5
Istzotel naj Elifaz hunelxa:«Wal tinanh xin hach Job, tato chꞌah hawaw,
¿aymi mak chitaqꞌwi tawet?
¿Mak hunu ángelal chaqꞌ isbꞌa tawinh?
2 Yinh kaw yeli haꞌ mak ekꞌna chute isbꞌa, haꞌ ishowal iswiꞌ tuꞌ chꞌaqꞌni kamoj.
Haꞌ mak chiꞌocheniko tzet ye tuꞌ, chitanhilo yu,
yu ischiwako iskꞌul yinh yet anmahil.
3 Hanintiꞌan hankawinan wilan naj kaw ekꞌna yute isbꞌa, yanayto xeꞌ yinh istxꞌojal,
haꞌtikꞌa yinh huneꞌ hora tuꞌ xin istzꞌaktiꞌnhe bꞌay ehikꞌoj.
4 Haꞌ yuninal naj tuꞌ nahat yehilo yinh mak chikolniloj,
haꞌ bꞌey ispultahil konhobꞌ machi hunu mak chaqꞌ isbꞌa iskolnilo ebꞌnaj tet isyaꞌtajil.
5 Haxa haꞌ ebꞌnaj chinhochahi haꞌ chihatxꞌnikanh,
waxanhka xolaj teꞌ txꞌix ayko istzꞌunubꞌ naj tuꞌ.
Haxa ebꞌnaj chitaj istiꞌ xin chiꞌukꞌnayto isqꞌalomal naj.
6 Yuto haꞌ isyaꞌtajil mach chiyalnhekanh isbꞌa xol pojoj.
Hakpax tuꞌ yet chonhaqꞌlax ekꞌoyaꞌ mach chalnhepaxokanh isbꞌa sat txꞌo txꞌotxꞌ.
7 Yuxin hakaꞌ chu yah tzꞌitqꞌaꞌ yu jaqꞌeqꞌ;
hak tuꞌ naj winaj pitzkꞌana naj yu yaqꞌlen naj isyaꞌtajil.
8 Haninan hakaꞌ hach tiꞌ,
yinh kaw isyelal xam insayilojan Komam Dios,
xam intaqꞌehan inyaꞌtajilan yul isqꞌabꞌ Komam.
9 Haꞌ Komam Dios chiswatxꞌe Komam tzetaj ye tuꞌ kaw nimejkanoj,
haꞌ tzet chiswatxꞌe tuꞌ machi txumchalo ju,
haꞌ kꞌaybꞌalkꞌule chiswatxꞌe matxa chibꞌischa ju.
10 Chati Komam haꞌ nhabꞌ sat txꞌo txꞌotxꞌ,
chanayo Komam ha haꞌ xolaj telaj.
11 Haꞌ Komam chiꞌinikanh makta chiyiyo isbꞌa.
Haꞌ Komam chiꞌaniko yinh istꞌinhanil makta bꞌiskꞌulal yehi.
12 Haꞌ Komam chisomchanto isnabꞌal ebꞌnaj kanhye yinh istxꞌojal;
hak tuꞌ xin nabꞌanhe chiswatxꞌe ebꞌnaj hunteqꞌan ismunil chiswatxꞌe yu isqꞌabꞌ.
13 Haꞌ Komam chitzabꞌnayo ebꞌnaj kaw helan yinh istxꞌojal,
hak tuꞌ xin matxa chij isbꞌa tzet nabꞌil yu ebꞌnaj yu istxꞌojal.
14 Hayet tzꞌayikal chitxaqꞌmo ebꞌnaj hakaꞌto xol qꞌejholo ayko ebꞌnaj;
haxa yet chuman tzꞌayik xin toxanhe chꞌekꞌ matxmon ebꞌnaj hakaꞌto aqꞌbꞌalil ay ebꞌnaj.
15 Hak tuꞌ chu iskolnilo Komam ebꞌnaj mebꞌaꞌ tet yespada ebꞌnaj txꞌoj isnabꞌal,
kat iskolnilo Komam ebꞌnaj tet istiꞌ ebꞌnaj txꞌoj,
chiskolnipaxilo Komam ebꞌnaj yul isqꞌabꞌ ebꞌnaj kaw ay yip yinh howal.
16 Haꞌ ebꞌnaj matzet aya,
ayko Komam yipo iskꞌul ebꞌnaj, haꞌ huneꞌ tuꞌ xin chꞌaniko ismaj istiꞌ ebꞌnaj txꞌoj.
17 Kaw saqꞌal yet naj winaj chikuylax yu Komam Dios,
yuxin mach chakaja yet chaxhkachlax yu Komam,
Komam kaw aykano yip.
18 Yuto haꞌ Komam chiꞌaniko kolahwilal, yajaꞌ haꞌ chibꞌujnipaxoj,
haꞌ Komam chimaqꞌwahi,
haꞌtikꞌa isqꞌabꞌ chiꞌanhtenpaxoj.
19 Haxa yet chꞌay wajel isyaꞌtajil tawibꞌanh, haꞌ Komam chachkolni tet,
walxa yinh ishujel xin matxa chu kaxhispitni yabꞌil.a
20 Hayet ay wahil, haꞌ Komam chachkolnilo tet kamikal,
kat kach iskolnipaxo tet chꞌen espada yet ay howal.
21 Haꞌ Komam chachkolnilo tet isyaꞌil tzet chal yaqꞌ anma,
mach chachxiwkanh yet chilahul isyaꞌtajil tawibꞌanh.
22 Chach tzebꞌoj yet chihul isyaꞌtajil yebꞌ yet ay wahil,
mach chaxhxiwpaxo tet noꞌ howla noqꞌ ay xol telaj.
23 Hayet chach munlahi machi chꞌen chꞌen chꞌok etlo tawinh,
yuto tꞌinhan chawutekano habꞌa yebꞌi,
kat yokpaxo noꞌ howla noqꞌ xoltelajil yinh aqꞌankꞌulal yebꞌ hach.b
24 Chawohtanheloj tato ay aqꞌankꞌulal yul hawatut;
hayet chachto hawilno tzetaj ay hach, sunil tuꞌ kaw tzꞌajan yehi.
25 Chawilaꞌpaxoj tato kaw niman mak chipohchakanilto yinh hawuninal;
hawuninal tuꞌ lahan isbꞌisil hakaꞌ teꞌ telaj chalnhekanh isbꞌa sat txꞌo txꞌotxꞌ.
26 Ichamilxa chachkami, hakaꞌ chu iskꞌuplaxkanh ixim trigo kaw qꞌanxa yet istzꞌayikalxa yahi.
27 Haꞌ tzet xajaqꞌlehanh, haꞌ chonhkuynihanh,
yuxin chijalanh tato hak tuꞌ ye hunteqꞌan tiꞌ,
yuxin abꞌe tzet chiwaltiꞌan, kat kam istxumchalo hawu tzet yelapno yehi,» xhi naj Elifaz.