꞌal? Machoj.
8 Hanintiꞌan xawilan tato haꞌ mak chiwatxꞌen ismachiswalilal yebꞌ mak chitzꞌunni istxꞌojal,
haꞌ ismachiswalilal yebꞌ istxꞌojal tuꞌ, haꞌ chischah.
9 Haꞌ hunteqꞌan tuꞌ chismaqꞌkamo Komam Dios yu xobꞌ istiꞌ,
chistanhtzenkanilo Komam yu ishowal.
10 Haꞌ ebꞌnaj txꞌoj tuꞌ waxanhka kaw ay ismay yel yaw ebꞌnaj hakaꞌ noꞌ bꞌalam,
yajaꞌ chiꞌoktukno ebꞌnaj hakaꞌ noꞌ nixhte bꞌalam chimaqꞌlaxilti yeh.
11 Haꞌ noꞌ bꞌalam kaw ichamxa, chitanhilo noꞌ yu manh chibꞌehal;
kat issajlemito nixhte yunin noꞌ miꞌe bꞌalam.
12 Ay huneꞌ tzotiꞌ tiꞌ ebꞌabꞌil wetan,
yajaꞌ xin ay hanikꞌ tiꞌ apni yinh kaw nanhkꞌulal yinh intxikinan.
13 Hayet aqꞌbꞌalil yet chitit iswayanh anma, ay tzet tiꞌ chiyil yinh iswayik,
hak tuꞌ wuhan ay huneꞌ inwayikan bꞌay kinsomtelihan;
14 yul huneꞌ niman xiwkilal winhan, inbꞌilikanhan yu, sunil inbꞌajilan bꞌilikanh.
15 Wabꞌenan yekꞌto huneꞌ jaqꞌeqꞌ yinh insatan,
yah txetno inxilan yu xiwkilal.
16 Yok linhno huneꞌ mak yinh insatan, machi xin txumchalo sat wuhan,
wabꞌenan yalni yinh ewan tzotiꞌ nanhkꞌulal hakaꞌ tiꞌ:
17 “¿Tom ekꞌbꞌalto kaw kꞌul naj winaj sata Komam Dios?
¿Tom ekꞌbꞌalto saj naj winaj sata mak watxꞌenhe naj?
18 Haꞌ Komam Dios machi kawxi iskꞌul yinh ischejabꞌ,
yilchapaxo yángel Komam yinh manhkꞌomal.
19 ¡Hajxam ebꞌnaj winaj ay yulaj nha lokꞌ ayko yichoj,
ayayto isxeꞌal xol pojoj, kaw labꞌan isxanhobꞌtanhelax hakaꞌ noꞌ ih!
20 Haxa yinh sakꞌayal xin yebꞌ yinh qꞌejbꞌiyal chiꞌetalaxtoj,
kat iskꞌaykanh yinh hunelnhe, matxa mak xin chiwatxꞌeniloj.
21 Haꞌ iskꞌulchꞌanil chitanhpaxilo yintaj,
chikamtoj matxa xin chitzujcha apno helanile yu,” xhi huneꞌ mak,» xhi naj Elifaz.